المساعد الشخصي الرقمي

مشاهدة النسخة كاملة : صندل يغير مجرى حياة ؟؟



الملقوف
20-03-2002, 12:25 PM
سلام .

اول شي صبحكم الله بالخير جميعا ويا هلا فيكم جميع 0

صراحة يمكن البعض يلومني عليها بس لقيت نفسي مجبور

اقولها ..

نعم صندل غير مجرى حياتي وياليتي القا ذاك الصندل كان

ابروزه بأطار من ذهب وربي يجزا صاحبته كل خير .

طبعا الكلام هذا ايام الدداسن والشماغ اللي يفوح بخاخ النشاء

مريتو وايام الترزز والكشخات يعني على بلاطة ايام ( المغازل)

الله لا يجعلنا من اهله ولا يعيدها من ايام .

القصة ومافيها اني في يوم انا والشباب توم كروز وطقتة

مشخصين في الشبح الياباني غمارتين استعمال ابو هنود

وطاقين هالمرازيم وريحة الطيب تقتل كل ذبانة تدخل السيارة

تقول كل واحد بيروح لعرس واخوكم في الله اللي هو انا مرتز قدام

بحكم اني اشيك واجمل واحد في الشلة كنت انا اللي بقط الرقم .

ومن زود الشياكة رايح اكتبة على كرت زواج ومتفنن فيه ومن زين

الخشة موقع تحت الاسم ( عدنان ) طبعا متأثر بعدنان ولينا. كنا نطارد

ذاك السوبر بان ما تقول

الا دوريات وهات يا مطارد ومن شارع لشارع ومن لفة الىلفة

والددسن طلعت ريحتها من المطارد والسعابيل تقطر

تحلف اننا اذا وقّفنا السوبر بان نبي نكتب كتابنا على طول !!

المساكين اللي في السوبر بان ملو وخافو منا طبعا اشكال

ما تشفع تغازل ولا بواسة ..

دخل السوبر بان في ذاك الشارع ودخلنا على طول وراه

وطلعت الكرت اللي فيه الرقم وكنت راز خشتي ( متفائل)

وعلى طول وقفنا جنبه ..

انفتح احد ابواب السوبر بان قلت يا شباب السنارة صادت

بتاخذ الرقم بس تراها لي ..

ما ادري الا وقذيفة من العيار الاثقل من الثقيل تمر من جنب وجهي

وتصبخ في باب السيارة

انا حسبتها صعقة والا نيزك والا صاروخ امريكي مضيع زي العادة

واطالع في الارض بعد خويي ما عشق السيارة ودخل رجوله داخل

تانكي البانزين من الخوف داس بانزين بكل رجوله اطالع واشوف ذاك

الصندل اللي عمري ما شفت بحجمه ..

طبعا الجميع ضحك وعلي وعلى اللي صار حتى انا مت من الضحك

بس ليلتها تخيلت ان اللي يطاردون اهلي !! او احد قريب لي

وش بيكون موقفي لو شفت هالمشهد ..

ارضاه على اهلي ؟؟

ارضاه على احد قريب او بعيد ؟؟

صراحة حاسبت نفسي وعرفت اني فعلا غلطان

وقتها تمنيت ان الصندل جاء في وجهي يمكن يكون عذاب لي

في الدنيا ويعفي ربي عن في الاخرة

وقتها عاهدت نفسي وعاهدت ربي ما ارقم او اضايق احد

اخواني خلاصة الكلام اذا حطيت راسك في الفراش بعد

ما تكون طفيت جميع الانوار تخيل نفسك في القبر تخيل انك

خلاص الحين مافيه شي ممكن يشفع لك او حتى يسليك في قبرك

غير عملك حاسب نفسك لو خمس دقايق ان دائن والا مديون

ويا كثر المديونين بس رحمة ربي تسبق عذابه

والله من واحد وواحد بيقول وش جاب طاري القبر يالملقوف

بس هو النهاية الحتمية لنا ..

الله يجمعني بكم في جنات النعيم

وربي يجزا صاحبة الصندل كل خير

* الـمـنـتـظـر *
20-03-2002, 01:24 PM
صباح الخير اخوي ملقوووف ..

وسلامته وجهك الف سلااااااااااامه ..

وأنا أقول وش فيك خشمك مايل على جنب ..:D أثاريه من الصندل

الله على الفشيله ..

مطاردات يا عدنان .. شفت شلون آخرتها مع لينا ..

عاد من زينك تطارد تبي ترقم .. :p

إلأ ما أدري أنت قلت لك ان لوحة الجمس كانت حروفها ( و ج ع ) لا . لا

أفتكرت كان رقمها ( ت ن ك ) :)

أنت عارف و ش الشئ اللي موتني ضحك .. واحد من أخوياك كان يقول

أن مسجل السيارة كان خربان وانك مآآخذين معاكم مسجل استيريو

من البيت ومشغلين اخاني المنتخب .. أبوك يالترقيم ..

أما من جد قصة تهبّل .. ضحكتني والله ...

عموما يا غالي .. أسلوب جديد من نوعه .. مزح وجد

مزحلّلي على جدّلّلي على قول اهل جده ;)

حبيبي الغالي ..

الشئ الذي لا ترضاه في فيك او أهلك لا ترضاه في الناس

كلام جميل ورائع ..

أتمنى أن نراه بعين العقل ..

تقبل تحياتي وتقديري .. ودمت اخ وصديق ( واحد ما يعرفك )

سلاااااام

الملقوف
21-03-2002, 11:05 PM
سلام ...

حيالله المنتظر ...

من ناحية زين فالحمد الله ازين من اللي اشين مني . واذا تبي لي

صورة اذا عندك احد من البزورة غاثك تراها انجح وسيلة تربوية هالايام

اما من ناحية خشمي فالحمدالله اكبر ما فيني خشمي لا صندل

ولا غيرة يميله والحمدالله انها جت سليمة . اما لوحة السيارة

فكانت ( غزل ) . ولون الجمس كان موف وافهمها ;)

بس حتى .. فعلا كنا غلطانين

تصدق كنا مشغلين شريط سعد جمع ( اونا ) مدري بوقا

ويييييين ذاك الوقت هالاغنية كانت في منتهى الرومنسية

والحين لو تسمعها بقرة كان جاها جنون البقر

على العموم اشكرك يالغالي على ردك

سلام

aljenny
21-03-2002, 11:07 PM
أموووت في دقة تحديد الهدف

ياخي وين الأمريكان عن صندلها !


صدقني نفس سالفتك بتصير قريب في أحد المؤتمرات !

وبيتبادلون الصنادل بدل من السفراء !!

يالله .. بروفات على تبادل الأحجار من طرف واحد !



عاااااد بجد مغصني بطني في آخر سالفتك .. مدري وشلون بنام الليله ؟!

الله يستر

صامت
22-03-2002, 12:31 AM
ســلام



قصة حلوة ..واسلوب رائع لاقناع الجني ...وطقته .....لانهم ناس فيهم خير بس يبون شوي تذكير ....عقب ما..تشققوا ضحك ....


الجني /

بتمغصك بطنك من هذه العبارة ((صدقني نفس سالفتك بتصير قريب في أحد المؤتمرات !

وبيتبادلون الصنادل بدل من السفراء !! ))

ماهو في اخر السالفة !!! احذر تسلم ...


صـــــــــــــــــــامت

:sleep:

زهرة البساتين
22-03-2002, 01:25 AM
هههههه


يا هلا اخوي الملقوف



بجد مت على نفسي من الضحك



صحيح شر البلية ما يضحك اعذرني بس ما قدرت امسك نفسي تخيلت الفيلم الهندي هادا



رهيييب بصراحه واحلى مافيه بطلته فازت بدور البطوله بجداااره هي وصندلها:D



فعلا الله يجزيها خير خير ما سوت فيك


سبحان الله كان سبب



والي يعيش يا ما يسمع ويشوف


والحمد لله انك طلعت من الفيلم سالم وغانم بصيانك من الغفله

وتسلم على قصتك الي اسعدتنا بروايتها والهدف منها


:SMIL:

مرسال
22-03-2002, 03:01 AM
سلام حمد

زماااااااااااااااااااااااااااا اااااااااااااان عنك

تصدق اشك انك الملقوف اللي اعرفه

ولا غلطة املائية حصلت:D

بس اعتقد ان الصندل هو سبب التدهور اللغوي اللي عندك

يعني لو(صقعك)الصندل كان تكلمت(اوردو):p

بس الحمدلله جت سليمة

اقول ادعي لي ان ردي على موضوعك يخليني متوازن الخطوة

تراني مليت من(الحبي)وتجرحت رجولي

سلام وسلم لي على الدكتور ملفوع خلاص

سلام للمرة المليون

مرسال
22-03-2002, 03:03 AM
حمد وجع

شكلك مادعيت

الرد اللي فوق ماخلاني اتوازن

اذا الرد هذا ماتوازنت فية بتلقى لي كل شوي رد

ندعس ارسال الرد ونشوف

شعاع الأمل
22-03-2002, 04:21 AM
الصندل المحتاس.... عذب وايد ناس :moh:


بصراحه تسلسل روعه للاحداث
ونهايتها صندل رجع لك عقلك

ياليت كل الصنادل تهدي شبابنا وبناتنا قبل لا يجربونها


الله يرحمنا برحمته اللهم حسن الخاتمه

الملقوف
23-03-2002, 12:11 PM
سلام ....

حياك الله الجني ..

عاد تصدق سياسة الصنادل اعتقد انها انجح سياسة .

ياخي ايبس من راسي مافية .. بس شف لما خطم الصندل

من عندي وشلون .. والله يكثر من الصنادل وصاحبات الصنادل

مع العلم الحين انا صنادل هالوقت لو ينضرب فيها الكافر

اسلم .

حياك الله اخوي الصامت .. عاد تصدق اني اجزم ان الجني امام

مسجد ( انشاء الله ) .

ما اصدق مرسال مرة وحدة !! وانا اقول وين الرقيب اللغوي

حياك الله اخوي مرسال وابشرك اني في الاملاء 9 من عشرة

لاني للحين ( ض - ظ ) ما دخلن راسي ما اقتنعت فيهم للحين

يا خي اكره ماده عندي اللغة العربية واللي يدرسونها كيف

تبيني ابرز فيها ..

والله بدعي لروحي اصير متزن الخطوة للحين هدا هدا زيي زيك..

..

اوه نسينا زهره البساتين .. هي مجموعة افلام بس الفلم

هذا كان الحلقة الاخيره ..

حياك الله يا شعاع الامل والله يسمع منك المصيبة الحين

ان فيه ناس ( بنات ) يبون زبيريات .

سلام

البندري...
23-03-2002, 02:17 PM
هلا والله بملقوف باشا...

رووووووووووووووووووووووووووووو وعة..:D.

بس والله الحمد لله ماكان جات على وجهك...

بس لو كان جا ........................... اف ............:eek:...


ويسلمووووووووووووووووووو اناملك اخوي.:):):)..

قصة روووووووعة.:)..

اختك:
البندري...

BackShadow
23-03-2002, 02:47 PM
هلا ملقوف

بصراحة .. مغامراتك كانت شي ثاني


اتخيل شكلك وانت مشغل رباب وداخل جو

والياقة ام ثمنطعشر زر :hap:


اللللله لا يبلانا بس ....

بس زين انك انعدلت بعد ذي الحادثة

بعض الناس بيني وبينك تلاقيهم مجربين كل مقاسات الجزم ولا هامهم شي



مع تحياتي

الملقوف
24-03-2002, 12:53 PM
سلام ...

صبحكم الله بالخير جميعا ..

حيالله البندري وتسلمي ..

هلا والله بالظل .. تصدق اعتقد ان رفيقي صاحب الددسن راح

يسمكرها عقب هاك الصندل !! ( قوية ) ..

ياخي على قولتك والله الحين لا صنادل ولا زبيريات تنفع

يمكن كلاشنكوف ..

الشيهانة
24-03-2002, 01:18 PM
صبحك الله بالنور والسرور يالملقوف


والله اني ضحكت يااخي لين انخنقت حسبي الله على ابليسك


هذا كله على صندل لو كانت جزمة كان شسويت؟؟:D :D


اعتقد كان تحجبت :D :D :D


الله يثبتك ويهدي الجميع..






ولك كل خالص التحايا

الملقوف
25-03-2002, 12:40 PM
سلام ....

مساك الله بالخير يالشيهانة ....

ليه ما تقولي طيب لوهي صاكتك بالجزمات اللي الحين تقولي

انها جزمة لابسة حرمة من اللي كعبها متر و48 سم ..

انا شفت والجميع بكرامة جزمة في احد المحلات في صحارى

قلت للي يبيع صديق فيه نفر يشتري جزمة كذا ؟

قل ايوه هذا موديل صديق ...

قلت الله يجزا هالايطاليين خير ... خابرين ان فيه بنات الوحده

طول علبة الكبريت وتبي شي يرفعها