المساعد الشخصي الرقمي

مشاهدة النسخة كاملة : على طاري موضوع الطبخ .. أنا والضب


حلوه
03-06-2002, 11:15 AM
من فترة مو وايد بعيدة .. شفت موضوع في موقع .. عن الضبان
المهم آنه من زمان كان عندي غستعداد نفسي لتقبل تذوق لحم الضب .. لكن الحصول عليه إلي كان مشكلة المشاكل .. مع أنه الأهل صابتهم العدوى من أخواننا السعوديين .. وصار لهم فترة مخلصين الضبان إلي في البر ..

المسألة أني .. أصبحت في يوم .. وآنه مصممة أني أجرب آكل هالأكلة .. قلت أشمعنى .. إلا أجرب .. خو العرب ما خلوا شي ..

وعن طريق معارفي بالشبكة العنكبوتية .. تعاقدت مع صياد .. يبعث لي ضب .. ضحك علي لحد ما شبع .. وبعدها قال لي .. من صاجة أني الحين ... قلت يا ولد الحلال والله صاجة .. ولسان حالي يقول .. خلصونا بأ

وطول الأخو .. وما شفنا شي .. :D .. وآنه قاعده على نار .. خبركم ما أهدئ إلا لما أسوي إلي في رأسي .. كبقية بنات جنسي لما نصمم على شي ...

وأنتظرت وأنتظرت .. وبعدها .. هم أنتظرت .. لحد ما جات فرصة ما كانت على الحسبان ..

صدت ولد عمتي في يوم .. يتفشخر أنه صاد ذاك الضب .. إلي تم يلاحقه على طول البحرين كلها .. لحد ما صاده ..

آنه لما سمعت هالكلام .. لو كنتوا شايفيني في ذيك الساعة .. راح تشوفون النظرة المنتصرة في عيوني .. وجربت منه .. لما خلص فشخرة وأنهى المكالمة .. وقلت ...

حلوه : ولد عمتي .. أبي ضب لو تسمح
الولد : ها .. شتقولين
حلوه : قلت أبي ضب .. أبي أتذوق لحم الضب .. تقدر تحصل لي واحد

طبعاً إلي صار بعدها .. ما صار ولا أستوى .. بعد ما ضحك وكان بيطيح .. ولما خلص .. فضحني فضيحة .. كل ما يقابل أحد .. حلوه تبي ضب .. حلوه تبي ضب ..

حشى .. ولا وكالات الأنباء .. المهم .. صبرت وأحتسبت .. وقلت لك يوم يا ولد عمتي .. أردها لك .. وأضحك عليك ضحك :)

لكنه أبد ما قصر ما صار أسبوع .. إلا وهو طاب علينا صبحية .. قلنا عسى ما شر .. أشصاير .. وهو يصارخ .. الضب وصل يا حلوه ..

آنه من الحماسة .. تقول مباراة البحرين والسعودية .. ( أيوه ذيك ما غيرها ) قلت حياه الله الضب وصاحبه ..


... أعتقد أني بعد كذه لازم أسكت .. وأخليكم تستوعبون الموقف بس ..
ولي رجعة أكيد .. أكمل لكم .. ( القصة حقيقية ترى .. وفيها رتوش تجميلية فقط .. وإلا من ناحية الكوميديا .. فالسالفة بأكملها .. تموت من الضحك ) ( لا تخافون .. بقلل الأجزاء بقدر ما يمكن ) :)
ابوفهد
03-06-2002, 12:11 PM
مرحبا بالاخت حلوه

فعلا حاجة غريبة وحده ودور على ضب :SMIL:

المهم جالك الضب والا تراني مستعد

اجيبلك ضـــب الى حــدك

صدقيني لحمه لذيذ وخاصة العكرة :hap:

وسألى جـــعــــجـــع بعـــد

يالله منتظرين البقية

تحياتي
عــــزيــــز
03-06-2002, 12:41 PM
ياشينها .. الفواصل الاعلانية
اقول حلوه .. لاتتأخري
ابي اعرف ايش صار لك
بعدين عطيني رايك بطعمه .. صدق..
لاني ماقد اكلته ابد..
وودي اعمل عليه بحث .. ونشووووووووووووف:D

يله بأنتظارك..
إبتسامه
03-06-2002, 03:55 PM
يسعد مساك حلوة:hap:




اما حكايتك حكاية مع الضب ...... وش نقز الفكرة ذي براسك بالله
كيف تغامرين وتاكلين لحم ( ضب :eek: )


بس انا متحمسة اعرف كيف طعمه ... مو عشان شي بس لو طلع ( موحلو ) اقول تستاهلين :p بس لو طلع طعمه حلو ..... الله يكرم النعمه ماني مجربته ولو اييييييييييييييييييييييييييييي ش :D





تحياتي لك عزيزتي حلوووووووووووووووووووووووووووو ووووووووة ;-(
* الـمـنـتـظـر *
03-06-2002, 05:21 PM
ضب وضب هاي الليلة الناس مضبّين

لو إنتا وياي الليلة الضب بضبّين :D

هذا ^^ كاظم

مساء الخير يا حلوه

ضبّ + حلوه ( ما ادري كيف تجي :p )

أنا والله إلى اليوم ما عمري أكلت لحم ضبّان :005:

بس ما دام البنات يآكلون على الطلاق أن نآكل :hap:

بس بغيت أعرف كيف طعمه أول

في إنتظار الحلقة القادمة

من مسلسل ( أرانب حلوه :) )

من إخراج .. الحلوه ضبّه :D

تحياتي
الساحر
03-06-2002, 08:00 PM
وليه المشوار ذا كله يا حلوة(اسمك يورط خصوصا اذا فيه ناس ملاقيف مخلين الغرفة كلها وواقفين علي راسي)
الدعوة ما يبي لها صيد ولا عراوي ولا شئ
ماكدونالز عندهم الحين ساندوتش جديد
ماك ضب بالجبنة السويسرية
مع البطاطس والبارد
وكيس مجاني يعني اذا حسيتي ان معدتك رجعت في كلامها :D
ضب يا حلوة ؟؟
انا اعرف ان البنات يحبون ياكلون
جناح حمامة بصلصة البوكا ريكا
شرائح صدر نعام بعصير الكرز
قطع المرتدلا مع رز ايطالي
مهوب ضب:p
عموما اذا ملزمة تاكلي ضبان اسمحي لي اعطيك عنوان الخبير السويدي في صيد الضبان الاخ جعجعوه الحاصل علي البورد الفرنسي في صيد الضبان بواسطة الشكمان
حلوه
04-06-2002, 08:56 AM
سلام الله عليكم يا أهل الخير ..



عدنا لنكمل ..

أخي بو فهد مشكور وما تقصر والله .. خلاص لقينا لنا وكيل في البحرين .. ولد عمتي وكما بنشوف .. بيطلع فلته في هالأشياء .. وبعدين قول لي أيش معنى العكرة أول .. اقول لك رأيي فيها

أخي عزيز عذراً .. آسفة .. بحكم شغلي الصعب .. أضطريت أجزء السالفة .. مع أني كنت ناوية أكملها أمس ..
لكن ولا يهمك .. أكملها اليوم بإذن الله / أما عن طعمه .. أنتظر وتابع معي :)

أختي أو أخي إبتسامة عذراً أعتقد أخت صح ؟
المغامرة عجيبة في الأشياء المتاحة .. قبل شهر واحد بس .. كان رأيي من رأيج وكنت بأبصم عليه .. لكن الظاهر صابتني شضايا نيزك .. وإلي صار صار خلاص :D والطعم جايج رأيي فيه بالطريج تابعي معنا

أخي المنتظر :) تابع وبتعرف رأيي في طعمه

أخي الساحر معذرةً .. الظاهر أني فشلت في أختيار الأسم .. لأنه حتى آنه متورطة معاه .. (بيني وبينك .. حصلت مضايقات من وراه) المهم .. يبيلنا خمسين قرن عشان نرتقي شوي بأفكارنا .. ( قلبتها جد )

أسمح لي أعترض ماكدونالد مقاطعة .. وآنه ترى من أشد أشد المتحمسين للمقاطعة .. نشف دمي وآنه أكتب هالجملة :rolleyes:

آقول .. أيش تعني شكمان بعد .. ترى أختكم حدها الشرقية .. وبطلعة الروح عرفت كم مصطلح :D

وينه جعجع هاذي ... الظاهر سيد الضبان بالمنتدى هو وإلا أيش :)
حلوه
04-06-2002, 10:03 AM
نواصل على بركة الله ...

-----------------

آنه سمعت صراخه بس ما شفته .. صوته من خارج البيت مسموع .. فقلت إلي قلته وحييته .. لكن أول ما دخل البيت .. شفت الكل يتراكض من أمامه .. خفت .. طبعاً على بال ما لبست الشيلة والعباية .. كانوا كلهم أشردوا ..

أشصاير .. محد يبي يعلمني .. الكل يقول طلعي وشوفي بنفسج
طلعت .. ليش لا .. شجاعة آنه .. شوي :rolleyes:

وبعد ثانيتين تسمرت ..
وقلت : ولد عمتى .. جايب الضب صاحي :eek: أشتبيني أسوي .. لا يكون جايبه لي أذبحه آنه :eek: :eek:
( طبعاً الوالده تبرت من المطبخ ذاك اليوم .. وقالت أنتي وولد عمتج تتصرفون .. وآنه مع اليهال طالعين ناكل بره .. قلت يمه .. ما يصير تخلوني مع الريال بروحي أشفيكم .. قالت زين .. بس يخلص ويطلع ... وحنا طالعين معاه) .. (هي ما شافت إلي بيصير .. كنت بقول معذورة)

ضحك مرة ثانية .. وآنه في هاليوم شفت ضروس ولد عمتى كما لم أشفهم :D طوال حياتي ..
قال لي : لا آنه بذبحه لج .. بس جايبه أذبحه هني عشان قلت يمكن تحبين تشوفين ....

:eek: ( ما قلت لكم آنه متوعدته بيوم .. يصبر علي بس )
قلت له : من صجك الحين .. أيش قالوا لك .. أحب الأفلام الدموية ( طبعاً قلتها في نفسي .. ما أستجريت ) رحنا المطبخ الخارجي .. والوحيدة الشجاعة معاي .. الخادمة .. طلعت جدعة :D

شوي وإلا هو مطلع سكينة جزار أشكبرها ..
هني عاد آنه إلي ضحكت .. قلت أشدعوة .. ما عندنا سكين .... قال وهو بعد يضحك لالا هاذي بس السكين إلي متعود عليها في الشغل ( لا سفاح الأخو ::* )والضب الظاهر عرفها من لمعة السكين .. قام يحافص ويناقز .. وآنه خلاااااص وصلت حدي من الخوف .. بس متسمرة في مكان واحد .. مفتشلة في ولد عمتي

سمى بالله وهوب .. إلا هو مخلص .. والخادمة طلعت عيونها .. وآنه نص الوقت مغمضة .. رحمةً بنفسي بس :) .... وتم يغسل وينظف ويشيل القلب بناحية والكبد بناحية وأشياء وأشياء .. ذبحنا والله وحنا نشوف .. قلت أيش أطلع بس .. أرميهم كلهم .. نبي اللحم بس / ضحك وقال لالا على الأقل القلب والكبده بنخليهم .. ترى بيطوفج وااايد إذا ما ذقتيهم ... قلت زين أمرنا لله .. القلب والكبده وبس .. قال زين بل ..

وقلت بعد .. طيب قشره لي وإلي يخليك شكله كلش مو حلو بهالمنظر .. طالعني شوي .. وإبتسامة شقاقية على محياه .. وجان يقول .. ليش موزه هو ( يعني بصريح العبارة آنه ما يسوى علي ذاك اليوم .. وين ما أبي أكحلها .. أعميها ... وولد عمتى مستمتع آخر إستمتاع )

وقلت طيب كيف نطبخه الحين .. قال هاذي مهمتي عاد .. كيف تحبينه .. مع عيش (رز) وإلا مقلي .. :D هالمرة قلتها وما استحيت .. قلت داخلة مطعم حشى .. ضحك وقال لا بس آنه أبي أعرف أيش تفضلين .. قلت .. أنت شوف الطبخة إلي تحس أنه لحم الضب بيكون فيه ألذ وسوه .. ( ولسان حالي يقول .. خلصنا بأ )

وإلي سواه بعدها .. حشى .. مو طبخ أبد .. شي ثاني بعيد عن الطبخ بالمرة .. أخذ القدر وتم يقط فيه يقط ويرمي .. تقولون لا إله إلا الله يسدد هدف .. وآنه أقطع له الخضرة وأجهز البهارات .. وصرت مساعد شيف .. لكن أي شيف .. مو عادي كلش .. أستحيت اسأله من وين متعلم أنت الطبخ .. بس خفت على شعوره .. قلت خل يكمل أول .. ويعدي الأمر على خير .. وبعدها لنا العمر كله .. للطنازه :D

صدقوني .. كان ناقص يقول لي عندكم حطب .. لهدرجة وصل :)
( على فكرة .. بعدها عرفت أنه متعلم الطبخ من ربعه بالسعودية .. :D
هاااااا ..... أتاري الرجال بالسعودية يطبخون كذه ... الحمد لله .. ويعلقون على طبخ النسوان ... نصيحة .. شوفي رجلج وهو يطبخ .. إذا تحبين في يوم تضحكين عليه شويه :D )

ثلاث ساعات حبكم بالله وهو يطبخ العيش مع لحم الضب .. لدرجة إني قلت له .. خلاص أهترى اللحم .. قال أشعرفج أنتِ .. هاذي عشان اللحم يذوب في فمج قبل معدتج ( يتفلسف الحجي بعد )

المهم .. الحمد لله وصلنا خير .. خلص طبيخ .. وعندها أكتشفنا شي ..
الأخو طابخ لقبيلة ... مو لي آنه بس .. قلت أيش بنسوي في هالعيش هاذي كله .. هالكثر طبخت .. قال لا تحاتين وآنه أخوج .. أنتي بس ذوقي الضب الحين .. وشوفي .. عجبج كان بها .. خليت لج صحن معتبر .. وخذيت الباقي للربع .. وإلا (وضحك كثير ) آخذه الحين وأتصرف

( هين يا ولد عمتي .. صبر علي بس .. ) عطيته نظرة لؤم كذه .. وقلت يالله .. نشوف .. عطيته الصحن .. وقدم لي الطبخة .. بعد ما زينها بعود بقدونس :) ( لا محترف هو ) بديت أول بالعيش .. بحكم أنه فيه نكهة الضب .. قلت أشوف .. أجس نبض معدتي .. تتحمل وإلا .. آنه حزتها رجع لي الحماس والتصميم من بعد ما راحوا كلش من بعد إلي سواه الأخو ..... شفت روحي .. ما صابني شي .. ولقيت قابلية للمواصلة ... فواصلت ..... وخذت قطعة لحم .. صغيرة .. وذقتها :) .. ما شاء الله .. لا بأس به إطلاقاً .. مثل اللحم العادي .. لكني حسيت أنه ألذ شوي .. ما ادري .. يمكن مجرد إحساس ..

ولد عمتي مركز ويقول ها .. ها أيش رأيج .. وآنه آقول صبر علي شوي

وهو مو قادر ينتظر ... المهم .. الله كرمني .. وتذوقت لحم الضب أخيراً .. لا وعجبني بعد .. قلت له .. والله حلو لحمه .. قال ها :eek: من صجج عجبج الضب .. مو مصدق .. قلت لا والله عجبني .. ممكن شويه من الكبد والقلب .. بالمرة .. اجربهم .. وحط لي شوي .. وهو مو مصدق بنتاتاً .. وآنه مستمتعة أني أدهشته .. وقلت خلاص ولد عمتي .. من اليوم ورايح .. كل ما أبي آكل ضب .. بخليك تجيب لي واحد .. لكن المرة الجاية آنه إلي بطبخه .. وبتشوف الطبخ على أصوله عندها ..

( آنه عرفت بعدها .. أنه جايبه .. ومتعب نفسه .. بس عشان يشوفني لما أتذوقه .. وما يعجبني .. وبعدها بيضحك زيادة ويوسع خاطره .. لكن على مين .... هين يا ولد عمتي .. هين )

وكما ترون .. لحم الضب ترى عجيييييب ..
يعني إلي ما تذوقه .. لا يتردد ..
ابوفهد
04-06-2002, 10:40 AM
مرحبا حلوووه

هاااه جالك كلامي

شفتي حــــلاوة طعمة

رائع جداااااااا

شوفي عاد ياحلوة

العكره اهي الذيل

حقه الطويل

اذا ما تذوقتيه فاتك :hap:

واكيد ان ولد عمتك ضحك عليك

الشكمان هو احد وسائل

صيد الضب بس مايصلح

لانه مضر بصحة الضب

وهو الماسوره اللى في

مؤخرة السيارة يخرج منها الدخان

اذا كانت سيارتك خربانه :hap:

تحياتي
حلوه
04-06-2002, 11:24 AM
آها قلتي كذه .. طبعاً .. الذيل الظاهر إلي عجبني عيل .. لأنه كان فيه تفاوت بالطعم شوي .. بس لا .. آنه تذوقت كل شي ..
والحمد لله .. طابت نفسي له .. لكن من بعد سالفة طويلة عريضة ..
الله يهديه ولد عمتي :D

هاذي معناة شكمان ... وآنه آقول سامعة الأسم هاذي في وين .. عندنا وعندكم خير .. حتى حنا نسميه أسم .. لو تسمعه بتضحك أكيد ..









والله حاله :)
* الـمـنـتـظـر *
04-06-2002, 07:08 PM
مساء الخير يالفرفوشه بنت الفرفوشه بنت الفرافيش :D

مساءك فيران :p عفوا نسيت قصدي مساءك ضبّان

عسى الله يسعدك .. قولي آمين :)

ما تبي تقولي براحتك :005:

المهم .. حبيت أشكرك على طرحك للموضوع بالفعل أستمتعنا

ولكن ودّي أقول لك كلمة

أدري أني ملقوف بس عاد أستحمليني

أنا أشوف أنك وولد عمتك ثانئي رهييب ;)

أجل ليه ما تجتعموا في عش واحد وتجيبوا ضبااااان كثيرة

يا حليلكم والله :D

امانه لا تزعلي تري أحب المزح واااااايد ^-^

تحياتي :)
حلوه
08-06-2002, 12:26 PM
:) .. لا أبداً .. مسموح أخوي هالمرة :)
الملقوف
08-06-2002, 12:59 PM
سلام

اللي يبي ضبان يحجز من الحين ..

يوم الخميس فيه تطهير عرقي للضبان في المستوي ..

هذا سلمك اللي يسمون ذكر الضب ( عير )

والانثى ( مكنة ) .

والصغيرون ( سحيلي ) ..

شحم الضب ويسمى ( الخلوب ) اسود واحيانا يصير فيه

صفار ينصح بأكله لمرضى الروماتيزم

بيض الضب على شكل عنقود عنب في بطن المكنة كله صفار ما

فيه بياض ينصح بطبخه مع الشحم وله فوائد عده .... :cool:

يحتوي الضب على نسبة عالية من الكوليسترول

وهو ضار اذا داوم الانسان على اكله ..

اللي عاد منتم مصدقينه ان الضب يعمر الى 400 سنه او اكثر

ولا احد يقولي مهو معقول لاني انا ما اصدق ..

لحم الضب يدينه ورجوله قريبة جدا من لحم الارنب ..

وعلى قولة ابو فهد احسن مافي الضب العكرة لحمها ابيض

طعمها قريب من طعم السمك ..
الشرطي
08-06-2002, 02:27 PM
السلام عليكم

عندكم ضبان في البحرين
انا علي بالي مافي ضبان

اكيد الضبان الي عندكم ضبان اي شي صقار يعني

في اعتقادي حتي الجهال يلعبون فيها

لا حنا الضبان عندنا في الكويت غير
حنا الضبان عندنا تماسيح مو ضبان

الضب عندنا طوله من مترين الي مترين ونص

انتو اذا مسكتو ضب تحطونه في دبت السياره
حنا غير حنا اذا مسكنا الضب نجره في السياره:D :D :D
الشرطي
08-06-2002, 02:29 PM
السلام عليكم

عندكم ضبان في البحرين
انا علي بالي مافي ضبان

اكيد الضبان الي عندكم ضبان اي شي صقار يعني

في اعتقادي حتي الجهال يلعبون فيها

لا حنا الضبان عندنا في الكويت غير
حنا الضبان عندنا تماسيح مو ضبان

الضب عندنا طوله من مترين الي مترين ونص

انتو اذا مسكتو ضب تحطونه في دبت السياره
حنا غير حنا اذا مسكنا الضب نجره في السياره:D :D :D
قويه صح ماتصدق
هنو
09-06-2002, 04:13 AM
صباح الخير حلوة :)

ليه كذا بس تسوين بنفسك:(

إنتي من جدك؟

خلص السمك والربيان والخير رب العالمين عشان تاكلين ذاك الشي


:eek: :eek: :eek: :eek: :eek: :eek: :eek: :eek: :eek:

أصلاً يكفي إسمه

ضب

يع

ماأدري وش ملاقين فيه:confused:

لا شكل ,,, ولا لون ولا حتى عيون

صحيح ربي مشقيكم تتحرقون تحت ها الشموس

الحمد لله والشكر

بس عليك بالعافية

قال ضب قال

أموت جوع وأصير آكل ورق زي العنز ولا آكل ذا الشي:D
حلوه
09-06-2002, 10:51 AM
معلومات لا بأس بها أخوي الملقوف .. وعن شبهه بلحم السمك ..
صدقت والله .. فيه بينهم تشابه في الطعم ..

يعني الحين تبي تقنعني أخوي الشرطي أنه ضبان الكويت تختلف عن ضبان البحرين .. كلها ضبان .. عاد أختلفت في الحجم أو اللغة :SMIL:
ما فيه مانع ساعتها .. والمهم كيف تصيده ..
تجره بالسيارة والله حرام عليكم .. مساكين ضبانكم آقول ..


هلا والله أختي هنو .. هاذي شي طق في رأسي ..
أهو .. بس عشان ما أتحسف وآقول ياريت :D
صدقيني .. تشجعي شويه وما بتندمين .. هي بس أول مرة .. وبعدها .. عادي :)
ناصر الأحمد
09-06-2002, 12:15 PM
ياااااانا تتقاطر سعابيلي ونا اقرا الموضوع



اهلين الحلوه والله انتي (Y)

بصفتك اول وحده اشوفها تكسر حاجز اكل الضب من البنات

راح نقدم لك خصم مع كل ضب ضب صغينون مجاني

وسندوتش عكره ضب

بس صراحه طعم الضب يستاهل انك تسوي ذا المغامره

ولا وش رايك ؟؟


ولااااااايهموووووووونك بس الي ماييبونه قولي لهم الي مايعرف الضب

ينحاااااااش عنه




ولا اقولك



لا سبي بالضب

قولي ترا موزين

انه ماينفع للاكل


لا الحين يبلشونا يااكلونه مره وحده بعدين نبلش نلقاهم بس مطامر بالبران يبون يصيدونه


خليهمممم كذا قولي ماينفع الضب عاد معروفات سعوديات لايطيحون بشي :005:



مثل الي تقول اكل ورق زي العنزولا اكل ضب ( مهوب هنو ):D


خليها تاكله شوفي اذا مالقيتها بالبران رابطه كشتها وحافيه تلاحق ضب :005:


لا وتعدد سمك وربيان ومدري وش بعد

ماتدري ان يغطي عليها لاطعم ولا غيره ;)


ايه نسيت


هذه بعد طريقه للصيد الضب غير الطريقه الي قالها ابو فهد


طريقه سهههههههله مره


تجيب اسطوانه غاز

وتمد لي الاسوانه داخل جحر الضب وتفتح الغاز على الجحر وانتظر اسحب الي وابعد الاسطوانه


وولع على الجحر :hap:

وانت بس خليك معك شبكه زي شبكه صيد الجراد

ترا الضب تبي تشوفه طاير السماء تلقفه بس :hap:


تحيااااااتووووووووووو

االشيف جعجعوه الي طردته الروح من المطبخ::]
حلوه
09-06-2002, 02:15 PM
:D لي عودة أكيد
بخيت
09-06-2002, 08:01 PM
انا عارف ان لك عوده بس تبين احد يترجم لك كلام الي رد بالاخير هذا

هههههههههههههههههههههههههههههه ههه

ماني مترجم يجي هو يترجم

باي
My-Spirit
09-06-2002, 09:46 PM
هههههههههههههههههههههه

حلوة .. وفعلا حلوة .. أسم ومسمى ما شاء الله عليك ;)

كل هذي المغامرات تسوينها ما تقولين اعزم اختي الروح معاي

افا والله افا :(

طيب على الأقل قولي ادق عليها يمكن خاطرها تذوق مثلي

ولا أقول لك خلاص جعجعوا ما راح يقصر
وأكيد ما راح اهون عليه
وراح يخليني اذوق مثلك :D

بس تبين الصج عاد
شهيتيني آكله ;)


ومرة ثانية اذا ولد عمتك تذكرك بضب ثاني
تذكري اختك
وكلها حذفة حصاة واكون يمك :D
أساعدك .. بس اشوف .. ما اسوي شيء



تلكس .. لجعجوع بيه
من اللي طردك هذا
ما عنده سالفة .. أفا عليك المطبخ وصاحبة المطبخ كلهم تحت أمرك :D
حلوه
10-06-2002, 11:11 AM
:D :D :D

وأخيراً .. شفناه الـ جعجع .. حياك الله أخوي .. سمعت من مصادر موثوق بها أنك أبو الضبان بالمنتدى ..
( صحيح العرب ما خلوا شي ) تعطيني درس .. خلاص .. صرت محترفة .. وهالأيام .. قاعده أجرب وصفات جديدة منه .. خبرك .. لازم أكتشف وصفة جديدة وبنزلها إذا ضبطت إن شاء الله في رواق الأخت My-Spirit والله يستر من الطردة :D

هلا أخوي بخيت .. لالا ما نحتاج مترجم :D لحد الحين على الأقل

حيا الله روحي كيف حالج أختي .. خلاص .. المرة الجاية أكيد .. آنه بس حبيت أول مرة تكون بتكتم شديد .. فرضي ما عجبني ... وصارت أحداث مؤسفة .. ولاعت جبدي .. أيوه .. مو لازم أحتاط :D لكن خلاص .. المرة الجاية .. العزيمة عندي .. غالي والطلب همباه :D :D
My-Spirit
10-06-2002, 01:46 PM
:D