ذكرياتي مع القدر......و الملنص

[ابوشهد]

يا أخواني و اخواتي الكرام
الحقيقة اني عندي ذكريات كثيرة جدا مع القدر والمقصود بالقدر هنا (قدر الطبخ) حيث ان هذا القدر كان له ذكريات لاتنسى وانا اود ان اسرد لكم هذه الذكريات لكن المشكلة التي عندي انني شخص لا اجيد البدء في حكي الحكايات فقلت يا واد خلي اعضاء المنتدى يسألوك وانت من السؤال تبدأ تحكي الذكرى والمواقف - اسلوب سريالي في سرد القصص- يعني مو لازم تكون مرتبه زمنيا على حسب السؤال واثره في نفسي وتبدأ القصة من نقطة مو بالضروري تنتهي فيها وممكن الجواب يقود الي سؤال اخر او تعقيب وهكذا ...............




ملاحظة الشخصيات التي سترد في القصة واقعية ليس لها علاقة بالمنتدى

[أرسطوالعرب]

سلام
مساء اللافندر...
(بغض النظر عن أي إعتبارات أسرية....عاملني كمعرف عادي مثله مثل أي معرف ثاني)

ذكرت في إحدى ردودك إنك فنان تشكيلي...وعازف عود <==شفت كيف إني متابعك:D

أبغى أعرف إيش اللي يجذبك عشان ترسم شي معين...

وعندي سؤال ثاني..
إيش الصعوبة اللي واجهتك في تعلم العزف على العود..

خصوصاً إنك تقدر تعزف والعود وراء ظهرك...<==برضو هذي قريتها :D

سؤالي الأخير ..
الملنص ماهي مؤهلاته الموسيقية؟:D

........

والحين هذا السطر للأعضاء...يعني لا أشوف لك أي تعليق عليه ::*

يا جماعة الخير..

أخونا أبوشهد ....قرأت له خواطر في فترة قبل عشر سنوات إلى خمس سنوات..
بعد كذا توقف عن كتابتها نهائياً..

والمؤسف في الموضوع...

إني بعمري كله ما قرأت أي خاطرة بجمال اللي يكتبها .....

حاولو تضغطو عليه يعرضكم بعض اللي كتبه...

وأنا واثق تماماً إنها قادرة تنافس أجمل خاطرة عربية...<=== بس ويش نقول للخجولين:p


أقول أبوشهد...
سمعت طرطشة كلام إنك بتصير مشرف...
فأفضل حل إني أضف وجهي وأدور منتدى ثاني ما ألقاك فيه :D

وبكرة أجيب أمي وأسلمها إشراف المطبخ العالمي بدل طبخ الروح :p

وأجيب أبوي وأسلمه إشراف الفكر الأدبي والفلسفي..والدرة الإجتماعية<==ينفع بقوة

وأجيب جدي عبدالله وأسلمه الشعر والخواطر:D

وأجيب خالتي أم روميو...ونسلمها درة المرأة

ونجيب جدي الثاني أبو مرساة فينيقيا ...ونسلمه الإدارة بعد

كمللللللللللللللللللللللللت!!



---------
كان يوم أغبر يوم ما عرفت إنك أخويا ::*
----------

[ابوشهد]

اولا انت استفزيتني لكن مو مشكلة نظرا للاعتبارات الاسرية نفسها اللي عندك اجاوبك انت مو عارف اني اعزف العود ورا من كتاباتي لكن انت شفت الشئ هذا بام عينك والشاهد الظل ثاني شئ انا ابغى ارد عليك في اللي ماتبغاني ارد عليك فيه علشان اقهرك خواطر بالنسبة لي yoke


نرجع لموضوع الملنص والقدر طبعا للي ما يعرف الملنص نعرفه به زميلي وانا رابع ابتدائي ومن هنا بدأ المشوار معاه مرورا بالمتوسطة واتعلمنا المزيكا مع بعض خلال هذا المشوار وصولا الي اليوم حيث اننا فاتحين بيوت وبنأكل بزورة وخاطبين بنتين اخوات ناوين نتزوجهم على ام شهد وام يونس حتى نصير عدايل ما علينا من هذا الكلام بس هذا هو الملنص طبعا الملنص هذا النك نيم حقه في الحياة طبعاحتى كانوا يقولوله في المآثر

-الملنص داعس من غير ابنص-

اما مؤهلات الملنص في المزيكا فهو ضابط ايقاع من الدرجة الممتازة ومحاولات فاشلة في القانون والبوص وتاريخ الملنص المزيكاتي بدأ من ايام الابتدائية دخل الكشافة ومسكوه مرواس فكان يدقلهم النشيد الوطني الموزبيقي على انه السعودي وتعب كثير ورسب سنه رابعه وحفر في الصخر لمن عزف النشيد الوطني صح

تعرفوا يا جماعة الحياة كفاح و هذا نوع من انواع كفاح الملنص مع المزيكا حياة العظماء امثال الملنص تحصلها مليئة بالمأسي وثمن غالي منها رسوبه سنه رابعة ابتدائي في سبيل الفن طبعا ايام الكشافة كان عنده بسكليت -دراجه هوائية- كله خطرات وصواريخ- لمبات حمراء تزين بها الدراجة- وكان كل يوم العصر يردف المرواس و يروح المدرسة حتى يلحق بروفات الكشافة هذا بالله عليكم مو كفاح (يا كبدي على طفولتك المعذبة يا ملنص).

المهم الرجل تدرج في السلم الموسيقي لمن صار القائد الكشفي للمدرسة ثم للقطاع اللي فيه المدرسة كله وفضل هو الملنص هو الملنص بنفس البسكليت والمرواس والكفاح يعني ما غره المنصب شوف عظمة الفنانين والعظمة لله وحده.

طبعا طلع المتوسطة و هو على نفس طريق الابداع بس اول سنه في المتوسطة نهاري ثاني سنه ليلي ثالث سنه محو امية وهو سنه اولى متوسط بعد كذا طردوه من الدراسة وخلوه قائد كشفي اتحمل و صبر شوفوا التضحية بالمستقبل كيف يا جماعة.

هذيك الايام كنت توي اتعلم في العود واسس الملنص منتدى مزيكا عنده في البيت عبارة عن غرفة فوق السطوح وتعرفوا المادة كانت بالنسبة لنا صعبة فكنا نستلف العود من عند اي معرفه ونطلع ندق عليه فوق السطوح وكنا نستعيض بالقدر ايقاع بدل المرواس او الدربكة وكانت المواصلات صعبة علينا فكان يجينا لبيوتنا يلمنا بالبسكليت كله في سبيل خدمةالفن فكانت الغرفة اللي فوق السطوح هذي بحق شبيهه بصوالين طه حسين والعقاد

في مره من المرات ايام المضاربات فرشنا بشكة- طبعا هذا لا يعني اننا ما كنا ننفرش- وبعد المضاربة رحنا نحتفل وسوينا طرب في غرفة فوق السطوح بعد ما اتعشينا تونا غنينا -على دي العونه راحوا الحبايب ما ودعونا ومن حب السحلب ما أقدر اتغدى و دايم اتعشى صامولي وتونه - ورقصنا وكانت كل ثيابنا دم وطين من المضاربة بس الحياة كفاح يا جماعة
وياما شردنا من المدرسة و طلعنا طلعات طرب في الصبح !!!!!!!!!!!
في مرة شردنا من المدرسة الصبح لحقتنا دورية شردنا واندسينا في مسجد

على سيرة الدورية مرة جات دورية للملنص شالته من بيتهم لان البزورة في الحارة اشتكوه يسرق الحمام حقهم طبعا الملنص كان من دلالين حراج الحمام حتى مرة جاته بيعه حلوة يوم الجمعة في الحراج واشتراله قرد (انت هذي القصة تتذكرها يا ثامر) داوم يوم السبت في المدرسة مع القرد حتى كان اسم القرد (حامد).
ومرة داوم بحصان سيسي (القزم)

تعبت اكمل بعدين ......................




.............................. ....
يا ليتني خنقتك وانت صغير كان ارتحت منك وانت كبير
.............................. ......

[BackShadow]

يسعدلي مساك ابو شهد


انا شاهد اني شفتك بام عيني

وانت تعزف على العود وهو ورا ظهرك :hap:

من جد شي مو طبيعي ...


والملنص انا اشهدله

بانه افضل ضابط ايقاع مر على التاريخ الموزمبيقي :SMIL:


طيب المهم ... سؤالي موجة لك


كيف تتفادا ازعاج الجيران والناس اذا جوكم يدقون عليكم الباب ؟


وكيف اكتشفت موهبتك في دق العود وموهبة الملنص ايضاً ؟


ارجعلك بعدين عندي كوم اسئله :SMIL:



ابغى اكلم ثامر شوي


ثامر اسمع كلامي وانا عمك ...

اول شي ترى الخواطر بتجيك ... لا تستعجل


والشي الثاني ..

لا تجيب احد من العيله بعد كذا :MAD2:

لا تكرر الغلطة اللي انا غلطتها ::]

شوفني تعبان منها وبديت اصلحها واتخلص منهم واحد واحد



مع تحياتي

[ابوشهد]

اخويا BackShadow الحقيقة ان الجيران كانوا يتضايقوا خصوصا وان الحي شعبي لان الصوت يسري بالليل وكانوا يشتكونا عند ابو الملنص لمن ولفوا تعرف طريق الفن مليئ بالاشواك
مرة اشتكونا وخاصمنا ابو الملنص اخذنا العدة وروحنا مزرعة جنب الحارة وسوينا الطرب فيها تاني يوم طلعت اشاعة انه في جن في المزرعه كانوا مقومين طرب البارحة

وعلى سيرة ابو الملنص مرة عازف السمسمية اللي معانا في الفرقة وكان من اهل وادي الصفرا واسمه ابو الوفا اخذ السمسمية عندهم في البيت وكانت تزورهم جدته ام ابوه وسمعته يدق خبيتي انزارت وجاله ابوه وقاله ياملعون جدتك انزارت وطرده من البيت واخذله كم يوم في غرفة الملنص

نرجع لموهبة العزف على العود عندي شوف انا في الاصل رسام و الرسم علمني حاجة وسهل طريق المزيكا معايا لانه انا لما بارسم ما ارسم شكل لا ارسم احساسي ويطلع بواسطة الشكل والناس تشوف حسي وان الناس تشوف الحس هذا شئ مو طبيعي لان الحس مايدرك بالحواس الخمسة يعني بالبلدي هو شعاع يطلع من القلب للقلب التاني كيف وصل الله اعلم يعني عمرك ما راح تسمع احد يقولك انه يقدر يخلي الناس تشم او ترى او تلمس اوتسمع اوتتذوق حسه طبعا بالمعنى المادي لكن انا كنت اقدر اخلي الناس تشوف حسي بالمعنى المادي والمعنوي سوا قلت يا ولد ليه ما اخلي الناس تسمعه كمان ومن هنا بديت اتعلم مزيكا لمن صرت اقدر اسمع الناس حسي بالمفهوم المادي للسمع

على ذكر الحس مرة انا والملنص كنا في الخارج عند خواجات وكان معنا عودنا و عدتنا المهم قعدنا في قهوة شعبية وشافوا العود قربوا مننا جماعة وعرفونا على انفسهم وجلسوا معانا( انت عارف ان الخواجات ملاقيف في الاشياء هذي يحبوا الاشياء الغريبة ) وطلبوا لانفسهم بس واحنا نحلف عليهم الا على حسابنا عيال عرب المهم ما رضيوا وطلبونا نعزفلهم مزيكا فعزفنالهم ينبعاوي (اشتقنا يا حلو والله اشتقنا صارلك زمان مفارقنا ) انبسطوا كل الخواجات اللي في القهوة وصفقولنا وانا انشعفت كالعادة وانا اعزف فقمت ارقص واعزف واغني في وقت واحد -وهذا شئ تاني انت شفته بام عينك كمان-
المهم انتهينا من الاغنية صفقولنا وجلسنا فكان معاهم بنتين قالولنا انهم مغنيات روك ونفسهم يتعاونوا معانا ونسوي مزيج بين مزيكتنا والروك (تعاون فني) ونغني معاهم في البار اللي يغنوا فيه طبعا احنا رفضنا - الملنص كان يسألني يعني ايه روك- لمن شافونا مصريين على الرفض طلبوا مننا نكتبلهم اللحن حق الاغنية فقلنالهم اننا ما نعرف نكتب نوتة موسيقية قالولنا انتو كذابين تعرفوا تعزفوا وما تقروا نوتة مو معقول وزعلوا و مشيوا طبعا وهم ماهم عارفين قصص الغرفة ومعاناة الملنص في الكشافة والغرفة والجيران والبسكليت ابو خطرات ولا كان صدقونا.

بس هم مشيوا جا صاحب القهوة قالنا انتم تعالوا كل يوم هنا واعزفوا ساعتين وكل طلاباتكم تنزل بلاش طبعا الاقتراح عجب الملنص بس انا رفضته حتى لا يقترن الفن بالمادة.قلناله طيب وسوا دعاية في المحل ولا رجعناله تاني وبطلنا نعدي من قدام محله وصرنا نمشي من طريق طويل علينا.


ومرة في الحسين بمصر في قهوة الحاج شعبان نادينا واحد يعزفلنا ما عجبنا عزفه اخذنا منه العدة وعزفنالهم اغنية طاهر كتالوج ( كنت اتخيلها خيال سجنه ما كانت ع البال) وفي بنت شحاته صغيرة دبة تشبه الانبوبة (انبوبة الغاز) قعدت ترقص عليها ولمن خلصنا قلنا للفنان اللي جبناه هات فلوس على الطرب اللي سويناه لك انقهر مننا و مشي
ومرة تانيه في بلاد الخواجات والفِرنجة سوينا طرب في الشارع رمولنا قروش معدن وهذي موثقة بفلم فيديو بس اعرف كيف انزله في المنتدى انزلكم هو .



يوه تعبت من اكمل بعدين

[BackShadow]

يسعدلي مساك ابو شهد



حبيبي .. بصراحة انا استمتعت بالذكريات الرائعة هذي


بس انا كان سؤالي السابق ما كان عن الازعاج للجيران

سؤالي كان بناء على معلومة انكم كنتم قاطعين صوت الجرس


سؤالي الجديد هو ...

بصفتك رسام ... هل تشعر بان العزف لوحة ترسمها !!؟؟

ومن من الفنانين والملحنين تأثرتم بهم انت والملنص ؟؟!!


في انتظار اجاباتك



مع تحياتي

[ابوشهد]

اشاعة صحيحة طبعا الملنص شغال في شركة الكهرباء فقام فصل الجرس وحط لمبة حمرا اذا احد دق علينا من تحت تولع اللمبه منها ما يخشلنا صوت نشاز في الطرب ومنها ما يزعجونا الجيران بشكاويهم
اما عن العزف على اللوحات نعم عندما ترسم فانت تعزف على اللوحة واحيانا تخش علي ام شهد وانا يدي ترسم وجسمي يتهشهش طربا
اما عن المطربين فالقائمه طويله
ام كلثوم وعبد الوهاب وسيد مكاوي ومحمد الموجي من مصر
طاهر كتالوج وطلال مداح وابوبكر سالم بلفقيه من السعودية
فوزي محسون واحمد شيخ واحمد القرقمله وابودلي والبيلي من المدينه المنورة
واحمد الجميري من البحرين
وعوض الدوخي (في لون الصوت الغنائي) من الكويت
وفيصل علوي والمرشد من اليمن -اهل طرب نظيف بالمره-
وعبد الوهاب الدوكالي من المغرب
وعلى فكرة ترانا ندق اغنيةno woman no cry على عود وبنقص ودربكة واضفنالها موال(هم يحسدوني على موتي فوا أسفاه) لبوب مارلي من جامايكا كنا نعزفها للخواجات في الخارج
اما الملنص فتأثر بالدقاقات توحة وصفية شتيوي ............الخ........
بالاضافة للسابق ذكرهم الا بوب مارلي لانه ما يعرفه بس يدق معايا بالاحساس لمن احتاجه
يوه الملنص دق علي ورايحين المزرعة نقوم طرب لانه اليوم جاينا واحد خواجه صاحبنا بياخذ عمره وزيارة ومقومينله طرب
علشان نعرف ان اهل المدينه اهل حنيه ومزيكا قلوبهم رهيفه

[من مثلي من الناس]

هلا ابو شهد
بووووو شهد طيب والقدر وش بينك وبينه من ذكرياااااات

عطنا القصه :D