سلام .
اول شي صبحكم الله بالخير جميعا ويا هلا فيكم جميع 0
صراحة يمكن البعض يلومني عليها بس لقيت نفسي مجبور
اقولها ..
نعم صندل غير مجرى حياتي وياليتي القا ذاك الصندل كان
ابروزه بأطار من ذهب وربي يجزا صاحبته كل خير .
طبعا الكلام هذا ايام الدداسن والشماغ اللي يفوح بخاخ النشاء
مريتو وايام الترزز والكشخات يعني على بلاطة ايام ( المغازل)
الله لا يجعلنا من اهله ولا يعيدها من ايام .
القصة ومافيها اني في يوم انا والشباب توم كروز وطقتة
مشخصين في الشبح الياباني غمارتين استعمال ابو هنود
وطاقين هالمرازيم وريحة الطيب تقتل كل ذبانة تدخل السيارة
تقول كل واحد بيروح لعرس واخوكم في الله اللي هو انا مرتز قدام
بحكم اني اشيك واجمل واحد في الشلة كنت انا اللي بقط الرقم .
ومن زود الشياكة رايح اكتبة على كرت زواج ومتفنن فيه ومن زين
الخشة موقع تحت الاسم ( عدنان ) طبعا متأثر بعدنان ولينا. كنا نطارد
ذاك السوبر بان ما تقول
الا دوريات وهات يا مطارد ومن شارع لشارع ومن لفة الىلفة
والددسن طلعت ريحتها من المطارد والسعابيل تقطر
تحلف اننا اذا وقّفنا السوبر بان نبي نكتب كتابنا على طول !!
المساكين اللي في السوبر بان ملو وخافو منا طبعا اشكال
ما تشفع تغازل ولا بواسة ..
دخل السوبر بان في ذاك الشارع ودخلنا على طول وراه
وطلعت الكرت اللي فيه الرقم وكنت راز خشتي ( متفائل)
وعلى طول وقفنا جنبه ..
انفتح احد ابواب السوبر بان قلت يا شباب السنارة صادت
بتاخذ الرقم بس تراها لي ..
ما ادري الا وقذيفة من العيار الاثقل من الثقيل تمر من جنب وجهي
وتصبخ في باب السيارة
انا حسبتها صعقة والا نيزك والا صاروخ امريكي مضيع زي العادة
واطالع في الارض بعد خويي ما عشق السيارة ودخل رجوله داخل
تانكي البانزين من الخوف داس بانزين بكل رجوله اطالع واشوف ذاك
الصندل اللي عمري ما شفت بحجمه ..
طبعا الجميع ضحك وعلي وعلى اللي صار حتى انا مت من الضحك
بس ليلتها تخيلت ان اللي يطاردون اهلي !! او احد قريب لي
وش بيكون موقفي لو شفت هالمشهد ..
ارضاه على اهلي ؟؟
ارضاه على احد قريب او بعيد ؟؟
صراحة حاسبت نفسي وعرفت اني فعلا غلطان
وقتها تمنيت ان الصندل جاء في وجهي يمكن يكون عذاب لي
في الدنيا ويعفي ربي عن في الاخرة
وقتها عاهدت نفسي وعاهدت ربي ما ارقم او اضايق احد
اخواني خلاصة الكلام اذا حطيت راسك في الفراش بعد
ما تكون طفيت جميع الانوار تخيل نفسك في القبر تخيل انك
خلاص الحين مافيه شي ممكن يشفع لك او حتى يسليك في قبرك
غير عملك حاسب نفسك لو خمس دقايق ان دائن والا مديون
ويا كثر المديونين بس رحمة ربي تسبق عذابه
والله من واحد وواحد بيقول وش جاب طاري القبر يالملقوف
بس هو النهاية الحتمية لنا ..
الله يجمعني بكم في جنات النعيم
وربي يجزا صاحبة الصندل كل خير