المساعد الشخصي الرقمي

مشاهدة النسخة كاملة : ][ لا تدعـــس ... هنـــــــا ][



الأصيـــــــــل
22-07-2003, 02:07 PM
تحية بعطر اللافنـــدر للجميع

.

.

.



طبعاً أنا عارف إني طلّعت عيونكم بالمواقف اللي بمر بيها

بس عادي ... انا كريم وانتوا تستاهلوا :cool:

الحقيقة الموقف دا مر عليّة من فترة .. بس إلحاح الحبايب اللي

سمعوا القصة في إني أنزّلها في المنتدى خلاني أكتبها .. عشان

اللي ما عرف يعرف .. واللي يعرف يبلغ عني ايش حكاية ( لا تدعس هنـــا !!)





في مرة من المراريت كنت راجع من الشرقية على جدة ..

طبعاً الطائرة كانت أكبر نوع من أنواع الطائرات .. ومن حظي الحلو ..

كان مقعدي بجانب الشباك .. طبعاً أنا أعشق المقاعد اللي بجانب الشباك خصوصاً لو كانت الرحلة في الصباح والشمس في بنكرياس السماء |493|

المناظر غير طبيعية عن جد .. بس جلستي المرّة هذي مميزة أكثر

قولولي ليش .!! أنا أقلّكم .. لأني مو بس جنب الشباك .. لا كمان فوق الجناح بالضبط.

الجناح طويييييييل وعملاق عن جد .. وللي ما يعرف عن تركيب جناح الطائرات

حابب أعرّفة إن الجناح يحتوي على وقود الطائرات ... يعني أنا قاعد على قنابل

غير كده في في الطائرات الكبيرة زي اللي أنا راكبها .. ثلاث قطع فلات FLATS

اللي تستخدم كمصدّات هوائية عند هبوط الطائرة .. ومكانها فوق جناح الطائرة ..

المصدّات هذي مكتوب عليها بالأحمر وخلفية بيضاء ( لا تدعس هنا ) وتحتها الترجمة

بالإنجليزي (DON'T STEP HERE) .. طبعاً كل اللي جلس عند الجناح يعرف الموضوع دا

المهم يا سيداتي وسادتي أخذت نظرة سريعة على القطع الثلاث وعلى شكل الجناح وعلى السيارات اللي بتحمل العفش..

وصرفت نظري بعدين للشاشات اللي قدامنا عشان نشوف تعليمات السلامة ..

أضيئت إشارة ربط أحزمة المقاعد ربطنا الأحزمة .. وبدأت الطيارة تتحرك لمدرج الإقلاع .. قعدنا نردد دعاء السفر ..

وبعدها حطيت لبانة (علكة) ففمي وغمضت عيوني وبدأت الطائرة في التسارع و .....

أقلعت بحمد الله .

طبعاً أخوكم في الله من النوع اللي يدوخ في الإقلاع والهبوط .. |141|

ففضلت مغمض عيوني لحد ما سمعت الصافرة اللي تبين إننا فأمان - بعد أمر الله طبعاً – ونقدر نفتح أحزمة المقاعد .. تنفّست الصعداء .. وعدلت جلستي وفتحت عيني ..

وبدأت آخذ جولة بعيوني على الناس اللي حولي .. طبعاً الله رزقني بشايب عمرة 400 سنة من قبل لا نقلع وهو نايم .. |347|

المهم ناظرت من الشباك أبي أشوف المناظر وأشوف الأرض حولينا .. وكيف كل شي صغييييييييييير ..

قعدت يمكن ربع ساعة وأنا أطالع بالأرض والطيار كل شوي يرتفع لحد ما صار كل اللي تشوفه سحاب ..

وسبحانك ربي على تكوينا السحاب .. عن جد ودّك تفك الشباك وتاخذ منّه وصله – على بالي حلاوة قطن – عن جد إبداع إلهي رائع ..

المهم في خلال جولتي التفقدية بعيني رجعت أناظر للجناح وشفت الفلات اللي مكتوب عليها لا تدعس هنا .. كانت القطعتين ترقد بسلام على جناح الطائرة ..

رجعت بنظري داخل الطائرة وللمقعد اللي أمامي تقريباً وبدأت أبحث عن شيء أقرأه و ......

قطعتين بس ..؟؟؟؟؟؟؟؟؟؟؟؟؟؟؟؟؟؟؟؟؟؟؟ ::]

رجعت للجناح ... لقيت ( لا تدعس هنا ) بقدرة قادر من 3 قطع اتقلّصت لقطعتين ...؟؟؟؟ |343|

طبعاً أي واحد فمكاني كان حيحصلّه نوع من الشلل الدماغي الدائم مع سحابة من الهبل والتخلف

المغولي التي قد تؤدي للوفاة |344|


أما أنا فكان هبل مؤقت مع قليل من الجنون الوقتي |210|


قد شفتوا منظر واحد مصدوم ومرعوب وكل وجهه صار عيون وفمّة وصل الأرضية وراح منّه الكلام

وفوق راسة 66 علامة تعجب و500 علامة استفهام وشاعر بنوع من الهبل .. |507|

قعدت أبحلق فمكان ( لا تدعس هنا ) اللي طارت مالا يقل عن 10 دقائق كاملة .. وأنا بحاول أقنع

نفسي أني شايف غلط أو مع الدوخة شايفها اثنين وهيه ثلاثة |520|

عدّلت جلستي .. جاتني حالة من الضحك الهستيري |529|

درت وجهي داخل الطائرة وعبر بعيني صف المقاعد الموازي لمقعدي وشفت مين اللي جالس في مثل

مكاني من الناحية الثانية .. لقيتها وحدة ..

طبعا استصعبت اني اروح أسئلها عن ( لا تدعس هنا )

شفت اللي وراها لقيتها وحدة وواحد .. شكلهم دوبهم متزوجين ..|55|

لأن الناس في الناس والعصفورين دول بيهمسوا لبعض ومبسوطين على الآخر .. |53|

مساكين مش عارفين إن في وحده من ( لا تدعس هنا ) طارت |422|

كان نفسي أروح أنصحهم يوصّوا بعض .. المهم قدام المقعد الموازي لي ... في واحد

أسود البشرة ملتحي ولابس طاقية الألوان اللي خلقها ربي كلها فيها .. |439|

قلت هذا هو .. نقزت من مقعدي عدّيت الشايب اللي جنبي اللي شكلوا ميت مو نايم .. ولفيت حوالين الكراسي متجه للأخ الأسود .. مروراً بالعصافير .. |295|

بصراحة ما قدرت أمسك نفسي .. وقفت قدّامهم ونظرتلهم بنظرة حزن مع تنهيدة طويلة .. |591|

ثم اتجت للأخ المطلوب ..


أنا : السلام عليكم

الأخ : أليكم سلام ( بنظرة غريبة وابتسامة عريضة) |452|

( الغريب ان الأستاذ مسوي فيها مايكل جاكسون بالنظارة السودة اللي لابسها )

أنا : ممكن استأذنك شوية وأطل من الشباك اللي عندك

( زادت ابتسامة الأخ )

الأخ : نومة .. تنومة

أنا : كيف!!! |417|

الأخ : دولما تدولما ...

يادين أم الحظ ::[

نط واحد جنبه شبهه بالتمام وقالي

الأخ 2 : ماذا تريد يا سيد ..؟؟

أنا : ماذا أريد |326| .. الأخوان من وين ...؟؟

الأخ 2 : نحن من نيجيريا وفي طريقنا للعمرة .. وأنت ..؟؟

أنا : أنا من موزنبيق .. وفي طريقي ان شاء الله للجنّة .. |343| ممكن لو تكرمت تقول زميلك يوخّر شوي عشان أطالع من شباكه ..

الأخ 2 : لم أفهم .. ماذا تعني ..؟؟

أنا : لم تفهم .. أها .. هل تستطيع يا أخي أن تستأذن زميلك في أن يتنحّى عن مقعده قليلاً .. حتى أسترق النظر من خلال نافذته !!!! |284|

الأخ 2 : ولماذا ...؟؟

أنا : لا شيء البتّة .. ولكنها عملية فحص روتينية نقوم بها عادة حين تطير ( لا تدعس هنا ) |254|

الأخ 2 : ماذا تعني !!

أنا طبعاً فها الموقف وأعصابي مشدودة وحالتي رعب وهستيرية وطحت فواحد خارج من المعجم الوسيط .. نقزت ناحية مايكل جاكسون في وسط امتعاض من الجالية النيجيرية و .... وكانت المفاجأة

هناك 3 ( لا تدعس هنا ) وليست اثنان ....؟؟؟؟؟؟؟؟؟؟؟؟ |198|

خرجت من كومة المقاعد النيجيرية ... وأنا مبتسم ابتسامة بلهاء تماماً |511|

ودّي أبكي وقتها والله .. عن جد .. ودّي أبكي |504|

رجعت لمقعدي ... وربطت الحزام وغصت فمقعدي


واصباعي لا شعورياً اتجه فوراً لزر استدعاء ملاحي الكبينة .. بعد دقائق جاني واحد منّهم ... ولد بخاري أمّور ..


المضيف : أأمر

أنا بكل براءة : ( لا تدعس هنا ) طارت |293|

مين فيكم شاف جريندايزر ..؟؟ في شخصية اسمها دامبي فجرندايزر .. في حلقة من الحلقات دايسكي يكلم دامبي كلام مايفهم فوجه دامبي يتغير .. تصير عين مرة صغيرة والهين التانية بكبر وجهه .. هذا بالضبط كان وجه المضيف .. اللي افتكر اني مجنون تماماً |261|

المضيف : عفواً .. ما فهمت ..؟؟

أنا بغضب : ايش حكاية الطيارة اليوم كلكم منتوا فاهمين .. |285| كلامي عربي ترى ( لا تدعس هنا ) طارت

المضيف بوجه اعبط من الأول : ايش لا تدعس هنا يا استاذ |309|

أنا : يا أخي مو العادة في الجناح 3 ( لا تدعس هنا ) ، الحين في 2 بس !! فهمت ولا أعيد ... :-@

فلمح البصر كان المضيف بجانب الشباك وأخذ نظرة على الجناح ..

أعتقد إني مش من الغباء اللي ما يقدر يعرف ان المضيف المسكين بغي يوقع من طولة .. |343|

بس كرجل محترف ومعلّق 3 شرايط فوق كتفه حاول انه يهدّيني .. لأني أولاً فضيحة وصوتي عالي وثانياً لأني ممكن أرعبله الطيارة كلها

المضيف : لا تخاف يا أخ .. انته ايش اسمك ..

مدري ليه حسيت إني فجأة دخلت حضانة أطفال وصرت طفل خايف من المدرسة واللي حوليّه بيهدّوني |77|

أنا : أيش حتجبلي حلاوة ولا حتلعبي في المراجيح .. أقلك ( لا تدعس هنا ) طارت تقولي ايش اسمك ..؟؟ |158|

المضيف يبغى يبكي شوية |536| : يا أخي صدّقني الموضوع مش بالخطورة اللي انته متصورها .. عادي يعني .. القطعة هادي مش مهمّة !!

أعتقد ان الجملة هادي كانت غلطت عمره .. لا ووقع مع مين .. مع هائل .. أعبط خلق الله

أنا : لااااااااااااااا يا شيييييييييييخ ..|199|

أسألك بالله .. |457|

مش مهمّة .. |393|

أخترعوها ليه إذا ماهي مهمّة .. حاطينها ليه إذا ماهي مهمّة .. منظر .. زينة ... قطع حديد زايدة وقالوا يسووها ديكور .. ( لا تدعس هنا ) تطير وتقولي عادي !!!!!!! يااااااااااااااااا حلاوة !! :confused:

أعتقد انو صوتي بدأ يعلى لأني فجأة أكتشفت ان العالم كلها اللي قدامي واللي حواليني بطالعوا فيه وفي الشباك ... الحمد لله سويتلهم أزمة في الطيارة

بعد دقائق أضيئت اشارة ربط أحزمة المقاعد .. والعالم رجعت لمقاعدها .. واللي يبكي .. واللي يسبح واللي يستغفر .. والشبة اللي جنبي فتّح عينه وطالع فيه بغضب وقالي

الشيبة : الواحد ما يعرف ينام منّكم يا شباب اليوم .. ايش القرف دا .. اللهم طولك ياروح

طالعت فيه بنظرة غضب أكبر كان ودّي أغتاله |374| وقلت

أنا : يطولها أكتر من كده ايش تبغى تسوي بيها .. نام .. يمكن آخر مرة تنام فيها نام

طبعاً كانت أول رحلة في الخطوط السعودية كاملة من الشرقية لجدّة ما يوزعوا فيها أكل ولا عصيرات فضل الله ثم بفضلي .. لأني قلبت الطيارة فوق تحت .. |375|

وكل المضيفين سابوا الطيارة والناس وواقفين يهدّوني .. والعالم تزعق ولمبات تنور وتطفي وجهاز النداء للمضيفين تسمع صفاراته في الطيارة كلها .. والحالة حراج .. |429|

وأنا راسي وألف جزمة إن ( لا تدعس هنا ) حتسبب كارثة .. كنت عن جد خايف وحالتي بالبلى ودامبي يقولي عادي ..

بدأ الأمور تتشربك بزيادة والطيار بدأ في الهبوط .. بعد معركة طويلة سلّمت بالأمر ,, وفوضت أمري إلى الله .. وقعدت على الكرسي حقي وربطت الحزام وأنا أعصابي مشدودة للآخر ومعرّق وحالتي حالة .. وعيني معلّقه على ( لا تدعس هنا ) ..

مرّت علي شريط حياتي بالكامل وأنا أراقب الطيارة وهيّه تهبط أكثر وأكثر

اقترب الطيار من مدرج الهبوط .. وأنا دقّات قلبي تتزايد ..

أول مرة في حياتي يجي وقت الهبوط وأنا مفتّح عيني .. وأنا أطالع في الجناح في مكان ( لا تدعس هنا ) المفقودة ..

وبدأنا نقترب ..

ونقترب ..

ونقترب ...

ودقات قلبي

تتزايد وتتزايد وتتزايد

وعندما لامست كفرات الطائرة مدرج الهبوط

كانت المفاجأة التي لم أتوقها ...........
.
.
.
.
.
.
.
.


لم يحدث شيء ..|517|

هبطت الطائرة بسلام وسلاسة

وراتفعت خمسة من ( لا تدعس هنا ) لتصد الهواء .. ثم عادت إلى أماكنها ..

حتى توقفت الطائرة تماماً ..

وأنا مسبهل تمام الاسبهلال .. |530| |534|

حسيت نفسي أهبل بقوووووووووووووووووووووووة |544|

طبعاً أول ما فتحوا باب الطيارة جري على برا

وخرجت ولا استلمت عفش ولا شي ..

لقيت زميلي برا أعطيته كعوب استيكرات العفش وقلتله يروح يستلمه

بحجة اني مرة تعبان

وأنا طبعاً .. أبغى أهرب من أكثر من 250 شخص بما فيهم طاقم الطائرة

اللي رعبت أهاليهم طول الرحلة ..




وتوتة توتة |499|


خالص تحياتي،،،،،،،

رحاب
22-07-2003, 02:22 PM
:D:D:D:D:D:D

وربي ضحكت ضحك في حياتي كلها ماضحكت مثله

يالهوي هذا كله يطلع منك |326|

|312| |312|

الحمدالله اني كل ماركبت الطيارة غمضت عيني ومافتحتها غير وقت الهبوط

والا كنت سويت اطين من الي عملته

وبعدين تحمد ربك انه ابتلاك برجال شيبة|325|

وإلا كنت مضحكة الطيارة لو كان الاخ شاب.

ماأقول غير ربي يبسطك ويبعدك عن ادعس مرة ثانية:D

BackShadow
22-07-2003, 04:26 PM
يسعدلي اوقاتكم جميعاً


الله يرجك يا هايل ... بجد منت صاحي |314|
يا انا فطست ضحك على النيجيري
بجد انت تحفة :D

اثاريك المرتفعات تتعبك
وان اقول بس المنخفضات بس هي اللي تتعبك |321|
انتظرني .. كلها كم يوم وانزل موضوع " انا والاصيل ودجاجة البحر " :005:



مع تحياتي

البندري...
22-07-2003, 04:44 PM
:D

جف البحر
22-07-2003, 05:05 PM
السلام عليكم

تعرف يا هايل لو انا معاك في الطياره وتقلي لا تدعس هنا طارت وعملتلي القلق دا كان شبكت محلها في الجناح :cool:
يعني الامور دي المفروض انك حتى لو انصرعت تحلها ودي
بس مو تسمع امة لا اله الا الله كلها
وبعدين النيجيري ياخي المفروض انك تتصرف بعقل معاه
كيس دوم وبريالين حبحبوه وينتهي الفلم معاه

بس فعلا حمدلله على السلامه
انته احسن شي لك رحلات ينبع جده ابو 45 دقيقه وبس
ابو كتير دا بطل منه
او دق امها جري ولا احد يقلك ادعس ولا تدعس

يالله حوووبي يسلمو


مع حووووووووووووووووبي،،

Sami96SA
23-07-2003, 08:36 AM
صباح الخير

الآتي بحد ذاته مسرحيه تفققع الخاصره من الضحك :




أنا : ممكن استأذنك شوية وأطل من الشباك اللي عندك

( زادت ابتسامة الأخ )

الأخ : نومة .. تنومة

أنا : كيف!!!

الأخ : دولما تدولما ...

يادين أم الحظ

نط واحد جنبه شبهه بالتمام وقالي

الأخ 2 : ماذا تريد يا سيد ..؟؟

أنا : ماذا أريد .. الأخوان من وين ...؟؟

الأخ 2 : نحن من نيجيريا وفي طريقنا للعمرة .. وأنت ..؟؟

أنا : أنا من موزنبيق .. وفي طريقي ان شاء الله للجنّة .. ممكن لو تكرمت تقول زميلك يوخّر شوي عشان أطالع من شباكه ..

الأخ 2 : لم أفهم .. ماذا تعني ..؟؟

أنا : لم تفهم .. أها .. هل تستطيع يا أخي أن تستأذن زميلك في أن يتنحّى عن مقعده قليلاً .. حتى أسترق النظر من خلال نافذته !!!!

الأخ 2 : ولماذا ...؟؟

أنا : لا شيء البتّة .. ولكنها عملية فحص روتينية نقوم بها عادة حين تطير ( لا تدعس هنا )

الأخ 2 : ماذا تعني !!

أنا طبعاً فها الموقف وأعصابي مشدودة وحالتي رعب وهستيرية وطحت فواحد خارج من المعجم الوسيط .. نقزت ناحية مايكل جاكسون في وسط امتعاض من الجالية النيجيرية و .... وكانت المفاجأة

هناك 3 ( لا تدعس هنا ) وليست اثنان ....؟؟؟؟؟؟؟؟؟؟؟؟

خرجت من كومة المقاعد النيجيرية ... وأنا مبتسم ابتسامة بلهاء تماماً


الله يسعدك يا رب.


-------------

سامي

الأمــل
23-07-2003, 09:40 AM
أتاريك حكاية ... يا أصيل:D

طلعو خمسة ::].... مو بس 3 ناقصين واحد ...

أشوا ولا كنت رح ادوّر على ثلاثة...|326|

بصراحة اشفقت على المضيف..

بس الشايب الي جنبك عسل... بس أنت مش واخذ بالك.:p

والحمدلله على السلامة

الأمــل

الأصيـــــــــل
24-07-2003, 09:38 AM
تحية بعطر اللافنـــدر للجميع

.

.

.



هلا وغلا والله بصدى

شفت البهدلة ...

بس عن جد الشيبة كان تحفة

ونصيحة أخوية

أوعك تقعدي عند الشباك

عشان حتى لو راح لا تدعس هنا

أعصابك ما تروح :D


تسلمي يا غالية على مرورك



خالص التحية،،،،،

جــــودي
24-07-2003, 09:57 AM
:SMIL:

شكلي كل ماجلست قريب الشباك رح أعد كم عدد((لاتدعس هنا ))

بس أي مشكلة أعملها رح أقول لهم

العهدة على أخوي الأصيل :)

أديني حذرت من بدري|338|

احترامي

*همس الورد*
24-07-2003, 10:56 AM
ههههههههههههههههههههه اصيل موقف خيالي

وانا اقول انو مافى احلى من قعدة الشباك:D

يمكن لو كنت مكانك كان قعدت مكانى وقلبي ماوقف قربعه::]

خخخخخخخخخخخخخخخخخخخخ

بس بالله عليك مو المنظر يجنن من الشباك؟؟!!

واحد فاهم غلط
25-07-2003, 09:49 PM
السلام عليكم


طيب يا اخي انت الحين زعلان علشان الجهه اللي انت جالس فيها مش موجود الا اثنين لا تدعس هنا !!
غيّر مقعدك للجهه الثانيه اللي فيها ثلاث لا تدعس هنا وريح نفسك |347|

ليش ما تشغلون امخاخكم يا جماعه |273|

رغــد
25-07-2003, 11:58 PM
هايل ..
من جد أنا اللي هسترت من الضحك ..|314|
لي ساعه وأنا اضحك .. :D:D
بقوووة اتمنيت أكون معاكم في الطيارة
عشان اشوف فضايحك على الطبيعه ..
وفطست لما قالك الشايب : اللهم طولك ياروح
قلتلو : اكثر من كده ايه .. تعمل بيها ايه|314||314|
هههههههههههههههاي
يعطيك العافيه

*نجـ سهيل ـم*
26-07-2003, 01:42 AM
مساء الخير .. هايل ..

كيفك يا غالي ..

ياخي بجد إنت نكته .. وعليك طلعات تخلي الرايح جاي ..

عموماً .. بجد كان ودي اشوف المنظر على الطبيعة .. ولو إنك ما قصرت

أخرجته باسلوب نصي وكاني قاعد أشوفك على الطبيعة ..

عموماً ياغالي .. حبيت أسلم عليك ..

ولازم نشوفك ..

الأخيــــــــر
27-07-2003, 09:48 PM
اضحك الله سنك

يسعد ايامك ياهــــايل
بجد موقف ....هههههههههههههههههههههههههه هههههههههههههههه

الأصيـــــــــل
04-08-2003, 01:41 AM
تحية بعطر اللافنـــــدر للجميع

.

.

.


هلا والله بالظل ...

يا سيدي الله يسعدك كمان وكمان

خلينا نشوف بس يوم اسافر معاك

وتطير لا تدعس هنا وش راح تسوي

وشكله موضوع دجاجة البحر دا ما حينزل ولا كيف :D



نورت يابو حميد

الأصيـــــــــل
04-08-2003, 01:47 AM
تحية بعطر اللافنــــدر للجميع

.

.

.



البندري

وأنا كمان :D



تسلمي على مرورك

الأصيـــــــــل
04-08-2003, 01:50 AM
تحية بعطر اللافنـــــدر للجميع

.

.



هلا بجف البحر الساعة خمسة ونص<--- اسمك موضوع مو معرف

اللي يسمعك يقول ماشاء الله لاقوة الا بالله

الولد الطيّــــار

خلّي الطابق مستور يا كبتن

محنا سافرنا سوا قبل كده وشفت منظرك في الطيارة

لما بس تهز شوية |314|


روح نام :D


تسلم على مرورك حبيبي،،،،

الأصيـــــــــل
07-08-2003, 02:06 AM
تحية بعطر اللافنــــدر للجميع

.

.

.



هلا والله وغلا يا بو أحمـــد

يا سيدي والله السبب الرئيسي اللي خلاني أنزل الموضوع

الله يسعدك انته كمان ولا يحرمنا منك





نورت،،،،،

الأصيـــــــــل
08-08-2003, 04:15 PM
تحية بعطر اللافنـــــدر للجميع

.

.

.



هلا وغلا بأمل الدرر

يا ستي لا حكاية ولا رواية

كل مافي الأمر إني اترعبت وكانت ردة فعلي

طبيعية ... نوعاً ما :$

وبعدين أنا لما قلت خمسة لا تدعس هنا

القصد انو اثنين في الناحية اللي انا فيها

وثلاثة على الجناح الثاني

مش خمسه على كل جناح ..

ايش انتي ما تعرفي جغرافيا |314|


يسلم حياتك يا رب

وميرسي على مرورك


خالص ودّي،،،،

الأصيـــــــــل
08-08-2003, 04:18 PM
تحية بعطر اللافنـــــدر للجميع

.

.

.


هلا وغلا بجـــــودي

نورتي ...

هو الأفضل بيني وبينك انك ما تجلسي عند الشباك

نهائياً .. منهاً للاحراج ..

وبعدين هيّه ناقصة تقولي العهدة على الأصيــــل

ماهي الدنيا دارت وصرت موظف بالخطوط السعودية|326|

خليها على ربك بس


تسلمي على تواجدك يا غالية


لك كل الود،،،،،

الأصيـــــــــل
08-08-2003, 04:22 PM
تحية بعطر اللافنــــــدر للجميع

.

.

.


هلا وغلا بهمس الورود

لو جات على القربعة تهون

دا انا سويت فرح في الطيارة

بس بدل الزغاريد صويت

والمنظر من الشباك مو خيالي وبس

عن جد يجنن ... بس أهم شي لا تطاعلي في الجناح |322|


نورتي ،،،،،،

الأصيـــــــــل
08-08-2003, 04:25 PM
تحية بعطر اللافنـــــدر للجميع

.

.

.


هلاااااا بواحد فاهم غلط

غريبة يا خي

هذي المرة الوحيدة اللي فهمت فيها صح:D

يعني بصراحة غابت عن بالي الفكرة

لو أدري كان من زمااااااااان سويتها

والله طلعت ليك فايدة في المجتمع السعودي

ليه ياخي ما طلعت طيار|314|



منور يا باشا

الأصيـــــــــل
08-08-2003, 04:29 PM
تحية بعطر اللافنـــــدر للجميع

.

.

.



هلا برغـــودة


يا ستي الله يسعدك كمان وكمان

لا يا يبنتي الحمد لله إنك ما كنتي على الطيارة

ولا كان كرهتيني .. خصوصاً وانتي مع عيالك وانا قاعد

اهلوس واقول الطيارة حتطيح

أما الشايب دا حكاية ...

قال ايه اللهم طولك ياروح

بدل ما يروح يصلي ركعتين شكر

انو شاف الاختراع اللي سموع طيارة ويقول يالله حسن الختام


منورة يا عيني



لك الود،،،،،

الأصيـــــــــل
11-08-2003, 08:42 PM
تحية بعطر اللافنــــــدر للجميع

.

.

.


حبيبي نجم سهيل

الله يسعدك يا قلبي

عاد هذا حال الدنيا .. اللي رايح فيها كأنه جاي :D


نورت يا غالي وأكيد لازم نشوفك


تحياتي،،،،،

الأصيـــــــــل
11-08-2003, 08:49 PM
تحية بعطر اللافنـــــدر للجميع

.

.

.


الأخيــــــــــر حبيب ألبي

يا عمي الله يسعدك كمان وكمان

أهم شي انك انبسطت واتشمت :005:


نورت يا غالي..،،،،

الأصيـــــــــل
25-07-2004, 06:04 PM
|347|

الفجر قادم
26-07-2004, 01:27 AM
لي رجعة ان شاء الله

:SMIL:

الفجر قادم
28-07-2004, 03:54 AM
هههههههههههههههههههههههههه

الله يقطع ابليسك


:D

مشكوووووور على نشر الابتسامة

والقصة الي ضحك وفي نفس الوقت تخوف والله :259:

الأصيـــــــــل
28-07-2004, 08:08 AM
تحية بعطر الكــــــــادي للجميع

.

.

.


أهلين وسهلين بالفجر القادم

الل يحرق ابليسي كمان

هو لو ابليس ما وسوسلي بالمصايب اللي هيألي

هيه كان صار اللي صار:150:

نوّرتي الموضوع

بس خلي بالك ... لا تدعس هنــــا:171:


خالص تحياتي،،،،،

EDrara
29-07-2004, 08:07 AM
يا أنا جلست أضحك الين اللي حولي صاروا يضحكوا من ضحكي

لو شفتك وانت في الحالة لكان مت من الضحك

دا إنت حالة نادرة جداً

يبغالك متحف لوحدك

تسلم

جف البحر
29-07-2004, 11:36 AM
ادرارا

والله انك معتق :D

ايش المواضيع اللي بتطلعها من الارشيف

بس والله موضوع حلو



مع حوووووووبي،،

المتمرد
29-07-2004, 01:21 PM
أضحك الله سنك أيها الأصيل ..

لقد استمتعت كثيرا وضحكت أكثر وقرب روحك إلى المرح كان الأكثر ..

أقصص علينا هكذا قصص فأنها تدخل السرور إلى القلب .

كثيرا أشكرك وأشكر من رفع الموضوع .

الأصيـــــــــل
30-07-2004, 12:23 AM
تحية بعطر الكــــــادي للجميع

.

.

.



أهلين أبو عبدالملك

انته بتقول فيها

عرضو عليه كم متحف بس مالقيت على مقاسي:209:

سلامتك من الموت يا عيني

ومشكور على مرورك وكلماتك

لك كل التحية،،،،،

باربي
31-07-2004, 12:32 AM
أنا دعست :MAD2:|320|
وبصراحة موضوعك مرة طويل :150::217:
ومافيا أقأو:130:
بااااااااااااااااااااااااااااي :256::256:

الأصيـــــــــل
04-08-2004, 08:48 AM
تحية بعطر الكـــــــــادي للجميع






أهلين بحبيبي المتمرد

يا سيدي احنا في الخدمة

الله يسعدك حبيبي

وشكراً على مرورك

لك كل التحية،،،،،،

الأصيـــــــــل
07-08-2004, 07:38 AM
تحية بعطر الكـــــــادي للجميع
.
.
.



أهلين باربي

والله شكلك فاهمة الموضوع غلط :261:

على العموم بستناكي لما تقرأي

وبعدين نتفاهم



تحياتي،،،،