مساء الأنوار ..
تحياتي للجميع ..
شوفو بصراحة الموضوع هو للعزوبية بس .. أو للي عندو نية تانية ;)
بس الأساس للعزوبية ..
ومدام هيا سيرة و انفتحت .. و بدأها العمدة .. و موضوعه حق
العنوسة .. و ما راعى انو المنتدى ماشاء الله تبارك الله 98% عوانس
على سنة و رمح .. هدا موضوعي .. و اللي بصراحة عاملي أزمة ..
المهم عشان الواحد يكون في Picture ==> يعني في الصورة
لازم المقدمة اللي حقولها دحين .. أنا أول حفيدة في العيلة .. يعني
أكبر البنات من جهة عيلة ماما .. لان عيلة بابا الحمد لله كلها عيال ..
المهم اللي حصل انو في السنوات القليلة اللي راحت .. حصلت انتفضاة
و الكل اتجوز .. كل بنات العيلة من دون استثناء الا ما تحت 10
سنوات .. و اللي لاحظته في حياتي مع أهلي انهم يتجوزو مرة بدي ..
مش عارفه هو بس في المدينة انهم يتجوزو بدري و لا في كل مكان !!!
المهم ..
آخر مرة رحنا فيها المدينة اللي هو في الصيف حصل الكلام دا .. خالتي
انخطبت و طبعا دا كان معجزة .. بس الحمد لله .. فما بقى أحد غير
مين في العيلة ؟؟؟؟ أنا ^-^ و أعوذ بالله من كلمة أنا ..
الواحد سار يسلم على خالتي يقلها مبروك ..
و يسلم عليا يقلي شدي حيلك هدا و أنا لسه ما دخلت
العشرين ..
المهم ..
مرة رحنا جواز ... و أكره اروح جوازات .. الا في وحده حرمة كل سنة
اشوفها .. تسلم على ماما و تسألها مين دي ..؟؟ ماما تقلها دي
بنتي إسراء .. ماشاء الله عندك بنت ؟؟ 19 سنة على دا
الحال كل مرة تسأل نفس السؤال .. بعدين قالت ليش لين دحين ما
جوزتيها ؟؟ و انتي مالك واحد شايل قفة و التاني تعبان بيها ..
الا و قعدت سلمت على بنات العيلة ,, و قعدت جمب وحده و قلتلها
بكل بلاهة .. أمونة حبيبتي ماشاء الله كانو زايد وزنك
الا البنت قلب وجهها ألوان .. قالتلي اسراء انا حامل
:-S:-S:-S:-S:-S
كيف يعني حامل ؟؟ هو انتي متى اتجوزتي ؟؟ يا امي احنا كنا نلعب
سوى في الحارة ... يالله ستي الله يتمم لك بخير ..
و البنت دي أصغر مني بخمس سنوات
فيعني ماسار في سيرة و لا حيرة في العيلة الا اسراء متى ح
تتزوج !!!!!
يا ربي عالم غريب هو انتو مالكم عااااااااااادي جدا
أمس كنت قاعده مع بابا و سألته : بابا يجوز الوحده تخلي العصمة في
ايدها ؟؟
قال ايوة يجوز .. رحت قلتله خلاص انا بخلي العصمة في يدي ..
:rolleyes::rolleyes:
طل فيا بنظرة ما عجبتني أبدا .. و كأنو يقول مش يبقى يجي أول
المهم ==>مو كأني من الصبح قاعده أقول المهم ؟؟؟
رحت مكة أجيب عمرة :p على قولة بعض الناس
الا و يدق جوالي بعد ما صليت خلف مقام ابراهيم ..
علياء : هلا سوسو كيفك ؟؟
أنا : علياء حبيبتي انا في حرم مكة كلميني بعدين ..
علياء : الله يخليكي ادعيلي اني اتزوج
أنا : اوكي
و ما اتزكر اني قلت شيء في السعي غير يا رب تسخر لعليا ابن
الحلال
في عندي سؤالين ..
و اللي خلى دا السؤال يجي في بالي حواري مع هنو ..
هنو : سوسو أبغى اتزوج
أنا : ربك كريم
هنو : ايش رايك تسوي إعلان في مجلة ؟؟
أنا : لا يا أمي عشان بكرة النهار يقلي انا بعلن عن نفسي الله لا يقدر
ان شاء الله عمري ما اتجوزت
هنو : ادعي على نفسك لو سمحتي ..
فالسؤالين هما ..
1_ هل ممكن انك تتزوج عن طريق إعلان في مجلة ؟؟؟
2_ هل ممكن إنك ترضى انك تتزوج زواج جماعي ؟؟
بس
و على قولة العمدة و كل سنة و العانسين و العانسات في انتقاص ..
غالي تحياتي