(( قوللي وأقولك وتعالو نقول مع بعض ))
ــــــــــــــــــــــــــــــ ـــــ
شوفو حبايبي
بما إني مكاوي ولد مكاوي ومتربي فحارة من أحلى الحواري القديمة في مكة ( الحجون جبل السيدة خديجة رضي الله عنها ـ فوف المقبرة ) إيه والله فوق المقبرة كانت بيوتنا ,,, المهم ,,,
ودي هنا أجيبلكم كم كلمة من إللي كانت دارجة في الإستخدام كملافظ بين أهل مكة الأصليين ( مو التقليد التايوان ) ,,, وأعتقد أنها كمان كانت تستخدم في جدة والمدينة ,,,
وياريت كل واحد عنده من المخزون الحلو هذا يتحفنا بيه ,,, للإستفادة وكمان من باب العلم بالشيئ ,,,
خدو عندكم ,,,
نبدأ من البيت
الدهليز أو السيب : مدخل البيت من تحت
المقعد : عادة يكون في الدور الأرضي عشان أبونا يقعد فيه ويريح شوية ويستقبل فيه بعض الضيوف
المركب : المطبخ !!!
بيت الما ـ بيت الراحة : الحمام
الحنفية : بركة ماء معلقة في جدار الحمام صغيرة
المغراف : إناء صغير بيد لغرف الماء
البازان : صنبور رئيسي في الحارة بين البيوت عشان الناس تمد منو ليات الموية وتعبي البراميل أو الخزانات حقتها .
البزبوز : الصنبور
الطباخة : موقد يعمل بالقاز للطبخ .
الدافور : كمان موقد للطبخ لكنه أقوى واسرع من الطباخة .
الكرويتة : حاجة زي الصندوق الخشبي كبيرة توضع عادة عند الحائط إللي فيه شباك بطول الغرفة وتكون مفروشة وعليها مساند ومخدات ويجلسوا عليها سواء الرجال أو الستات ومن تحتها تكون مفرغة عشان ممكن يستفيدوا منها في وضع أشياء تخص البيت زي الشراشف أو كراتين أشياء وهكذا
الزير : برادة المياه بمفهوم هذه الأيام .
السموار : أداة صنع الشاي
الجزة : ياعيني على الجزة ,,, صندوق حلو ومزخرف يحطون فيه أدوات الشاي والقهوة .
الجلالة : المفرشة
السحارة : تقريباً دولاب المطبخ إذا ماخاب الظن
المنور : أي فتحة في الحمام أو المطبخ تطل على الفضا
المبيت : غرفة أو إتنين في آخر دور ويكون إستخدامها أكثر شي في الصيف للنوم والمعيشة لأنها باردة شوي وماهي كتمة .
الخارجة ـ الجزء المتبقي من السطح
ــــــــــــــــــــــــــــــ
طبعاً في أشياء كثيرة فاتتني ,,, فيكم الخير والبركة لو جيبتوها ,,,
نجي في بعض المصطلحات المستخدمة بين أهل مكة ,,,
يعني زي :
بلكي أو بلكن : يمكن !!!
مايمديني : ماأقدر
إيشيكلوا : يعني إيش هذا ؟؟؟
سرتلك : يعني صرت أو أصبحت ويستخدم لوصف الحالة
أتعرقبت : يعني طحت على الأرض غصب عني
مني بعافية : يعني مريض
ماتقيته ( بتشديد التاء الأولى وضم الثانية ) : لم أجده
سرسري أو سربوت : يقصدون بها السب ولكن ليست من السباب الخارج عن الأدب ( وهذا على ذمة كاتب عكاظ الأستاذ محمد الحساني )
هرجلي : يعني قال لي
القازاخانة : محطة البنزين
المركوب أو المداس : الشبشب أكرمكم الله
الكونترا : الجزمة أو الحذاء أكرمكم الله
الكرته ( بضم الكاف وتسكين الراء ) : الفستان
مسويلي فيها : يعني متشبه بـ كذا
صبحك الله بتوب الكعبة : صباح الخير ( شفتوا صباح أحلى من كدا ؟؟؟ )
برحلي جنبك : يعني واحد يجي يجلس جنب واحد في مجلس ضيق .
النيابة : قسم الشرطة زمان
لمة : يعني جمع من الناس
دردب : يعني أرسلي أو أحذف لي الشي الفلاني
أزقلي : نفس الشي إللي فوق
أزقلني معاك : يعني وصلني في طريقك
جاك هول الليل : شبح كانو يخوفون به الصغار
تعا تعا : كانو يقولونها للغنم وسبحان الله كانت تجي على هذي النغمة وتمشي لحد ماتدخل الحظيرة .
لكاعة ـ هدارة ـ مجاغة : كلها كلمات تقال لمن يتصف بالبرودة أو التصرفات إللي تطفش , مثلاً يقول ياواد بلاشي مجاغة !!!
زي ( بفتح الزاي ) : يعني شي مثل شي
مسكت الخط : يعني مشيت في الطريق
إزا هود الليل : مثل شعبي معناه إذا هدأ الوقت من الليل
الحقيقة كلمات كثير ضايعة عليا , لكن أتمنى من كل واحد عنده معرفة بهذي اللهجة إنه مايقصر علينا بيها ,,,
ــــــــــــــــــــــــــــــ ـــ
ــــــــــــــــــــــــــــــ ـ
[/ALIGN]
