__ (( من ذكرياتنا في رمضان )) __

[zadi]

________________________


السلام عليكم ورحمة الله وبركاته ,,,

كل عام وأنتم بخير ,,, شهر مبارك على الجميع ورمضان كريم ,,,

أعزائي وأحبتي في هذا الشهر الفضيل ,,,

لشهر رمضان ذكريات ومواقف دوماً ماتكون متداولة بين الناس على سبيل الإخبار أو التفكه ,,,

ونحن هنا نريد فتح صفحات من الذاكرة ,,,

لينفض كلاً منا بعض الغبار عن ذاكرته ويستجلب لنا أجمل ذكرياته ,,, سواء أكانت جدية أم هزلية ,,,

والفكرة هي للتسلية على العموم ( يعني بدل طاش ماطاش ) :142:

والطريقة هي أن يختار العضو الذي كتب ذكرياته العضو الذي يليه لسرد ذكرياته ,,,
بمعنى , أنا راح أبدأ فيها الآن ,,, وأختار من بعدي واحد عضو ,,,

وصلت الفكرة ؟؟؟؟؟؟؟؟؟؟؟؟؟

أوووووووووكي ,,, 1 ـ 2 ـ 3 ـ ستارت أكشششششن

ــــــــــــــــــــــــــــــ ـــــ


ايام الحارة ( صغير ) يعني أبو 7 إلى 10 سنوات , كان رمضان هذا يعني لنا ( بليلة ) وبسكليتات وفرفر وطيري ( شرعت ) ولعب لحد الساعة وحدة في الليل , وبعد كدا نوم للصبح ,,, بالنسبة للصلاة والصوم كنت أنا وأمي في زحمة ,,,
وكنت أروح ألعب كورة مع ( العيال ) في الحارة وقت صلاة العشا وأطنش الصلاة وتجي التراويح وأطنش ,,, عارفين ليه ,,, لأن واحد من عيال الحارة أكبر مني بسنتين تلاتة ,,, قاللي إذا صليت آخر ركعة في أي صلاة كأنك صليت الصلاة كلها كاملة :220: ومن يومها وأنا أخذت ( الفتوة ) هذي وصرت أجي على التسليمة الثانية ,,, |17|

وطبعاً كانت متعتي أيام المتوسط والثانوي إني أنزل السوق في العشر الأواخر وأقضي مقاضي العيد حقتي بنفسي ,,, متعة كبيرة ,,,
سبحان الله لحد الآن أشعر بها ,,,
وفيا ( حتة ) على قول أخوانا المصريين مرة تعبتني إلين تخلصت منها ,,,
لازم أشتري لعبة العيد ,,, دي طبعاً لما كنت صغير ,,,
وكبرت معايا هذي العادة ,,,
وكبرت ,,,
والله ياجماعة مابطلتها غير بعد الثانوي بكم سنة :181:

وطبعاً بعدما كبرت شوي صار رمضان بالنسبة لي في الليل دوري وكورة وملاعب وبلوت وشلة صياعة ( بس والله ماكنا نرقم غير عند اللزوم ) يعني مايصير يجي العيد وأنا فاضي ولا عندي وحدة قديمة :249: لازم التجديد :180:

المهم , أنا كدا تميت ,,,

وأختار من بعدي العزيز الغالي الحبيب العمدة أبو فهد ,,,

وكل عام وأنتم بخير ,,,

[جف البحر]

فكره حلوه يا خال

وكل سنة وانته طيب ..

ننتظر ابو فهد ..

ونشوف ذكرياته


اما انته فالذكريات هادي مهي غريبه عليك

تذكرني بفؤاد وهوه صغير ويبيع البليله

هاااع



جف

[BackShadow]

اهلين زادي قلب الاسد


الله يرجك ... من جد ذكريات ممتعة

خلتني افتكرك ايام المدرسة وانت تروح بالبسكليته وتسوق بدون ما تمسك الدركسون :268:


ننتظر ابو فهد نشوف ذكرياته



مع تحياتي

[ابوفهد]

هلا بالغاالي زادي
يسعد الله ايامكم بالخيرات

حقيقة احرجتني الله يسامحك هو انا بتاع ذكريات او أحلام :266:

تصدق انا مو عارف اش تسحرت أمس

حتى اتذكرلك أش صار معايا في صغري

إحنا عايشين في بلد ما نعرف حركات نص الكم حقتكم هذي

لا ترقيم ولا صياعة ولا غيره

في زماني نفرح بالعيد علشان نلبس ثوب جديد بس :201:

وحكاية الحلاوة بالعيد وليلة العيد نوم مع الدجاج علشان ما كان فيه تلفزيون ولا فضائيات

ناااااس مسالمين مريحين رؤوسهم من البلاوي هذي

بس كذا خلاص لانه من جد ذاكرتي ( جزمه ) أكرمكم الله :005:

بعدين مالي شغل من يكون بعدي انتوا اختاروا

لكن من الأفضل يكون أحد الأثنين اللي فوق

أكيد يحتاجون هاردسك جديد يا دوب يكفيهم

دمتم بخير مع جزيل الشكر والتقدير لكم

[zadi]

______________________

طيب يا عم عمدة ,,, مئبولة منك على أد سنك @!@

ظل ,,, وله ياظل ,,,,

تعالى هنا ياواد ,,,

هات إللي عندك ,,,

[Nooosa]

وعليكم السلام ورحمة الله وبركاته ..
.
.

حبيت أشارك في الموضوع من أول .. لكنه طلع بالدور:rolleyes:
وبما إنه الآن ماجا أحد فأعتبروا مشاركتي فاصل .. اعتبروها حاصل:D وأمركم لله
.
.

زمــــااااااااااااان ..
وأنا صغيرة جدًّا كان رمضان بالنسبة لي مكة:256:
وبالأصح الجبل ( كانوا أهلنا في جبل عمر ) اللي على الحرم على طوول ..
وكان رمضان في مكة ( غيـــر )!
نفطر على المدفع .. وأذان الحرم
ما كنا نجلس مع الحريم:p
الفول والسمبوسك والسوبيا والتووت أكتر شي نحبه في رمضان .. الكبار كانوا يشربوا السوبيا .. واحنا نِنْصُب ( نفتري ) في التووووت:142:
ولمن تخلص يرسلونا المطبخ نجيب لهم زياده .. نرجع نلاقيهم نصبوا في الباقي ::].. ويرجعونا للحريم|198|
ما كنا نرجع
نطلع الشارع وتبدأ المغامرات ( أكشن )
نلعب شَرْعَت ( اللي برضوا تقولولها طيري أو طيرا ) والأولاد يروحوا بعيد وأنا ما أقدر ألحقهم .. والمتألقة دايمًا كانت عند الباب وتضحك ( هبله:hap: ) وغالبًا برضو تكون معاها قارورة موية أو حلاوة
ولمن أيأس من الأولاد وبنات مكة|126| ماشاء الله ينتشروا زي الجراد ويعرفوا كل دخله في الجبل .. المهم أقوم أحكي التحفة المتألقة وهي تعطيني الشي اللي معاها سواء كان موية ولا حلاوة ( وطبعًا إلى اليوم ما أدري هي ليش تعمل كدا ) يمكن كانت تسكتني::]
المهم لمن يرجعوا الأولاد يمسكونا محشات وتقطيع .. ولا لمن يقطعوا في بعضهم أحلى .. ولا لمن يصدقوا نفسهم إذا سألناهم فين رحتوا .. ياإلهي ع التأليييييف والركب ( على قولهم ) والأرانب اللي تطيييير جنبنا .. ياويلي من جد لمن يصدقوا نفسهم .. المشكلة ياخدوا مقلب شنييييع:005:
وحكايات وأساطير .. وتخاريييييف .. واحنا نصدق ونخاف ( يا حسرة )
دمهم خفيف .. كنا نسهر للصبح ضحك ومقالب وتنكيت وأفلااااام ( في بعضهم برضو ) نفوسهم كانت حلوة .. وإحنا كنا على أي شي نضحك:D نسطّح مو بس نضحك
.
.

لمن كبرت شوية ( في الإبتدائي )..
كل اللي افتكره في رمضان .. بيت ستي وسيدي ( الله يرحمه ) وحااااااارة الشااااااام
أظن ( أحمد / ToTTII ) لو سأله أحد عن حارة الشام يبكي!
رغم إني ماكنت أنزل الشارع كتيـر .. لكنها كل ذكريات الطفولة ..!
أولاً كنت ما أحب ألعب مع البنات:237: كان لعب الأولاد يستهويني حتى لو بس تتفرج تستمتع بلعبهم وقعداتهم ( زماااااان ) دحين هم كمان ساروا:237:
أول يوم في رمضان عادتنا الفطور في بيت ستي .. نفطر على صوت المدفع .. وهو من ( أحلى أحلى ) الأشياء في رمضان زمان
وشوفوا عاد لمن الأولاد يكونوا رايقين .. يطرطعوا عند باب العمارة ( قنبلة ) عشان نفطر ونحسبه المدفع .. تخيلوا عملوها::] ويقولوا ضرب المدفع ضرب
على سيرة الطراطيع كانت متعة في رمضان آآخر الليل .. وليلة العيد و( حكايات وروايات ) ومرة الأفندي توتتي ( طرطع ) يدّو ( لووووووول ) وسار حديث الموسم :p.. واتمنعت الطراطيع في العيلة:( والآن هو اللي يهربها:D
أفتكر أحسن شي في حارة الشام
العم سالم إللي يبيع البطاطس المقلي ( كلااااااااااااااااااااااام ) الله يذكره بالخير .. هو والعم عباس الله يرحمه ( على فكرة العم عباس هذا اللي كانت تكتب عنه عكاظ ) الله يرحمه ويغفرله كان راجل طييييب و( حكييييييم )
وتاني أحسن شي ( برحة باب جديد ) ( تحسوا إني طالعة من الأزقة من جد ) أيّـاااااام ..!
متعتنا لمن نلعب ( برجون ) زي البولينج الآن :D ولا زي البلياردو:D في الحفر ،، ونجمعها في علب النيدو .. ولمن كانوا خيلاني يلعبونا ( زقيطة )
بابا دايمًا يقول إنتوا من القلة اللي عاشت جوّ رمضان ( جدة ) القديم
وانتوا = الجيل الصغير ..
بس اللي مالحقنا عليه المسحراتي:(
.
.

وكبرنا وعرفنا ربنا أكتر ( ياربي لك الحمد ) يارب أكرِمنا
سار رمضان معنى تاني تمامًا ..
تمامــًا:)!
محطة إيمانية قوية .. مدرسة للتربية وتنمية الذات ( متطورة جدًّا )
أول مؤسسة تربوية في التاريخ لمدة 30 يوم متواصلة كل عام و( مجانًا ) .. ومزودة بأحدث التقنيات ( الروحانية )
ننتظرها ونبكي على وداعها .. نحبها فعلاً ..
رمضان .. وكل أيامي اقترنت بالمتألقة كل ما أذكره من حياتي معها
في كل ( عثرة ) جنبي وكل وقفة بيدي .. ضحكتي ضحكتها ( الصدى ) ( الظل ) ماأدري إيش أقول لكن قبل ماأفكر أحسها بقلبي تبتسم!
أفتقدها ( جدًّا ) أول رمضان لا نقضيه سويًّا ولا نخطط فيه .. ولا نتسابق فيه .. ونتعارك:)

مجنونة هي .. عفوًا ( أنا ) أو ربما الإثنتين "ههههه" !
حين نصنع ذكرياتنا .. نغزلها بخيوط الأمس
نضحك فيها همس!
ونتلو عليها تراتيل ( البقاء ) / الخلود
للقاء الطيف الذي يقربنا رغم البُعد ومسافات الأفق
نصنعها مكتظة بالمتعة / العذاب الكامن خلف الضلوع!
مدججة بالحماس ..
موبوءة بذاك الرقص ( المثير ) على عتبة ( المفاجآت )
"متروسة" بـ( صخب المشاعر ) .. وعنفوان ( الصبا )
بـ( خصوصيتنا ) عُقدتْ
وجنون الـ( نحن )!!
.
عفوًا ( خاالووو ) فاقداها بقووووووووة.
وشكرًا لك من القلب على هذه المساحة ( الراقية )
فعلاً
.. كل مايحترم ( ذكرياتنا ) راقي .. شكرًا لك:)

**فلاش ..
شكلك كنت ( فرفاري ) الحارة;)

[zadi]

__________________

أهلين نوووووووووووسا ,,, مسا الطراطيع ,,,

إيش هادا يابنت ,,, كل إللي جيبتي سيرتهم ( الله يرحمه ) وهدا ( الله يغفرله ) وهدا ( كان ياماكان )

شكلك جايا من حضارة فرعونية ههههههههههههههههههههههه

بس بجد ذكريات لزيزة ههههههههههههه

فكرتيني بالطراطيع أم فتيلة إللي كنا نخرق علبة الصلصة أو التونة ونحطها فيها وتطلع فوق يمكن خمسين متر ,,,

تسلمي يانوسا ,,,

بس ما أخترتي إللي بعدك ,,,

يالله شوفيلك أحد عشان يتحفنا بذكرياته مادام الظل يدلع علينا ,,,

مشكورة ,,,

[Nooosa]

أكيــــد نستنى أونكل ..
بس أنا عملت شوية غلاسة
.
.
وبالنسبة لـ( كان يا ماكان )
فـ أنا فعلاً جدة أسأل بيتالز:p حكايات وحكم .. وقعدة البيت تسوي العجب

[EDrara]

يا سلام يا زادي

ذكريات عبرت افق خيالي

ايش الهرجات والمرجات هذه
انا ارشح جفجوف بعد ابو فهد

وبعدين اقول لكم عني

[zadi]

______________________

تعال ياعم إدرارا ,,, تعال ,,, يو ويلكم ,,,

سيبك من أونكل ,,, الله يكون في عونه ماعنده وقت لنا ,,,

أقول ( أخصرك ) منه ,,,

أما جف خليه في آخر القايمة لأنه ( كتكوت ) وذكرياته ماتتعدا الفار أبو سن دهب : )

يالله هات إللي عندك ,,, عارفك مكاوي وشكلك راح تتحفنا بحاجت حلوة ,,,

[BackShadow]

معليش يا جماعة ... اعذروني

تعرفون رمضان ملخبط جدولنا على الآخر ... السموحة منكم


وبيني وبينكم كنت احاول اخفي شوي من الفضايح اللي كنا نسويها في رمضان

بس الظاهر مافيه فايده


المشكلة ان ذاكرتي سيئة ... يعني يا الله الخراج اتذكر البارح ايش افطرت
فما بالك اتذكر زي زادي ايام ابو 7 وابو 8 :178:


المهم اذكر من الاشياء اللي ما تتنسي اننا كنا في رمضان بعد العشاء نشتغل حريقة في الشارع
طراطيع على صواريخ على سلك نحاس مولع .... وطبعاًَ كل يوم نرجع والفنيلة محروقة والا ارجع بنص بنطلون

واذكر ان ابوي الله يطول بعمره كان يمسكنا بعد الفجر لازم نقرأ قرآن في حلقة ذكر يومياً
والمشكلة اكون نعسااااان وما اتجرأ اروح البيت :180:
الين يجي دوري واقرأ اللي ربي يسهله لي وما يروح الدور للي بعدي الا وتلاقيني انجريت على البيت :238:

كبرنا شوي وصارت الحكاية كورة

اذكر مره ايام الطعشات ... قلنا لازم نشترك في دوري
المفروض الفريق 7 اشخاص وثلاثة احتياط
اغلب المباريات ما جينا كاملين ... فما بالك بالاحتياط :D
وكنا نجي بدون تمرين ولا تسخين ولا نلبس طقم يعني احياناً نتفق نجيب كلنا فنايل صفر او زرق
ومره اضطرينا نلعب بدون فنايل ... علشان الطقم خرب وكل واحد جايب لون

والفرق الثانية كلها ترتيب واطقم وخطط وشغل ثقيل
وكانوا يطالعون فينا بنظرة ( من ذا الفريق المنتف ) :220:
وفي نهاية الدورة فزنا بالكاس :214:

رمضانات السنين الماضية كنا لازم نلعب كوره برضة كل يوم بعد العصر
الين قبل المغرب .. وتلاقي سب ولعن ويضيع الصيام كله |273|

من يومي ما اداني الاسواق ...
ما اروح آخذ مقاضي العيد الا في آخر يومين
او اكون اروح بعد العصر واريح راسي

الله يفكنا من الاسواق ومن دوشتها


ايييييييييه كانت ايام :229:


مع تحياتي

[zadi]

أهلين أونكل باشا ,,,

(( وكانوا يطالعون فينا بنظرة ( من ذا الفريق المنتف )
وفي نهاية الدورة فزنا بالكاس ))

الله يرج إبليسك ,,, قعدت أضحك ضحك ,,,, :220:

وإللي ودي أفهمو ,,, كيف فزتو وإنتو منتفين :249:

بس ماقلتلنا مين كان معاك من شلة الدرر ؟؟؟ :142:

عموماً يا أونكل ,,, أشكرك على الحضور الحلو ,,, ياحلو ,,,

وشكلك نسيت تختار مين بعدك ؟؟؟

أختار ولا تحتار ,,,

تشكرات افندم
|17|

[EDrara]

زادي

لك ما تريد
ولكن ليس اليوم فأعتذر

[BackShadow]

خلاص ادرارا قال انا لها :D

[To0ofy]

الله يفطسكم زي مافطستوني.....:268: :268: :268:

من جد انتو فلللله عليكم ذكريات شي.....:181:

يالله نستى الكابتن ادرار ايش عنده ذكريات..

مشكوووور أخ زادي وجزاك الله ألف خير....

تحياتي:
تيــــــما...

[zadi]

______________________

ياعم إدرارا

إيش التقل هادا ياهووووووووووووووووووووو

أرحمونا شوية

طب وبعدين يعني ؟؟؟؟؟؟؟؟؟؟؟؟؟