zadi
30-12-2007, 03:39 PM
__________________________
في بيت من بيوت زمان , في حارة من حواري مكة القديمة , وسط عيلة مكاكوة , صار هادا الحوار ,,,
نبيكم وصلوا عليه .
الأبو : ياواد دحمي , أنزل الدهليز وفك غطا الخزان وشوف موية زبيدة جات ولا لأ . وبعدين روح الحوش وعلف الحمار وحطلوا شوية تمر أبو السمن , وبعد ما تخلص روح لُم الغنم من الحارة قبل المغرب , هيا يادحمي عشان تلحق تجيب العشا بعد المغرب وسلم على عمك باهويني وقللو يتوصى .
دحمي : هيا خد علموا وحطو فقارورة , إيش أسوي أنا إيش ولا إيش , هوا أنا مكينة يابويا , ماتنادي على ولدك التاني هادا حمزة إللي مفلوت زي بقرة الحرام من شارع لشارع .
الأبو : إيش تقول ياقليل الخاتمة على سيدك , ياواد أستحي على وجهك وسوي إللي قلتلك عليه ولا والله لأقوملك , أخلي يومك ... را يا ... را .
خلا نور ( أم دحمي ) : ياراجل ماتبغا تسيب الإفترا إللي إنتا فيه , إقولك إزا كبر ولدك خاوية مو تكسر مجاديفه وتجيبلو الكفية , ياشيخ خاف الله , تبغا يسوي دا كلو لوحده .
الأبو : يامرة أنكتمي ونقطينا بسكاتك , هادي آخرة دلعك ومجاغتك معاه , مو قادر يسويلو شغلتين على بعض , هادي دقني إزا فلح .
روح ياواد وأسمع إللي قلتلك عليه وسيبك من هدارة أمك , روح وخليك رجال .
حمزة جاي من الشارع وطالع لأبوه في المبيت .
حمزة : أبويا , يبويا , باركلي باركلي .
الأبو : مبروووووووك ياواد , بس إيشكل الموضوع عشان مسوي هادي الهليلة كلها .
حمزة : قبلوني أشتغل في كندا . سواق يابويا , سواق في كندا .
الأبو : ول ول في كنداااااااااا , وهادي تطلع فين يارمة ؟
حمزة : يابويا هادي هنا في مكة , فييييييييي مككككككككة , يعني جنبك وكل يوم أطل عليك في الدكان في الروحة وفي الجية .
الأبو : تبغى تجنني ياواد , أنا سمعت من الحجاج إنو هادي كندا بلد بعيدة وجنبها بحر مرررررررة كبير .
حمزة : يابويا هادي شركة إسمها كندا دراي حقت قوارير البارد إللي كل يوم نشرب منها في الدكان .
الأبو : هااااااااااااااااااا دحين فهمت . الله يوفقك , وكم حسبولك أجرة ؟
حمزة : 180 ريال يابويا مية وتمانين ريال , ريال ينطح ريال .
الأبو : ماشا الله تبارك الله , يالله لُم يدك في المصاريف وخلي أمك تشوفلك بنت حلال .
( خديجة ـ أخت حمزة ) : يابويا خليه إتهنا براتبه , على طول تبغو تجوزوه ,,, حمزة , فاكر لمن وعتني بالكرته إللي وريتك هيه في الدكان إللى في القشاشية وقلتلي أشتريلك هيه من أول راتب ؟؟؟
حمزة : إكشب حالك إنتي ماتنسي ماشا الله عليك , أبشري يا أختي ياحبيبتي , وكمان فوقها , نقيلك كونترا على زوقك , أنا ليا كم أخت في الدنيا .
خلا نور : الله يخليكم لبعض ياحبايبي ولايحرمكم من لمتكم سوا كدا طول العمر .
الأبو : بس ياحمزة ياولدي لاتنسى أخوك دحمي من أي شي تشتريلو هوه , حتى لو مداس باتا كدا يفرحبو ويدعيلك .
حمزة : أفا يابويا , إنتا ماتعرف معزة دحمي عندي قد إيه , أنا ناوي أشتريلو بسكليته يقضي عليها المقاضي ويروحبها المدرسة ويعاير عيال الحارة بيها .
وكمان إنتا يابويا , ناوي إنشا الله أشتريلك دباب هوندا سبعين يريحك من الحمار وأكلو وقرفو , بس عبي بنزيم وأديلو .
الأبو : إيش إيش إيييييييش , شوف إللي مايستحي , ياواد إنتا تتمصخر بي على آخر الزمن ؟ أفا , هادي آخرة تربيتي فيك ؟
حمزة : إيشبك يابويا ؟ والله ما أقصد أزعلك وأقلب مجازك , إيشبك ؟
الأبو : أنا أركب دباب ؟؟؟أنا أسيب الحمار وأركب دباب ؟؟ رٍكبك عفريت إنشالله ,,, ياواد شايفني من العربجية حقين الدبابات عشان تشتريلي دباب ؟؟؟
حمزة : يابويا والله الدباب أحسنلك من الحمار , عشقو وأمشي , تطلع دحديرة يطلع معاك تنزل نزلة مايقولك شي , مو زي الحمار , عرررررررر بيها يطلع وبيها يتربس ,,, خلاص حمارك عجز ويبغالو يروح دار العجزة .
خلا نور : قاللو متى طلعت القصر قاللو أمس العصر , عشنا وشفنا والله ياحمزة , أبوك يركب دباب .
حمزة : يا بويا والله فهمتني غلط , أنا قصدي أبغاك ترتاح من هادا الحمار , وإزا ماتبغا , بكيفك . طيب إيش تبغاني أشتريلك من أول راتب , لازم ترا .
الأبو : أقولك , بس عشان حلفت وأنا ما أبغى أكسر بخاطرك , شوفلي عصاية مكلفة عشان المزمار والحمار , بس ها ,,, لازم تكون مصرية ومرقدة في الموية تلاتة شهور , أبغاها زي اللبنية في يدي .
حمزة : أبشر يابو حمزة , أبشر , أشوفلك هيه من عند عم صدقة راعي القهوة في السوق الصغير .
الأبو : روح يا ولدي الله يرضى عليك .
حمزة : وإنتي ياست الحبايب , إيش تبغيني أجبلك من أول راتب ؟
خلا نور : يجيبلك الخير ويعطيك خير الوظيفة ويكفيك شرها , إللي تشوفو ياولدي .
حمزة : طيب إيش رايك في كوبر جديد بدل المصدي إللي عندك دا ؟
خلا نور : لا ياولدي , لا , الله يرضى عليك , هادا كوبر دخلتي على أبوك , اليوم لو 25 سنة وأنا دهبي وصيغتي والكحل والبودرة والكولونيا كلها وحنتي وحالي ومحتالي فيه , تبغاني بعد العمر دا كلو أرميه , يكفيني إنو من ريحة أبوك .
الأبو : شوف شوف الولية , يامرة ,,, الله ياخد عدوك , هو أنا مُت ْ لمن تقولي ريحة أبوك ؟ ياشيخة فاولي فال خير الملافظ سعد .
خلا نور : مو قصدي ياسيدي , بس في دمتك ماتزعل إزا فرطت في دبشي إللي جبتلي هوه ؟
الأبو : كيف ما أزعل , الله , دا كلفني دم قلبي ديك الأيام وخلاني أشتغل وأكر على غير قبلة إلين ما دبشتك . وهيه دي حاجة تتنسي .
حمزة : الله يخليكم لبعض , والله يا أمي أنا بس كان قصدي إني أجددلك الكوبر , تدري , أشتريلك واحد تاني وحطيه جنبو تحت الكرويته , ها إي قولتي ؟
خلا نور : طيب ياحمزة , إللي تشوفو ياولدي , بس لا تقولي أستغني عن شي من دبشي مرررررة .
خلا نور : ياخديجة يابنتي قومي سوي براد شاي العصرية حق أبوكي ولاتحطي الحبق معاه , خليه لوحده إزا يبغى هوه يحط . قومي الله يرزقك بولد الحلال وأشوفك في بيت جوزك منورتو .
خديجة : آآآآآآآآآآآآآآآآآآآآآمين يا أمي آآآآآآآآآآآآآآآآآآآآآمين ( قالتها وهي تضحك وقامت بسرعة )
خلا نور : شوف البنت ,,, وه وه وه ,,, والله بنات اليومين دول مايستحو ولافعيبهم نقص ,,,
ــــــــــــــــــــــــــــــ ــــــــــــــــــــــــ
هذه محادثة مفترضة مكاوية الطابع ,,, أرجو أني قد وفقت فيها ,,, ولمن لايعرف هذه اللهجة يمكن أن يضع الكلمات الغير مفهومة وسأقوم بالرد عليها وتفسيرها .
لكم خالص مودتي ,,,
في بيت من بيوت زمان , في حارة من حواري مكة القديمة , وسط عيلة مكاكوة , صار هادا الحوار ,,,
نبيكم وصلوا عليه .
الأبو : ياواد دحمي , أنزل الدهليز وفك غطا الخزان وشوف موية زبيدة جات ولا لأ . وبعدين روح الحوش وعلف الحمار وحطلوا شوية تمر أبو السمن , وبعد ما تخلص روح لُم الغنم من الحارة قبل المغرب , هيا يادحمي عشان تلحق تجيب العشا بعد المغرب وسلم على عمك باهويني وقللو يتوصى .
دحمي : هيا خد علموا وحطو فقارورة , إيش أسوي أنا إيش ولا إيش , هوا أنا مكينة يابويا , ماتنادي على ولدك التاني هادا حمزة إللي مفلوت زي بقرة الحرام من شارع لشارع .
الأبو : إيش تقول ياقليل الخاتمة على سيدك , ياواد أستحي على وجهك وسوي إللي قلتلك عليه ولا والله لأقوملك , أخلي يومك ... را يا ... را .
خلا نور ( أم دحمي ) : ياراجل ماتبغا تسيب الإفترا إللي إنتا فيه , إقولك إزا كبر ولدك خاوية مو تكسر مجاديفه وتجيبلو الكفية , ياشيخ خاف الله , تبغا يسوي دا كلو لوحده .
الأبو : يامرة أنكتمي ونقطينا بسكاتك , هادي آخرة دلعك ومجاغتك معاه , مو قادر يسويلو شغلتين على بعض , هادي دقني إزا فلح .
روح ياواد وأسمع إللي قلتلك عليه وسيبك من هدارة أمك , روح وخليك رجال .
حمزة جاي من الشارع وطالع لأبوه في المبيت .
حمزة : أبويا , يبويا , باركلي باركلي .
الأبو : مبروووووووك ياواد , بس إيشكل الموضوع عشان مسوي هادي الهليلة كلها .
حمزة : قبلوني أشتغل في كندا . سواق يابويا , سواق في كندا .
الأبو : ول ول في كنداااااااااا , وهادي تطلع فين يارمة ؟
حمزة : يابويا هادي هنا في مكة , فييييييييي مككككككككة , يعني جنبك وكل يوم أطل عليك في الدكان في الروحة وفي الجية .
الأبو : تبغى تجنني ياواد , أنا سمعت من الحجاج إنو هادي كندا بلد بعيدة وجنبها بحر مرررررررة كبير .
حمزة : يابويا هادي شركة إسمها كندا دراي حقت قوارير البارد إللي كل يوم نشرب منها في الدكان .
الأبو : هااااااااااااااااااا دحين فهمت . الله يوفقك , وكم حسبولك أجرة ؟
حمزة : 180 ريال يابويا مية وتمانين ريال , ريال ينطح ريال .
الأبو : ماشا الله تبارك الله , يالله لُم يدك في المصاريف وخلي أمك تشوفلك بنت حلال .
( خديجة ـ أخت حمزة ) : يابويا خليه إتهنا براتبه , على طول تبغو تجوزوه ,,, حمزة , فاكر لمن وعتني بالكرته إللي وريتك هيه في الدكان إللى في القشاشية وقلتلي أشتريلك هيه من أول راتب ؟؟؟
حمزة : إكشب حالك إنتي ماتنسي ماشا الله عليك , أبشري يا أختي ياحبيبتي , وكمان فوقها , نقيلك كونترا على زوقك , أنا ليا كم أخت في الدنيا .
خلا نور : الله يخليكم لبعض ياحبايبي ولايحرمكم من لمتكم سوا كدا طول العمر .
الأبو : بس ياحمزة ياولدي لاتنسى أخوك دحمي من أي شي تشتريلو هوه , حتى لو مداس باتا كدا يفرحبو ويدعيلك .
حمزة : أفا يابويا , إنتا ماتعرف معزة دحمي عندي قد إيه , أنا ناوي أشتريلو بسكليته يقضي عليها المقاضي ويروحبها المدرسة ويعاير عيال الحارة بيها .
وكمان إنتا يابويا , ناوي إنشا الله أشتريلك دباب هوندا سبعين يريحك من الحمار وأكلو وقرفو , بس عبي بنزيم وأديلو .
الأبو : إيش إيش إيييييييش , شوف إللي مايستحي , ياواد إنتا تتمصخر بي على آخر الزمن ؟ أفا , هادي آخرة تربيتي فيك ؟
حمزة : إيشبك يابويا ؟ والله ما أقصد أزعلك وأقلب مجازك , إيشبك ؟
الأبو : أنا أركب دباب ؟؟؟أنا أسيب الحمار وأركب دباب ؟؟ رٍكبك عفريت إنشالله ,,, ياواد شايفني من العربجية حقين الدبابات عشان تشتريلي دباب ؟؟؟
حمزة : يابويا والله الدباب أحسنلك من الحمار , عشقو وأمشي , تطلع دحديرة يطلع معاك تنزل نزلة مايقولك شي , مو زي الحمار , عرررررررر بيها يطلع وبيها يتربس ,,, خلاص حمارك عجز ويبغالو يروح دار العجزة .
خلا نور : قاللو متى طلعت القصر قاللو أمس العصر , عشنا وشفنا والله ياحمزة , أبوك يركب دباب .
حمزة : يا بويا والله فهمتني غلط , أنا قصدي أبغاك ترتاح من هادا الحمار , وإزا ماتبغا , بكيفك . طيب إيش تبغاني أشتريلك من أول راتب , لازم ترا .
الأبو : أقولك , بس عشان حلفت وأنا ما أبغى أكسر بخاطرك , شوفلي عصاية مكلفة عشان المزمار والحمار , بس ها ,,, لازم تكون مصرية ومرقدة في الموية تلاتة شهور , أبغاها زي اللبنية في يدي .
حمزة : أبشر يابو حمزة , أبشر , أشوفلك هيه من عند عم صدقة راعي القهوة في السوق الصغير .
الأبو : روح يا ولدي الله يرضى عليك .
حمزة : وإنتي ياست الحبايب , إيش تبغيني أجبلك من أول راتب ؟
خلا نور : يجيبلك الخير ويعطيك خير الوظيفة ويكفيك شرها , إللي تشوفو ياولدي .
حمزة : طيب إيش رايك في كوبر جديد بدل المصدي إللي عندك دا ؟
خلا نور : لا ياولدي , لا , الله يرضى عليك , هادا كوبر دخلتي على أبوك , اليوم لو 25 سنة وأنا دهبي وصيغتي والكحل والبودرة والكولونيا كلها وحنتي وحالي ومحتالي فيه , تبغاني بعد العمر دا كلو أرميه , يكفيني إنو من ريحة أبوك .
الأبو : شوف شوف الولية , يامرة ,,, الله ياخد عدوك , هو أنا مُت ْ لمن تقولي ريحة أبوك ؟ ياشيخة فاولي فال خير الملافظ سعد .
خلا نور : مو قصدي ياسيدي , بس في دمتك ماتزعل إزا فرطت في دبشي إللي جبتلي هوه ؟
الأبو : كيف ما أزعل , الله , دا كلفني دم قلبي ديك الأيام وخلاني أشتغل وأكر على غير قبلة إلين ما دبشتك . وهيه دي حاجة تتنسي .
حمزة : الله يخليكم لبعض , والله يا أمي أنا بس كان قصدي إني أجددلك الكوبر , تدري , أشتريلك واحد تاني وحطيه جنبو تحت الكرويته , ها إي قولتي ؟
خلا نور : طيب ياحمزة , إللي تشوفو ياولدي , بس لا تقولي أستغني عن شي من دبشي مرررررة .
خلا نور : ياخديجة يابنتي قومي سوي براد شاي العصرية حق أبوكي ولاتحطي الحبق معاه , خليه لوحده إزا يبغى هوه يحط . قومي الله يرزقك بولد الحلال وأشوفك في بيت جوزك منورتو .
خديجة : آآآآآآآآآآآآآآآآآآآآآمين يا أمي آآآآآآآآآآآآآآآآآآآآآمين ( قالتها وهي تضحك وقامت بسرعة )
خلا نور : شوف البنت ,,, وه وه وه ,,, والله بنات اليومين دول مايستحو ولافعيبهم نقص ,,,
ــــــــــــــــــــــــــــــ ــــــــــــــــــــــــ
هذه محادثة مفترضة مكاوية الطابع ,,, أرجو أني قد وفقت فيها ,,, ولمن لايعرف هذه اللهجة يمكن أن يضع الكلمات الغير مفهومة وسأقوم بالرد عليها وتفسيرها .
لكم خالص مودتي ,,,