حبيتكم تقرون هالرائعه للشاعرة نور الرياض..وأتمنى أنها تحوز على رضاكم وأعجابكم..
رجوعك مايعزيني.......
انا ماجيتك اعاتب و اناشد حبك المزعوم***ولا لي حاجة عندك ابتجمل وبقضيها
ولا هانت علي نفسي أقلل قدرها واسوم***غلاها عند انسان مجنبها وناسيها
خسرتك؟هوانا اصلا كسبتك ياحبيبي يوم***وكيف اكسب هوى نفسٍ لغيري كل مافيها
نعيت بداخلي حبك وجدت في العلوم علوم***بكيت ومالقيت احدٍ مع روحي يواسيها
ومع غدرك واحزاني سماي تلبدت بغيوم***تجمع همّ هالعالم وسط عيني يغذيها
تساوت عندي الدنياو عيني ما هناها نوم***ومرت بي ليال ٍ سود تمنيت الفرج فيها
لجا لك كل احساسي وقلبٍ يشتكي مضيوم***رجعت بكفي الخالي اقلبها واناجيها
انا ماندم على حبي ولا الحق خفوقي لوم***ولا ودي تجاملني ولا نفسي تعزيها
ولكني اصور لك شعور ٍ داخلي مصدوم***وأنعي اصدق احساسي وقصتنا ابنهيها
انا مهما تقدم لي بيبقى خافقي محروم***رجوعك ما يعزيني وناري ما يطفيها
رجيتك بس تنساني يكفيني أسى وهموم***يكفي تسقي جروحي واذا نامت تصحيها
خيارك كان بيدينك وردك واضح و مفهوم***وغيري ماسكن روحك وحبي باقي فيها
فمان الله نتوادع لا ظالم ولا مظلوم***وعفا الله عن ليالينا..نست اجمل حكاويها
للشاعرة الرائعة:نور الرياض