[align=center][tabletext="width:70%;"][cell="filter:;"][align=justify]


________________


السلام عليكم ورحمة الله وبركاته ,,,

صباح اليوم , قدر الله علي بأن أراجع إدارة الأحوال المدينة لأجدد بطاقة الهوية الوطنية ,,,

طبعاً كنت عندهم من صبح الله خير , الواحد لا لحق يفطر ولايتهندز مع ذاك الصباح , المهم ,,,

أخذت رقم إنتظار وطلعت خارج المبنى أدور فطور ,,,

لقيت كفتريا وطلبت سندويتش وبارد ( أكيد مو بيبسي ـ الأكيد سن توب ) وجا واحد وقعد وطلب صحن فول وقعد يفطر ,,,

أثاريه معاه جيب لاندكروزر ومقفل على واحد بالسيارة , فجاء الأخ المقفول عليه ويسأل مين صاحب الجيب , رد عليه الأخ وهو قاعد ( يمضغ ) في الفول ويده كلها زفر وقاله أنا , قاله طب لوسمحت أبي أطلع ,,,,

الرجال أشار له بمعنى يعني كيف أسوق ويدي فيها أكل وقاعد أفطر ؟؟؟ فقال طيب تعال لو سمحت خذ مفتاح السيارة وجنبها !!!

أنا بيني وبينكم , تحركت النخوة عندي وقلت في بالي خليني آخذ مفتاح السيارة وأجنبها لأني أنا خلصت فطوري وقاعد أمزمز في العصير وأضيع الوقت ليمن مايجي دوري ,,,

بعدين , وفي ظرف ثواني قلت في بالي , طب ونا ( مالي شغل ) !!!
ليه بعدين مايجيني صاحب السيارة ويقول كان فيها مية ألف ريال طلعها لو سمحت

بيني وبينكم , سكت ,,, وقلت خلاص مشكلته وهو يخلصها ,,,

المهم , جا راعي السيارة الثانية وجنب السيارة الجيب وبعدين رجع جاب المفتاح لصاحب السيارة ,,, وهذا كله وهو قاعد يفطر ,,, إنتهينا ,,,

بس , قعدت أفكر بيني وبين نفسي , ليه جا على بالي ( مالي شغل ) ؟؟؟

ليه كان المانع سوء النية إللي ممكن يصير , يعني فكرت بسوء النية قبل حسن النية ؟؟؟

وليه إحنا كمجتمع أصبحت كلمة ( مالي شغل ) متداولة وبسيطة وبها الواحد يتنصل من مواقف سواء كانت بسيطة أو صعبة , وغالباً ماتكون إنسانية ؟؟؟

كأمثلة , ليه أقول ( مالي شغل ) ونا أشوف إثنين يتضاربون في الشارع مثلاً ؟؟؟

ليه أقول ( مالي شغل ) ونا أشوف واحد قاعد يعاكس وحدة في الشارع ويضايقها بسيارته ؟؟؟

ليه أقول ( مالي شغل ) ونا أشوف زميل ياكل في ظهر زميله بالنميمة والغيبة ؟؟؟

ليه أقول ( مالي شغل ) ونا أشوف حادث في الطريق ولا أوقف أقول سلامات أو أحاول الإسعاف ؟؟؟

كثير جداً إستخدامات وإستعمالات ( مالي شغل ) للأسف الشديد ,,, وهذي تأثير المشاكل المترتبة على بعض التدخلات إللي بتسبب التوريط لأصحابها ,,,

فا , كم ( مالي شغل ) مرت عليك في حياتك ؟؟؟

وهل إنت ندمان إنك قلتها ؟؟؟

أرجو المشاركة بالموضوع والنقاش وياحبذا لو كان بالأمثلة ,,,

وفي النهاية , ترا ( مالي شغل ) لو ما أحد شارك

يسلمكم ربي من كل موقف يصير عليكم و واحد يقول ( مالي شغل )

[/align][/cell][/tabletext][/align]