مذكرات طالبة جامعية (1)

[الشمس]

صباحكم سعيد يارب ..

في زحمة الاختبارات قررت إني أكتب مذكرات طالبة جامعية .. :eek:
أرجعوا هالرغبة إلى ما شئتم من الأسباب , حتى لو كنتم تفكرون أن السبب زعل على قرب فراق الجامعة لمدة لا تقل عن ثلاث شهور , وأنا وكل اللي يدرسون ناجحين قولوا يااااااارب :) ..

خلال الأيام الجاية رح أمضي في كتابة سلسلة من المذكرات واللي رح تحتوي على أحداث واقعية 100% , مو شرط كلها صارت معاي , لكن حصلت وعاصرتها ..
في أشياء كثير عانت منها دفعتنا والدفع اللي قبلنا , لكن حصلت تطورات بالجامعة مؤخراً عالجت بعض السلبيات وفي طريقها إن شاء الله لمعالجة البقية ..
لكن هذا ما يمنع من إني أتكلم عن معاناتنا :)
وفيه مشاكل وصعوبات تواجه كل بنت انتقلت من مجتمع المدرسة المحدود , إلى مجتمع الجامعة الغريب عنها بكل تفاصيله , باعتبار أنه البنت في مجتمعنا نادر جداً ما تندمج مع مجتمع خارج نطاق الأقارب والمدرسة ..
أتمنى بالفعل تكون حاجة تستحق الوقت اللي رح تقضونه في قراءتها ..


خليكم معاي ..

الشمــــــــس

[الشمس]

....
تحذيـــــــــر ..
يمنع منعاً باتاً نسخ أو اقتباس أي جزء من هذه المذكرات دون إذن خطي من كاتبتها ..

.....



مستجــــــــــدة


أول يوم لي بالجامعة :106: .. الجامعة اللي كنت أشوفها خطوة أولى في الطريق اللي رح يوصلني للي أتمناه ..
جا وقت تخرجي من الثانوية في الفترة اللي بدأ المجتمع يتخلى عن نظرته السلبية للجامعة وكل من ينتمي لها من البنات ..
إلى الآن مني قادرة أنسى سالفة البنت اللي قدمت على كل الكليات والجامعات الموجودة هنا بالرياض , أيام ما كان مسموح تتقدم بصورة من شهادة الثانوية العامة , وما قبلت في أي كلية أو جامعة باستثناء جامعة الملك سعود والقسم اللي هي كانت تبيه , ورفضوا أهلها إنها تداوم هناك , وبالتالي جلست بالبيت من دون دراسة , والسبب >>>
:121: " ما عندنا بنات يدرسن بالجامعات " !!!:121:

وجاء تخصصي معارض لرغبة الوالد نسبياً :193: , اللي ما وافق إلا بعد ما أقنعته بإن التخصص هذا هو اللي كنت أتمناه من يوم كنت بالمرحلة المتوسطة وما جبت النسبة اللي جبتها إلا عشان أقدر أتخصص في المجال اللي حبيته من دون منة من أحد , يا هو ولا بلاش من الجامعة كلها , ما رح أقدر أمشي في شي ما اخترته :239: ..

طبعا كنت راسمة لي خطة بعيدة المدى , رح أتخرج وبامتياز , ورح أتعين معيدة , ورح أكمل دراستي حتى أحصل على أعلى شهادة :154: ..
كانت هذي باختصار خطتي , وخطة كل بنت تعتبر نفسها طموحة !!
يعني تخيلوا معي كل بنت تجي متحمسة للجامعة تقول أنا رح أصير معيدة , تخيلوا لو صارت كل بنت معيدة !!!
رح نتابع سوى ونشوف وش نهاية هالحلم :196: ..

أول يوم لي بمكان ما أعرف فيه أحد إطلاقاً :210: , طبعاً كان يوم لا ينسى , مضت ليلته وأنا عاجزة عن النوم , طلعت الشمس وجلست أحسب الدقايق متى تجي الساعة سبعة ونص عشان أطلع ..!!
ومر الوقت , وطلعت من البيت , ووصلت الجامعة .. مكان جديد علي كلياً :210: ..
وااااو وش هذا كله .. كيف أعرف طريقي الحين ؟
وين أروح ووش أسوي :295: ؟!!
سؤال .. ما رح أسأل أحد .. سبق وإن سمعت سوالف فيها تريقة على المستجدات , ومستحيل أسمح لأحد يتريق علي :238: ..


طبعاً إلى الآن أنا واقفة عند البوابة , وعالم داخلة , وعالم طالعة ..
لوحات إرشادية .. ما فيه ..
خريطة بمباني الجامعة ما فيه ..
مكاتب إرشاد سياحي - أووووبس عفواً - أكاديمي .. ما فيه ..
أحد داج مثلي كمان ما فيه :196: ..
أوكي فكرة :289: .. خلاص قررت أمشي مع هاللي يمشون وأشوف وين بيودينا الدرب ..

مشيت مع مجموعة من البنات شكلهم يعرفون بعض .. لا تخافون مو وراهم بالضبط عشان ما يبين شكلي إني ضايعة :309: ..

وش هذا ؟ كل هذا طريق ؟!
ليه أتخيل نفسي في شارع الحوامل ؟!
المفروض مسوين لهم مكتب تأجير سياكل , سكوتر , دباب للمستعجلة .. الوحدة مننا تستأجره أول ما تدخل , وتسلمه لهم لما تجي تطلع ..
مشروع رح يدخل ربح أكثر من المعقول .. وطبعا مافيه غير شركة (( ..... )) اللي هي أصلاً محتكرة الجامعة باللي فيها وأنا متأكدة أنه لو يسوون تصويت ياخذون آراء الطالبات في مستوى خدمتها , كان طلعوا بزيرو من الأصوات لصالحها ...
لكن من متى أصلا اهتموا بآراء الطالبات ؟!!

نرجع لموضوعنا .. كنت أمشي ورا البنات وعرفت أخيراً أنهم يتجهون إلى مكاتب الإرشاد الأكاديمي لقسمهم عشان ياخذون ورقة كبيرة اسمها ((إشعار تسجيل المواد))
أوكي .. بس هذا مو قسمي .. ما علي إلا إني أدور على هالمباني حتى أوصل للمبنى الصحيح ..
عادي جداً حتى لو كان في الجامعة 21 مبنى :196: .. لكن المهم إني ما أدخل أماكن معزولة :314:

أبشركم وصلت .. ولقيت ورقة مقاس 4A مكتوب عليها بالقلم الفلوماستر إشعارات التسجيل للمستجدات غرفة 76...
وااااو أخيراً لقيت لوحة إرشادية :316: ..

وبعد ما دخلت الغرفة 76 ..
أنا : لو سمحتِ ...
الموظفة : نعم ؟ مستجدة ؟؟؟
أنا : إيه مستجدة ..
الموظفة : كم رقمك بسرعة ..
أنا : آه رقمي ... اممممم ... امممممم .. أأأأأأ .. مني حافظته :193: ..
الموظفة : شلون منتي حافظته , ما تعرفين أنه الرقم الجامعي أهم من اسمك ؟!!
أنا : ما أحد قال لي :062: ..
الموظفة : طيب شلون تبيني أطلع إشعارك الحين .. ؟!!
أنا : امممم .. عفواً .. بس أقول لو .. لو يعني دورتيه بالاسم , أو خليتيني أنا أدوره , ماينفع ؟
الموظفة : إلا ينفع .. تفضلي دوري , ولما تلاقينه وقعي هنا , واكتبي كل البيانات ..
أنا : طيب .. شكراً ..
الموظفة : ....
أنا : شكـــــــراً ...
الموظفة : ...
(( ولاطالعت فيني حتى , معقولة تكون ماسمعت ؟!! ))

لقيت إشعاري أبشركم .. ووقعت , وما طلعت إلا وأنا متأكدة من إني عبيت كل البيانات .. وبغيت أعبي بيانات اللي بعدي من كثر ما أنا أبي الفكة منها بس ..
طلعت من عندها وأنا ودي أبكي .. أنا شسويت لها عشان تصرّخ علي كذا :026: ..
ما يكفي إني جالسة ساعة أدور في هالجامعة أدورهم ..

دق جوالي .. ميييين .. بابا حبيبي .. صوت لأحد أعرفه .. يا الله أنا في السعودية :315: ..
على بالي في المنفى والله ..
الوالد : هاه حبيبتي شسويتِ ؟
أنا : أبشرك لقيت الإشعار وأخيراً ..
الوالد : بشري كيف الجدول ؟
أنا : توني مابعد شفته بشوفه بعدين أدق عليك ..
باي ألحين ..
الوالد : فمان الله ..

أطالع بالجدول وأحاول أفك الرموز .. والحمدلله طلع فيني شوية مخ و فهمتها .. وقدرت أطلع الأوقات والأيام ..
وش ذا ؟!!
محاضرة 101سلم من الساعة 1 إلى 3 العصر ... !!!!
وأنا وش يجلسني بالجامعة إلى العصر :082: ...

اممممم سمعت أنه فيه بنات يغيرون جداولهم , ليه ما أروح أحاول أغيره ؟!

بس برضو هذي يبي لها بحث وتحري حتى أقدر أتنصت على البنات وأعرف اللي تبي تغير جدولها وين ترووووح ؟!

تمام هنا بنات متحمسات يتكلمون عن مشاكل في الساعات .. مشيت ورا وحدة منهم .. وصلت لمكتب مكتوب عليها رئيسة الإرشاد الأكاديمي ..
تمااااااام .. وصلنا..
مسكت دور بالصف .. ووقفت ساعتين ونص (( والله ما أكذب ))
دخلت عليها ..
الدكتورة : إيه يا بنتي .. إيه مشكلتك ؟
أنا : أبداً يا دكتورة بس أبي أغير موعد المحاضرة للصباح ..
الدكتورة : والسبب ؟
أنا : ما أبي أتأخر للعصر ...
الدكتورة نزلت نظارتها وركزت أنظارها علي , وابتسمت ابتسامة ما تبشر بالخير .. : إديني جدولك يا بنتي ..
أعطيتها الجدول .. وقالت : إيه ده إنت ربعميه وتسعطاشر ؟!!!
أنا : والله ؟
وشو ذا :056: ؟!
الدكتورة : يا بنتي إنت مستجدة ومش عارفة حاجة .. إحنا ما بنغيرش جداول للمستجدات
تفضلي وما تعطليناش ..
أنا : طيب أنا آسفة ..

وطلعت مو مقهورة من شي قد مني مقهورة منها لما قالت لي مستجدة ومش عارفة حاجة :026: ...

طيب ألحين وش تتوقعون مني بالله ..
تتوقعون إني أهج من الجامعة للبيت .. البيت جنة والله ..
طبعا طلعت باتجاه البوابة ورجعت أمشي الطريق اللي مشيته الصباح , لكن فيه فرق .. هالمرة مشيته الظهر , يعني الشمس مررررة كانت باردة .. وطبعا جامعتنا الحبيبة ما شافت انه الوضع يستاهل تظلل لنا الممرات أبدا .. يعني عادي توصل للمكان اللي تبيه وتحس ان كبدك لايعة و راسك مصدع , يعني طبياً أصبت بضربة شمس ..
وصلت وأنا كارهة نفسي و حطيت الشنطة على أول كرسي في صالة الانتظار ..
وطلعت العباية أبي ألبسها , لكن ما قدرت أوقف على رجولي من كثر ما أنا شايلة هم هالجامعة وشايفة إن المسألة ماهي سهلة :062: ..
جلست جنب شنطتي .. إلا وحدة تسألني .. لو سمحتِ إنتِ مستجدة ؟
رفعت راسي وأنا في نيتي إني أخنقها بالطرحة اللي معاي :055: ..
بس تفاجأت بوجه ملائكي قدامي , بابتسامته الهادية :013: ..
وبعد ثواني صمت , جاوبتها وقلت لها على التخصص كمان ..
الملاك : أنا بعد مثلك , أخذتِ جدولك ؟
أنا : إيه , إنتِ ؟
الملاك : أخذته .. , وش اسمك ؟
أنا : الشمس , انتِ ؟
الملاك : ملاك :)
أنا :اسم على مسمى :)
ملاك : شكراً .. في أي مدرسة كنتِ تدرسين ؟
أنا : دار السلام ..
ملاك : تعرفين وحدة اسمها .. ولاء ال...
أنا : أعرفها , في ثاني ثانوي صح ؟
ملاك : إيه هذي بنت خالتي .. :)
أنا : صحيح , صدفة حلوة ..
إنت وين كنت تدرسين ؟
ملاك : في التربية الإسلامية ..
أنا : آها .. تعرفين وحدة اسمها لما ال...
ملاك : إيه كانت معاي بس سجلت في قسم الإنجليزي .. تعرفينها ؟
أنا : سبحان الله .. شفتِ كيف الدنيا صغيرة .. !!
هذي كانت صاحبتي بالمتوسط وإلى الحين أكلمها وأقابلها بين فترة وفترة ..
ملاك : تجين نشوف القاعات وين , ولا بتطلعين ..؟
أنا : بطلع الحين خليها بكرة ..
ملاك : عطيني رقمك لو معك جوال أو البيت لو ما فيه مانع
أنا : لا شدعوة .. تفضلي هذا هو الرقم ..
يالله عاد أنا أستاذن ..
أشوفك على خير .. باي ..

طلعت من الجامعة وأنا مستغربة مرة من نفسي .. كيف ارتحت لها الإنسانة على طول كذا , مو من عادتي أدخل في حوار طويل مع أحد ما أعرفه ..
أبداً ما قد سويتها قبل هالمرة .. ونادر جداً أرتاح لأحد بهالسرعة ..
ملاك وسالفتي معاها نسوني الهم اللي كنت شايلته .. حتى وصلت للبيت وعلى السرير على طووووول نومة إلى المغرب ..



انتهى ..

أول يوم دراسي في عام 1419هـ

....


الشمـــــــــــس

[* الـمـنـتـظـر *]

مساء الخير اختي الفاضلة الشمس

أتمنى من الله لك ولكل طالب وطاليه وللجميــــع ان شاء الله التوفيق

لدي إحساس باننا راح نستمتع بمذكراتك والتي تعتبر إجتماعيه بحته

أتمنى لك التوفيق ولإي إنتظارها

وتصبحين على خير

[* الـمـنـتـظـر *]

أهليييييييين وسهلين اختي الكريمة الشمس

والله والله والله أستمتعت بالقصة فوق ما تتصوري

كانت القصة اكثر من روووووووعه

:p :p :p :p :p :p

وفي إنتظار الجديد



بس لي طلب .. دام ان هذا أول يوم

وباقي أيام وسنين يعني أكيد يبي لنا نفصل نظارات ::] ::]

بليز غيري لون الخط شوي ::]

والله العظيم تعبت من القراءة




على فكرة انا رديت قبل شوي قبل ما أنتي تنزلي أول مذكرة يعني

المعذرة :)

ويا هلا فيك وفي إنتظار الجديد

وتصبحي على خير

[* الـمـنـتـظـر *]

:-@ :-@ :-@

:-@ :-@ :-@

تو الحين مغيره الخط بعد ما أنعميت وانا أقرأ

أول شئ أقرأ اول الموضوع وأرد

شويه والاقي اول مذكرة

وأرد وأقول لك الخط عمانا ::]

وبعدين الاقي الخط تغير بعد ما قريت

وش اللي صاير اليوم

عموما .. بر ضو يا هلا قيك وفي مفكراتك

على فكره منتي حاسّه اني اليوم ملقوف شوي ^-^

سلاااااااااااام

[kittiwake]

صباحك حب شمس عمري :179:
رجعتيني ليوم أعتبره إشراقة الأمل في حياتي:201:
كيف ما يكون و فيه لقيت توأم روحي :165:
في انتظار كامل السلسلة اللي مشوقة من بدايتها :308:


كتي ويك^-^

[الشمس]

المنتظر .. :)

ياااااكثرك :D

الله يوفق الجميع يارب .. وووو الحمدلله انه طلع عندي ذوق وغيرت اللون قبل .. :rolleyes:

ومشكور عزيزي على القراءة والاهتمام .. رفعت من معنوياتي :hap:

وخلك معي :)

......


كتي حبيبة قلبي .. :heart:
بس هذا مايمنع إني كنت أبي أخنقك , لكن فكك ربي :p
تسلمين ياحلوة ..


.....


كونوا معنا ..

الشمـــــس

[ابوفهد]

مرحبا بالاخت الكريمه الشمـــس

بداية حلوة لمذكرات اعتقد انها ستكون احلى

عاد معــروف عنكن يالبنات المواقف المحرجه

ارجو الله ان يوفقك ويمنحك الصبر على كتابتها

ترى نادر مايكمل الواحد كتابة مذكراته :SMIL:

تحياتي

[المستشار]

اهلين اختي الشمس :SMIL:

بجد مغامرات .. وفيها تحف بعد :p

عموماً لا تطولين .. حنا بإنتظارك ..

وهنيا لك الوجه السموح :SMIL:


تحياتي ،،

[البدر]

مساء الخير . . اختي الشمس


اولا : اتمنالك التوفيق والنجاح

ثانيا : مذكرات اكثر من جميلة

اكثر من حلوة

اكثر من رائعه


ثالثا : من القلب انا استنا الجزء الثاني وبلهفه


ولله يعينك على الاختبرات . . . ويعين المستجدات


مع خالص تحياتي وامنياتي لكي بالتوفيق والنجاح .

[الشمس]

صباح الخير جميعا ..


أبو فهد .. هلا فيك :)
الله يحلي أيامك يارب ..
بعدين أنا ما أكتب مذكراتي :) , أنا أكتب مذكرات طالبة جامعية ;)

امممم ..
معنى عبارتك (( ترى نادر مايكمل الواحد كتابة مذكراته )) واحد من شيين ..
يا إما إنك تحاول تهبط من عزيمتي , أو إنك تحفزني بأسلوب تحدي !!
ورح أختار الثانية ;)
وأقول لك أنا مو أي واحد .. يعني مو من اللي نادر ما يكملون شي بدو فيه ..
ولو حبكت مرة مرة .. قلت لكم إني تخرجت وهذي الحلقة الأخيرة :D


تسلم أخوي :)

......




المستشار .. :)

الله يهنيك بكل أيامك يارب ..
إن شاء الله قريب رح يجي الباقي

مشكور على وقتك :)

.....




البدر :)

الله يمسيك بالرضا يارب ..
والله يحلي أيامك ويوفقك والجميع ويعينهم ..

ورح يجي الجزء الثاني قريب إن شاء الله

مشكور على قراءتك وردك :)




الشمــــــــــس

[naif_y]

تحية عذبه ,,,


مساء الفل والكادي



الشمس .. :)


هل يكفيك ان اصفق اعجابا و اشكرك امتاعاً !!

من جد كانت روعة

الا صحيح .. وش سالفة ملاك :p ماكانها ملقوفة :p


متى رح تكمليها ؟؟



اقول يالمحتري ... وش كثرك تقول كانك حجيات كورنيش الحمرا :p

كيفك كيتي ويتي تويتي :p

انا ماقلت شي ^-^






بس تدرين .. لي عودة .. بعدين :)


ولكم محبتي





أنــــــــــا و بــــــــــــــــس

[Sami96SA]

مساء الخير

وخيتي الشمس

أثريكم يالبنات مساكين وحالتكم حاله

أنا أقول ما اخترتي معرف الشمس من فراغ أبدا.

أول يوم كنتي تحتري الشمس تطلع .. وبعد ما خلصتي من مكتب الإرشاد الأكاديمي طلعتي في الشمس اللي احرقتك وسببت لك ضربة شمس .. الموضوع نصه شمس في شمس.

بس اسمحي لي يالشمس .. مره ثانيه شمس.

الحين وحده زيك معدلها ما شا الله ينطح خروف وتروح تسجل في الجامعه مستجده ولا عندها أي معلومه وين تروح ووش تسوي!!

طيب اسألي من هون وهناك .. ما عندك صديقات في نفس الجامعه؟

كذا تروحي على عمايه وتصيري داجه تدورين كنك مضيعه.

ماني عارف ليه الواحد يخاف يسأل عشان لا قولو عليه جديد أو مو فاهم شي .. والمثل يقول "اللي يسأل ما يتوهش"

والا أنا غلطان؟؟!!


على العموم أنا استمتعت بالجزء الأول من مذكراتك وعجلي علينا بالجزء الثاني لأني باعطيه بنتي لما تروح الجامعه .. بعد اذنك طبعا :)

تحياتي وتقديري.

-----------------------

سامي

[kittiwake]

كأني سمعت أحد جايب سيرتي::[
أقول نايف .. :209:
يازينها من لقافة (I) اللي دلتني على حبيبة قلبي :224: ، بعدين أنا ما أتلقف عبث (Y)
يعني لي نظرة ثاقبة في اللقافة :289:


تحياتي
كتي :309:

[جــــودي]

أختي العزيزة شمس..

استمتعت بمذكراتك اللي لازم أحطها في بالي

أول ما أدخل الجامعة باذن الله :SMIL:

بانتظار الأجزاء التانية

:034: <=== وحدة متحمسة مرة

جـــودي

[بسمة الحياة]

السـلام عليــكم..

استمتعت بقراءة مذكراتك..

بعدين يابنت بلاش وانتي تدرسي تسرحي وتكتبي

مذكرات..وووووووووووو شوفي شوفي الهجوم علي..لالاخلاص اكتبي:)

على الأقل تسوي "ريفرش" للذاكرة..:D

ذكرتيني بالذي مضى...ياااااه...اول يوم كنت خلاص على وشك البكاء..

الجهل شيييييييين..كنت احسد كل البنات القدامى واقول يابختهم..

مش انا واقفة زي الـ..."محذوفة حفاظا على رقة المشاعر" :rolleyes:

[الشمس]

صباح الخير ..


نايف .. مساء صباح الورد :)
مشكور على إطرائك و إعجابك عزيزي ..
والحمدلله إللي أمتعتك ما طفشتك :rolleyes:

بس مايكفي اللي قلت عليه :D
ولا تسألني وش اللي يكفي لأنه مافيه بالي شي معين , بس كذا نذالة اقول مايكفي :p

ايييييه سالفة ملاااك ..
بس عشان ماتلومني لما طلعت أقدس اللقافة :p :309:

على فكرة حركة كتي ويتي تويتي .. والله حركة :hap:

في انتظار عودتك ووو الله يوفقك في اللي شاغلك :)

أما بالنسبة للجزء الثاني ما أقدر أعطي موعد , مو عشان ما أتأخر وبس , عشان خايفة أجي قبل :D لأني فجأة كذا من دون مقدمات ألاقي نفسي بديت في الكتابة ..
لكن رح أقول إني لو تأخرت مرة مرة فرح يكون مطلع الأسبوع القادم بإذن الله .. يعني السبت :)


ومشكور مرة ثانية


......

الشمـــــــــــس

[الشمس]

سامي .. مساء صباح النور :)

لا البنات مو مساكين ::[
أكره هالكلمة :rolleyes:
تقدر تقول أنه تواجهنا بعض الصعوبات بس :251:

اييييه ولا زلنا ناخذ لنا حمام شمس يومي في رحاب جامعتنا الحبيبة , والله يا سامي حتى السن بلوك ماينفع :014:

وبعدين هذا اللي سويته من جد , رحت ما أدري وش السالفة :D
ولا لي صديقات ولا معارف ولا شي , المشكلة اني مرمية هناك في الملز , ولا لو في عليشة كان استقريت في مكتب وحدة من هالدكتورات اللي اعرفهم :D , لكن عاد هذا اللي صار وش نقدر نسوي , يمكن كنت متخيلة الموضوع سهل ومايبي له حوسة وسؤال وماادري ايش :)

بعدين بالنسبة للسؤال أنا ماعندي أي مشكلة فيه , بالعكس معروفة بأسئلتي اللي ماتنتهي :o , وانت منت غلطان :) , لكن المشكلة لما أكون مستجدة صدقني شي ثاني .. إنت تعرف أنهم في الجامعة يسمون المستجدة (Z) ((( مستدجة ))) وفي مقولة أخرى ((( مستلجة ))))
وبعد هالتسميات تنتظر مني إني أسأل :000: ..
في مثل هالحالات أنا من أنصار المقولتين هلب يور سلف , والتجربة خير برهان :059:

والحمدلله اللي أمتعك الجزء الأول :)
والفال إن شاء الله للباقي ..

أما الجزء الثاني هذا هو مشغل ذهني و مخليني أسرح كثير في مذاكرتي :confused:

وبالنسبة لبنتك , لو تبي تخليها عندي كم شهر أخليها الشمس الصغيرة إنت آمر بس :D


ومشكور :) ..


الشمـــــــــــس

[LAST*HOPE]

تحيه للشمس الشموسه ..


مميزه انت أينما توجهتي ومهما طرقتي .. :)



الجامعه ..


اذا كان احد يتوقع اني بلحق هالجمله بأي ذكرى جميله او مدحه ظريفه ترى ماعنده سالفه ولا يدري وين الله حاطه ..
الله بس يفكنا منها :mad:

بس ما يمنع الحقها بذكريات غبيه :o

أذكر اغبى شي كنت اسويه أول ما دخلت الجامعه اني ارتب كتبي قبل انام :o
واذا جا من بكره أذت كتب المواد اللي علي كلها والدفاتر والاقلام والآله الحاسبه وكل البلاوي ..:(

متحمس اني طالب جامعي .. لكن للأسف كان السستم حقي ما يزال على نظام الثانوي .. و أجلس اشيل هالكتب معي وين مارحت .. واستمريت اسبوعين لين انتبهت انه مافيه احد غيري يسوي كذا :$


والحمدلله من تالي صرت اروح فصل كامل للجامع واجي ما معاي ولا كتاب ولا دفتر ولا حتى قلم .. :D

الظاهر ان هذا رد فعل عكسي .. عشان كذا اقول الحماس الزايد مو زين :|

[الشمس]

.....

كتي نورتِ :) ..

وبعدين أكيد رح تكون لك نظرة ثاقبة , طالعة علي :D
وإن كنت أشك إن السبب مو في نظرتك وبس , السبب إن الشمس ماتغطيها الأصابع الخمس :D

ووويو آر ولكم :)


الشمـــــــس

[الشمس]

....



جودي , ياهلا والله :)

يالله يعني أنا ألحين أكبر منك ؟!
يعني أنا بشيّب قبلك ؟!
يعني أنا بتخرج قبلك ... هذا هو أهم أهم فرق بيننا :p

بإذن الله بتخرج قبلك :rolleyes: .. ترى نيتي ماهي شينة , أخاف ربي يعاقبني ويخليني ممن يستحقون أن يترك لهم نصب تذكاري في الجامعة ::[ ..

الله يعينك ويوفقك ويسهل دربك قولي آمين :)
وتسلمين ..


الشمـــــــس

[الشمس]

بسمة الحياة .. وعليكم السلام والرحمة :)

تصدقين عاد ؟
فاقدة طلتك علي في موضوعاتي
وما أعتقد إني قلت لك قبل إن معرفك كثير يعجبني :)

نجي ألحين لردك .. بالعكس ياحلوة أنا ما هجمت عليك أبد أبد , إلا متقطعة من الفشيلة :303: .. فعلاً ما تسلطت علي الكتابة في المنتديات إلا في الوقت اللي المفروض فيه إني أذاكر للفاينل :156:
ولا أحس إني شايلة هم اختبارات , لكن قولوني شوي وبينفجر .!!!
يمكن العقل الباطن مهتم والظاهر لا :D

تدرين الحين وش المفروض نسوي انا وياك .. ؟
المفروض نروح ونضحك على المستجدات .. نياااهاااااا


:144:


مشكورة ياحلوة :)


الشمــــــس

[الشمس]

لاست هوب .. ياهلا :)

آمين يارب الله يفكنا منها على خير :rolleyes:

طيب يعني انت تقول إن الاجتهاد غباء :056: ؟!
بالعكس لاست الكتب مهم إنك تاخذها معك حتى لو كانت قد المبنى اللي فيه المحاضرة , لأنه عندك دكاترة عباقرة جداً من يدخلون إلى إن يطلعون وهم يكتبون على السبورة كلام منسوخ من الكتاب ..
فبدل ما تجلس تكتب معاه وتتعب يدينك , تابع معاه على الكتاب ..

وأزيدك من الشعر بيت , نظراً لقدرتهم المحدودة جداً , فإنهم يجيبون أسئلة الاختبارات من الأسئلة الموجودة آخر كل فصل , لأنه يعرفون إن الطلبة مستحيــــــــــل يحلون أسئلة ما قررت عليهم واجب وشيتات مطلوب تسليمها في موعد محدد :032: ...

طبعاً واضح أنه معاك انفصام في الشخصية :D


تسلم على القراءة والرد والإطراء كمان :)


الشمــــــــــس

[فــجــر]

http://www.tcastle.com/n67bar.gif
السلام عليكم ورحمة الله و بركاته
--- --- ---

شمسنـــــا الرائعة..


مذكرات ممتعة للغاية..


زادها متعة أسلوبك الساخر المميز..


((مذكرات طالبة جامعية..))


أهنئك على قدرتك الرااائعة


في تلخيص كل ما يحمله هذا الأسم من متناقضات..


أمتعتينـــا في ظل جو الامتحانات الكئيب


فلا تجعلينا ننتظر الجزء الثاني أكثر:)


ولك مني أعطر التحايا و أصدق عبارات الشكر


الله يوفقك ويسهل لك أمور دينك ودنياك..


--- --- ---
أختك في الله..فـــجـــر..
http://www.tcastle.com/n67bar.gif

[الشمس]

مراااحب ..


فجر .. وعليكم السلام والرحمة :)

خجلني إطرائك ياحلوة ^-^
تسلمين على قراءتك ويارب يعجبك الباقي كله ..

والله يوفقك ويسهل عليك اختباراتك يارب :)

تسلمين على دعواتك ولك مثلها .. ومشكورة كثير :) ..


الشمـــــــــــس