ست فتو

[الأخيــــــــر]

هاادي يابويا حكااايه قديمه مافيها مجاغه
حكايه من زمان حكاها ليا سيدي
انا عجبتني الهرجه وقلت لازم اقولكم عليها وانتم خدوا منها العبره وافهمومها فهمت عليا والا لا !!
هادا واحد كان يبيع لقيمات وشوية حلويات كده زي اللبنيه والهريسه وحاجات من اللي تجيب السكر
مره هذا الولد كان لزيز ودمو خفيف (دمه)
مره وهو قاعد كده يفكر في حاله ولدنيا ومشاغلها ويتذكر هرجه قديمه صارت عليه لما سياره دعست ولد جارهم اشرف صعب عليا
هيه هرجه طويله اقولكم عليها بعدين لااكثر عليكم وتضيعوا وماتعرفوا انا قاعد اقولكم ايش
وهوه جالس كده يفكر فهمت عليا والا لا !! الا يتزكر امه الله يرحمها الست فوزيه وصتو قبل تموت الرحمه عليها وعلي روحها الفاتحه اللي يرضي عليكم
قالتلو قبل تموت انو لازم يتزوج بنت ناس ويجمع فلوس ويعيشها عيشه كويسه ويرضيها ويتزكرها بالدعا
فكر هنا..وشوية هناك فهمت والا لا وقال ايش الكلام هادا انا ليا شغال ليل ونهار وبرمضان اشتغل مسحراتي ولااجازه ولايحزنون
انا لازم اشوف لي عروسه بنت حلال كده تسعد لي حياتي
الاهبل علي باله راح ينبسط والدنيا بتحلو لما يتزوج ومو عارف ان الزواج مو لعبه
انتم خليكم بالهرجه معايا اكملكم هيا بعدين

[*نجـ سهيل ـم*]

الأخير .. وقسماً بالله ما فهمت شي ..

مره تجيبنا يمين ومره شمال ..

يا راجل أرحمنا ترا فيه هنا متنحييييييين كثييير ..

[الأخيــــــــر]

قال انا يوااد لازم اتزوج واشوف لي حرمه
فكر يمين يسار...صعب علي نفسه
هوه بالقوه كده وشغل من الفجريه الين اخر الليل ياحبة عيني ويادوب يجمعلو تلاتين ريال مع الاكراميه من عيال الحلال اللي زيكم
البيت عندو بيت ابوه الله يرحمه برضو هوا مات
الفاتحه علي روحه اللي يرضي عليكم
ابوه كان انسان شهم ونبيل لكن مات والولد صاحبنا لسه شهرين وامو ربتو لحد ماصار اربعطعشر سنه كده وتعلم من امو يبيع حلويات
المهم هوه حيلتو البسطه هذي والبيت القديم حق ابوه
من هنا ودقيقه وثانيه تجري والشمس ضاربه راسو من حرارتها قال بسك ياوااد يازكي انا نسيت اقولكم هوه اسمو زكي محد سلم عليا ولد علي روق المنجه فهمت عليا والا لا!!
نرجع للهرجه مره ثانيه
هوه قال بسك ياوااد يازكي يكفيك هم وقرف علي الظهريه اللي جايبه وجع الدماغ وخليك في شغلك فهمت عليا والا لا وانت حتتيسر امورك باذن الله بس انت خليك شاطر كده ولاتشيل هم اي حاجه تجيب المغص وبطل مجاغه
شوية تمر عليه البنت اللي كل عيال الحاره يموتوا عليها من جمالها واسمها فتو بنت الحج عمر بلاش لقافه
وهو قاعد يطالع فيها وعيونو بتطلع عليها ول عليها زي القمر فهمت عليا والا لا
البنت طالعتلو وتزكرت زمان لما كان يلعب معاها سبع الحجر ومويه وثلج ودوحه يادوحه والكعبه بانوها
قالتلو ياولد يازكي ايش قاعد تسوي انت كيفك وكيف امك الست فوزيا
قال مين انتي يابنت الاوادم وكيف عرفتي اسمي ؟
قالتلو انت نسيتني طبعا ماهو من فلاحتك يازكي
قال ليها مافي بنت معفنه وشايفه نفسها الا فتوو
قالت عليك نور يامعفن يازكي وبطل المجاغه حقتك هاادي
هما عرفوا بعضهم وجلس يتكلم معاها وقالتلو انها خلصت الثانويه العامه وعلامتها كانت علي الحفه وابوها مره زعلان منها وقاللها لازم تتزوج ولحد مايجيلها عريس تقعد مع امها بدال الشغاله وتساعدها بتنظيف البيت وانو هيه مو حقت دراسه
قام هوه التاني يحكيلها حكايتو وكيف كل حاجه مبهذل فيها من يوم ما امو ماتت
انبسط معاها وقعدوا يتكلموا ساعه زمن كده فهمت والا لا
شويه قالت انا نسيت المقاضي اللي امي وصتني عليها وتعزرت منو وراحت
هوه حبها من الكلمتين اللي تكلمها معاها
شويه كده قال ليش بس مااتزوج فتو الحلوه هاادي خاصه انو ابوها مو راضي يزوجها الا واحد مطقع زي حالتو
ابوها طبعا غني ويبغي يزلها علشان علامتها بالثانويه كانت علي الحفه وهو كان يبغاها تدرس بالجامعه وماعندو واسطه
قال هيه بس لقيتها الهم لك الحمد
ساعات الواحد يكون منتف وماعندو فلوس يوقف بها علي رجلينو وهاادي برضو نعمه
لانو فيه ناس مخها تعباان وتبغي تبهزل ادمي وربي من وراهم يرزق ادمي
زكي محد سلم عليا ولد علي روق المنجه فهمت عليا والا لا!! تزوج البنت فتو بنت الحج عمر بلاش لقافه وربنا رزقوا بولد سماه سمير المجغ وبرضه بشويه فلوس كده من بيتو لما جات التوسعه حقت الحرم وهدمو بيتو اللي وارثه وادولوا تعويض حدود سبعميه الف ريال وسوا مشروع كويس وفتح كم محل يبيع فيه لبنيه وهريس وشوية كنافه وبقلاوه ولقيمات وحلي من مجاميعه بس تري البسبوسه مو مره طعمه من عندو انتا روح لمحل النابلسي عندهم بسبوسه كويسه فهمت والا لا
هادي الهرجه يابويا وعلي الله يافالح فهمت العبره منها