المساعد الشخصي الرقمي

مشاهدة النسخة كاملة : . . . تعبتيني معاكي . . .


Sami96SA
02-09-2002, 03:44 PM
مساء الخير

كلام خنفشاري مثل العاده .

طلع كذا ومن غير لا إحم ولا دستور بعد الإستماع إلى نفر من المتعبين من الزملاء خلال وجبة غذاء هذا اليوم (دجاج تكا) .. ولأنه كلام خنفشاري مالقيت دره تناسب طرحه فيها غير هالدره العزيزه على قلبي ..

طبعا درة الشعر والخواطر للمشاركات الغير خنفشاريه .. احتراما للأقلام الكبيره هناك.



تعبت
تعبت ونا قول تعبت
حتى التعب مل مني
وصبرت
ياااه .. وش كثر آنا صبرت
حتى الصبر تعب مني
دنيتي .. آااااااااه يا دنيتي
من أولك لتاليك تعب .. واكبر هم
وأوقات أحس انك مجرد وهم .. وهم



تاخذنا الأيام وتحضنا
وفجأه ومن غير ميعاد .. ترمينا
نفز ونقوم من عفرة التراب
ومن الغبره أيام تاليه تنفضنا
وعلى هالحال ليما الحال منا ضاق
نضحك وما ندري على ايش
والا على مين
نبكي!! .. وليه ما نبكي!!
لو كل ألف دمعه ترجع لنا بسمه
كان بكيناك دم .. يا ضحكه



سألت روحي مره
الحياة يا روح حلوه لو مره؟
تجاوب .. وليش تسأل!!
طبعا حياتك ياروحي مره
لنك حبست أنفاسك الحره
وسجنت أحلام في داخلك
وجريت ورا الوهم
والوهم انت عاد عنه أدرى
يتعبك وانت مافيك حيل
ليما الحيل ذاق الويل
ويل ويل .. ويلاه ... يا حسره



وعلى دي الحال
كلن يناجي ليلاه .. ياليلى
وليلانا ماهي بشر
ولا حرمه مثل القمر
ليلانا هي دنيانا
تعبتينا يا ليلانا
ليتك فتاة .. ومن أبوكي خطبناك
وتنتهي همومنا ويا الشقى
لكنك هم .. هم ووهم
هم أكبر من حروف يجمعها قلم
واكبر من الناس وحجم الأمم
تعبتينا يا دنيانا .. تعبتينا


ويا تعب مني أنا لا تمل
لني ماراح أمل من قولة "تعبت"



---------------------

سامي
SS1500
02-09-2002, 04:30 PM
سلام ابو احمد


اقول شربت كوب ماء بعد الغداء ...




تحياتي
BackShadow
02-09-2002, 04:39 PM
يسعدلي مساك ابو احمد


سلامتك والله ابو احمد ... عسى التعب ما يجيك


خلاص ياخوك ... الجار المشخر وافتكيت منه

وش بعد يتعبك :hap:


اشتقنا لخنفشارياتك كثييير يا ابو احمد



الله لا يحرمنا منك :SMIL:



مع تحياتي
المهاجرة
02-09-2002, 05:13 PM
يمسيكم بالرضا

ويافال خير اول موضوع افتحه وانا قدامي اختبار :(



تدري عاد انت سرقت افكاري اي واللهي كان ودي أألف خنفشاريه بنفس المضمون بعنوان اللوحه الأزليه (( الطريق ليسا بأوله :052: :003: ))

مفاد الموضوع اني تعبت من المشي

من يوم تعلمت المشي وانا امشي وامشي وامشي وشعاري التفاؤل :)

ورغم كل السنين والطريق الطويل ( مش طويل أوي :$ ) اللي قطعته تطلع لي نفس اللوحه ( الطريق ليسا بأوله والمشوار طوووويل )


بس خفت اكتب وكأني مستعجله على النهايه :134: :064:




أخوي الكبير بالمقام قبل السن

قل لأصحابك على الغدا بكره إن الله مد بالأعمار إن شاء الله


قل لهم ...

تفااااااااااااااائلوا والطريق ليسا بأوله :195:
بنت الشاطئ
02-09-2002, 05:38 PM
مرااااااااااااحب للجميع أعضاء المنتدى بدون إستثناء
أهلا يا أخ سامي تشرفت بمعرفتك من خلال خنفوشاريتك الجميلة التي تضفي روح جميلة على المنتدى بس ليش كده تتعب نفسك سلامة نفسك من التعب والله الدنيا ماتستاهل إنك تتعب نفسك وإزا كان الغدا بيخليك تتشاءم لاتروح تتغدى غير وأنت في غاية التفاؤل لاتسمع لأحد متشاؤم وأشرب موية مع الغدا :SMIL:
hardboy
02-09-2002, 10:11 PM
سلاااااام


سامى كيفك ؟؟؟


هالحين فى دجاج تكا فى حرض :cool:

لازم اجيك فى حرض اطمأن عليك ياويلك منى جايك فى

( الكومبلاينس رفيوووو ):cool:



تصدق انت ذكرتنى بايام سوده كنت شغال 14 و 7 يعنى زيك

بس كنت فى البحر ما اشوف البر نهائيا فى الجعيمه على سطح سفينه اسمها رمثان

على الاقل انت تشتغل 12 ساعه وبعدين ممكن تروح اى مكان لكن انا ماعندى غير السفينه

جات عليه ايام كرهت كل شىء

بس بعدين الحمدلله اتعودت ومرحله وعدت


الله يعينك مصيرك ترجع




تحياتى
الشيهانة
02-09-2002, 10:30 PM
الله أكبر ياابو بريقش:D ايه الكلام الخطير دا:D :D

انت بتجيب الكلام المختنفشر دا منين؟؟;)

ماتدينا شوية من موهبتك الي مالهاش ملامح :D :D :D



الا موهبتك دي فطرية ..يعني حاجة صحيت من النوم لقيتها عندك؟;)

ولا حاجة اكتسبتها من تناولك التكا::*

امال لو تاكل كنتاكي ولاهارديز حتعمل فينا ايه:confused: :confused:

اكيد حتسدح المنتدى:D :D بلي فيها:( :cool:
قيصر
03-09-2002, 12:44 AM
اقول .... انت تحب قطوة وصرت تراكض وراها لين تعبت ؟؟؟

ياخي انت رهيب مرة ((انتبه لا تعطيها قلبك )) والحين طلعت لنا (( نقزت من العفره )) !!!!!!!

الله يهديك يا عبدالرحمن رفيع متى بتعقل ؟؟

قالوها الربع ان دوامك الجديد بيلحس مخك العفري بس ما توقعت بهالسرعة !!!

شوف واصل على هالمستوى الرهيب لين تصير شاعر حرض وماجاورها .

صجيتني بسالفة جارك اللي يشاخر عندك ويوم الربع ما قصّروا وحلولك المشكلة صرت تشبع نوم وهذي هي النتيجه صاير عافور .

اللهم لاحول ولا قوه منه العوض وعليه العوض
الشيهانة
03-09-2002, 01:01 AM
خخخخخخخخخخخخخخخخخخخخخخخخخخخخخخ

عبدالرحمن رفيع ياقيصر؟؟

والله ظلمت رفيع فيه..:D :D :D :D

هذا فهد العسكر :D :D :D :D :D على غفله

الا بتعرف فهد العسكر يابوبريقش:cool: :cool:

اذا ماعرفته قولي وانا ابئ اقولك:p
wala2
03-09-2002, 03:08 PM
سلااااااام
كيفكم؟
:)

انا صراحة اول ماقرأت
تعبت
وانا اقول تعبت

وقفت:D:D
وماكملت قراءة :)



عشان لا اتعب:):)
Sami96SA
03-09-2002, 06:02 PM
مساء الخير


يسعد مساكم جميعا


تنويه هام :

ما جاء في القصيده الخنفشاريه لا يعكس أبدا أحوال الشاعر اللي هو أنا .. ولله الحمد دنياي حلوه ومافيها إلا كل خير.

هي بس كلمات طلعت بعد سماع تذمرات من زملاء لي في العمل.

أجل لو كل الكلام اللي نكتبه بالضروره يعنينا كان قلنا عن الفقاقه رايحه فيه طقن من الحب والغرام .. صح؟

هي جت بس على الفقاقه ..الربع كلهم رايحين فيها طقن :)


------------------

هلاااا ناصر


شربت ماي ونا خوك .. مو عشان الدجاج التكا اللي أكلناه بس هي عاده زينه انك تشرب ماي بعد كل وجبه هنديه.


-----------------

مرررراحب محمد


انت السبب اللي خلاني أنزل هالخنفشاريه لأني سمعتك تقول مشتاق للخنفشاريات .. وهذي جتك على عجل.

انت تامر طال عمرك.

----------------

أهلين أستاذه


ياريتك نزلتي الخاطره .. شكلها كانت بتطلع شي.

الطريق لسه بأولو .. زي ما قلتي .. وزي ما قلت للشباب اللي أكلو الدجاج التكا .. والدنيا ما تسوى.


أول خطوه في الطريق الصحيح تبدأ بنظرة تفاؤل .. متفق عليه.


سلمتي لخوك.

------------------

يا هلاوين بنت الشاطئ

تشرفت بتوقيعك في الموضوع .. والحمد لله انه نال إعجابك وعلى قولتك التنويع زين.

بس الله يخليك لا تغلطي في اسم القصيد اللي من هذا النوع .. اسمها خنفشاريه مو خنفوشاريه.


الدنيا حلوه .. صح كلامك.

------------------

سامي
Sami96SA
03-09-2002, 06:11 PM
مساء الخير



أورفوار شيهانه


أول مره أسمع واحد يقول لي عندي موهبه ملهاش ملامح.

مدري هي مدحه والا ذمه.


مدري أشكرك والا أجيك بالشبشب (وانتي بكرامه) على مناخيرك.



طبعا أعرف فهد العسكر .. وهل يخفى القمر.

حتى بالأماره حافظ له قصيده موب صاحيه .. اسمعي وش يقول :




نـوحـي



نوحي بِعقـر السجـن نوحي ، فصـداه في أعـماق روحي





نوحي .. فقـد سـالت جروحـكِ مثلما سـالت جروحي





نوحي .. فمـا أغني غبـوقكِ لا .. ولا أجـدي صبـوحي





نوحي .. وبالـسر المقـدسِ لا تبــوحي .. أو فبــوحي





نوحي .. فجسمك مثـل جسمي .. قـد طواه اليأس طيــا





نوحي .. فروحك مثل روحي .. كم كواها الوجـد كــا





نـوحي .. فنفسك مثــل نفسي .. لم تجـِـد زادا وريـا





يـا للشــقاء .. ويـا لبُؤسِ شقيــة تـهوى شقيـا





نـوحي .. فقـلبــك مثـل قـلـبي .. لم يبـل أوامـه





نـوحي عـلى طلـلِ الصّبــا .. واستـعرضي أيـامـه





نـوحي عـلى الحـب الـبريء .. وكـفـني أحـلامـه






إلى آخر القصيده .. بصراحه طويله.

إذا قصدك يشبه مين في الشكل فأعتقد أكثر واحد قريب له هو الحبيب قيصر .. صدقيني.

-------------------

سامي
Sami96SA
03-09-2002, 06:28 PM
مساء الخير

قيصر

وش أخبار الفار اللي في مكتبتك؟ :D

سمعت انك قاعد تدور على شداخه صنع تايواني بعد ما جربت كل شداديخ العالم وما نفعوا.

جاني فضول مره وزرت واحد صديق عنده مكتبه مثل اللي عندك وطلبت منه يوريني مكتبته .. قال تكفي يا أبو احمد لا تحرجني المكتبه هذي ما خشيتها من قرن .. قلت ما يخالف أبي أشوفها بس عشان أسوي لي وحده في البيت.

المهم دخلني مكتبته وأول شي شقته مجلد كبير مفتوح على مكتبه وعليه الغبره تقول انه صادق ما دش المكان من زماااان.

ونا أطالع في ذي الكتب اللي مدري وش شكلها إلا وذاك الفار اللي لونه مدري وش قايل .. هو رمادي أو أسود أو حنطي .. فار كبيييير نط على كتفي من فوق الدولاب الله لا يبارك فيه من فار.


صرخت عليه .... وقــــــف.


تصدق انه وقف .. وقف وطالعني وبعدين بدل ما كان يركض قام يمشي بشويش يدور الباب.


صاحبي استغرب من تصرف الفار وقام يسألني : انت تعرف الفار؟

قلت لا .. ومنين أعرفه ونا توني أشوفه .. بس شكله كان سعيد اني زرتك اليوم عشان أخيرا بيطلع من هالسجن اللي انت حاطه فيه.


الفار خبرك يولد في المكاتب ويكبر ويكبر بعدين ما يقدر يطلع من الفتحات الصغيره ويظل المسكين ياكل في أوراق الكتب لين ما يصير عنده تضخم في الأمعاء .. خاصة والأوراق اللي فيها فيتامينات خلصت مثل أوراق كتب أبو الحصاني للأصفهاني.



أخبارك يبو القياصر؟

تمام؟

الحمد لله.


أنا هنا كلو تمام وما عليك من الكلام اللي في الخنفشاريه .


-------------------


ولاء

انتي بتتكلمي منين؟

من ماليزيا؟

ما شاء الله .. تطوروا بلاد الشرق.

الله يرجعك بالسلامه انتي واختك ميري.


-------------------

سامي
الشيهانة
04-09-2002, 01:08 AM
سلام..



أسلوب جديد عليك ياسامي..


تسأل وتجاوب على نفسك..

من علمك على هالطبع ..؟؟< ---- بديت أكره القلم .
Sami96SA
04-09-2002, 08:28 AM
صباح الخير

يسعد صباحك يالشيهانه

بصراحه مدري وش صاير فيني هاليومين قمت أقط خيط وخيط.


وشكلي بهون خلاص من المشاركه لأني قمت أغلط على الناس من غير شعور .. وانتي آخر الضحايا.

هل يا ترى بتقبلين اعتذاري يا شيهونه!!!


والله ثم والله لو ما انت عزيزه وغاليه كان ما تماديت بالمزح معاكي في الردود .. لكن أكيد أكيد ما المفروض توصل للشبشب.


السموحه يالساحليه .. وخلاص يبي لي آخذ بريك عن الردود المزوحيه لأني مدري وش بغلط فيه وعلى مين المره الجايه.


وعشانك أبي أهديك أهم قصايد فهد العسكر .. واللي منهم جبت القصيده اللي في ردي فهد العسكر. (http://www.dwaihi.com/fahad.htm)


وإذا حصل ومر قيصر من هنا وفتح على اللينك بيستغرب لمن يشوف صورة فهد العسكر لأنه الخالق الناطق هو قيصر بذات نفسه.


أوووبس .. أحسن لي أسكت لا نزعله هو الثاني.


--------------------

سامي
Sami96SA
04-09-2002, 09:24 AM
صباح الخير

هاااااارد بوي


كيفك يالغالي؟

وكيف أنا انعميت وما شفت ردك؟ والله مشكله .. وأبو الإحراج.


اسمح لي حبيبي .. مو قصدي أتجاهل ردك أبدا.

بس مدري اشلون ما شفته.


عندنا دجاج تكا وكل أنواع الطبخات الهنديه واحسن يوم هو يوم الأحد لأنهم يسوون باربكيو في الهواء الطلق.


هاردي

أنا أعرف رمثان .. واذكر اني طلعت فيها tour واذكر بعد يوم خربت عندنا وصارت واقفه مده طويله يصلحون فيها .. وشكلنا شفنا بعض بس وقتها ما كان فيه لا نسيج ولا درر.


تحياااتي هاردي والمعذره.

------------------

سامي
aljenny
04-09-2002, 08:45 PM
قاطعوا منتجات " تـكـّا "

لأنها بتجيبلي التكـّه !

ذهب يبو أحمد ذهب ..

حدائق من الإبداع ولا أروع ..

كلمات من الزعفران مبهره بحب الهال ( حشى دله )

يخوي منين تجيب هالكلام ؟ ( عشان أكسر رجله إن أوحى لك ثانيه )


إسمحلي بنقد بسيط جداً .. قد يضطرك للهبوط الإضطراري إلى مستواي النقدي المتواضع .. فقد أعجبتني بعض الكلمات وودت إعادت تسطيرها ..

(((تاخذنا الأيام وتحضنا
وفجأه ومن غير ميعاد .. ترمينا
نفز ونقوم من عفرة التراب
ومن الغبره أيام تاليه تنفضنا)))

- عاااااادي في المعادي ويتضح جلياً أن الدنيا مسطرته صح

(((سألت روحي مره
الحياة يا روح حلوه لو مره؟
تجاوب .. وليش تسأل!! )))

- ق ط ف قـَطـَفَ .. أنواع التقطيف وقيس ماعنده مشكله

(((وعلى دي الحال
كلن يناجي ليلاه .. ياليلى )))

- أكيد ليلاه ياليلى ! أجل يامصطفى ؟!

(((ويا تعب مني أنا لا تمل
لني ماراح أمل من قولة "تعبت" )))

- وين أذنك ياجحا !



خنفشاريه ولا أروع .. تفتح النفس لوجبه من تكا لعلي أجود بربع ماجادت به قريحتك

صدقني يبو أحمد من جمال خنفشاريتك حبيت أحشها

تحياتي لك


( لا ولاشي .. بس حبيت أشوف رقم الآي بي بخخخخخ )
Sami96SA
05-09-2002, 05:21 PM
مساء الخير


جنجون باشا

يسعد لي مساك يبو دوامين <----- انت اللي قلت أبو دوامين مو أنا.


كان لازم أمسيك بذا الأسم "أبو دوامين" عشان أأكد انك مشغووووول حيل وما عندك وقت حتى لمتابعة المواضيع.


وحقيقة استغربت منك هذه الدقائق وأنت المشغوووول دائما التي اضطرتك أن تتواضع وترفق بحال الرعيه التي من ضمنهم أنا وترد علي بنقد خنفشاري لاذع جعلت من قصيدتي تحفة من تحف الكلام الهابط .. تماما كما هي أغاني هذا العصر .. اس اس سلامو عليكو وشاكلتها.

عادي في المعادي .. على قولتك.


وكانت لي وقفه مع أحد تعليقاتك الذي يقول :


"- ق ط ف قـَطـَفَ .. أنواع التقطيف وقيس ماعنده مشكله "


على المقطع :

(((سألت روحي مره
الحياة يا روح حلوه لو مره؟
تجاوب .. وليش تسأل!! )))


وقفتي كانت عباره عن ضحكه بدون صوت أو قهقهه لأني علمت وقتها أن القصيدة في واااد وأنت ونقدك في واد آخر.

لا يبو الشباب تطمن ليس هناك ما يجول بخاطرك حول "تعبت" وليس الملهم لهذه الكلمات هو حال التقطيف أبدا .. بل على العكس تماما.


أم أن الدنيا "مسطرته" صح فذلك شيئ ينطبق حتى على العاديين غير الشعراء الخنفشاريين أمثالك .. فكأني أرى تسطير خطوط أصابع الدنيا على خديك من كثر تسطيرها لك صباحا ومساء يا سيدي جنجون .. كما هو حال الأغلبيه ممن يبحثون عن لقمة العيش.


سيدي .. راكبه في النص أدبيا موب معناتها انت سيدي :)


فهمت؟

طيب

حتى لو في يوم من الأيام صرت سيدي لا سمح الله يعني بقول لك يا سيدي وبتبعها بكلمة أدبيا .. كذا يعني :

صباح الخير يا سيدي أدبيا.

وترد على انت .. أسعدت صباح يا مو سيدي لا أدبيا ولا مركزا.



على فكره بسك تحسس على راسك إذا عليها بطحا والا ما عليها ..

صاحبي أبو الآي بي هو أبو رهف لأني مره كنت أسأله أيام نسيج كيف تعرف الآي بي حق أي معرف قال رد عليه وأشر انك تبي الردود عالبريد وهناك بتعرف الآي بي .. وبس.


المهم يبو البنادر خل عنك الخرط والنقد بس وسوي لي توقيع بالفلاش مثل حق الملقوف.

بالإنتظار.


-----------------

سامي
أحبه حيل
05-09-2002, 06:22 PM
السلام عليكم

هلا أخوي ..

حبيت أشيد بروعة إلقاءك لقصيدة فهد العسكـر .. وكان ودي إنك كملتها للآخر ..

ق ط ف قـَطـَفَ .. أنواع التقطيف :cool:
Sami96SA
05-09-2002, 07:39 PM
مساء الخير

هلا بيك أختي

عجبتك قصيدة فهد العسكر؟

كنك تعرفيه من أول!!!


على العموم أنا حطيت اللينك لكل قصايده اللي منها قطفت التشاكيل من حروف قصيدته "نوحي" عشان أبهر الشيهانه اني أعرف الشاعر واحفظ قصايده.

أنواع الفشخره بعيد عنك.


يعني هذا قصدك؟ انه يقصد هذا النوع من التقطيف؟

طيب .. ما قصرتي يا ورود .. جزاك الله خير.



مثل

ش ل ه = شِلّه <---- مو صعبه أبدا


مو قلنا من زمان ما نبي شلل :)


شوفولكم غيري الله لا يبارك في ابليسكم ما وراي الا الجني وتحبه حيل عبالكم.


------------

سامي
aljenny
06-09-2002, 08:24 PM
حيلك حيلك حيلك يبو أحمد ::[
وراك إنكبيت كلك ؟

يخوي أنت سيدي وتاج راسي ومن دون ماتكون في النص ولا في الربع

أنت سيدي أدبياً وفكرياً ، لغوياً وإدارياً وتوجيهياً .. سيدي في الذوق .. سيدي في الأدب .. سيدي ..........
(على بالك أبقول سيدي بلير ؟ لا ماحزرت لأني داخل على ثقيل )

شوف ياسيدي .. للتذكير فقط دامك مازلت في مسلسل التناحه أنت سألتني أيام نسيج الزرقاء كيف أعرف رقم الآي بي وقلتلك سوي طلب إضافة رد وبيطلعلك رقم الآي بي .. وقلتلك لاتعتمد عليه لكنه يعطيك لمحه عن المستجد وضحكنا سوى أكثر من ضحكي عليك اليوم .. وقلت لك المواضيع إللي فيها خاش خرباش ومعرضه للحذف يستحسن تسوي فيها رد حتى لو تحط نقطه عشان أي إضافة تجيك بالميل قبل الحذف .. وسلامتك

ولو ماضحكت علي وإتريقت كان عضيت شحمه ولا رجعت لك

بالنسبه للتوقيع من عيوني أسويلك لو أعرف .. لكن هذيها عندك الطباخه أم حيل وشلون تبيني أطلبها ونت توك حاشها هي وشلتها ؟ !

بس ولايهمك بإذن الله التوقيع بيجيك لو أنقز لأقرب خطاط وأسويه لك


ختاماً وليس خاتماً أرجع أقول خنفشاريتك روعه حتى ولو كانت في وادي فاطمه وأنا في وادي لطيفه .. على الأقل أنت سويت خنفشاريه وأنا ماقدرت


تحياتي لك ياسيدي .

(لاحظ .. بعد سيدي يوجد نقطه .. والنقطه تعني الوقوف .. والوقوف يعني الإحترام)
Sami96SA
07-09-2002, 04:37 PM
مساء الخير

والله مدري وش أقول يا سيدي يبو البنادر

أخاف أتكلم بعدين تقول هذا أدمن التناحه وتقوم انت وشلتك تضحكون علي.

ونا ماني ناقص وجع راس.

أحسن شي Let's leave it at that


أجل تقول أم حيل هي اللي تسوي التواقيع؟


تصدق يجنجون المعرف حقها أوريجنال خالص .. يا أخي البنت هذي إبداع على طول حتى لمن تغير معرفها تخترع لك واحد ما حد فكر فيه أبدا .. ما شا الله عليها الله يحفظك من العين يختي يا أحبه حيل.


تكفين يا ورود أبي توقيع مميز .. على ذوقك.


عسانا ما ننحرم منك ومن تواقيعك .. ومن خواطرك اللي كانت شي.

وينك من زمان عن الشعر والخواطر .. كل هذا مشغوله في موقعك "ورود" .. لا ما يصير يوخيتي لازم نشوف لك حاجه جديده وروعه مثل الروائع اللي كنتي تتحفينا فيها أيام زمان.

الله على أيام زمان لمن كنتي كل اسبوع وهافتنا بذيك الخاطره اللي مالها أول ولا تالي من ناحية المعاني الجميله والدقه في اختيار المفردات والقوافي .. يختييييي على القوافي .. مالها مثيل أبدا.


الله يخليك التوقيع مالي أبيه حركه فنيه نادره .. الله يقويك.


توسط لنا تكفى يا جنجون.



تحياتي لكما.

---------------------

سامي
أحبه حيل
27-09-2002, 01:48 PM
السلام عليكم


يسعد مساك سامي ..

العذر منك يا أبو أحمد .. أدري تأخرت حيييل
لكن مهما كان .. أحسن من بعض ناس وعدوك .. وطنشوك .. ولا حتى نقزوا لأقرب خطاط .. ولا حتى خدمات طالب
ولا .. وتقول توسط لنا !! الظاهر إنت اللي يبي من يتوسط لك عنده أول !!

عموماً يا أبو أحمد .. هذا التوقيع .. إن شاء الله يعجبك

width = 290 height = 159

وهذا الكود :

<embed width="290" height="159" src="http://www.geocities.com/a811a/sami.swf"type="application/x-shockwave-flash">

وقبل لا أنسى .. تسلم على الكلام اللي قلته عني .. ومو غريب عليك الطيب يا أخوي ..

وتقبل صادق تحياتي ..