اللفظ الأليم من ما جاء في كلام أهل القصيم
السلام عليكم ورحمة الله وبركاته
هذه رسالة كانت محفوظة عندى منذ زمن بعيد وبالصدفة ليلة البارحة شاهدتها .
فحبيت أن أطلعكم عليها مع الإعتذار من أهل القصيم رغم أنه ليس فيها ما يسيء لهم والحمد لله .
إنما هى رسالة من إمرأة الى أخرى وكلهن من القصيم والرسالة عبارة عن أخبار وأحوال المرأة المرسله باللهجة القصيمية :181:
مع العلم أنني من أهل القصيم :SMIL:
والآن أترككم مع الرسالة وأتحداكم تفهمون شيء :212:
ويستثنى من هذا التحدي أهل القصيم وخاصة منهم ( الملقوف ) بالطبع هذا إن تكرم علينا بزيارة الله يذكره بالخير هالقطوووع .
السلام عليكم ورحمة الله وبركاته وبعد
رسالتس اللي كزيتي وصلتن وفرحت به ... وكثر الله خيركم على المقطع والغدفه اللي كزيتي لي,وابشرتس أن أخبارنا تسرتس.
البقرة أضنت ، والبيض فقش ، والدجاجة الرقطا راجن ،وإن إدحيم العلي أعرس ، ونوّير مخطوبة ، وعويش فطمناه ، وسويرة رفعناه من السقاط ، وصويلح شراله دنانة ، وسليم ختم المصحف ، وإعزيز الصالح طاب من الطنان ، وسند ولد مضيوي بدا يحبي ، والحمد لله طاب الجحام الي بعينه ، وأنتي صاتزه حطينا عليه تبنه ، وحصيصه طابت إقطوفه الي براسه ، ومنيره مشطناه بورده .
وأم سويلم طلعت من الماجب ، وتممنا لسويلم ، والنعال الزنوبا اللي تخبرين عندنا هاك السنة رقعناه ، ومقطع الروز خبناه ، والدوشق غيرنا قطاعتة ، و السفرة الكبيرة علقناه بالقبة ، وحطينا بيت للرادو ، والمصحف حق عمي غيرنا ثوبه ، والسراج زينا فتيلته .والزبيل مليناه حتات من إنخلتنا ، وشرينا سحارة ولقيناه مكسورة .
وبقولس إني مع هالحمولة غاديتن حوسة ، الطاية تخر ، والمثعب منشق ، والقتاله منقلعة ، و باب الروشن منكسر، والتسوله مسنيّه ، وبريتز الغرش الصغير منقشع ، والله يهديتس يأم دحيم.البزار الي كزيتيه شوي الكركم به ، والمسمنة تقل رماد مابه ليمون ، والفتيت مسري ، والكليجا تقل عظامة .
وذا بغيتوا تكزون شي: كزوا شي يبل الريق ويواجه عند الحمولة . معكم علم إن حمولتنا ناس نقادة . وخالتي شرّاهة ، وعمتنا حقنة مايجوز لها شي مثل رقاص الساعة.
وحريم عمومتنا صرت إثمنلهن ، وجذعانهم فرقا عين جدي شيبان كبري يترددون علي هالجصة قضوا على النعمة تقل دبا ، ونا ماودي أطول عليس الحتسي عسا مايخليني منتس ، ولامن جناين قلبتس ، لاخلا ولا عدم وسلميلي على نفستس ومن يعز عليتس .و أخص بالسلام مضيوي وفطوم وقوليلهم والله ماخلان أقصر عنوتي عنكم وأشوفكم إلا إني عويجزة ولاصقة علي ظهيري وضليعاتي ومارخة كتوفي ورجيلاتي بالفقس .. ومعتس علم هالارياح يعودن بين حين وحين ومع هالبراد صايلات علي يالله حسن الخاتمة والعمل الصالح وسلمي وأنتي سالمة .
طبعاً لا يجي أحدكم يقول فسر وترجم مالي شغل :277:
لكن أملكم فقط بحضور الملقوووووف
دمتم بخير
السلام عليكم ورحمة الله وبركاته،،
عمدتنا الغالي ابو فهد
من وين طلعت رسالة هذه العجوز
هداك الله فضحت بنا
..
* جفووووووووه موقع سيرلنكي هاه
لكن حلوه منك ياعسل
..
* عابده لله
بإنتظار باقي الشرح تصدقين انا من القصيم ولم اعرف بعض الكلمات
دمتم بحفظ الله
