روح الدرر الغالي زادي يكتب لكم شوية عن مكة وحياته وذكرياته فيها

[ابوفهد]

أحبا الدرر الغالين
السلام عليكم ورحمة الله وبركاته
بعد موافقة الحبيب الغالي ابو عبدالله ( زادي ) روح الدرر وقلبها النابض
ها أنا انقل لكم ما كتبه على الفيس بوك إلي واحة الدرر الشامخة
لأنها أحق بنشر هذه الذكريات الغالية عن الغالي
فأتمنى أن تستمتعوا بها مؤقتاً لأنه وعدني بإكمالها خاصة بقرب شهر رمضان المبارك
فكما تعلمون هو شهر الخير والمحبة والتواصل بين المسلمين عامة وأعضاء الدرر خاصة
وإنني أرجو المولى عز وجل أن يكون هذا الموضوع سبباً في عودة محبينا ومحبي الدرر
ولكم تحياتي





السلام عليكم

كيفكم ؟

با أكتب شوية عن مكة وحياتي وذكرياتي فيها ,,, يمكن تعجب وتفيد البعض ويمكن بعضهم يقولك ( بلا فلسلفة واقلب وشك : ) طيب ياسيدي إللي موعاجبك الكلام خدلك لفة وتعال يمكن تلاقي شي أحسن ,,, المهم ياحبايب ,,,

أنا ولادة مكة وعيشة مكة وتربية مكة ودراسة مكة مو بس أنا , حتى أبوية الله يرحمه نفس الشي ,,, بيتنا لازال موجود في الحجون جبل السيدة , بس العيشة والرزق ساقني لجدة والحمد لله مو بعيد يعني , لكن أسبوعياً لازم أطلع مكة أروح لست الحبايب الله يطولي في عمرها ولايحرمني منها .

زمان ياجماعة الخير , أيام الحارة ( ومكة كلها كانت حارات مترابطة وقريبة من بعضها ومتداخلة وحتى الأهالي كانوا متوزعين في الحارات يعني تلاقيك ساكن في الحجون وخالتك في المدابغية وعمك في جرول وزي كدا ) فا , با أتكلم عن جانب بسيط من حياة الحارة من ناحية الأهالي , وأتركلك المقارنة بين حياة الأمس واليوم وتشوف الفرق ,,,

ميزة الناس في ديك الأيام ياجماعة , ماكان فيه تفرقة بينهم وبين بعض ,,, ماكان في عنصرية زي إللي الآن بنشوفها الآن ,,, يعني كانو جيراننا فيهم الجاوة وفيهم البخارية وفيهم الصيني وفيهم اليمنا وفيهم البدو ( هذول إللي مرا مامرت من جنبهم الحضارة إلا شوية هههههههه ) بس والله ماكنا نشعر بأي فرق بينا وبين بعض , نلعب مع بعض إحنا كعيال حارة وبزورة صغار , والكبار كانو يجلسو مع بعض بعد العصر يشربو الشاهي ويطقوها حكي , الحريم تلاقيهم يتلموا مع بعض على شاهي الضحوية وكل وحدة منهم جايبة فضلة خيركم حاجة الغدا , إذا ملوخية تنتفها وإذا فاصليا تقطعها وإذا رز أو عدس تنقيه , وهذا كله وهمه قاعدين يدردشو إلين ما أسمع وحدة فيهم تقول ( يالله ياجماعة مكة بتقرا ) يعني صارت الساعة 12 ظهر والراديو يكون شغال على الإذاعة ودا معناه إنو بعد القرآن راح يأذن الظهر وبعد الظهر راح يجي ( أبونا ـ يعني جوزها ) وتلاقيهم وحدة ورا التانية يتسحبو ويمشو ,,, وطبعاً عادةً يكونو مجتمعين عند البيت إللي يكون وصط الحارة ومعروفين أهله بأنهم عيلة كبيرة وفرفوشين ,,,

كان ياجماعة الملاحظ في الحارات القديمة في مكة وجود ( الرباط ) وهو البيت إللي يكون وقف للناس المساكين والغلابة والأرامل ,,, كان عندنا في الحارة رباطين ( الآن دورلي على رباط قريب من بيتك في أي حي ؟؟؟ ) وكان في هذي الأربطة تعيش عوائل وكان لنا إختلاط بهم سواء الحريم الكبار أو العيال والبنات الصغار وكنا معاهم والله زي الأهل ( الآن الناس نفسي نفسي , الله المستعان بس ) .

كانت المدارس وصط الحارات , يعني درست في الإبتدائية في مدرسة الحجون والمتوسط في عمرو بن العاص وكلها كنت أروحلها على رجلي الله يكرمكم , ما اذكر إني ركبت سيارة أو مع سواق عشان اروح المدرسة , بس في المتوسطة أشتريت بسكليتة 24 وصرت أروحبها المدرسة وأتكشخ بيها على العيال ,,, اليوم جبلي طالب يروح المدرسة على رجلو !!!

من الحاجات الحلوة أيام الحارة و ماكنت تلاقي بيت مافيه بهايم أكرمكم الله , يعني غنم ودا شي أساسي , دجاج بلدي , حمام ,,, الغنم خد منها حليب ولبن وجبن بلدي ولبنة ولاتنسى ( اللبا ) لمن تولد الغنمة ,,, الدجاج خد منه بيض وكتاكيت والحلو فيه إنو يحفظ النعمة يعني بقية الأكل حقت البيت أرميه للدجاج يفرملك هوه ههههههههههه ,,, الحمام أكثر إللي يربوه كانو عشان حلاوته وكمان يبيعو ويشترو فيه خاصة فيه انواع منه حلوة وغالية زي الرقاص والمصري والكويتي وحاجات كدا ,,,

أنا كنت أبغى أتكلم عن سلوكيات الناس في الحارة , يعني الجيران والأقارب من أهل الحارة صغار وكبار , لكن اعتقد إن زودتها شوية اليوم : ) نخليها في يوم تاني ,,,

على فكرة , في حارات مكة القديمة كانو القصمان والناس إللي من حول الرياض والشرقية , كنا نقول عنهم إما ( أهل الرياض ) أو ( الشروق ) هههههههههههههههه وكانت أعدادهم قليل وإختلاطهم مع الأهالي قليل , لكن دا مو معناها عيبة في حقهم , لا والله , كان منهم ناس طيبين جداً وأهل كرم و وفا ,,,

في أمان الله ,,,

[ام سلمان]

ما شاء الله متميز دوم خال زادي متابعة

[صدق الوفاء]

عَدنا والعود أحمد
بعد كرف و فرفرة قرابة الشهر اللهم لك الحمد حتى ترضى و لك الحمد إذا رضيت و لك الحمد على كل حال .
،
،
،
حبيب قلبي يا اقدع خال و جار في الدنيا

كلامك ماشاء الله سلس و يدخل القلب دوغري مع اقرب زقاق >> علشان الحكومه ما تكفشه ههههههه
،
،
،


الحمام أكثر إللي يربوه كانو عشان حلاوته ................ وحاجات كدا ,,,


ما اقدر اعديها يا خااااال إن شاء حتى يرجع مرسي مره ثانيه .... مستحيل :180:

هههههههههههههههههههههههههههههه ههه

مع حوووبي

[zadi]

بسم الله والصلاة والسلام على رسول الله صلى الله عليه وسلم
أولاً أشكرك يا أبو فهد على حسن ظنك الكريم في شخصي البسيط ,,,
أتمنى إني أقدر على الأقل وضع صورة بسيطة عن حياة وعيشة مكة زمان بما إني أتشرف أن أكون أحد أبناء مكة حفظها الله .
وراح أحط كل المشاركات القادمة إبتداء من اليوم هنا ’ أعتقد يكون أفضل . لأنه أنا مين بدو يطالع في وجهي ؟؟؟ لكن لما يلاقي موضوع للعمدة راح يدخل هههههههههههههه
الله يسعدك ياعمدة ,,,


أم سلمان
كل سنة وإنتي طيبة ياطيبة
أشكرك لمشاركتك , الله يحفظك ويحفظ العيال وأبو العيال ,,,
تسلمي من كل شر ومن كل سوء يارب
تحياتي لك


عمدة اللصوص والجزاير وكل العتيبية
يا هلا ومسهلا ومراااااحب
كيفك يا أحمد ,,, إن شاء الله بخير وصحة يارب ,,,
والله لك وحشة يا أحمد ,,,
حبيبي , ما أستغني عنك في دا الموضوع بالذات , إنتا ولد مكة وقريب مني يعني الحارة جنب الحارة والباب قدام الباب ,,, واخوك له صولات وجولات مع الزهايمر ههههههههههههههههه يعني صحصح معايا وصححلي ,,,
الله يعطيك العافية يا أحمد ,,, نشوفك علىى خير يارب ,,,

سلامي وتحياتي وتقديري للجميع سكان بيت ( الطين ) الدرر ( هههههههههههههههههه والله يا عمدة الدرر أستحقت مسمى بيت الطين بدل نسيج ههههههههههههههههههه
الله يطول في عمر الجميع يارب ...

حبيبكم : )

[zadi]

بسم الله الرحمن الرحيم
السلام عليكم ورحمة الله
نتواصل اليوم في الجزء الثاني من ذكرياتي في الحبيبة مكة المكرمة

كنت قد توقفت بناءاً على طلب الجماهير الغفيرة ( ركزلي على الغفيرة بس : ) في الجزء الأول عند سلوكيات الناس في الحارات القديمة في مكة وأخص بالذكر حارتي الحجون ,,, الناس كانوا أخوان وأهل فوق ماتتصوروا ,,, كان فيه شيئ إسمه عيب ومايسير ولازم ,,, كان فيه حق إسمه حق الجيرة ,,, كان فيه شيئ إسمه رجالة ومرجلة وتواضع ومسامحة ,,, كان البيت إللي يغيب عنه راعيه يبقى أهله في عيون أهل الحارة كلهم ,,, كان فيه حشمة في الحريم ,,, كان فيه نخوة في عيال الحارة ورجالها ,,, تعالوا شوفوا لما يكون فيه مناسبة في الحارة زي فرح زواج أو ملكة ( بكسر الميم ) أو عزا ( يعني عزاء ميت ) ,,, تلاقي أهل الحارة كلهم يخدموا في هادي المناسبة ,,, من نصب تيازير وفرش مفارش في الشارع وتجهيز القهوة والشاي ودبح الدبايح وطبخ العشا وإللي يجيب اللمبات على حسابه وإللي يشيل العشا وإللي يشيل الفاكهة وإللي يشيل الكراسي ( كلمة يشيل يعني يتحمل تكاليف ) والعملية كلها سلف ودين على قولتهم , يعني العملية دايرة بين الأهالي , اليوم عندي مناسبة وبكرة عندك أوقف معاك وزي كدا ,,, كان الكل يد وحدة ,,,
كان للكبير إحترامه , يعني جارنا مثلاً له كلمة على العيال الصغار لحد لو وصلت ممكن يضربه عشان سوا حاجة غلط , وتفتكروا إن أبو الولد يزعل ؟ لأ , بالعكس الأبو يقابل جاره ويقولو كان زته ( يعني كان زودت عليه الضرب أو المخاصمة ) ,,, لأن فيه ثقة بينهم وبين بعض إن لو ما سوى الولد شي غلط ماكان خاصمه أو ضربه ,,,
من الحاجات الجميلة في الحارة , زي ماقلت لكم كان فيه بيوت نسميها ( الرباط ) وهو خاص بالولاية والغلابة والفقراء , وكان أهل الحارة مثلاً لو عندهم صدقة أو أربعين أو أي شيئ فيه خير , أول مايحسبوا حساب , يحسبوا للناس هادولي ,,, يقولك روح ودي هذا الكيس أو الصحن لأم فلان ( الساكنة في الرباط ) .
نجي على شي تاني ,,, الناس أول ماكان عندهم ثلاجات في البيوت , يعني ممكن بس الميسورين منهم , لكن الغالبية ماعندهم غير النملية ( يعني دولاب المطبخ ) وكان شُرب الموية من الزير أو الشراب ,,, فكانت المقاضي كل يوم بيومه , بمعنى إن اليوم يبغوا يسوو ملوخية , يشتروا الملوخير وعليها وقية أو إتنين لحمة ( الوقية كانت من ضمن الموازين بس دحين اختفت ) وينطبخ الأكل على طباخة أو دافور وهادي إللي كانت شايعة أكثر شي لأن مين كان عنده بوتاقاز ؟؟؟
لذلك كان الأكل صحي وألجسام كانت صحية , الأكل طازة وكل يوم بيومه , كنت أتذكر ستي الله يرحمها ( أنا قضيت معظم أيام طفولتي معاها ) كانت ترسلني أشتريلها خضرة ولحمة أو دجاج من الخان ( موقع صغير للخضار واللحمة ) وآخد معايا جالون القاز أعبيه وكانت تنقحني بأربع قروش إكرامية تخليني اروح بقية اليوم ونا مكشخ بالأربع قروش ,,,
كان عندنا في الحارة وحدة حجة الله يرحمها كان إسمها حجة آمنة , تكرونية , والله ياجماعة الحجة دي كانت محبوبة من كل الأهالي في الحارة , تبيع فصفص ولوز وحلاوة باكورة وحاجات زي كدا , بس الحجة دي والله كانت كريمة , ماتشوفني غير تناديني وتحطلي في يدي شوية فصفص أو لوز وهي تضحك , الله يرحمها ,,,

نجي على شي تاني , بمناسبة قرب شهر رمضان الله يعيده علينا وعليكم بكل خير يارب ,,,
رمضان أيام الحارة كان يا ألله قد غيش كان حلو ,,, أول حاجة لأنه كان فرصة لنا وإحنا عيال صغار ( ابو 12 إلى 15 سنة ) للعب ,,, كان فيه ألعاب عندنا ماتحلى ولا لها طعم غير في رمضان , زي الشرعت وطيري والفرفر والبسكليتات والبراجون , العاب كلها حركية يعني فيها حركة , عشان كدا كانت صحة العيال بمب ماشاء الله ,,,

ومن الأشياء الحلوة في رمضان كانت كترة البسط , يعني دا يبيع بليلة ودا يبيع شرشو ودا ياجر بسكليتات ,,, أما في العصرية حقت رمضان تلاقي بسط بيع السوبية , وطبعاً سوبية اصلي ماهي تجاري زي حقت دحين , شغل بيتي , تشرب منها من هنا وتدور المخدة من هنا هههههههههههههههههه . على فكرة , أنا أشتغلت فيها كلها , يعني كنت أبيع سوبيا وأبيع بليلة وعندي دراجات أأجرها وبعت حبحب , والله كله في الحارة ,,,

الجزء الجاي عن نشاط أهل الحارة في كل المواسم ,,,

أسيبكم على خير وأشوفكم وإنتو بصحة وسلامة يارب .

[أبو مصعب السكندرى]

جزاكم الله خيرا ( زادي )

وجزاكم الله خيرا ابو فهد

علي نشر الجزء الاول

ونتمنى باقي الاجزاء زادي

بارك الله في اعمارنا جميعا بالطاعات وبالذكريات الجميلة

[ابوفهد]

الله يعطيكم العافية أيها الغالي أبو عبدالله على هذا التجاوب والتفاعل مع موضوعكم
أسأل المولى عز وجل أن يمن على والدتكم بالشفاء التام وأن يقر عيونكم بعودتها سالمة
وأرجوه جل جلاله أن يجمع لها بين الأجر والعافية ويردكم من سفرتكم العلاجية بالسلامة
دمتم بخير

[الكونكورد]

حبيت اقول اني مريت من هنا .. وهذا الأثر :134:

[zadi]

__________________________


أهلين ابو مصعب ,,, كل سنة وإنتا طيب ياراجل ياطيب ,,, إزيك وعامل إيه ؟ إن شاء الله أمورك كلها تمام يارب ,,,
تسلم حبيب قلبي وبارك الله فيك ,,,


______________________________


حيالله العمدة ,,,
أبشرك الحمد لله والشكر لله عودنا أنا والعجيز حقتي وربنا سبحانه وتعالى يستحق الشكر وله الفضل على كل حال ,,,
تسلم يا أبو فهد , الله يطولنا في عمرك على طاعته ورضاه .

______________________________ ______


أيمن باشا , كيفك ياكونك ؟؟؟ وين الناس ؟ طلاتك صايرة قليلة ,,, رمضان مبارك عليك يارب ,,,

[zadi]

______________________________


السلام عليكم ورحمة الله وبركاته
في هذا الجزء الثالث من سلسلة ذكرياتي بمكة , نتواصل في سرد نشاط أهل الحارة صغار وكبار في كافة مواسم مكة الله يعمرها ,,,
أولاً , كان من المرجلة ( يعني من الرجولة ) إن كل واحد يكون عنده شغل وباب رزق يترزق الله فيه , إما شغلات بيع وشرا أو وظيفة حكومة وقليل جداً من كان يشتغل في القطاع الخاص كموظف لأن كانت سمعة الوظيفة في القطاع الخاص إنو مالها أمان ,,,
في حارتنا كان فيه ناس موظفين في المعارف ( التربية والتعليم دحين ) وفي المالية ( مؤسسة النقد الآن ) وفي البرق والبريد والهاتف ( إللي هي شركة الإتصالات الآن وقبل كانت وزارة البرق والبريد والهاتف ) والمدرسين في مدارس زي الحجون الإبتدائية والرحمانية وعمرو بن العاص وأبي هريرة ,,, وكان عندنا برضو ناس شغالة في وظائف عليا في الدولة مثلاً في وزارة الخارجية اذكر يحي حسن ملاح والسيد هاشم علوي جفري وطارق محمد علي بحة ,,, وكمان فيه ناس كانت تشتغل في الخطوط السعودية ويداومو من مكة لجدة وأشهرهم حسن عجب نور إللي كان يبهرني بأناقة البدلة حقت السعودية زمان ,,, وطبعاً في طبقة الكادحين في الأرض زي الكدادة إللي يشتغلو على سياراتهم الخاصة أو الأوتوبيسات خط البلدة أو يشتغل بعضهم في ( الحجر والطين ) يعني مع مقاولين البناء بمفهوم دي الأيام ,,, أما إحنا الصغار ,,, فما كنا نعدي موسم إلا ونشتغل فيه ,,, يعني رمضان له أشغاله ( بسطات مثلاً ) الحج له أشغاله ( مع الحجاج ) ,,, إحنا بيوتنا كانت ولازالت مطلة على مقبرة السيدة خديجة رضي الله عنها وأرضاها ,,, فا , دا كان مصدر وباب رزق واسع ,,, كنا في الحج عندنا ثلاث خيارات للشغل في المقبرة ,,, وعلى فكرة المقبرة تمتد من مقابر السليمانية ( جنة المعلا ) إلى جبل السيدة ,,, يعني ملعب كبير هههههههههههههههه الخيار الأول إنك تشتغل ( مزور ) حجاج و أول ماتصيد بشكة الحجاج من ناحية مدخل المعلا , تاخدهم تزورهم على قبور كانت معروفة مثل عبد الله إبن الزبير وعبد الرحمن إبن أبي بكر الصديق وأسماء بنت ابي بكر الصديق وصولاً إلى مقبرة السيدة خديجة ومقام السيدة آمنة والدة الرسول صلى الله عليه وسلم ومقام سيدنا بلال ثم قبر أبي طالب وعبد مناف وعبد المطلب جد رسول الله .
كن نقوم بدور المزور للحجاج على هذه القبور ويعطوننا الحجاج مبالغ إكرامية مقابل هذا العمل ,,,
الخيار الثاني ,,, إنك تتشارك مع واحد من اصحابك وتحط شرشف على قبر من القبور إللي ذكرناها فوق ولما يجو الحجاج يزورو القبر وبعد الدعاء ينقحوك بمبلغ ممكن يكون ريالات أو هلل ,,, على قد مايطلع من الحاجي , وهذي الشغلة حلوة والله فيها ورق على كيف كيفك ,,,
الخيار الثالث , ودا من أفضل وأقوى الخيارات ( القرنقش فيه كتيير ) إنك تسوي بسطة صغيرة سواء تحت كوبري الحجون أو في مدخل الحارة , يعني في أماكن أستراتيجية ,,, وممكن تسويها في منى أو عرفة وربك الرزاق ,,,
بالنسبة لي , الحمد لله أشتغلت فيها كلها , يعني مزور في المقبرة أشتغلت ,,, راعي بسطة تحت كبري الحجون أشتغلت 3 سنوات ,,, راعي بسطة في منى وطباخ عشا في مزدلفة وبياع موية وبيبسي في عرفة أشتغلت ,,, الحمد لله ,,,
على فكرة , ترا طريق الحجون الطالع من الحرم الغزة مروراً بكبري الحجون للمعابدة للششة والعزيزية , هذا الطريق الرئيسي للحج , والطريق الثاني إللي هو شارع الحج أو ماكان يسمى ( خريق أبو العشر ) ,,,
الآن جا الدور نتكلم على أو عن بعض الحجاج إللي كانوا يجو مكة ,,,
أولاً , مكة كانت صغيرة وسكن الحجاج كان حول الحرم وفي الحارات القريبة , وكان الحجاج يستأجرو البيوت من أهل مكة ويقاسموهم السكن فيها يعني أهل البيت يسكنوا المبيت والحجاج تحت في الأدوار إللي تحت ,,, ما أبغى أقولكم على الألفة والمحبة والعلاقات الروعة إللي كانت تربط بين الحجاج وأهل البيت ,,, شيئ لايوصف ,,, توصل لدرجة التصاهر واسألو أهل مكة القدام عن دا الكلام ,,,
ثانياً , خلينا نتكلم عن كرم الحجاج ,,, من واقع تجربة وإحتكاك بهم , كان أكرم حجاج هم حجاج إيران !!! قبل الثورة وقبل الخميني الله لايبارك فيه , كانو شعب مرفه , كانوا ياخدو أحسن بيوت وكانو يغدو الحارة إللي ساكنين فيها لأنه كنا نجي وقت الغدا واحنا صغار بقدورنا يعبولنا فيها الرز الإيراني بالزعفران وقشر البرتكان والله ياجماعة ريحته وطعمه في فمي لحد الآن ,,, وكان الإيراني إللي اليوم تشوفه شكله غضب ومايبتسم وتحس فيه الحقد والكره بسبب الثورة حقتهم ,,, والله كان مايمشي غير وفي جيبه الفستق والبرتقال أو الأفندي و وكان يعطينا وإحنا صغار ويكون سعيد ومبسوط ويضحك ,,, مو زي دحين مساكين يجيبو معاهم خواتم وفصوص عقيق عشان يبيعوها هنا ويشترو لأهلم هدايا ,,,
في المرتبة الثانية كانو حجاج نيجيريا ,,, كانو الفقيان كرماء كثير ,,, وبعضهم والله مايعرف قيمة الفلوس ويغرف ويعطيك ,,,
بعد كدا يجو الحجاج الجاوة ,,, كمان كرماء ماشاء الله عليهم ,,,
وكان بصراحة أبخل حجاج إللي من جد تغسل يدك منهم حجاج اليمن هههههههههههههههههههه من يومهم غلابا ,,,
الآن أستودعكم الله ورمضان كريم ومبارك علينا وعليكم ,,, ولنا عودة إن شاء الله .

[zadi]

_________________________




السلام عليكم ورحمة الله وبركاته


نتواصل اليوم في الجزء الرابع ,,,


هادي السنة في أول يوم رمضان أنطريت للسفر بوالدتي لمصر للكشف عليها عند دكتور معروف , وطبعاً كان أول يوم صعب جداً من ناحية طول الوقت لأننا صمنا مع السعودية وفطرنا مع مصر وفيه فرق حوالي ساعة غير تعب السفر وموعد مع الدكتور بعد الوصول بساعيتن , المهم من دا كله أبغى أتكلم شوي في حق أمي الله يشفيها ويعافيها ويمدها بالصحة والعافية ,,, وعلى فكرة دا برضو بيدخل في سياق موضوعنا الأساس وهو مكة وذكريات مكة ,,,


أنا بطبيعة الحال والدي أتوفى ونا عندي 9 سنين تقريباً وكنت أكبر أخواني , والدتي كانت في عز شبابها 24 سنة أنكفت علينا وشالتنا وتعبت علينا كثير الله يجزاها الجنة هي وأمهاتكم يارب .


فا , لأنها كانت الأم والأب في وقت واحد , كان شعورها بالمسئولية كبير , أتذكر لها مواقف كثير ,,, أنا بصراحة كنت في صغري من يومي شيطان وحق مشاكل وشغل حارة وفلتة ,,, لكن وربي لو ما هالديبة إللي ورايا , كان اليوم وضعي وضع تاني لايسر عدو ولاحبيب ,,,
عارفين أمي متى شالت يدها مني ( يعني بطلت تضربني ) وأكتشفت إني خلاص مني حق ضرب ؟؟؟ بعد ما أتخرجت من تالتة متوسط !!!


كان ياويلي ويا سواد ليلي لو أدن المغرب ونا مادخلت البيت ,,, الاقيها بعبايتها في أول الحارة ,,, والله ياجماعة تكون حاطة اللي ( يعني الأنبوب البلاستيك حق المويه ) في يدها تحت العباية وتسوقني بيه من مكان ماتحصلني إلين اوصل البيت ونا آخد على ظهري وجنبي ويدي ورجلي طبعاً مع السب والتفالين هههههههههههههههههه وأدخل البيت على الحمام وأنتم بكرامة إلين ماتهدا الأمور وأخرج أزاكر شوية وأحط راصي وأنام ,,,


بس والله أنا بصراحة تعبتها كتيييييير الله يسامحني , مضاربات ومراكز شرطة وهيئة ومشاكل مع عيال الجيران ولعب كورة في ملاعب الزاهر زمان ( إللي هو الآن سوق الضيافة ) وإستئجار دبابات بالساعة في المدابغية من عيال الدمياطي وإستئجار سيارات كوريلا بالدورة في الزاهر ( الدورة بـ 5 ريال ) :drr05_55:


طبعاً دا غير مشاكل المدرسة ,,, كنت في أولى متوسط هادئ وشاطر , جينا في تانية كسلت شوية ,,, جينا في تالتة متوسط أووووووم الفلة كلها ,,, شردة من المدرسة ولعب وجنان ,,, أذكر مرة من المرات , شردت أنا وزملا ليا من المدرسة وكان معانا ولد خالي وهوه ملقوف وطِرق , رجعنا من الشردة ( رحنا بركة موسى في العدل ) وتاني يوم الصبح من بدري ما اشوفلك غير ستي الله يرحمها طالعة من صبح الله خير من بيتها وجاية لأمي , أنا قنصتها من الصطوح كنت قاعد أحلب الغنم , من ساعتها وقلبي قال طنننننننن هههههههههههههههه عرفت إنو فيها مصيبة ,,, نزلت أنا وحليبي ودوبني داخل عليها الصالة ولا أشوف غير إعصار أو تقدر تقول عاصفة مفكوكة على وجهي , فين كنت أمس , أهرج بسرعة ؟ أنا طبعاً متلخبط وأستلوحت وصرت أدمدم وأتمتم ومني عارف إيش الهرجة !!! أتاريه ولد خالي الملقوف راح قال لستي الحكاية من طقطق لسلامو عليكم , وستي قامت ببقية الإجراءآت هههههههههههههههههه :261:


ما أبغى اقولكم ياجماعة عن ألم داك اليوم , لأنه شي ماينوصف ولاينقال ,,, لا , وفوق دا كله أخدتني من يدي وعلى المدرسة ووقفت عند باب المدرسة وقالت للفراش أزهملي على المدير وكان وقتها مدير المدرسة الأستاذ عبد الرحمن العقلا وإللي مايعرف العقلا يسأل عنه ,,, المهم قالتله يا استاذ هذا وعبد الله ولد الملاح ومحمود ولد العجب نور شردو من المدرسة أمس وحلفتك بالله تأدبهم ,,, هي بس قالت دي الكلمة ورزعتني قدام المدير ومشيت ,,, والله ياجماعة من الفلكة إللي أكلتها بعد الصلاة وقدام الطلبة , والله ماقدرت أطلع الفصل على رجلي , طلعت على الأربع القوائم هههههههههههههههههههه :217:


يوم لا ينسى :177:


طبعاً فيه غيرو كتير من الأيام الخالدة ,,, بس الوقت ضيق والأخلاق صايرة تجارية مع الصيام ,,, فيه مثل مكاوي معفن افتكرته , يقولك ( المكان ضيق والحمار رفاز ) هههههههههههههههههههههههههههههه :drr05_19:


بالله عليكم دعوة لأمي ولأمهاتكم إن الله يتقبل منهم صيامهم وقيامهم ويجزاهم خير على ماقدموا وإن الله يرزقهم الفردوس الأعلى من الجنة ويحسن خاتمتنا وإياهم على اشهد ان لا إله إلا الله وأشهد أن محمداً رسول الله ,,,



الله يحفظ الجميع :drr05_23:

[صدق الوفاء]

الف لا بأس على الغاليه الله يعطيها الصحة والعافية و يمد في عمرها على طاعته يا رب و لا يحرمك من برها و رضاها .

مبدع يا خال كعادتك ربي يسعدك حركت شجون و عواطف و حنين عبدالغني كمان هههههههه

و تستاهل احلى هديه على المجهود اللي بتسويه

و طالما إنه الكلام في الماضي التام Past perfect ههههه

راح تكون الهديه شي كان في رمضان ايام الهجوله

http://www.dorarr.ws/up/uploads/13747039391.jpg (http://www.dorarr.ws/up/)


ايام الطفره تطرطع يعني تطرطع راس مالها كبريت بريال و بواجي مستعمل و اسقاط مظلي على الاهداف

دوووس يا معلم و مالك إلا واحد خبرة تعزيز خخخخخخخ

[الكونكورد]

بس الحجة دي والله كانت كريمة , ماتشوفني غير تناديني وتحطلي في يدي شوية فصفص أو لوز وهي تضحك , الله يرحمها ,,,


___________________


الحقيقة ما ألومها .. من يوم قريت ..

___________________




أنا بصراحة كنت في صغري من يومي شيطان وحق مشاكل وشغل حارة وفلتة ,,,





الله يسامحني , مضاربات ومراكز شرطة وهيئة ومشاكل مع عيال الجيران




:drr05_19:

[zadi]

______________________________



هذا الجزء الخامس إذا ماخاب الظن !!!

طيب , كيف الشباب ؟ إن شاء الله بخير يارب ,,,

رمضان على قولة أمي الله يشفيها ويرفع عنها , كانت تقول عن رمضان في زي دي الأيام ( رمضان بيلملم عفشو ) : : : وطبعاً في زي دي اليام كانو ستات البيوت يبدأو يضبطو البيت للعيد , كان العيد في مكة له نكهة وطعم ,,, بالنسبة ليا أنا شخصياً و كنا أمسك الزقاق من قدام بيتنا من أوله لآخره أنظفه من الوصخ يعني الكراتين والورق , وبعدين إن كان تعرفوا المشط الحديد أكنس به الزقاق ويصير بعد كدا فل الفل ,,, وارش موية على الزقاق ,,, أما أهل البيت كان عندهم شغل كثير في البيت , يعني غسل المفارش وتنجيد المساند والمخدات والطواويل بالزات حقت غرف الضيوف إللي هيه نسميها المجلس أو الديوان , وطبعاص بعض الناس كانوا يضربو البيت من جوة وبرة بوية جديدة ,,, المهم تلاقي شكل البيت من جوة ومن برة أختلف ,,, ودا كلو يصير قبل العيد ,,,

حلاوة العيد , اللوزية طبعاً أساسية ,,, وبعدين فيه كم شكل كدا معروفة من القديم , زي العسلية الصفراء وحلاوة فواكه وطبعاً ماننسى الحلاوة الحلقوم بأشكالها , وكولونية العيد ههههههههههههههه ( مين فاكر كولانية باريس ؟؟؟؟ )
كان في بعض الحارات إللي عمدتها ديب على قولهم , يسوو شيئ إسمه برزة ,,, هاذي عبارة عن مكان من الأرض وسيع ومحاط بتيازير الخيام ومفروش زل , ودا يكون مخصص للإحتفال في العيد والعشا والمعايدة لأهل الحارة ,,, وطبعاً في الأخير لازم من المزمار ,,, لحد يقزلي إش المزمار عشان لا أنتحر : (

كانت أيام حلوة بالنسبة لنا وإحنا صغار ,,,

كانت عيديتي من أبوية الله يرحمه ويسكنه الجنة , ريال !!! هههههههههههههههه إيوه ريال عربي سعودي واحد وأحمد ربي عليه وأبوس يدي وش وقفا هههههههههههههههههه إش تحسبو إنتم ؟ نظام الخمسمية ريال في العيد وكمان تلاقو الولد أو البنت قالبة وجهها !!! بلا في دا الشكل ههههههههههههههههههههههه

المهم , كنا في العيد من صبح الله خير نلفلف على بيوت الحارة بيت بيت , هذا الكلام ونا في سن 8 ـ 12 سنة ناخد عيدياتنا حلويات أشكال وألوان وفلوس غالبيتها قروش ( يعني قطع معدنية من أبو 5 هلل وإنتا طالع إلين أبو نص ريال ) بالمناسبة كان فيه عملات معدنية إللي هيه قرش وقرشين وأربع قروش وخمسة قروش ( الربع ريال ) ونص ريال بس , قبل الريال المعدني الكبير لايجينا ,,,

كانت أكبر عملة في الحجم والوزن أبو أربعة قروش , هادي لو ترميها على راص واحد تفقشو ههههههههههههههههههه وعلى فكرة والله كانت مصروفي في المدرسة من أولى إبتدائي لتانية وبعدين تانية مكرر ( يعني راسب تانية مشوها وبلاش تدقيق موضوع قديم ) وكانت طال عمركم تجيب واحد كعكي كولا وواحد كيك !!! شفتوا قد إيه كان فيه بركة في الفلوس ؟؟؟
نجي للملاهي والألعاب في العيد ,,, طبعاً كلمة الملاهي والألعاب كلمة كبيييرة إللي يسمعها يقول ياحق ديزني إنتا : )
حبايبي , في وصط الحارة كانوا العيال الكبار ينصبوا ( مدريهة ) يعني مرجيحة بمفهومكم , كبيرة وتتحمل أتنين تلاتة ,,, وينصبوا كمان شي إسمه ( شقاليب ـ أو الشقالب ) وهي نفس فكرة العجلة الحديثة بس بشكل قديم وبدائي جداً ,,,
وطبعاً ألعاب الفرفر والبسكليتات وإن كانت التوسيمة حقت العيد ( يعني الواحد وسم من العيديات ) نروح لدكان في الحارة عندنا حق واحد إسمه ( عم علي مكي ) الوحيد غللي يبيع ألعاب تعتبر راقية لأنها تشتغل بالحجار وأشكالها غريبة وحلوة ( الحجار يعني البطاريات لاتفضحونا ) ,,, طبعاً دا المحل بالنسبة ليا كان عبارة عن ( تويز آر أص ) بالنسبة لكم دحين ,,, معظم الوقت أقضيها فرجة قدام المحل على الألعاب الحلوة الغالية وبعدين اخرج من عنده ونا مشتري ( جيب ) ونننن ونننننننننن هههههههههههههههههههه بريال واحد ,,, الله ياديك الأيام ,,,

ندخل على الجزء الأخير في موضوع اليوم عن العيد في مكة أو في الحارة ,,, طبعاً كل ست بيت تكون مستعدة في آخر رمضان للعيد بالأكلات والطبخات المعروفة عند المكاكوة , ودا شي اساسي في كل بيت , عندك بالنسبة للأكل الزفر , المنزلة , الندي , الكباب , الرز ,,, أما بالنسبة للنواشف فلازم تتقضى وتجي من آخر رمضان , الجبن والزيتون والحلاوة الشامي والطحينية والهريسة واللبنية والمشبك وكمان دجاج البر للتسلية ( بعضهم يسموه حمام البر ) ,,,

الله يسعدكم , كل عام وإنتو بخير وصحة وسلامة يارب ,,,


أسأل الله الكريم إن يتقبل منا رمضان ويكتبنا من العتقاء السعداء ,,,


وأن يرحم من كان معنا بالأمس واليوم هو تحت التراب ,,,

نشوفكم على خير ,,,

[zadi]

______________________

أحمد
أيمن

والله راجعلكم حبايبي , بس الوقت صرقني ونا قاعد أكتب واتفلسف والعالم خلصت الفول من عند بانعمة ,,, على فكرة يا أحمد بانعمة يساوي الغامدي عندنا في مكة ,,, فول على كيفك : )

جايييكم بعدين ,,,