أنا حرامية !

[الشمس]

أهلاً :)

اليوم.. اللي هو أمس طلعت للمملكة .. وبعد ماخانتني الآنسة " kittiwake" وماجت معي.. أو ردت عزيمتي ولا لبت دعوتي، وطنشتني وراحت مع أمها لمجمع العجلان |198|.. اضطريت إني أكمل مشواري لحالي بالرغم إن الصحة لكم عليها شوي، لكن للحاجة أحكام |322|

طبعاً من معرض لمعرض.. أول ماأدخل واحد فيهم أطالع فيه وأنا عند الباب إذا هو مرتب ومافيه زحمة دخلت، وإذا هو حوسة وكبير مايخلص مثل "دبنهامز" أدخله وأدوووووووووور كذا بسرعة وأطلع من دون ما ألمس ولا قطعة.. أهم شي أرضي ضميري و أقول إني دخلته :p

في لحظة قبل أذان العشاء بشوي كنت جووووووعاااااااااااااااانة وتعباااااااااااااااانة لكن أنتظره يأذن عشان أطلع لمملكة المرأة فوق وأروح أتقهوى |321|.. وفي هذه الأثناء دخلت معرض "زارا" كان بااااااااااايخ، ومو من كثر بضاعته |309|.. لفت انتباهي توب قطن أبيض بـ 35 ريال فقط مسكته بيدي اللي كنت شايلة فيها الكيس اللي معاي.. كنت أكلم نفسي وأقول لها: من خبرته وهو فاضي.. مدري متى يتعبى.. الظاهر أحسن فرع هو اللي موجود بالفيصلية.. خل أطلع بس ذا ماعنده إلا الدجة |282|..
طلعت مع الباب وعيونكم ماتشوف إلا النور .. أسمع صوت جرس إنذار حق السراقين والحرامية.. والسكيورتي يقول: اكسكيوزمي ميم.. ويمد يده يبي ياخذ التوب اللي معاي ..

وأنا ===> |261|

أخذه مني وراح يعطيه اللي على الكاشير.. وأنا أناديه أقول له: والله آي كنت ناوينق احاسبنق بس فورقتنق |515|

رجع لي وقال: اتس اوكي قو آند بي |273|..

رجعت أحاسب.. واللي على الكاشير كان سوري الجنسية، طالع في القطعة وسعرها بعدين طالع فيني وصار وجهه صار==> |272|
وهذا اللي خلاني أشك و بغيت أقول له مدري من اللي سرق أنا والا انت :p |165|

وقفت قدامه وقلت له: طلعت من دون ما أنتبه لها.. سرحت |121| !

قام يصرف وقال: بتصير.. أحياناً بتكون الزبونة دافعة لكن عم ننسى نشيل البلاستيكة من الإطعة |321|..

قلت في نفسي.. يا ابن الحلال ماتترقع.. والله فشيلة |272|



....

تحسبوني تبت، ولا تأدبت.. رجعت عدت الجريمة في نكست |314| لكن لحقت نفسي في آخر لحظة |322|
شكل الإجرام يجري في دمي ...

...

أذن العشاء وطلعت فوق أكلت لي سينمون مع موكا تحبه قلوبكم.. وبعد كذا أكملت مشوار التسوق.. حالفة ما أطلع ومعي ريال :p .... هذا مرض الشراء اللي قالت لكم عنه الآنسة كتي ويك ..


أي خدمة |321| ؟

[kittiwake]

خاينة وحرامية اجتمعوا :p

أحلى صداقة هذي تصير :D

أنا خاينة هاه؟ طااااااااايب |326|

[kittiwake]

تضاف لك الخيانة أيضاً

توني استوعبت أنك أكلت سينمون عني :MAD2:

[رغــد]

..

ماتترقع والله فشيلة ..!!
..

الشمس ..
مو الله يهديكِ لو انتظرتي لين تشفي كليا بعدين تسوقتي ..
مو كان أفضل ..؟
.. والمعرض بايخ وبتسرقين الثوب الأبيض ..
يعني عشان بايخ .. تظني انهم ماينتبهون للي يسرقون ..:D
لا ياعمري .. ترى اكثر الناس الحريصين هم البايخين ..|314|

..

بس من جد ..
كان نفسي اكون معاك وانت تاكلين سينمون ..
هذا احلى مافي القصه :D

..

تحياتي لك
رغــد

[رحاب]

لاحول ولاقوة الا بالله|326|

البنت شكلها مررررة تعبانة ياولدان:MAD2:

شموسة قوليلي على اسم الدواء اللي بتستخدميه يكون يمكن من أعراضه انه تاخذي شئ من السوق بدون ماتدفعي الحساب:$

يعني عشان الوحدة تاخذ إحتياطها وماتستخدمه وتخرج السوق:005:

كتي ماوصيكِ عليها شموسة ماتنترك هاليومين لوحدها;)

[الشمس]

كتي ويك يا أحلى صديقة |321|..
خاينة .. كتي ويك خاينة..
شفيك منتِ قادرة تنطقينها صح؟ ميب صعبة :p
بعدين كراتين السينمون اللي رايحة وجاية على بيتكم علمتني كيف أخون ::[
خلي العجلان ينفعك|315|


....


أهلا رغود ..

مش ثوب يا قلبي انتِ، محل كل شي بريالين ماباع ثوب بـ 35.. تبين زاااااااااااااارااااااااا تبيع ثوب بهالسعر!
هذا يا بنتي قطعة بيضاء مااااااصلة مشخلعة، تعلقينها على رقبتك إذا تبين تلبسينها :p... أكيد عرفتِ وش أقصد |321|..

لكن على قولك .. على الأقل لو بغيت أسرق خل أسرق شي عليه القيمة .. عشان أستاهل وصمة العار هذي |315|

إيه والله ليتك كنتِ معي.. على الأقل يصير معي أحد يشاركني اللقمة، ويصير بيني وبينك عيش وملح.. هذيك اللحظة بغيت أدق على أخوي أقول له تعال بس نتقهوى.. لكن ماردني إلا إني في مملكة المرأة مايدخلون رجال |315|

تسلمين لنا رغووووود :)

.........


أهلا يا صدى ':
سامعين يا ولدان... البنتان لأ مالهم شغل |314|

أنا أستخدم يا صدى أربعة أدوية .. وش تبين أقول لك عن أي واحد فيهم.. آمري انتِ بس |321|


تسلمين لنا صدى ':

[الأصيـــــــــل]

تحية بعطر اللافنـــــدر للجميع

.

.

.


احم احم ..

اللهم لا شماته ...

لو كنت مكان السوري كان دفعتلك حسابها والله

عادي قولي ما عندك 35 ريال ..|314|

وبعدين مالقيتي اللا الشخلعة وتسرقية ..

ياللعار


كفارة يا ريس:D



تحياتي،،،،،،

[سبريزاتورا]

أهلين أختي

أنا وأعوذ بالله من أنا مطفوق|322|

وأحب الخدمات المجانيه|324|

وكأني سمعت أحد يقول : أي خدمه:p

ممكن تسرقين سينمون |321|

وأختي كيتي ويك تسرق الموكا|298|

بعد ما تشاهد خبراتك طبعا وتستفيد منها::[

وانا مستعد أخفي معالم السطو:D

[المستشار]

.
.

مساء الورد ..
تدرين يالشمس .. اشوف اللي صار مره بسيط ..
خاصك وانك كنتي مسرحه وقتها كثير ..

انا احياناً آخذ شيء .. واحاسب ..
وانسى اللي شريته واجيك طالع <= قمة الدلاخه صح :D


تحياتي .. وما تشوفين شر ':

[الوجه الآخر]

|314|


|314|


|314|


شموووسه حالتك صعبه مرررره الله يعينك...

لا تخرجي تاني مره لوحدك...

بس عادي شموسه تحصل في أحسن العائلات والبنات


فكرتيني لمن ادفع وامشي سايبه كل الي اشتريته وانسى فين سيبته...


تحياتي القلبيه شموسه

[BackShadow]

اذكر فيه وحدة ابوها " مليونير " ورغم كذا تقول انها ما ترتاح الا اذا مارست هوايتها بالسرقة من المحلات ... ويا كثر ما توقع في مواقف بااايخة |322|


عموماً انا ودي انك تعترفي يا المعزبة :D


ادفع نص عمري واشوف شكلك وانتي قدام الكاشيير وهو يطلع لك اعذار |314|



مع تحياتي

[الوجيه]

ليش الحركات هذي

ما هو عيب عليك طول وعرض وتسوي كذا

المفروض انك ما قلتي لنا

بمعنى آخر

ما قدرتي تشوفي شي اغلى:005:|322|':

[جف البحر]

السلام عليكم

هاااااااااااااااااع


:D :D :D :D :D

اللهم لا شماته

يا ام الموقف اللي ماله داعي..

والله لو انا اقول كنت ناوي اجرب نظام السيكيورتي عندكم

.....

أصيل .. تخبر يوم صار الموقف لي وامي معي في مارك اند سبينسر .. وش سويت في الرجال

ولا الموقف الثاني اللي في سيتي بلازا ... وشا صار في السيكيورتي ..

والله اختي الشمس لو فيه احد معاكي (مذكّر) يعني اخوكي ابوكي .. كان ماحسيتي باحراج نهائيا :D



مع حوووووووووووووبي،،

[أحمد النجار]

أنا احتاج لخدمة بسيطة منك( أنت قلتي أي خدمة)

بخصوص السينمون والموكا أية واحد فيهم اللي يتلبس قبل الثاني لأنني اشتريت اثنين سينمون واحد ابيض مخطط بأزرق ومقلم بفوشي من تحت وفيه شرايط خُضر من تحت وخطين حمرا من الوسط ...والثاني فيراني (يع ) على أصفر فاقع مع تقليمه بمبي (ياي ي ي ي ي ي خطيرررررررررر ) وفيه شرايط بنية غامقة من تحت وخطين موف من الوسط
والموكا كمانا (أيوه) يأخد العقل ابيض فيه بقعتين سودا يقولولي وسخ (ناس ماتفهم صحيح) وكمان فيه في الوسط وردتين خربزي كبيره ولماعه والأكمام حيرانه وقماشها كروشيه(خطيررررررررررر) مع جزمة وحدة خضرا كعب عالي والتانيه شبشب اصفر فاقع ينور من ورا على شنطة كبتشينو ياي ياي ياي ..حيغمى على ) وعباية محزقة ومغبرة (تخلى الشباب مو يمشوا ورايا لا يمشوا يكلموا نفسهم ورا بعض) على مكياج نهاري فاقع وشعرتين نازلة على عيني (هي اللي عندي بس) وبختين عطر أبو طير (تفتكره يا أبو فهد) مع إن عندى كلونيا ثلث خمسات بس وحده من البنات شربتها........ومشية مكسحة دلعية كدا وابتسامة منوره بسنين الذهب اللي مركبتهم (وهما اللي موجودين حالياً بعد المضاربة الأخيرة في الحارة)...............
أختكم الغالية
البومة

أختي العزيزة الغالية جداً الشمس تحية تأخذ من شعاع الشمس بريقها وتخفت إذا ما بلغت بريقك وسناك ........
كم أنت رائعة جادة وساخرة

كم أنت متمكنة وفي كلتا الحالتين

تضحكين إذا أردتي وتبكين إذا أحببتي وصفك دقيق رائع مذهل ممتع

دمتي رائعة مبدعة
ودام قلمك المذهل النادر
ودمتي أختي العزيزة الغالية

(اللي فوق بس مشاركة علىنفس المنوال ..أرجو ألا تغضبك)

أخوك
أحمد النجار
(على فكرة قد تكونين حرامية ..ولكن لقلوب كل من يعرفك)|44| |44| |44| |49| |49| |49| |48| |48| |48|

[My-Spirit]

أجل ايش رايك في اللي تاخذ الحاجة وتخليها في كيس بأيدها وتمشي|326|
وتكتشف الموضوع في البيت |321|

<=== ابداً مش أنا :$

[ابوفهد]

لاحول ولاقوة الا بالله

ايه يابنت الناس عالفشيله بس

الناس تسرق ماخف حمله وغلا ثمنه

مو تسرق قميص بــ 35 ريال :-@

فشلتينا الله يهديك

اش يقولون على بنات الرياض هالحين ؟:005:

تحياتي

[الشمس]

هيّووووول ':
شفت عاد.. طلع السوري مو جنتل، يعني ماطلع مثلك لو انك بمكانة :p
وبعدين ماأعجبني إلا هذا طيب .. شسوي |315| والله بعد |315|
وتعال قول لي .. وش يعني : "كفارة ياريس :D" |326|

وياهلا فيك ':

.........


أهلا يا سبريزاتورا ':
مشكلة عاد السنمون والموكا |322|.. لازم طريقة تخلينا ندخل من ورا الكاونتر .. ندق صحبة مع وحدة من الجرسونات.. شرايك |321|..

فكر فيها وعلمني :p

.........


المستشار ':
إيه والله قمة الدلاخة :p
فيه أحد يدفع ويرمي فلوسة في الشارع |326|..

والشر مايجيك ':

.........


الوجه الآخر ':
انتِ بعد مثل المستشار.. وصلتوا لقمة الدلاخة :p..
يابنتِ هذي بفلووووووووس |314|

وتعالوا في الرياض عشان نطلع السوق سوى |321|
ترى غرفتي وااااااااااسعة أقدر أستضيفك فيها |298|


.........


أنكل ':

هذي أكيد أنا |321| <== هذا الاعتراف اللي تقصده؟ .. عادي سهلة :p
أما شكلي هذاك الوقت |315|.. للأسف اهتز برستيجي :p

ياهلا فيك ..

.......



الطاووس ':

ِشسوي .. ماأحب الكذب :p

ليه أكذب.. بإمكاني أروح أسرق شي أغلى وأجي أقول لكم السالفة :p.. دام الدعوة كلها يسحب مني القطعة ويوديها لواحد يتعذر عني.. حتى هذي سهلة |321|

وياهلا ':

........


راجعين |298|

[الشمس]

جف البحر ':

تدري وش المشكلة؟
كان ودي أكتسب من أخواني الأولاد صفة وحدة بس... إللي هي موهبة التصريف.. الظاهر فيه خلايا خاصة في أمخاخ الرجال خاصة بالتصريف فقط لا غير :p.. يعني مستحيل تطلع معي التصريفة اللي قلت عليها |315|

ولو معي أخوي ولا أبوي .. كان انحاشوا وتبروا مني |314|
فيه أحد يتشرف بحرامية |315|

ياهلا جف ..


.......


الروح ':

ياهلا نور الموضوع |321|
هذي يا حبيبتي إنسانة محظوظة |314|.. بخخخخخخ .. من جد فلّـــــــــة :p
وسعي صدرك أهم شي افتكيتِ من الفشيلة والجرس اللي فزع الدنيا |322|

وياهلا ..

.......

معوّدين <== بالنجدي :p

[الشمس]

العمدة ':

يا عمي هذي مشكلة الحرامي بالفطرة .. تصير يده تمتد للي قدامه من دون مايفكر |314|..

شسوي .. كل المحل كان خايس.. ما أعجبني غير هذا |315|..

بيقولون عن بنات الرياض أنهم أحلى بنات في العـــــــــــــالم.. يكفي إني منهم :p .. اسم الله علي الرحمن الرحيم |321|

ياهلا ياعمدة ':

[الشمس]

ابن النجار :o..
من جد آسفة .. سقط سهواً ':

راكب لك الدور على فكرة |321| ...
وكمان ينطبق على فئة..
وأنا أمشي بين المعارض.. قابلت واحد هو وزوجته كان يأشر على مجموعة بنات مراهقات لابسين العباية شكل فقط.. حتى ماغطوا لا شعر ولا وجه وووو أنواع الزينة والتسريحات.. عموماً أشر عليهم وقال: طالعي.. شوفي بنات المستقبل !

أنا ضحكت... وقلت الله لا يبلانا ومشيت ':..

لكن الخير لا يزال موجود يا أحمد ':..

وشكراً أولاً وأخيراً على الإطراء :SMIL: