. . . أنت .. من تكون ؟ . . .

[Sami96SA]

صباح الخير


شخص تعزه .. وتظن أنه يعزك.

يوما ما ومن دون أن تقصد قلت كلام جرحه أمام جمع من البشر .. فزعل.

جل من لا يخطئ.


وبعدها بوقت قصير أخبرك بأنك أزعجته بكلامك وجرحته .. فهدد بأن يتخذ منك موقفا .. لا تدري ما هو.


وأمام الجميع .. له اعتذرت.


لم تكتفي .. بل أرسلت له اعتذارك مكتوب بحروف من أسى عله يصفح عنك ويسامحك .. لأنك تعزه معزة صادقه.

إذ تعتبره كأخيك .. بغض النظر عن ماذا تكون بالنسبة إليه.


إذا كان الله غفور رحيم .. من تكون أنت يا بني آدم كي لا تسامح لأخيك خطئه؟


من تكون؟


أخبرني .. أخبروني أنتم.


والله حاله.

-----------------

سامي

[ROMEO]

روميو يا دلخ!!

تراك تعبتني كل ما أكتب رد بالدرر يطلع بمعرفك!!!

حل عن سمايا!!

والله حالة

(سومة راجع بس خلني أسجل خروج من المعرف المنحرف هذا)

[أرسطوالعرب]

بسم الله الرحمن الرحيم
(*ومايلفظ من قول إلا لديه رقيب عتيد*)
السلام عليكم ورحمة الله وبركاته....


أهلين سامي.......<===الحين أنا أرسطوالعرب أوكي :D

شوف حبيبي...

قبل ما تسأله من يكون أو ويش يكون...

أحكم على غلطك.....

هل غلطك تمحيه كلمة (آسف) ...أو حتى إعتذار قدام الناس ولا لأ؟؟

وربنا يسامح اللي يتوب ....لأن ذاك ربنا.....(العفو الرحيم...الكامل)

لكن ويش إحنا غير بشر وعبيد أولاد عبيد أولاد أولاد عبيد الله...

فلاتقارن بين آدمي وبين الله ..

نفس السؤال اللي طرحته لفلان....إطرحه لنفسك يا سومة...

من تكون يوم غلطت عليه بالمجلس؟؟

نصيحة أخوك الصغير...
إذا إعتذرت له وما زال على موقفه ....إحذفه من جوالك ومن النوتة ...ولاتحاول تجلس معاه نهائياً...لأسباب كثيرة
أولها إنه مالك وجه تقابله ....وآخرها إنه باعك

أدري شكلي كاتب رد ومعصب...لكن من الغثيث روميو ....كل ما أكتب رد يطلع بروميو !!!
معلومة على الطاير .....روميو يحتاج يجدد إسلامه ....




---------
أولى أبواب الفضيلة.....تقييم الجهل
----------
ثـامـر الـحـربـي

[ابوشهد]

يا عمي يا سامي
ان قبل العذر قبل العذر ان ما قبل العذر ترى عقله صغير وما يستاهل اصلا اني اعتذرله ولذلك لا تندم على انك غلطت في حقه ولو شفته مو راضي يقبل عذري اسحبه على طول
او حتى تبردها على قلبك سوي مقارنه بينه وبين ابوك ابوك لازم ترضيه لو بمذله لك بس هو والوالدة الاشخاص الوحيدين في الدنيا اللي يستاهل الشئ هذا لذلك تبرد على قلبك ان رضي ولا ما رضي لانه لو يحلم ما راح يوصل لمكانة الوالدين عندك
بعدين يا اخويا سامي ضاع صاحب مو مشكلة اللي جمعك فيه وخلاه صاحب لك بيجمع باللي احسن منه .............قادر يا كريم.............

[ابوفهد]

مرحبا باخي الحبيب سامي

السلام عليكم ورحمة الله وبركاته

كل انسان معرض للخطاء مهما كانت درجة حرصة وحذرة

جل من لا يخطئ وهو العزيز الحكيم

لكن مع ذلك يجب على كل احد منا ان يكون حذراً جداً

وان يزن كلامة بدقة متناهية ويعرف متى يتحدث واين يتحدث

فليس كل صديق او قريب يتحمل المزاح او الخطاء باي شكل كان

وبعكس ذلك هناك اصدقاء واحباب قلوبهم اكبر من ان يؤثر فيها

كلام بسيط او غلطة عابره

وصدقنى ان من قلبه كبير ومملؤ بالايمان لن يؤثر فيه الكلام

الذي تسببت فيه بالخطاء عليه ولو انه عاتبك وهذا من حقة

على كل حال التسامح من اهم صفات المؤمنين

فعلى المخطيء الاعتذار لصديقة وعلى الصديق قبول الاعتذار

واحتساب ذلك عند الله فهو الغفور الرحيم

بس تدري عاد ياابو احمد

الواحد لما يخطىء وهو مؤمن يحس بتانئب الضمير ويضيق صدرة

الى ان يعفو عنه صاحبة

بس كان الله بعونه لوكان صديقة نذل وحب يستمر بتعذيبه

عقاباً وتأديبا له حتى يعرف كيف يتكلم مرة اخرى

تحياتي

[الشمس]

سلام سامي :)..


تنويه :
الاعتذار لو صدر من المخطئ تراه له !
بمعنى أنه يعتذر عشان يرضي نفسه وضميره أول شي
والاعتراف بالخطأ قد لا يعنيني ولا يفيدني بشي بقدر مايفيد اللي أخطأ واعترف ..
لأنه باختصار الاعتذار ما يرجع يعيد الموقف ويغير فيه ولا حتى يمحيه ولا حتى يمحي أثره..
الاعتذار مجرد طلب غير مباشر لفتح صفحة جديدة لكنه مايقطع الصفحات القديمة ..


وطبعاً لا يعفو إلا من كان قوي ..
لأن القوة هي في السيطرة على النفس وترويضها لما يحب الله,
والقوي مارح ينتظر لا اعتذار ولا غيره عشان يفرض قوته .

أما عن من تكون؟
أكون إنسان أخطأ في حقه إنسان آخر خطأ ماقدرت أنساه ولا أنسى وش سوى فيني ..
شسوي إذا كنت كل ماشفته تذكرت اللي صار ورجعت أحس فيه من جديد!
على فكرة الكسر في الزجاج مهما حاولنا جبره يبقى شرخ ..
يعني لا تغلط وتنتظر بثقة يرجع " كل شي " مثل ماكان, وتحس أنه هالشي من حقك, لأنه إذا رجع فهذي نقطة تحسب لصالح اللي انت غلطت عليه ومو لك لأنك اعتذرت :)


هذا رأيي :rolleyes:

الشمس :)

[Sami96SA]

صباح الخير


أرسطو

صح كلامك .. من أكون أنا عشان أغلط على أخوي وبعدين وبكل سهوله أطلب منه يسامحني!!

لكن نسيت شي .. أنا صاحبه اللي يغلاه بالحيل ولو غيره ما أخطي عليه حتى بدون قصد .. اعتبره خطأ عابر وما راح يتكرر.

أنا أفرق عنه اني اعترفت بخطئي.

أنا أفرق عنه اني أعلنت له وبكل صدق محبتي ومعزتي له.

أنا .. أنا اعتذرت له وقدام خلق الله.


لو كل صديق زعل على صديقه بسبب خطأ عابر من الأساس ما كان يقصده كانت الدنيا خلت من الخلان والأصدقاء.

كم وكم نسمع كلام من أحبابنا يجرحنا ويزعلنا وبعدين نتسامح ونرجع مثل أول وكأن اللي كان ما كان.

ونحاول ما نكرر الخطأ.


ياريتني حافظ كم آيه وكم حديث يتكلمو عن العفو والمغفره عند الإستطاعه.


باختصار يا ثامر .. الخطأ بين الأصحاب وارد ومافي أحد في هالدنيا يقدر يقول لك أنا ما غلطت على أحد في حياتي كلها .. أي نعم في ناس عندها إمكانية التحكم بأقوالها وأفعالها حتى وقت المزح عشان لا يضطر يقول آسف.

وفي ناس ما يحب تكون علاقته مع صديقه رسميه حيل ويقعد يركب له ميزان في لسانه عشان كل كلمه تطلع تكون موزونه .. ياخي هذا صديقي وأعزه وأبي أمزح معه لازم يتحملني أو من الأساس حط شرط لهالنوعيه من العلاقه مع هالبني بالتحديد.

تقول له من الأول .. لااا تمزح معي.


-------------------

سامي

[Sami96SA]

صباح الخير

يسعد صباحك يبو شهد

كلامك يبرد على القلب يبو شهد .. ما شا الله عليك حمش.

مثل ما قلت .. هو صحيح عزيز بس ما يوصل إلى درجة اني أترجاه يسامحني .. لكن السؤال اللي يسدح نفسه"

ليش انت يا بني آدم تصيبك هالشوفه في نفسك اللي تخلي صاحبك يترجاك تسامحه؟

ما يدري وش كبر هالشي عند الله.

إبليس اللي هو ابليس يطالع وراه وهم ساحبينه لجهنم ويسألأونه وش تطالع يقول أترجى مغفرة ربي ولآخر ثواني.


انت تعرف وش ثوابك عند الباري الكريم لمن تقبل اعتذار أخوك المسلم؟

ما ظنيتي هذا يدري .. أهم شي عنده انه حس ببعض من كبريائه رد له وانه بذا الحال يفتكر انه ملك الدنيا وما فيها.

أقول له مثل ما قلت يبو شهد .. طز فيك.


فيه هو يبو شهد مو فيك انت :)


بارك الله فيك وفيذا اليوم اللي عرفنا فيك يبو شهد.


-------------------

سامي

[Sami96SA]

صباح الخير

يا هلا بالغالي أبو فهد

جزاك الله خير وما قصرت بكلامك الطيب يبو فهد.


هذا كلام كبير ما ينقال إلا من واحد كبير ومتمرس في العموديه.

أقول يبو فهد الحق على نفسك ترا ميري ناويه ترشح عمده غيرك في نسيج وبسام بينتهز الفرصه في غيابك.

نرجع لردك يالحبيب.

خليني أقرب نوعية الخطأ اللي صار على صاحبنا في الموضوع .. أو نعطي مثال.

لو مثلا يعني أنا قاعد معكم في ثلاثياتكم في جده غير .. وفي وسط الكلام والضحك طلع مني كلام من غير قصد .. القصد كان بس الفرفشه والتحرش العادي بين الحبايب.

الكلام هذا عباره عن "بالله شوفو واحكموا مين أكبر أنا والا أبو فهد؟"

أنا أدري أنا أكبر منك .. وانتي مأكد لي من مقابله سابقه .. وموصيني بعد من أول لا نجيب طاري الصغر والكبر .. بس أنا ما مسكت روحي وقمت قايلها بصوت عالي عشان أتحرش بصديقي الغالي أبو فهد.

تقوم انت تزعل .. وهذا من حقك .. لأنك عزيز وغالي.

بس أنا لأني أعزك أكثر أقوم أحب على راسك واعتذر لك على ثقل الدم مالي وأوعدك ما عيدها مره ثانيه.


ما بتضحك بعدها يبو فهد وتسامحني وتقول حصل خير؟


احكم انت وقول.

---------------------

سامي

[Sami96SA]

صباح الخير

سلام شمس

أولا تنويهك في محله.

من يعتذر على خطأ ارتكبه بحق انسان آخر يفعل ذلك لإرضاء نفسه وراحة ضميره .. والأفضل أن يكون مرضاة لله أولا لأن جميع أفعالنا يجب أن توجه في المقام الأول لمرضاة الله واتباع أوامره.


القوة ليست في قبول الإعتذار ونسيان ما حدث .. ربما تكون .. ولكن ليس كتلك القوه الذي يتمتع بها المعتذر خاصة إذا هو عربي.


ماذا يعني أن نعتذر؟

يعني أننا بني آدميين أذنبنا وأخطأنا واعترفنا بذلك وتبنا وأصلحنا .. وتوبتنا الآن عند قاض وجلاد إنسي.

فقط قارني الفرق بين عظمة الله الذي وسعت رحمته كل شيئ .. وبين هذا الشيئ الذي يتمادى بكبريائه ولا يغفر لخليله خطئه.

الله القوي والغني عن عباده يغفر ما تقدم وما تأخر .. وهذا الهيكل المتحرك بإرادته تعالى يتعالى ويزداد علوا وغرورا.

صديقك .. صاحبك .. خليلك .. ابن عمك .. أخوك .. جارك .. ابن أمتك .. ابن قريتك .. قرينك .. قريبك .. أخ لك في الدين .. مسلم مثلك ..

أخطأ عليك واعترف بفداحة خطئه واعتذر.

وأنت تقول لا .. فالجرح مازال ينزف.


وما تمثيل هذا الخطأ بالجرح إلا مجازا يا سيدتي .. فمالخطأ إلا مجرد مزحة ثقيلة يتناساها صاحب كل قلب كبير.

هنا المحك.

صاحب قل قلب كبير .. وأين هم في هذا الزمن يا شمس؟



الخطأ بين الخلان والأصحاب وارد .. والنبيه هو من يراعي مشاعر الآخرين .. أصدقاء كانوا أو غرباء .. والإعتذار هو ردة فعل طبيعيه لشخص عرف كيف يحافظ على علاقته الطيبه مع صديقه .. وتعني أيضا درسا له كي لا يكرر خطأه.

ولن يكرره .. لأنه سيضع لتلك العلاقة حدود لن يتعداها في المستقبل.



(أنا ضعيف في القواعد لذلك أرجوك لا تدققي في الخطبه) :)

---------------------

سامي

[مرسال]

مساء الخير ابو أحمد

كيفك عيوني

شوف في البداية كلنا نعرف ان نفسيات الناس تختلف من شخص لآخر والشئ هذايفسر

اختلاف ردة الفعل بين الناس.

يعني المفروض ماأقيس الموقف هذا على نفسي لأن نفسيتي تختلف عن نفسيتة

هذا بشكل عام

لكن من وجهة نظري المتواضعة والمتواضعة جدا مبدئيا انك ماقصرت

لأننا مانعرف حجم الخطأ اللي سويتة،لو عن نفسي اتوقع ان واحد مثلك ابو احمد

اخطائة اكيد بتكون عكس عمرة;)

الشخص هذا اكيد عزيزعليك ولا ماكان نزلت موضوع علشانة وأتمنى أنه يقرأ

الموضوع علشان يعرف صدقك.

لأن كثير يشوفهابايخة في حقة اذا اتخذ طريقتك لكن صدقني ابو أحمد حركتك هذي

كبيرة ماتصدر الا من انسان كبير.

أخير (لأني بديت أحس أني طولت:))

أنت سويت اللي عليك،لكن توقعي أن هذا الشخص عزيز جدا عليك بلغة بحاجة واحدة:

أنك موجود وانك سامي الأولاني ومتى صاحبك راجع حساباتة وأكتشف انك ماتستاهل

كل هالصد منة ،يرجع لك وراح يلقاك مثل ماكنت أبو أحمدصاحب أطيب قلب

ولا أنا غلطان

تحياتي لك ابو أحمد

[المهاجرة]

يمسيكم بالرضا


ويمسيك بالرضا يالباشمهندس :)


عندي كلام كثير وملخبط مثلي بحاول ألخصه :


- الكمال لله وحده وكلنا نغلط ونغلط ونغلط

مو بس غلطه عن غلطه تفرق .. إلا صاحب غلطه عن غيره يفرق !!



- الله يسامح صح بس اللي بينه وبين عبده فقط

اللي بين العبد والعبد ما يسامح فيه إلا إذا سامح المُذنب بحقه ( حلوه المُذنب بحقه انواع التعبير :( )


- لمن اعتذر و ما ألقى الصفح بتاخذني العزه وأنا مجرد ( بشر ) وبقول من يكون هذا عشان ما يسامحني ( طيب الحين أنا ليش أعدل غلط بغلط مو كني ما اعتذرت :) )


- لا تعتذر وتنتظر صفح ولكن اتمنى ( ما ) يكون للصفح رواسب !!




ويا سامي طالما صديق عزيز لا تستعجل على قلبه ما تدري لو هو أبيض عليك بس منكسر خاطره منك .. يا أخي اعطيه وقت

وقت يقرا الكلام اللي أزعجه

وقت يستوعبه

وقت يتألم ويحزن لأنه وصل له من صديق عزيز وقريب لنفسه والكل بدون استناء يقرا له ويحترمه

وقت يتعب اكثر ويبكي

وقت يقرا رساله اعتذارك

وقت يرد عليك وهو معصب ويقول ما ابي اعتذارك ولا ابيك :)

وقت يقرا موضوعك ويرجع من جديد يبكي أو تلمع عيونه

ووقت ينسى

ووقت يقول لك فيه ( يا اخوي وينك صرت ما عاد تنشاف :) )


المسأله يا سامي يا اخوي مسأله وقت فقط !!



أهم شي تأكد وطمن قلبك .. طالما صديقك وتعزه ويعزك وانت سامي السامي .. مرده يجيك يقول لك ( سامحني خلاص :) )


حنا بشر وعزه نفسنا تاعبتنا حبتين .. تلقاني بننطق الكلمه والكبرياء يردنا عنها .. ولا غاب عن نظرنا من نبغا نصفح عنه وما درى عنّا بكينا وقلنا مسامحين والله مسامحين :)

[BackShadow]

يسعدلي مساكم جميعاً


شوف يبو احمد ...

الموضوع انت في ردودك الاخيره حصرته في مثال معين

واجابتي على مثالك هذا اللي ضربته بابوفهد انه لازم يسامح وينسى


لان الموضوع تافه ولا يستاهل


بصراحة انا الشخص اذا وصل عندي الى مرحله الصديق المقرب فانا اغفر له زلاته بشكل عام ... الا اذا اخطأ خطأ كبير في حقي .. فهذي لازم يكون لها ( عقاب )

وبعد العقاب اكيد حترجع المياه الى مجاريها


عادة يختلف التقييم للخطأ من موقف الى آخر ومن شخص الى آخر


يعني الشي اللي يزعلك انت مو بالضرورة انه يزعل غيرك

والعكس طبعاً


لذلك اتفق معاك بان الشخص هذا المفروض انه يسامحك

والمفروض انه ينسى الموقف ...

وبالعكس انت في الحالة هذي لازم تكبر في نظره

لانك اعتذرت له قدام الناس

بينما انت كان ممكن تعتذر له في وقت خاص فيكم



عموماً ... انت ارضيت ضمرك وسويت اللي عليك


وتراني مسامحك يبو احمد :hap:


ما فيه داعي تشهر فيني بين الناس :005:


مع تحياتي

[Sami96SA]

مساء الخير


يسعد لي مساكم جميعا


هو صحيح الموضوع شكله شخصي لكني أتمنى كلنا نستفيذ منه .. ونا يوم نزلته كان في بالي هذا الشيئ وهو ان النقاش في الموضوع ياخذ جانب العموم .. بالإضافه إلى التعقيب وإبداء الرأي حول المشكله المطروحه.

والحمد لله ما خاب ظني.

أنا جرحت اصبعي وحبايبي تسابقوا يوصفوا لي دوا .. وبجي يوم أنا بعد بسوي فيها أبو العريف واوصف دوا للي يشتكي حاله.

وهلم جرا.


ما تلاحظون شي؟


الحلول لمشكلة ما .. مهما كان حجم المشكله تتوارد لذهن الشخص الغير معني في المشكله .. ويقعد يتفاهم مع ذي الحلول المتراكمه ويحتار وش يختار منها عشان يعطيها لأبو المشكله عشان يجرب هالحل اللي يشوفه المناسب.

لكن لين صار هو في مشكله مثلها أو مشابهه لها يبتلش بعمره ما يدري وش يسوي .. أو يمكن يعرف وش يسوي بس يفكر بصوت عالي .. تماما مثل اللي قاعد أنا أسويه.


مشكوريين يا غاليين.

--------------------

مرسال

حبيبي انت .. مو كنك صاير هذار هاليومين .. الأول ردك يا الله بالكثير سطرين والحين ما شا الله عليك تكتب معاريض .. وتلف بي سبع لفات لين مادوخ سبع دوخات وتخلي الزبده في الأخير.

هالمره يبو المراسيل بابدأ قرائة ردودك من الأخير :)


بقول لك شي حبيبي

انت تقول أخطائي المفروض تكون عكس عمري .. يعني كل ما كبر بي العمر تقل أخطائي .. هذا المفروض .. لكن مو بالضروره يكون قاعده لجميع الناس.

لكن الحمد لله كلامك انشا الله صحيح .. لأني لو أعمل مقارنه بين الحين وقبل كم سنه أشوف الحمد لله الأخطاء في نقصان .. ولا أزكي نفسي أبدا.

وبقول لك شي ثاني يبو المراسيل .. الشخص هذا أنا أعزه حيل بحسبة أخو والله ودايما أنا وهو نتمازح بس مني متأكد إذا هو معتبرني مثل أخوه والا بس مجرد معرف .. أوبس قصدي أي شخص.

على قولتك أنا سويت اللي علي والباقي عليه هو.

أنا قلبي مفتوح على طول.


مرسال .. تسلم لي دايما.

-----------------

سامي

[Sami96SA]

مساء الخير

لحضه شوي يالمهاجره

أبي أكمل كلامي اللي سبق ردي على مرسال.

عشان لا أنفهم غلط أبيكم تعرفون اني ممتن كثير ومقدر كل الكلام اللي قلتوه في ردودكم ولو أنا جيت الصباح وقريت ذا الموضوع راح أقول تقريبا ملخص للي قلتوه كلكم مع بعض التحفظات.


أستاذه مهاجره

من كثر ما كررتي كلمة "الوقت" صرت أطالع في الساعه وقول أففففف متى بيخلص هالدوام :)

كلامك على عيني وراسي بس صاحبنا هذا أخذ وقت كفايه حتى أنا صابني نوع من اليأس انه راح يسامح.

تعرفين يوخيتي

أنا واحد من الناس ما أقدر أنام واعرف اني مزعل أحد أو أسمع شخير :D


بس أي سبب ثاني ما يوقفني عن النوم.


يجيني وجع ضرس .. أنام.

يصير علي دين لحد .. أنام (مش أوي يعني).

يوم كنت قريب أعرس .. نمت ولا عندي فيها .. بعرس بعرس وشوله أفكر ولا أنام.

لين انهزم المنتخب .. أقعد أتقلب لي ساعتين وبعدين أنام .. بس عيبي أقعد أنتقذ في المتسبب في الهزيمه .. ودايما هو سامي الجابر.



عشان كذا أنا ما أتحمل أعرف واحد حامل في قلبه علي شي.


لكن بصبر وبتبع نصيحتك .. إن قبل اعتذاري كان بها وإلا نصيحة أبو شهد موجوده.

تسلمين على وقتك.

وعساني ما أنحرم من نصايح أختي الصغيره في السن.


-------------------

سامي

[Sami96SA]

مساء الخير

حبيبي حماده

حمودي


المثال اللي حطيته في ردي لبو فهد تقريبا مشابه للخطأ اللي ارتكبته في حق المعني .. يمكن أكبر شوي بس هو في هالحروه.


أنا أعرف ناس يسوون فيها ثقل ونا عندي كرامه وماني عارف أيش.

هذول أقدر أتفهم موقفهم لمن يكون المخطي شخص عابر ومالي علاقه فيه .. بس لمن يجيني واحد أعرفه واعرف سلوكه من سنين وفجأه غلط علي (ومن غير ما يقصدها حرفيا) وش الداعي اني أسوي فيها كل هالمقامات والحركات.

هو صحيح الواحد لازم ينتبه لا يغلط على أحد بس ياخي تجيك أيام تقول كلام أو تسوي شي من باب الميانه يتضح انك كسرت حاجز الخط الأحمر .. هذي تصير.

حاجه سيئه انك تخطئ والأسوأ انك تتمادى في الخطأ ولا تعتذر.

بس أنا اعتذرت يا محمد .. والله العظيم اعتذرت :)


ما علينا من ذا كله.

خلك معاي دقيقه وحده يبو الشباب.

لو في يوم من الأيام جاك أبو رهف ورحت انت وياه وخيمتو في البر .. وبعد جوله متعبه في قنص الضبيان رحت انت في سابع نومه .. وأبو رهف من كثر ماهو يشرب شاي طول اليوم صار صاحي ومو قادر ينام.

طالع فيك وشاف حاجه غلط (لا سمح الله).

شاف ان شنبك كبيييير قوي ومسوي لك زحمه على خدودك وبراطمك وخشمك.

جته فكره .. جاب مقص من درج سيارته (مدري ليش يحط مقص في درج سيارته)

المهم جاب المقص وصار يخفف من الشنب يمين يسار .. عند الخشم .. لين ما صار شنب أخف من ذي قبل.

من وجهة نظر أبو رهف .. مزحه ويتوقع انك بتزعل بس بعدين لمن تشوف شكلك بالشنب الجديد موديل سيبتمبر 2002 بتنبسط وبتمشيهاله.

لكن انت ما تمشيهاله .. تقوم تزززززعل .. وتشخط فيه .. وتأنبه على فعلته .. على مزحته الثقيله .. كلو إلا الشنب.


يجيك أبو رهف ويعتذر لك .. وتصير خديداته حمر وهو يترجاك تسامحه على دي الفعله الشينه.


هل؟


أنا أسأل ... هل؟


هل بتسامحه والا بتقول له اصبر شوي لين ما يوقف نزيف شنبي؟



تحياتي أبو ظلال.

--------------------

سامي

[BackShadow]

يسعدلي مساك سومة


حبيبي مثالك ذا حق ابو رهف شطحت فيه كثيييير :hap:


انشهد اني انتف رموشة رمش رمش

وبعدين اعلقة برجولة كانه واحد من الضبيان اللي صايدينها

واجمع عليه اربع ضبان يحرسونة من كل جانب

واخليه على ذي الحالة يومين الين يرجع شنبي زي ما كان


قال ايه قال يقص لي شنبي :cool:



ابو احمد ... المثل يقول :

بعض الجروح لا جت من اغراب عادي

الجرح موت الجرح لا جاء من احباب



بس تاكد ان صاحبك قلبه كبيييييييير وبيسامحك :SMIL:


انت اخونا العود يبو احمد وما لنا غنى عنك


مع تحياتي

[الشيهانة]

مساء الخير سامي..

قد لايكون صاحبك رباً..

ولا ملاكاً..

ولا قديساً..

بل بشر له مشاعره..وكرامته..



صاحبك هذا ..

أحبك واغلاك.. وأعلى شأنك في عقله وقلبه ..

فلم تعد كلمات تصف قدرك عنده..

وتلاشت بينكما كل المسافات..

كنت بالنسبة له أخ لم تلده أمه ..

تشاركتما المرح ..والبساطة..والأخوة الشفافة..

وذات يوم..

وفي لحظة صفا..وود..

وفي غفلة منك..ومنه..

امتدت يدك ولطمته على وجهه..أمام الاشهاد..

وتوقف حينها كل شيء..

وحاول هو وئد كل تفكير بما حدث..

راجعت نفسك..بعد إيماءه بسيطة منه..

واعتذرت..

ولكنه أنزوى ..وآثر أن يبتعد ..

أراد أن ينسى ..ويحاول العودة..لكن دون رواسب ..

اعتذارك كان يعني له الكثير..

أظن ان الفترة التي انزوى فيها صاحبك..

اعتذارك المعلن والغير معلن..

قدرك الكبير في قلبه..

كل هذا قد طبب جرحه..

ولكن مستقبلاً ترفق به ..فقلبه لايستطيع تحمل طعن الأحباب.




احساسي يقول أن صاحبك قد عاد..:) :)




دمت ودام قلبك الكبير ودامت لصاحبك أخوتك;)

[BackShadow]

يسعدلي مساكم جميعاً



خلاص يا سومة ... ما قلنالك مسامحينك



تصدق

كبرت انت والشخص المقصود في نظري وقلبي كثييييير


الله لا يحرمني منكم ::]



مع تحياتي

[Sami96SA]

صباح الخير

يسعد لي هاصباح الجميل

كجمال عيونكم أحبتي


سيدي الظل


شوف حبيبي .. أنا يوم قريت ردك وتعليقك على أبو رهف ووش بتسوي فيه لو قص شنبك قسما اني فطست ضحك وصرت أتخيل وشلون الضبان الأربعه بيحرسون أبو رهف.

تلاقيه بيتفاهم معههم يحلوا عنه بدون فايده.

انت يا ضب .. وانت كمان يا حبيبي روح لك مشوار كذا .. طيب روح جحرك لا يتسرق من الضبان الثانيه .. أو أقترح عليكم تشوفوا الملقوف وهو يقتل في أخويانكم.

ما تحلوا عني ربي ياخذكم .. منك لله يا ظلاليلو.


ههههههههههههههههههه


تسلم يا مدير على هذا الدعم المعنوي اللي خلاني أأكد لمرات متتاليه أن أبو فهد عرف يحط الشخص المناسب في المكان المناسب.


عسانا ما ننحرم منك أخ نكن له الإحترام والتقدير.


---------------------

سامي

[Sami96SA]

صباح الخير


الـشيهــانـه


صاحبي هذا ليس بالجديد في حياتي المنتدوياتيه .. فلي معه ذكريات.

طير عرفته في بداياتي يحلق في سماء الإبداع .. وقلم طالما أبهر القاصي والداني وهو يغزل سترات تدفئ حنايا المنتديات.

معرف أجبرني وأجبر المترصدين على احترامه والتصفيق له على ما أظهره من براعة في التصدي لخزعبلات التافهين .. معرف جمع الجد في الهزل والمرح في الحزن وتدفق ينابيع من مواضيع متنوعه تناولتها الأعين فأسعدها ما قرأت.

صاحبي هذا يا شيهانه فرض علي أو بالأصح فرضنا على بعضنا جرأة الخروج عن روتين نصوصنا في الردود كل على الآخر .. فاستحببت ذلك واعتبرته شيئا جميلا لا يكون إلا من شخص يكن لك الأخوة والمحبه .. واحترام متبادل.

يوما ما.

وكأني كنت أعلم أن هذا اليوم قادم.

يوما ما .. لم أدرك أن الخروج عن روتين الردود يعني عدم التمادي في قذف الكلمات و "القفشات" هكذا بدون مراعاة للشعور .. وبدون احترام الخطوط .. تلك الخطوط التي كان علي مراعاتها حتى لو لم تكن ملونه وواضحه.

ولأني بشر .. أخطأت في تقديري لحجم ثقل المزحه .. فخرجت عن النص وتعديت الخطوط .. وجرحت هذا الصاحب.

لا تعلمي يا عزيزتي أي شعور بالذنب انتابني بعدها .. خاصة بعد أن أومأ إلي هو بما أصابه من إحباط جراء ما قلته .. وسألت نفسي بعدها "وهل الإعتذار سيشفع لي لو فعلت؟!!"

فاعتذرت.

ولأني أعلم معزتي عنده وأنه سيتفهم أنني لم أكن أتعمد أن أجرحه بتلك الطريقه والأهم أنه متيقن كونه يعرفني جيدا أن ما حدث كان عباره عن "مزحه" ثقيله أتت في وقت ومكان غير مناسبين.


انتظرته أن يرد علي ويقول أي شيئ .. أي شيئ.

ولكنه لم يفعل .. فازدادت حيرتي وازدادت تساؤلاتي .. وصدقيني يا غاليه أنني لم يخطر في بالي أبدا أنه سيجعلني أنتظر رده طوال هذا الوقت .. ولا أخفيك أنني أحبطت .. وبعدها فكرت.

وقررت أن لا أتمازح مع أحد وأكتفي فقط بالردود الجديه في المواضيع الجديه .. كي لا أصبح في موقف مماثل .. وكما تعلمين نحن بشر غير معصومين فلربما أخطأ مرة أخرى وتتراكم معي مشاعر العتاب على نفسي المتعبه مسبقا.


والآن وقد طمئنني الظل وأنت بأن صاحبي قد قبل اعتذاري فلا أجد كلمات أصف بها سعادتي .. ولا أعرف كيف أصمم من الكلمات عهدا وميثاقا على الوعد بعدم تكرار ما حدث .. ولكني أستطيع أن أخبره وأأكد له أنه لا يزل صاحب قلب كبير كما عرفته وأنني ممتن له قبولي مرة أخرى في حياته المنتدوياتيه.

وسنمزح وسنمرح .. ولكن بحدود .. وهذا هو وعدي.


تحياتي للجميع.


-----------------------

سامي

[ابوفهد]

اخي الغالي ابو احمد

الله يسعدلي ايامك بالخيرات


كم انت رائع روعة السماء في علاه

انت وصاحبك الغالي

كغلا الطــير في السماء

فالسماء رائع بنجومه وحسن جماله

والطير غالي في السماء

لصعوبة الامساك به او حتى صيدة

فلك ولصديقك مني

الاجلال والاحترام والتقدير

[Sami96SA]

صباح الخير


أبو فهد

وفعز الكلام .. سكت الكلام.

وتراني ماسك الهوا بيدي .. ماسك الهوا .. وآه من الهوا يحبيبي .. وآه من الهوا.


والله يبو فهد تلعثمت وما عرفت وش أرد وأقول لك.


انت حزت حاضر ما تنفع معك غير كلمة شكــرا.


من الأعماق يبو فهد شكرا.


----------------

سامي