المساعد الشخصي الرقمي

مشاهدة النسخة كاملة : . . . أريد حلا (اعتذار وردود) . . .


Sami96SA
22-08-2002, 01:26 PM
مساء الخير

يسعد مساكم جميعا.


لقد حذف الموضوع الأصلي بناء على طلبي أنا .. والسبب هو صحوة ضمير متأخره بعد إدراكي أن بعض ما جاء في الموضوع لا يتناسب أبدا مع أخلاقياتنا في هذه الدرر الجميله كأعضاء وكمشرفين.

لقد قلت ما قلت في وصف الرجل المعني في المشكله دون إدراك مني وقتها بحجم الخطأ الأخلاقي الكبير الذي وقعت فيه رغم أن ذلك الخطأ لم يكن مقصودا ومتعمدا مني .. بل لم يخطر في بالي أبدا أنني كنت على وشك في تسبب إهانة لأحد.


والآن أعيد الموضوع مرة أخرى مع الردود وذلك عرفانا مني إلى كل من شارك برأي أو اقتراح في حل المشكله .. فليعذرني من رفض أن أقوم باعتذار على ما حدث .. ولتعذروني جميعا على ما حدث.




أريد حلا


عادة أنا ما أحب أعرض مشاكلي الخاصه في المنتدى واسألكم تساعدوني في حلها.

(ويا كثر مشاكل الواحد فينا .. صح؟)

لكن هالمره أعتقد اني مضطر اني أقول لكم عن مشكلتي المستعصيه اللي صار لها اسبوعين .. وأرجو ..

فعلا أرجو ألاقي لها عندكم حل .. ومن لي غيركم!!!

بحاول أختصر عشان لا أتوهكم وتضيع الحلول .. وضيع أنا.



يا ساده يا كرام .. يا أحباب ويا خلان

صلو على النبي المختار ... اللهم صل وسلم عليك يا رسول الله.


طبعا ومثل ما بعضكم عارف اني نقلت للصحراء عشان أكون من ضمن مجموعه طيبه اللي بتساعد في تشغيل وصيانة معمل غاز جديد للإستهلاك المحلي .. المعمل مازال قيد الإنشاء.

العمل تمام وكل شي على ما يرام.

الدوام من 6 الصباح الى 6 المساء .. الوقت يمشي من غير أيتها مشاكل وكل واحد يروح بيته قصدي غرفته ويتشطب ويروح يتعشى بسلام وأمان.

في يوم كان عندنا اجتماع .. وفي الإجتماع تعرفت على زميل جديد .. رجال محترم وأخلاق .. علم وخبره وتكانه في الحديث ومنطق في الرأي.

أعتقد اني أحتاج أوصف لكم شكل الرجال عشان يمكن يكون ضروري لتحديد أبعاد المشكله.


الرجال طويل عريض المنكبين .. كثيف الشعر واللحيه .. له كرش متدلدل حبتين لقدام .. وكرش من نوع آخر متدلي حبه وحده .. يعني انه ضخم الجثه.


لكن الرجال ما شا الله عليه ومن أول مره عرفته اتضح لي انه يتوزن بمعدن ثمين .. وشكلنا راح نتعاون مع بعض كثير في المستقبل .. واحتمال .. أقول احتمال يعني اني بصير رئيسه في المستقبل القريب.


لحد الآن تمام؟

الحمد لله انكم تابعتو معاي .. واشكركم للمتابعه.

نجي نقول لكم وش السالفه .. ووش هي المشكله بالتحديد.

الأسبوع اللي فات جبت معي ولدي أحمد .. وكانت تجربه فريده من نوعها بصراحه ان ولدي يكون معي بنفس الغرفه وبنفس المكان اللي أشتغل فيه .. والأهم ألعب معه سوني بعد العشا .. وبعدين نطلع نلعب تنس طاوله وبلياردو.

يعني كان روميتي اسبوع كامل .. ذكريات جميله مع أحمد .. ولـــدي.

أول ليله لما جينا ننام بعد نشاط كبير في صالة الألعاب .. قلت لأحمد أنا شكلي بنام على طول لأني تعبان ومرهق من الطائره والشغل بالنهار واللعب معك.


قال أحمد نام يا يبى .. تصبح على خير.

توني بغمض عيني .. أقول توني بس بحرك رموش عيني عشان أغمض .. واسمع داك الشخير اللي من كبره فكرت حالي في زريبة بقر وانتو بكرامه.

شخير .. تسمعه وتترحم على كل ملائكة السماء من إزعاجه.

أحمد بعدها نقز من الفراش وسأل : وش دا ؟

اللي نسيت أقول لكم اياه ان غرفتي خشبيه portable .. وراسي يكون براس جاري اللي وراي .. هو بغرفه 3 ونا بغرفه 4.

لكن معقول الشخير ينسمع في الغرفه المجاوره .. تسألوني؟

أقول لكم معقول إذا أخذنا في اعتبارنا نوعية المصدر اللي جاي منه الشخير.


بعدها أحمد قام يضحك ومو مصدق ان هذا شخير بني آدم.

حاولت أنام .. أجبرت عيوني تغمض .. ماكو فايده .. كل الطرق ما كانت تؤدي لروما .. كل الطرق كانت تقول لي اصحا يبو احمد والعب سوني مع ولدك لين ما يهجد الرجال.

أبد والله ما هجد .. ولا هجد في باقي ليالي الأسبوع اللي كان معاي فيه أحمد.


حتى أحمد قام يتمسخر علي مع اخوانه وأمه لمن رحنا في الويكند .. ومو بعيده علم السالفه لكل أصحابه.


مشكلتي يا جماعة الخير الأسبوع اللي فات وهذا الأسبوع أشعر بإرهاق شديد من قل النوم .. مع اني والله بالكثير الساعه 10 ونص أنا على الفراش .. والسبب أبو شخيره حبيب قلبي.


واحد من الشباب ساعدني في التحري عن من يكون هذا الجار السعيد الحظ اللي قلب ليالي سهر وعدم استقرار.

حزروا فزروا طلع مين؟؟

ما غيره الرجال اللي قلت لكم عنه .. زميلي ضخم الجثه عريض المنكعين.

طبعا جا في بالي كذا حل للمشكله:


واحد من الحلول:

اني أنقل لغرفه ثانيه .. بس للأسف ما فيه .. زحمه على الغرف.


الثاني من الحلول:

اني أكلمه وقول له بكل أدب انه لا يشخر عشان أعرف أنام .. بس ما ظنيتي راح يقدر حتى لو هو حب يساعدني ويرفق بحالي خاصة إذا الشخير اللي هو فيه من النوع الحلوف .. يعني لحميه ومحتاجه عمليه.

وبعدين أخاف يزعل وياخذ بخاطره .. ونا الرجال بصراحه احترمته من يوم عرفته في الإجتماع.


الثالث من الحلول"

اني أكتب موضوع في المنتدى أشرح فيه مشكلتي وارتجيكم تشوفون لي حل .. وهذا اللي سويته.


تهقى تلاقون لي حل .. طيب وش هو الحل؟


بعطي جائزه اللي يشوف لي حل ويتنفذ والمشكله تنتهي واعرف أنام زي الناس مره ثانيه.

وفيه جائزه ثانيه لأطرف حل راح يحدد صاحبها ولدي أحمد لما يقرأ الحلول.


أحب أوضح شغلات ماذكرتها في عرضي للمشكله.

- أحمد مو معاي الأسبوع هذا .. كان معي الأسبوع اللي فات.
- السكن عباره عن بنايه (بورتابل) من دور واحد وممر في المنتصف يفصل الغرف على جانبين ومجموع الغرف 10 في كل بنايه .. ويوجد أكثر من 35 بنايه كلها مليانه أوادم.
- في كل غرفه مكيف جدار وتلفزيون وثلاجه وحمام مستقل .. تقريبا مثل غرف الفنادق بس خشبيه.
- الزميل الى الحين ما يعرف أنا جاره.
- توجد عياده مقابله للبورتابل تماما وبها طبيب وممرض.




بانتظاركم .. خذوا راحتكم .. لا تستعجلون .. وأي سؤال أو استفسار يساعد في حل قضيتي أنا مستعد.




(سويا نتطلع كي تكون الدرر سباقه في إيجاد الحلول لأعضائها .. وخاصة مشرفيها)




تحياتي للجميع.


---------------------

سامي
Sami96SA
22-08-2002, 01:34 PM
صباح النور والسرور ..

شوف يا أبو أحمد <----- مدام احمد بيقرا الموضوع لازم نسوي الشويتين بتوعنا..:D

الاكيد ان عندكم العمل شفتات ..صح؟؟

خله هو بالليل وانت بالنهار..

روح للمسؤول الي يرتب هذا العمل ..وحب على خشمه:D

واذا تأخذ معاك هدية هم بعد زين على زين :cool: وبوسط الهرج والمزح

ادعس مشكلتك المتعبة هذي وقل له ترى لازم تشوف لي دبره ولا قريب

بتشوفوني شاب بالرجال وبغرفته :D :D :D وتقولون سامي ماقال:D

ان طاعك كان بها وان ماطاعك احرقه مع الرجال :D


ها ايش رأيك بالحل ؟؟؟:rolleyes:

ممتاز صح ؟؟

ادري دايما أنا منقذة للغير:D
Sami96SA
22-08-2002, 01:36 PM
هلا بالطيب ابو احمد

الله يسعد ايامك ياشيخ

فعلا كان الله بعونك على هالجـــــــار

لكن فعلا احمد اثبت انه قد المسؤليه

في تحمله هذه الحاله لمدة اسبوع

شف حبيبي

في اعتقادي عندك حلين فقط طبعا تقديرا لضروفك معه

الاول :

هو ان تقوم بتشغيل المسجل بشريط قرآن كريم من اللى

مدة الوجه حقه ساعة

بحيث تكون كافيه ان النوم يجيك وتنسى الشخير

بعدين لاتقول مو متعود او مارايح يجينى النوم لاني استمع قرآن

لا حبيبي رايح تتعود ورايح يجيك ابليس على طول بالنوم :SMIL:

مو جالس تسمع قرآن ؟

اما الثاني :

فهو وضع سدادات في اذانيك ودبها نومه :hap:

والله قلبي معك يا ابو احمد

بس عاد لو انا محلك شديت عن الحارة كلها

تحياتي

[/QUOTE]
Sami96SA
22-08-2002, 01:39 PM
يسعدلي مساك ابو احمد


حبيبي كسرت خاطري :hap:


من جد الله يعينك ... وزين ان احمد شاف معاناتكم بنفسه

على الاقل ينقل مشكلتك لامه :hap:


عموماً انا مع حل ابو فهد الثاني

يعني سوي زي فلم كرتون ....

حط سدادات اذن من عيار 2500cc

صدقني بتفي بالغرض ...


الللللللللللللله يخارجك يا ابو احمد



وياريت تسلملي على جـــــارك بالمره



ويا الله على بابك يا كرييييييييييييم يا كرييييييييييم



مع تحياتي
Sami96SA
22-08-2002, 01:40 PM
انا رأي انك تتحمل في صمت انت اللي متعبك انك تحكي الحكاية يعني المشكلة موجوده وانت ما اكتشفتها الا لما جا ولدك احمد يجوز انك قبل كذا انت اللي مزعجه بشخيرك يا اخي وانت ما انت داري
عموما الحل الوحيد انك تنام قبله ومنها بالمره تنسى السهر احسلك
Sami96SA
22-08-2002, 01:42 PM
سلام
مساء اللافندر......

يا أخي مشكلتك عويصة يا أبو أحمد...

شوف أمامك الحلول اللي طرحوها الأخوان...

وأقترح عليك إنك تروح تكلم صاحبك هذا وتقوله ينقل سريره للجهة الثانية ...<==إنت انسان مؤدب كثير فثق تماماً ماراح يزعل منك (أنا متأكد)

وبعدين ترجع لغرفتك وتنقل سريرك للجهة الثانية

وبكذا صارت المسافة كبيرة


وعندي إقتراح ثاني بعد

إشتري عازل ولصقه بجدار غرفتك..

وبكذا انحلت مشكلتك :D

وما أعتقد إنك صابر كل هذي المدة وإنت للحين ما بعد لقيت حل

إلا إذا تعودت على موسيقى بيت هوفن :D

ذكرتني بواحد من الشباب أيام القريات الله يذكره بالخير..
نشغل فيلم فيديو ونسوي جو سينمائي (نقفل الأنوار ونشغل البلاك لايت) وعد من واحد لعشرة تلقى خوينا سحب الشفاط

وأنواع الموسيقى حتى الجاز:D


سومة...
سؤال صغير مستحي أقوله لك ..

إيش رايك برد أبوشهد...أخوي الكبير..

مو كأنه فلسفي زيادة عن اللزوم إضافة لثقته المفرطة في إن حله مثالي؟؟

فيلسوف +واثق ويمكن مغرور ;) .......إلا والله أخويا ونص:D

---------
أبوشهد...مولازم تعقب على كلامي هذا ::*
----------
Sami96SA
22-08-2002, 01:44 PM
بخخخخخخخخخخخخخخخ


السلام عليكم ...



ابو احد اللهم لا شماته ...




عندي لك حلين ... إذا ما اعجبك حل اي احد من الشباب ..



1 - اعطني رقم تلفون جـــــارك وما يصير إلا كل خير .



2 - او روح فيه شي يسمونه " إير بلق " شي انتيكه كأنك في عالم لوحدك ولا حتي تسمع احمد ولدك الله يحفظه ((((( كيفك يا احمد:D .. تسلم حبيب قلبي انا طيب لا تروووووووح مع ابوك إلا ان ينقل الجــــار إلى حارة الهنداويه )))) جربها يا عم .. وراح تدعي لي .. إذا تبي اجيب لك خمس حبات بس:D ... كل ليله حبه ... وكل خميس تجي واعطيك الخمس الجديده ... والله مو مخدرات يا ابو احمد :D





تحياتي
Sami96SA
22-08-2002, 01:45 PM
مرحبا سامي

اعتقد ان الحل بسيط جدا وهو انك تروح للمسؤول عن السكن وتشرح له مشكلتك وتطلب منه نقلك الى غرفه ثانيه بعيد عن الراجل الطيب هذا وبدون احراج له او لك بحيث انه ما يعرف عن الشيء هذا ولا تقول لي ما فيه غرف زياده لاني اعتقد ان الغرف متوفره وبكثره.

وفيه حل ثاني اذا ما عجبك هذا الحل وهو انك تشوف لك واحد من الزملاء اللي يعملون في فترة آخر الليل مثل جماعة الامن وتتبادل معاه بالغرف بحيث تبقى الغرفه المجاوره للاخ هذا فاضيه اثناء الليل ولا ينزعج منه احد.

شكرا لك
Sami96SA
22-08-2002, 01:47 PM
السلام عليكم ..

اخوي سامي ...قريت كل الحلول كلها ممتازه مشاء الله ...

ولكن عندي راي يختلف ..

لما تصحي الصباح روح عندو ... وسوي نفسك تعبااااااان (مثّل حتى لو ماكنت تعبان)

رح يقولك اشفيك يابو احمد ...
رد عليه مانمت طوول الليل ...

حيقولك خير (اذا ماقال خير كمل الحكايه له ولاتهتم)

قوله امس بالليل احاول انام ماني قادر منزعج

حيقول من ايه (لوماقال احكي له ولاتهتم)

منزعج عشان غرفتك قريبه من غرفتي وطبعا انا فرحان كثثير بجيرتك
بس ..........

حيقولك بس ايشش ؟؟ (لو ماقالك كمل ولاتهتم )

بس انت مشاء الله موظف ممتاز وطيب ومكسب
لكن ..

حيقولك لكن ايش(اذا ماقال كمل ولاتهتم)

لكن صوتك شخيرك مزعجبنا شويه ..وانا حاب انصحك عشانك لانو موكويس لصحتك :)

واعطيه اسم مستشفى او دكتور وقول له ضروري تتعالج ...


طبعاً في فؤاد كثير لك و اهلو رح يدعولك بالخير كمان :)


------------------



و اطرف حل بننتظر الجني:)لها...


تحياتي..
Sami96SA
22-08-2002, 01:48 PM
ربنا يكون في عونك ...

:(

بصراحه مهنا حل الا وقالوه هاللحى الغانمة ...

وان كنت اييد اللجوء للمسؤول ولا من شاف ولا من دري ...
والا قطن الأذاني على الذمة ....

ياعزتي لك ::]


شف انا راح ادعي لك من كل قلبي ...


صدق من قال >> يامن شرى له من حله علاله :(


*جيـــــــاد *
Sami96SA
22-08-2002, 01:50 PM
[B]السلام عليكم..

وانت طايل تسمع سيمفونيات ببلاااااااااااااااااااااش؟؟؟ :D


عجبني رد ملكة البحار..دبلوماسي مرة..لكن كنتي بتكوني اشطر

في رأيي طبعا..لو يقول له..في صوت غريييب مدري من فين يا اخي

مايخليني انام طول الليل..ويسأله ان كان يعاني منه..شفتي

كيف اني داهية :D :D


وكمان رد ابوفهد بخصوص شريط القران..تعرف اني جربتها مرتين..

قلت خليني انام على صوت القران..لكن جاني تأنيب ضمير لان

القران ماينسمع وانا في سابع نومة :confused:


وكمان فكرة خضر حلوة..انت حاول ماراح تخسر شي..:cool: [/B
Sami96SA
22-08-2002, 01:52 PM
أبو احمد

وانا جالس اقرا الردود هنا عجبتني فكرت حنان

من جد والله ...

ويوم وصلت لنهايتها قلت ياريتها س ماانهتها كذا ...

نزلت تحت علشان اقول النهاية اللي براسي ...

لقيت بسمة الحياة سابقتني ..


بس من جد فكرة حلوة ..

بس انتبه لا يكون منتبهلك زين ويقولك

انت بتستعبط علي يا..........(تم الحذف بواسطتنا شخصيا :)
Sami96SA
22-08-2002, 01:54 PM
يسعدلي صباحك سومة


حبيبي جبتلك الحل اللي هوااا :005:


ليش ما تشتريلك Caravan ;-(

وتروح مسافة كيلو عن الحقل وتريح نفسك :hap:

ارجع لايام states وتذكر كيف يعيشون كثير منهم فيها


صدقني بتتهنى اذا اخذت واحد


وانا مستعد اجي اقضي معاك يومين كمان <--- عرض مغري



شكلي انا اللي جبت الحل :SMIL:


مع تحياتي

[/QUOTE]
Sami96SA
22-08-2002, 01:57 PM
يصبحك بالرضا

هانت كلها يومين وتشبع نوم

اشغل نفسك بهذا التفكير وانت بترتاح إن شاء الله


ما عندي حل لان الردود ما قصرت بس حبيت اشارك بحل نفسي نوعا ما :)


اذكر اني مرت علي فتره ما انام وكانت فتره مي قصيره

تعبت فيها نفسيا اكثر لاني اكون بعز الارهاق وعيوني مفنقله :)

قالت لي وحده من صديقاتي انها قرت مقاله تقول :

إن الانسان اذا استرخى بس وصفّى فكره من كل شي وغمض عيونه بدون ما ينام بيرتاح راحه تعادل النوم


ما راح اقول لك كلم صديقك وقول له تراك مزعجني ما انام لأني اعتقد ومن خلال خبرتي بتعامل سامي الجنتل معانا كمعرفات إنه ما راح يجرؤ عليها لكن

حاول تأقلم نفسك قد ما تقدر مع الوضع ولا تعطيه كل اهتمامك



انا من النوع اللي ما اعرف انام وانا اسمع همس ولا بمكان فيه بصيص ضو لكن بالمقابل

لمن اكون منهده والصوت يجي بعدين ولا انفجار هيروشيما يقومني :)





بكل تفاعل

الله يساعدك ويقصر مده المهمه ويلم شمل الاسره

اهم شي

تأقلم مع وضعك الجديد وبترتاح وعن تجربه :)
Sami96SA
22-08-2002, 02:04 PM
يسعد لي صباحك يا شيهانة القرون


ما شا الله عليكي يا فتاة الساحل الشرقي .. عدوانيه.

تبي تشبين الـرجـــال بقاز وعود كبريت مره وحده ؟ والله ينخاف منك!!

أجل وش بتسوين لو طلع زوجك من النوع اللي ما يهدا له بال إلا لمن كل جيرانكم يسمعون شخيره.

كني أشوفك قالبته فوق تحت مع شرشف وبطانية السرير ووصابه عليه تنك بنزين وشابه فيه .. لابوك لابو من زوجني اياك :)


حلك يندرج تحت بند "الحلول الطريفه" .. وبنشوف أحمد وش يقول عنه.


تحياتي يالغاليه وشكرا على ردك السريع.

----------------------

سامي
Sami96SA
22-08-2002, 02:06 PM
وانت أطيب يبو فهد

وعليكم السلام ورحمة الله وبركاته .. صباح الخير.

فعلا زين منه أحمد قدر يصبر طول الليالي الأربع اللي كان معي ومشاركني مأساتي.

الحين واحمد مو وياي .. صاير لوحي مع هالمصيبه.

اتصل علي البارحه الساعه عشر وسألني .. اشتغل العزف المنفرد اللي وراك والا لسه؟ ههههههههههه

اقتراحاتك يبو فهد ممتازه جدا وكنت البارحه بنفذ اقتراح الإستماع للقرآن لكن ما عندي مسجل .. ماعندي مشكله في الإستماع ونا أحاول أنام وأصلا هذي عادتي أشغل التلفزيون على قناة إخباريه ووقت اطفائه على نص ساعه.

لكن المشكله عندنا هنا اني ما أقدر أخلي التليفزيون أو المسجل بصوت عالي لأن جيراني الثانيين راح ينزعجو وصير أنا المشكله.

وبعدين يجوك طايرين على المنتدى يشكوني :)


اقتراح سدادات الإذن حلو وسهل تنفيذه لكن أنا واحد من الناس ما أقدر أنام وفي إذني شي أو على عيني صماده مثل اللي في الطيارات .. جربت السدادات من قبل وما جاني نوم.

البارحه جربت وحطيت لي نشاف في أذاني بعد ما فقدت الأمل في النوم من شخير هالآدمي لكن ما قدرت .. وصدقني لو قلت لك يبو فهد ان شخيره صار طنين في راسي حتى مع سدادات النشاف.


دمت لي بخير يالحبيب.

-------------------

سامي
Sami96SA
22-08-2002, 02:07 PM
يسعد لي أحلى صباح على أحلى شنب في جده غير

عزيزي الظل .. تحياتي


فعلا أحمد مجيته كان لها فوائد كثيره وأهمها يشوف معاناة أبوه في هالصحراء وفوقها معاناته مع أوادم مثل صاحبنا.

أحمد حصل له فرصه يتعرف على المعمل وفرصه يتعرف على طبيعة عملي ويشوف الشباب والشياب وكيف ان الحياة كفاح ومآسي .. والأهم يدرك ليش الواحد يحتاج انه يتعلم وبدون علم وشهاده ماراح يوصل لمكان.


مثل ما قلت لبو فهد اقتراح السدادات ما تصلح لي وخاف يصيبني الصمخ


تحياتي الخالصه.

-------------------

سامي
Sami96SA
22-08-2002, 02:09 PM
صباح الخير

العزيز أخو العزيز أبو شهد

اسمح لي واعذرني لأني ما كنت من ضمن المرحبين .. والحقيقه يبو شهد قرأت لك ردود وتأكد لي انك انسان واقعي وتحب تدخل في الموضوع باختصار.

ردك هنا على سبيل المثال:

"انا رأي انك تتحمل في صمت انت اللي متعبك انك تحكي الحكاية يعني المشكلة موجوده وانت ما اكتشفتها الا لما جا ولدك احمد يجوز انك قبل كذا انت اللي مزعجه بشخيرك يا اخي وانت ما انت داري

عموما الحل الوحيد انك تنام قبله ومنها بالمره تنسى السهر احسلك


كلامك صحيح يبو شهد وهو فعلا اني تكلمت كثير عن المشكله مع زملائي هنا في العمل ويمكن من كثر ما تكلمت عنها المشكله تضخمت وصارت تسكني.

بيني وبينك .. المشكله موجوده وأي واحد مكاني بيخليها في أول لستة مشاكله ولازم يتكلم عنها مع أقرب الناس.

الرجال ما كان موجود قبل أحمد ما يجي معاي .. الغرفه كانت فاضيه وصادف انتقال صاحبنا معنا يوم اللي جبت فيه أحمد.

اقتراحك اني أنام قبله صعب شوي لأني بكذا صار وقتي كله شغل ونوم بس .. وبعدين الساعه عشره أو عشره ونص ونا على الفراش أعتبرها جيده لأن فيه ناس هنا ينامون الساعه 12 أو وحده.


تشرفت بمعرفتك خوي أبو شهد وشكرا على ردك السريع.

--------------------

سامي
Sami96SA
22-08-2002, 02:23 PM
صبحك بالخير ثامر

كيفك وكيف أيامك؟ ها .. جاهز للمدرسه ووجع الدماغ؟

الله يكون بعونك .. وعون كل من له علاقه بالتدريس.


تقول "إنت انسان مؤدب كثير فثق تماماً ماراح يزعل منك"

أنا صحيح مؤدب لكن مو على طول خاصة لما المسأله توصل للي وصلت له وصاير في حالة ارهاق وتعب.

البارحه الساع 2 ونا في حوسه على دا السرير أبي أنام فعلا طلعت من طوري وفقدت أعصابي وفكرت اني أروح له ودق عليه الباب وقول له

Enough is enough

مثل ما قال بوش في خطابه الشهير.

لكن ولأني أخذت على نفسي عهد اني أتصرف بحكمه ورويه قررت اني أصبر وانتظر اقتراحاتك وادرسها في الويكند وشوف وش المناسب.

تعرف اقتراح تغيير مكان السرير جا على بالي البارحه لكن فكرت أجرب أول قبل ما أتعب حالي .. وفي عز شخيره ونا ماني قادر أنام رحت وجلست في أبعد مكان عن مخدتي وهو الكنبه أم نفر.

تصدق يبو الثوم مازلت أسمع شخيره.

أقول لك وصدقني الرجال عليه شخير مثل صوت الدباب .. شي مو معقول أبدا .. وكل مره أشوفه في الكافتيريا أقول في خاطري الله يسامحك يالجار.


أمس ونا جاهز أطلع أفطر الصباح الساعه خمس ونص والرجال بعده نايم واسمع شخيره .. شغال من أول دقيقه لآخر دقيقه.

أوقات يهدأ وما أسمع شي وقول الحمد لله أخيرا هجد .. ولين خلص أحس نفسي بروح في سابع نومه يرجع ثاني يعزف وتره الحساس.


بس برجع أدرس موضوع تغيير السرير مره الثانيه .. وبالنسبه للعازل ما أعتقد انه عملي خاصة والغرفه مي ملك أبوي الله يرحمه.


لك صافي مودتي.

--------------------

سامي
ابوفهد
22-08-2002, 02:30 PM
هلا حبيبي ابو احمد

ان شاء الله ريحت بالاجازة

تضامنا معكم في تعديل الموضوع

فقد قمت بتعديل صفة جاركم

في جميع المشاركات

فامل من الجميع معذرتي

على تدخلى في مواضيعهم

دون اذن مسبق

وعشمى هو السماح منكم

تحياتي للجميع


ابو احمد انتبه لردودك انت بعد

تراني عدلت واحد :hap:
Sami96SA
22-08-2002, 02:35 PM
كبير يبو فهد

انت دايما كبير .. بالأفعال أقصد


كلمة شكر ما توفيك حقك ومع ذلك الحين ما عندي غيرها


شــكــرا
Sami96SA
22-08-2002, 02:43 PM
مساء الخير

هلا بناصر اس مربع

إذا تشوف انك تقدر تحل المشكله لما أعطيك تلفونه فهذي بسيطه .. بس الأول تعلمني وش بتسوي.

يعني قصدك تتصل عليه على انك من مسؤولي السكن وتقول له جتني شكوى عليك من جارك في غرفه 2 (مو أنا طبعا) .. وتعطيه انذار نهائي يا يعدل من أوضاعه أو يقطونه في أبعد بلوك :)

تصدق انها فكره حلوه!!

خلص ولا يهمك أنا أتصل عليك واعطيك رقمه .. أوبس .. مافي فايده رقمه مو عندي الحين .. بس السبت انشا الله أقدر أتصل عليك واعطيك اياه.

اتفقنا؟ ماااشي.


بالنسبه للإير بلق .. مثل ما فهمت الشبيبه فوق ما تضبط معي .. جربتها كذا مره بس مااااش.


شكرا حبيبي.

------------------

سامي
Sami96SA
22-08-2002, 02:48 PM
مسيك بالخير عزيزي خضر

مدري ليش انت متأكد ان الغرف متوفره وبكثره!!

أقول لك يبو الشباب الدنيا هنا زحمه وفي موظفين المفروض جو عندنا من زمان بس لأن مافيه سكن فقاعدين ينتظرون لين تخلص التوسعه اللي شغالين فيها.

الحل الثاني اني أغير مع زميل أمن أو خلافه نفس الشي .. ما يضبط لأن رجال الأمن سكنهم في مكان ثاني .. وهم أصلا مقاولين .. مو تبع الشركه.


حلك الأولاني هو أفضل شي لكن للأسف يا خضر مافيه غرف.


شكرا خضر.

-----------------

سامي
المهاجرة
22-08-2002, 02:49 PM
أبو فهد يالريس

يمسيك يالرضا

بس أنا ما وصفت الرجال :(
Sami96SA
22-08-2002, 03:00 PM
مساء الخير

يسعد لي مساكي يا حنان

جبتيها يا حنان .. واعتقد رحت أو جيت بيكون هذا واحد من الحلول المطروحه .. لكن في تغيير في الخطه.

أولا صعب أروح له من الصبح لأن الرجال ما شا الله عليه ما يصحى بدري .. أسمع شخيره ونا في الشاور (صعب تصديقها هذي) .. لكن أقول لك الحقيقه الرجال ما يقوم بدري ونا لازم أروح المكتب.

في فكره اني أتبع خطتك في وقت الغذا لما أشوفه في الكافتيريا .. أجي أجلس معه وبعد حوار ودي أخش عليه في أسئله استدراجيه لين ما نوصل للهدف.

والهدف بيكون مراقبة ردة فعله لمن أعمل حالي مو عارف انه جاري اللي يشخر وما يخليني أنام .. واسأله لو هو مكاني وش بيسوي.


هههههههههههه

فعلا قاعد أتخيل ردة فعله والإقتراح اللي بيقوله.


وأكيد بعدين راح أنصح فيه عشان أهله يدعوا لي .. وبكذا تكوني انتي يا حنان حليتي مو بس مشكلتي أنا .. بتكوني عملتي معروف لعائله كامله في يوم الخميس والجمعه لمن يكون معهم.


شكرا يا ملكه.


--------------------

سامي
Sami96SA
22-08-2002, 03:06 PM
مساء الخير

كيفك عزيزي جياد

انشا الله تكون بخير .. وايامك كلها فرح ووناسه.

يخوي هذي الساعه المباركه اللي شرفتني فيها الموضوع .. الله يخليك يا رب ويزيدك إبداع فوق إبداع.


اللجوء للمسؤول في حاله مثل دي هو خيار ما أحب أتخذه خاصة في المرحله هذي لأني بكذا ممكن نصير أنا وهو في علاقه تختلف عن اللي أنا أرتجيها خاصة والحاضر يوحي ان احنا بنشتغل كثير مع بعض في المستقبل.

لذلك أفضل انها تنحل بطريقه وديه .. وكل واحد يصلح سيارته :)


شكرا جياد.

--------------------

سامي
الشهد
22-08-2002, 03:32 PM
السلام عليكم ورحمة الله وبركاته







مساء الخير والطيبة .. أخوي سامي ..

.
.


دائما أنت كبير بأخلاقك وسامي بتصرفاتك .. الله يبارك فيك

.
.

يعتمد الحل على شخصية صاحبك ... اذا هو من النوع الحساس اللي

ممكن تنبيهك له يجرحه .. فاعتمد على أسلوب غير مباشر...

.
.

بتقول كيف؟؟

طيب اسمع ...

صديقك هذا متي يروح ينام؟؟؟

انت مرة سو نفسك بتنام قبله ..وحط راسك ... وخل بالك يكون هو

بعده ما نام ..

وابدا بسلسلة الشخير الصناعي ...

يمكن هو ساعتها يحس فيك ؟؟ وينتبه ...

بس ما أوصيك علي من الصوت شوي ..عشانه يفهم ...

.
.

أحيانا عشان ما نجرح اللي نعزهم نحتاج انسوي اشياء غير مباشرة ..

شفت يا اخوي كيف ردي مختصر ومب طويل ...
.
.

ردي كان على سبيل المزاح ...

.
.

لكن ..


أحيانا نرى الكثير من الامور معقدة ..مع إن حلها بسيط ...

اذا توجهت لصديقك وكلمته بصراحة وروح مرحة .. أعتقد سيتفهم

لأنه أكيد ادرى بنفسه ..وسيفكر معك بحل ...

ولا اعتقد انك من الأشخاص الذين قد يتضايق من صراحتهم احد ...لأنك

تتكلم بقلبك قبل عقلك..


واذا توصلت لحل آخر قد أعود

.
.


دمت بخير وسعادة .. ونمت براحة وطاعة



خالص احترامي ...
ابوفهد
22-08-2002, 03:45 PM
السموحة بو احمد الله يحفظك




الاخت الكريمة المهاجرة

كلامك صحيح ماوصفتيه

لكن الخطاء كان من ابو احمد


لانه كتب ... رد الــهاجـــــرة

فعدلتها الى المهـــاجـــر ة

فهل ذلك لقافة منى ؟

ام تصحيح اخطاء عفوية ؟

حقك علينا واسفين :SMIL:

تحياتي
Sami96SA
22-08-2002, 03:56 PM
مساء الخير

يسعد مساك يا سمايل أوف لايف

يعني انتي وحنان متفقين بس انتي تبيني أجيه بطريقه ملتويه شويه وفيه خبث أو سيايه أوكروباتيه مراعاة للشعور .. مممممممممم فكرتك مش بطاله أبدا.

يمكن ليش لا .. ونخليها من ضمن خطة حنان عشان انتو الإثنين تشملكم دعوة أهل المحروس.

فعلا فكرة أبو فهد لاستماع القرآن من ضمن الخطط بس بالهيدفون .. يمكن تكون آخر الحلول لأني مثلك ما أحيذ الإستماع للقرآن ونا بحاول أنام .. ولو انها مي حرام طبعا .. الإستماع للقرآن جيد في كل الأوقات وأهم شي النيه.

تسلمين يا بسمه.


-------------------

سامي
Sami96SA
22-08-2002, 03:59 PM
هلا أبو رهف

يا كثرك هاليومين ما شا الله عليك.

أعتقد خلص أنا وانت اتفقنا على حلك مال نسيج .. وهذا اللي بيصير يوم السبت في الليل لين جيت أنام.

أبو رهف اقترح اني أتصل على الدكتور وجي يشوف المصيبه اللي أنا فيها وبعدها يكتب لي أنا وصفه بنقل اضطراري لغرفه ثانيه يدبروها لي من هنا والا هنا .. أو يكتب لصاحبنا وصفه طبيه تخمد شخيره للأبد بس ما تموته.

شكرا أبو فراس :)


-----------------

سامي
المهاجرة
22-08-2002, 04:00 PM
انا اللي اسفه والله يالريس

أنا بعد ما ارسلت ردي لك ندمت والله وحسيت اني تسرعت

ولولا اني اعرف انه انقرا كان حذفته


انتظرت ردك عشان اقول

العذر والسموحه منك يالكبير

والأسف والاعتذار حقك علينا :$
Sami96SA
22-08-2002, 04:03 PM
مساء الخيرات

حبيبي محمد (الظل)

فكرة الكارافان أو موبايل هوم جت في بالي ب عشان أنام كويس أحتاج لمئة ألف ريال أشتري فيها الموبايل هوم .. مدري إذا هي تستاهل خاصة ونا لسه ما عملت أي خطوه وديه حبيه لحل المشكله.

أذكر في أمريكا استأجرت لي وحده وسافرت فيها مع المدام من غرب الولايات إلى شرقها .. كانت رحله من أمتع الرحلات .. طبعا ما كانت موبايل هوم .. كانت مثل ما قلت انت كارافان.

وتسلم يا مدير.

--------------------

سامي
Sami96SA
22-08-2002, 04:09 PM
مساء الخير

خيتوه مهاجره إلى الأفق .. ويمسيك بالرضا والعافيه يا أستاذه

الحمد لله انك تفاهمتي وتصالحتي مع أبو فهد العمده .. غلطتي أنا اللي كتب الهاجره .. امسحيها بوشي.

نعود لردك.

اسمحيلي بس مين قال لك انها هانت يوخيتي عشان الويكند؟ مثل ما قلت انها مشكله مستعصيه وإذا ظليت ساكت عنها معناتها راح أستمر في معاناتي.

تعرفي كم ساعه نمت هنا في البيت؟

من الساعه 9 البارحه وما صحيت إلا الساعه 11 اليوم الصبح .. وبرضك حاسس اني نعسان.


نصيحة صديقتك على عيني وراسي :

"إن الانسان اذا استرخى بس وصفّى فكره من كل شي وغمض عيونه بدون ما ينام بيرتاح راحه تعادل النوم"


أنا ما أعتقد أحس اني ارتحت إذا عملت كذا وبس .. لازم أغوص في النوم واستمتع باحلامي .. حتى نصيحة صديقتك أعتقد واحد من شروط نجاحها ان المكان يكون هادي مو تحت تأثيرات شخيريه مثل اللي خبرك :)


شكرا هجوره. <---- ما يحتاج تعدل يبو فهد أنا أدلع المهاجره هنا.

--------------------

سامي
Sami96SA
22-08-2002, 04:19 PM
مساء الخير

من؟ شهد؟ يا هلا يا هلا

يوخيتي وش سويتي فيني .. الأولاد قعدوا يضحكوا علي ونا أعمل الشخير الإصطناعي.

عجبتني الفكره وقمت أشخر بأعلى صوت .. وبغيت أفطس.

رضا قام يقول لي "لا هذا مو صوت الأسد"

يفكرني أقلد له صوت الأسد لأني دايم لما ألعب وياه أسوي له صوت الأسد . وحنان تقول لي .. هذا شخيرك وانت نايم .. أوقات أسمعك تسوي كذا.

ها؟ حنان .. انتي تسمعيني أشخر كذا؟

قالت ايه .. اسمعك .. واذا تبيني أسجلك في مسجل الليله بعد عشان تصدق.


رحت سألت أم احمد .. أنا أشخر في نومي؟


لا يبو احمد انت ما تشخر في نومك بس أوقات لمن تكون تعبان أنا أضطر أروح أنام ويا الأولاد.


الحمد لله .. أشوى.


أعتقد كل واحد تجيه ليالي يكون فيها مرهق ما يقدر غير يشخر .. بس مهما يكون الشخير ما يوصل لمثل حبيبنا اللي في الموضوع.

بالنسبه لحلك الثاني أعتقد انك على صواب .. وانتي نضميتي مع حنان وبسمة الحياة .. ومعهم أبو رهف لأنه صادق على هالحل بعد.


تحياتي لك يا شهد .. واسمحيلي طول المعروض.


------------------

سامي
ملكة البحار
23-08-2002, 10:14 PM
سامي ... دايما قلبك طيب ... وحنون..

شكرا على اعادة الموضوع الحلو ... والتعديل الاجمل ..


تحياتي ..
BackShadow
24-08-2002, 04:02 PM
يسعدلي مساكم جميعاً

هلا سومة ..... الله يقويك حبيبي


الظاهر انك ضيعت الخميس في الموضوع هذا


انا خايف ام احمد تدعي علينا بس :hap:



مع تحياتي
Sami96SA
24-08-2002, 05:19 PM
مساء الخير

أهلين ملكه باشا

تسلمين والله هذا من لطفك.

----------------

محمد .. حماده

حماده لأنك تدلعني وتسميني سومه.


تعبكم راحه حبيبي ,, وفعلا أخذ مني وقت الموضوع لين خلص بس أم أحمد كانت معزومه في عرس بنت صاحبتها.

لا تخاف هي تدعي لكم.

أحسن لها يقعد أبو عيالها في البيت لو يهج من قهوه لقهوه .. وفي ذي الحاله صرت لها بيبي سيتر للصغار.


تحياتي.

--------------------

سامي
aljenny
24-08-2002, 08:13 PM
يسعد مساك سامي ..

ما أقول إلا الله يعينك

الحل جاك بالميل

تحياتي لك
Sami96SA
26-08-2002, 01:02 PM
مساء الخير

هلا بجنجون أفندي

أولا شكرا على الحل اللي جاني بالميل.

أنا قريت ردك من هنا ورحت طاير على الحل اللي جاني من هناك .. امحق حل يا جنجون.

الحين أقول لك حالتي حاله وماني عارف أنام وانت تقترح اني أشغل الرجال بمشاهدة مباراة وهميه لين أنام أول.

والله أنا أول شي استبشرت خير لما شفت ردك فقلت في خاطري خلص .. خلص يبو احمد معاناتك بتنتهي وبتبدأ تنام مثل الأوادم .. هذا بندر وطرش لك الحل اللي بينهي كل مشاكلك .. وأثاري حلك يزيد المشكله .. لأنه إذا شغل التليفزيون هذا معناته إزعاج لي وللآخرين .. ويمكن بعد ينسى التليفزيون شغال ينتظر المباراة وتروح عليه نوم ويبدأ العزف ماله ويصير فوق الإزعاج إزعاج آخر خاصة إذا هو حاطه على أخبار السعوديه .. وتليها الأخبار الجويه.


على العموم حلك طريف وبنشوف أحمد وش يقول عنه لأني خلص نفذت خطة المشاكسه المشتركه مع حنان وشهد وأبو رهف .. وإذا أمداني بعلمكم وش صار مع مستر شاخور.


تحياتي.

----------------

سامي
aljenny
26-08-2002, 08:51 PM
!


ما أقول إلا ياخسارة الوقت إللي قضيته في كتابة ردك يبو أحمد !!

ياريت نص هالوقت بس نصه أخذته في قراءة رسالتي لك !!

يبوي وشو تلفزيونه وشو صوته وشو إزعاجه ؟؟؟!!!


أنا قاصد ما أرد على سؤالك هناك .. عشان ما أخليك تتعمق كثير ..
وأثاري سؤالك أصلاً عن قولة ماشفت رسالتي !

طيب يبو أحمد .. هالمره أبمشيها عشان أحمد ..
لكن إن تعودتها تراني بخلي أذاني وأذانك أربع .. أنت توحي ؟


( لمعلومية الجميع .. ردي ماكتبته هنا لأنه يتنافى مع تعديل الموضوع )


سلام عليكم
Sami96SA
27-08-2002, 09:42 AM
صباح الخير

جني .. جنجون .. يمجنني ومجنن البلد

والله انت شكلك فعلا ناوي تجنني بخرابيطك.

أووووف أنا ألاقيها منك والا من هالدنيا اللي مب صايره عدل .. الحمد لله.


على كل إليكم ما حدث مع زميلي جاري حرفا حرفا دون زياده أو نقصان والله على ما أقول شهيد.



طلعت من الدوام ورحت بالسياره للسكن .. وخذت اللفه إياها عشان أوقف قريب من البلوك اللي فيه غرفتي .. واللي هو مقابل ملعب الكوره.

ونا خلص قربت أوقف شفت الجار يجري حول الملعب .. ما شا الله عليه رياضي .. يذكرني بلاعبين السله حق فريق أحد.

كنت تعبان ومرهق كالعاده .. والسبب انتو عارفينه.

وقفت .. فتحت الباب .. حطيت رجلي في الأرض .. ماكان لي خلق أروح الغرفه واتشطب مثل العاده ... ظليت مكاني واسترخيت وراسي يطالع الأرض ورجلي مازالت برا.

دقيقتين من التفكير العميق في يوم كان طويل متعب .. وإذا بصوت يقترب مني :


هو : لا تفكر كثير يبو احمد كلها يومين وتشوف العيال.

أنا : هلاااااا فلان ما شا الله عليك رياضي .. نفسي أبدأ أجري والعب رياضه مثل أول .. ها .. كيف الشغل؟

هو : الحمد لله .. مالك قاعد تفكر كثير؟

أنا : لا أبد سلامتك بس تعبان شوي.

هو : سلامتك .. من إيش؟

أنا : من قل النوم يا فلان.

هو : ليه .. متى تنام؟

أنا : أنام بدري بس من الإزعاج ما يجيني نوم.

هو : إزعاج ايش؟

أنا (وعامل حالي مدري مين جاري) : جاري يشخر كثير.

هو (متعجب وفي حالة صدمه) : معقوله .. انت أكيد حساس زياده عن اللزوم .. انت ساكن بغرفه كم؟

أنا : كيف الشغل؟

هو : لا تغير الموضوع يبو احمد انت ساكن فين؟

أنا : ليه تبي تعرف .. لا تفاجئني وتقول لي انت جاري .. ههههههه

هو : لا .. عادي .. بس معقوله الشخير بيوصلك للغرفه؟

أنا : أنا عارف انها صعبه تتصدق بس هذي هي الحقيقه.

هو : انت بغرقه كم يبو احمد .. قول لي الله يخليك.

أنا : ليه انت مصمم تبي تعرف رقم غرفتي .. أخاف انت تكون جاري يبو الشباب وبعدين وش يطلعني من هالموقف المحرج معك.

هو : لا محرج ولا شي بس انت تبالغ بشغلة الإزعاج دي .. كل الرجال يشخرون في نومهم .. انت ما تشاخر؟

أنا : أنا ما شخر في نومي إلا إذا كنت مرهق جسديا بس .. انت تشاخر يبو ....؟

هو : طبيعي .. بس مو دايما.

أنا : ما عمر أهلك انزعجوا من شخيرك؟

هو : أبدا .. ولا حتى قالولي اني أشخر أصلا.

أنا : يمكن خايفين يقولو لك .. مع ضحكه ههههههههههههه

هو : هههههههههههه يمكن

أنا : خلص لا تشغل بالك أنا راح أتعود على الشخير.

هو : انت بس لو تقول لي غرفتك رقمها كم!! وريني ميدالية المفاتيح أشوف



وفجأه نهبني مفاتيحي اللي كانو في يدي واللي مكتوب على ميداليتها البلستيك رقم البلوك ورقم الغرفه.


آااااااااااااه .. وانكشف الغطاء .. وظهر المستخبي .. وعرف أني جاره .. بعدها صار يضحك بهستيريه ... وصرخ وقال يبو احمد أنا جارك.


أنا : لاااااااااااااا ... مو معقول .. أبو الإحراج معك يالجار .. خلص انسى الموضوع أنا راح أتعود وتكفى لا تحرمني من سيمفونياتك الحلوه.

هو : هههههههههههههههه ولا إحراج ولا شي .. كويس انك قلت لي .. الحين لازم نشوف لك حل .. بس معقوله تسمع شخيري وانت في غرقتك رغم كل الجدران والسقف والأشياء دي.

أنا : أشياء ايش .. كلو جدار خشبي سمكه 4 بوصه .. وحتى لو جدار اسمنتي مع شخيرك يا جار ماراح ينفع .. هههههههههه.

هو : والحل؟

أنا : لا تشغل بالك .. أنا راح أتعود.

هو : بس فعلا باين عليك التعب.

أنا : المشكله يبو الشباب أنا ما يجيني نوم على طول لما أحط راسي .. أقعد لي نص ساعه أتقلب .. واسمعك تجي وبعد خمس دقائق ويشتغل الشخير .. وساعتها يطير النوم.

هو : انت تنام الساعه كم.

أنا : الساعه 10 ونص بالكثير.

هو : خلص الليله بيبتدي هناك مع النوم.

أنا : وش بتسوي؟

هو : ما راح أعلمك الحين.


وسلمنا على بعض مع ضحات عاليه يشوبها الود والمحبه وهرج رجاجيل على مستوى من التقدير كل للآخر.


رحت الفراش كعادتي الساعه عشره وربع .. تفرجت شوي على التليفزيون .. مرت نص ساعه .. لا شخير يسمع .. النعاس غلبني .. نمت .. رحت في سابع نومه .. صحيت مع المنبه .. قمت نشيط ولأول مره من أكثر من أسبوعين حسيت اني فعلا نمت كويس.


لقيته في الصباح الساعه ثمان واحنا ماشيين في اتجاه معاكس كل لقضاء عمل ما .. وبعد التحيه والضحكات إياها ومن دون أن نتوقف :



أنا : كانت أحسن نومه البارحه .. وش سويت؟

هو : ماراح أعلمك .. هذا سر.



مدري وش سوا بس الصراحه الوضع اختلف وحسيت براحه عجيبه اليوم لما صحيت .. بس نفسي أعرف وش السر اللي خلاه ما يشاخر .. أو يمكن شاخر بس أنا ما سمعته.


القصه حقيقيه وليست تأليف وخاصة الحوار أعلاه.


------------------

سامي
المهاجرة
27-08-2002, 11:41 AM
:SMIL:


صباح الرضا ومساه


مبروك اخيرا انحلت المشكله العويصه :)



عمري ما قابلت وحده من نفسه قبيله فلان إلا كان قلبها فل الفل والزعل سبحان الله ما يعرفونه


عليهم بشاشه وخفه ظل وتفهم للأمور كبير


ولا هم من النوع اللي يتحرّج من الصراحه ابدا يتقبلون كل نقد كل عتب بصدر رحب ، وشوفه النفس ما يعرفونها :)
عبدالرحمن الطويل
27-08-2002, 01:57 PM
مبروك يا ابو احمد



بكرة بتنزلنا موضوع علشان نكتشف ايش السر ورا هالهدوء المفاجئ :)
ابوفهد
27-08-2002, 02:33 PM
هلا ابو احمد الحبيب

والله يافرحتلك فرح


الف مليون مبروك

نوم العوافي ان شاء الله

ودووووووووم يارب

فعلا والله كلام المهاجرة


طيبة قلب ماتنوصف

نحن بانتظار اخر الاخبار

تحياتي
BackShadow
27-08-2002, 03:10 PM
يسعدلي مساك ابو احمد


مبرووووووك الف مبروك والله


تستاهل الهناء والعافية والله

وربي يديمها عليك ....


اجل اخيراً انحلت مشكلتك ... الساعة المباركة والله



واضح ان خويك ركب كاتم صوت :hap:


او انه كان ينام على جمبه اليمين وغير لليسار الحين


عموماً الله يديمها عليك نعمة


مع تحياتي
Sami96SA
27-08-2002, 04:27 PM
مساء الخير

أبو رهف

أستاذه مهاجره

صدقتي والله .. رجل والرجال قليل.

أنا تعاملت مع آخرين من نفس القبيله وتجربتي معهم أثبتت بما لا يدع للشك انهم ناس طيبين ومتعاونين جدا.


الله يبارك فيك وانشا الله يستمر في هدوءه.


-------------------

أبو رهف


أجل تبي موضوع مخصوص عن سر الهدوء!!

أتوقع والله أعلم انه بعد ما عرف اني أنام في ساعه معينه صار يتأخر ويجي بعد ما أنا نمت.

ويمكن مثل ما قال الظل غير من طريقة نومته وصار ينام على جنبه بدل ما ينام على ظهره.

على العموم بنشوف بعد الليله إذا كل شي تمام باسأله وأصر أعرف منه وش اللي غيره كذا .. واخبار الشخير ايه.


-----------------

أبو فهد

أدري والله يبو فهد انك متعايش مع معاناتي ومقدر اللي أنا فيه.

هذا انت دايما راعيها يبو فهد.

ما تتبناني يبو فهد؟

خذني أصير لك ولد أخو فهد :)


بس كيف تصير دي .. الولد أكبر من الأبو !! طيب أخوك الكبير بس أبيك تحن علي مثل ولدك الله لا يحرمنا منك يالغالي.

------------------

محمد

الله يبارك فيك ويهنيك وعقبال يا رب ما تتزوج وحده شاخوره.

يقولون في حريم شخيرهم مثل الرجال واسوأ.

تخيل عاد في ليلة عرسك والمحروسه بعد جهد جهيد تروح نايمه ويلحقها رعد مضخم من الشخير اللي يحبه قلبك.

أتحداك في صباحيتها تقول لها مبروك يا عروسه .. ما غير الشنب تحلف عليه بالشيل لو كررت هالإثم الليله اللي بعدها.


تسلم حبيبي.

-------------------

سامي
SS1500
27-08-2002, 09:07 PM
السلام عليكم ابو احمد ...


تدري احلي ما فيك انك عسل ... في كل شي ....



والف مبروك ونوم العافيه لك يا أستاذي ....


بيجي ويقول لا تقول لي أستاذ يا ناصر ... إلا استاذ غصب عنك :D ...




تحياتي ...
Sami96SA
28-08-2002, 01:00 PM
مساء الخير

حبيبي ناصر

وتدري انت وش أحلى فيك؟

انك أعسل من العسل .. انت الشهد اللي أوقات نحطه على اللقيمات في رمضان.

الله يسعدك يا رب.

وبرضك مصر تقولي يا أساذي ومن هالخرابيط دي؟

ما تخاف يزعلون علينا الأساتذه بعدين ويشتكون لوزارة المعارف بدعوى ان الناس العاميين قاموا يلقبوا روحهم أساتذه وهم من جنبها.


معليش موافق تقول أستاذ بس تكفى لا تقول "يا أستاذي" لأنك انت بكبرك أستاذ كبير.

موضوعك مال الكوكب يحتاج لسعة صدر ووقت والأهم روقان .. ومنين ألاقيه؟

انشا الله إذا حصل في الويكند يجيك الخبر اليقين .. وأذا ما حصل يبقى يخلف الله .. ونتلاقى في اللي بعدو.


تحياتي يا أستاذ.


--------------------

سامي
أحبه حيل
30-08-2002, 10:40 PM
السلام عليكم


يسعد مساك سامي ..

الحمد لله إني لحقت على الموضوع ..
أدري إن مشكلتك إنحلت .. ومنت بحاجه لأي راي أو تعليق
لكن أنا هنا بس عشان شي واحد .. ودي أقول لك إني ضحكت من قلب .. ماهو طبعاً على مشكلتك و وضعك مع جارك .. لا
وماهو على الأسبوعين اللي مروا عليك مرور الكرام .. أيضاً .. لا
ضحكت بصراحة على كمية التناحة اللي ترافقت مع هالموضوع ..

بجد .. شي يوسع الصدر .. ويرفع الضغط ‍‍!!

ويا عساها نومة العافية يا أبو أحمد ..

وتقبل تحياتي ..
Sami96SA
01-09-2002, 09:58 AM
صباح الخير

مستر أحبه حيل


الله يجعلك دوم مبسوطه والضحكه ما تفارقك وانتي تشوفين كميات من التناحه في النت.

حتى في الحياة بعد في تناحه.


أجل كيف تبين الناس توسع صدورها إذا ما صار فيه تناحه ودلاخه؟


الموضوع خلص وكل واحد حط له رد ومشى ونا بعد حطيت لي ردود ومشيت وصار عندي نوم العوافي وانتي توك تجين تفرحينا بسعادتك وانبساطك على شوية التناحه اللي صاحبت الموضوع.

ما شا الله عليكي بس.


على كل.

أنا أعترف اني تنحت لما رجعت الموضوع وعدلت الشويتين اللي فيه وفي الردود بدل ما أطلب من الإداره تعدل في أصل الموضوع والردود .. التناحه هنا لأني بدل ما أنام (ونا اللي كنت أشتكي من قل النوم) رحت أعدل في الموضوع .. صح؟


طيب.

أولا.. أنا نمت تقريبا من الساعه 9 الليل ليوم ثاني الساعه 11 الصبح .. فيعني شبعت نوووووم لين قلت بس.

ثانيا .. وش ذنب الإداره تضيع وقتها في تعديل الردود ونا كنت فاضي والعيال كلهم نايمين .. وبعدين الشغله بسيطه مع استخدام أيقونة "الإستعاره" والنسخ واللصق.

ثالثا .. وهذا الأهم اني حبيت أرد الجميل لأصحابه اللي ردوا علي في الموضوع ورد عليهم واحد واحد بعد ما أعتذر على حذف الموضوع والسبب اللي خلاني أحذف الموضوع.

رابعا .. حكاية الضمير "المستتر" هذي على قولة واحد صاحبي صحيحه وهو فعلا ما كان المفروض أقول اللي قلته في حق الشخص المعني في الشخير.

خامسا .. الرساله اللي جتني تأنبني على الكلام اللي قلته في الموضوع جت في يوم أربعاء والوقت متأخر انتظر الطياره للعوده للبيت .. وما كان فيه مجال غير اني أطلب بحذف الموضوع حالا إلى حين التفكير بما سأفعله عندما آكتفي بقدر كبير من النوم.



شفتيه كيف؟ كل ذي تناحه .. ولا ألومك في الضحكات اللي أطلقتيها لوحدك وانتي تشوفينها مصاحبه للموضوع من أوله لآخره.



مع تحيات تناحتي.


فلاش عالطاير

أتمنى من البني آدم اللي أرسل لي رساله يأنبني فيها على الموضوع .. أتمنى انه يكون قدوه في مواضيعه وردوده حتى لا أفكر انه أرسل رسالته وهو أصلا صاحب ضمير "مستتر".

-----------------

سامي
_المهنّد_
02-09-2002, 12:02 PM
ببساطة !!

خالية من أبسط قواعد الذوق


- عذراً قد أكون أخطأت عنوان الموضوع_
فهذا ذنبه هو!!
وليس ذنبي
Sami96SA
02-09-2002, 01:07 PM
مساء الخير

شكرا أخي المهند على مرورك هنا وتفضلك بالرد.

(تم تعديل الرد السابق بعد تفهمي الصحيح متأخرا لرد الأخ المهند)


تحياتي.

---------------------

سامي
BackShadow
02-09-2002, 04:58 PM
يسعدلي مساك ابو احمد


حبيبي اول شي ترى انا بغيت اعدل في الموضوع بدل الحذف

لكن لقيت اني باعدل ردود كثيرة ما لي حق اني ادخلها

رغم اني متأكد بان اي عضو من الاعضاء اللي ردوا ما حيزعل

بس قلت افضل البعد عن الحرج والتعديل

وقلت الحذف هو اسهل حل :SMIL:


عموماً لا تشيل هم .. الحمد لله ان المشكلة انحلت


ولا تكون تشيل هم اي رد ياخوك ... مافيه داعي للاي بي :hap:



مع تحياتي
أحبه حيل
05-09-2002, 05:48 PM
السلام عليكم

يسعد مساك سامي ..

---------
التناحه هنا لأني بدل ما أنام (ونا اللي كنت أشتكي من قل النوم) رحت أعدل في الموضوع .. صح؟


طيب.
---------

ولو قلت لك : لا .. ماهو صح يا سامي ؟!

ما أدري ليش أحس سؤالي كان فرصة مهيئ لها مناخ استثماري عالي الربحية .. بس ما أحد درا عنه !! ( تكفى .. لا تشتغل التناحه هنا بعد !! )

بصراحة ..
شكراً يا أخوي على طيبك وسعة صدرك وتقبلك لضحكاتي التي أطلقتها ذات شماتة في فضاء التناحة الرحب :D
ومشكور أكثر على توضيحك الشامل لكل ملابسات الموضوع - على الرغم إنه ما يعني أي شخص غيرك - وبالتالي .. ألف شكر لك

وتقبل أجمل تحياتي
Sami96SA
05-09-2002, 05:58 PM
مساء الخير

يسعد مساكي يا أحبه حيل

والله يا ورود معرفك الجديد دا موب راكب مع أي تحيه قبل.

شوفي وش حلاة لما أقول "يسعد مساكي ورود"

شي


نرجع للموضوع وباختصار

أقول


الحياة كلها فرص لاستثمارات مختلفه ومتنوعه وسؤالك كان وحده من هالفرص النادره.


ونا عارف ومتأكد انك تبين الخير لبو احمد عشان كذا سؤالك جا في الوقت المناسب.


وإلى لقاء مع استفسار وسؤال آخر.


-----------------

سامي