** جائزة × مسابقة × إستراحة × محطة بنزين **

[aljenny]

السلام عليكم ..

** جائزة × مسابقة × إستراحة × محطة بنزين **

نعم هذا هو العنوان .. آآآخر كلام وما أقدر أشيل حرف واحد لأنكم ماترضولي الخساره

بإختصار : خذ إستراحه وشارك في المسابقه .. لتعبي بنزين إشتراكك بجائزة

بسم الله نبدأ :

هم أصلاً كانوا أربعه .. المتنبي وأمرؤ القيس وجرير والفرزدق .. راكبين موتر المتنبي (الميتين إل) وطالعين يتعشون بروستد .. طبعا أمرؤ القيس (شايبهم) كانت قافله معه لأنه ما يحب طلعات الليول (مايشوف) وكان يقولهم خلونا نطلب العشا ديلفري .. وكل شوي يلمّح لهم ويقول :
الا يا أيها الليل الطويل الا إنجلي *** بصبح وما الأصباح منك بأمثل

بس الجحلّط جاحدينه لأنهم يحبون البرم في الشوارع .. عموما المتنبي ما كان يمّه لأن واحد من عليمية الرياض حدّه وخلاه يرقى دوار الأحساء .. إنقهر المتنبي لدرجة إنه التفت على العيال وهو يصارخ :
من لم يمت بالسيف مات بغيره .....

بس الفرزدق وجرير (إللي كانوا راكبين ورا) ما كانوا فاضين له .. يعني جرير والفرزدق راكبين جنب بعض أكيد أنواع المناقر بينهم (24ساعه) وما إنتبهوا لأحد .. لكن العيال هجدوا فجأه !

إستغرب المتنبي .. مهيب عادتهم !!

أثاري الملاعين قاعدين يكحلون عيونهم .. وياليتهم شافوا شي .. كل إللي شافوه طرف عباة وحده راكبه جمس ومظلل بعد .. قام تهيض جرير (عاد ذاك مايبي له شيء) وقال :
إن العيون التي في طرفها حور ** * قتلننا ثم لم يحيين قتلانا

وقام يتطلب المتنبي يبيه يلحق الجمس .. عاد المتنبي يووووووووه أنواع الغرور في ذاك الآدمي .. رد عليه :
ما بقي إلا هي !!
أنا المتنبي .. أنا إللي الخيل و الليل والبيداء تعرفني *** والسيف والرمح والقرطاس والقلم ألحق جمس ؟!
وإفرض ياخي كبس علينا أبو العتاهيه بجمس الهيئه بتنفعنا أنت وخشتك ؟!

قفلت مع جرير وبغى يتضارب مع المتنبي ولأول مره في تاريخ الشعر العربي إتفق جرير والفرزدق على نقطه معينه بس الفرزدق جابها باسلوب وقام يقردن المتنبي يبيه يلحقهم وهات يا مدح ودحلسه في المتنبي .. من : هذا الذي تعرف البطحاء وطأته .. وصولاً إلى : ما قال لا إلا في تشهده

في الأخير إنتفخ راس المتنبي وقرر يلحقهم .. وهات يا طردي في الملز .. طبعا أمرؤ القيس كان مكبر دماغه من جهة البنات (يلاعب الهوى) بس كان فاك مع الجمس حقهم (جمس 82) وما فيه إلا غزل في الجمس :
مكر مفر مقبل مدبر معا *** كجلمود صخر حطه السيل من عل

المهم بدأ الجمس يبعد عن العيال وصار جرير يتتريق على عزم الميتين إل ويقول للمتنبي :
ومزعجنا وكل شوي تقول على قدر أهل العزم تأتي العزائم و آآآخرتها طلعت الدعوى بكش !

قفلت مع المتنبي وقال للفرزدق :
والله بعذرك فيه .. والله يلوم إللي يلومك يوم إنك تكرّهه كل هالسنين
وبعدها ردها المتنبي بأثنين ودوووووس وبقدرة قادر صادوا الجمس في خنشليله .. قام لز المتنبي جنب قزازة الجمس و قال لجرير :
يالله يالمتفلت ورنا شطارتك !

رد جرير : إعتبر الموضوع منتهي .. وياحبيبي سحبنا بنات كلية عليشه على وجيههم وبعجز عن ذولي !

قام جرير يأشر جنب قزازة الجمس .. عاد البنات ما صدقوا خبر .. أول ما أشر جرير فتحوا القزازه وكانت صدمه ما بعدها صدمه ! وش ذا الجعف ! و لاشلة طقاقات راجعات الفجر

العيال إنصرعوا من هول المفاجأه .. عاد البنات تحطموا يوم شافوا ردة الفعل .. وقاموا يذبون على العيال بس جرير كان أكثر واحد متأثر .. فصار يرد ويقول لهم :
فغضي الطرف انك شيفة *** فلا باسكال بلغتي و لا ديانا

طبعا الوضع صار مكهرب في الميتين إل .. والمتنبي يقول لجرير :
شفت يالزلابه وش أنا قايلك .. مشورتنا على الفاضي وفي الأخير طلعت الدعوى تطريش

في هالأثناء لمح الفرزدق موتر ثاني (من ذيك المواتر اللي كنها حصاله) كان يلحق البنات .. فحب إنه ينبههم عشان ما ياكلون نفس المقلب بس يوم دققوا العيال في الموتر الثاني تعرفوا على الشباب اللي فيه .. قال الفرزدق :
و الله أنى قايله .. موضوع فيه غزل و سربته أكيد أبو نواس بيحضر أول واحد

رد جرير : شف أبو نواس ذا المصلحجي جايب معه عنتره عشان لو طلع الموضوع فيه حارش مارش يطلع مزبن نفسه

في الجهة الأخرى كان عنتره يتميلح جنب البنات وطالع من الفتحه وهو يقصد :
و لقد ذكرتك والرماح نواهل *** مني وبيض الهند تقطر من دمي
فوددت تقبيل السيوف لأنها *** لمعت كبارق ثغرك المتبسم

ضاق صدر المتنبي كذا لله في لله .. وقال للعيال :
ياخي والله محد يحقر نفسه .. حتى ذا الشين قام يغازل !

وبدون مقدمات فتح المتنبي القزازه وقال لعنتره : لا تشترِ العبد الا والعصا معه

عنتره سمع المتنبي والا ماسمعه .. ويولللللللع .. عاد أبو نواس يحب الشر .. طنش البنات ولحق العيال حتى من قبل مايقول له عنتره .. وقام أبو نواس يكبّس لهم ويقول :
مسوين فيها زعطه ويوم جا الجد إنحشتوا ! .. والا كلام الليل يمحوه النهار ؟!

لكن المتنبي أشر لهم وقال : الوعد التخصصي ياعيال اللذينا

في هاللحظه أبو نواس دخله الماء .. وقال لعنتره :
هم أربعه وحنا أثنين (والمازدا ما تكفينا) وأحيانا الكثره تغلب الشجاعه

قال له عنتره : ماعليك أنا بدق على أنجس واحد في الرياض .. أول ما يدري إن الموضوع فيه مضاربه بيجيك مدررررررعم

قال أبو نواس : منهو ؟؟

رد عنتره : من غيره ؟! .. سنايدي . . تأبط شراً

قال أبو نواس : عز الله إللي راحوا في خرايطها

بس المشكله إنهم يوم دقوا على تأبط شراً لقوا جواله مفصول (عسى ما يسدد تأبط شراً للأتصالات!)

صرخ عنتره : أفأأأأأأأأأأأأأ .. قعدنا بها !!

رد أبو نواس : ولا قعدنا بها ولا شيء .. أصلاً تأبط شراً دايم تاكي في ملحق أبو تمام .. ياخي دق عليه هناك

دق عنتره على الملحق ورد أبو تمام وقال له عنتره : عندك تأبط شراً ؟

قال أبو تمام : إيه .. في الحمام

قال عنتره : طيب ترا الموضوع كيت وكيت بتجون والا لا ؟

قال أبو تمام : أفأ عليك بس
السيف أصدق إنباء من الكتب *** في حده الحد بين الجد واللعب ...... إزهل الموضوع يبو العناتر

؟ ؟ ؟ ؟ ؟ ؟ ؟ ؟ ؟ ؟ ؟ ؟



س : من لديه الكفاءة أو الثانوية العامه يطربنا بتكملة الموضوع وإسم الكاتب

وله من العين ذي http://209.51.143.67/forum/avatar.php?userid=3&dateline=1015104161 قبل العين ذي http://209.51.143.67/forum/avatar.php?userid=3&dateline=1015104161 إشتراك مفتوح لمدة شهر برعاية الجني ونسما

وسلامتكم



( رجاء من إللي إشتراكاتهم ببلاش لايقهروني ويتريقون لا والله أخلي تأبط شراً يدخل عليهم)

[الشيهانة]

مسا التماسي ياجنجون:)



يعني ايش :confused:


هو فين السؤال وانا اجاوب:rolleyes:


تراني من الي يقهرون:D واشتركاتهم ببلاش::*


اصلا انا عارفة الي قاعدة تقوله:( بس بعطي فرصة:eek:

للي اشتركاتهم :mad: :mad: ;) بفلوس والفواتير عاميتهم:bhrt:

وهنيالك يافاعل الخير:D





سلاااااااااام::* ::* ::*

[الشمس]

مراااااحب ..

أنا اشتراكي مو ببلاش , لكن ما أحب نسما :239:

عاد هذا هو اللي منعني من إني أفهم وش تبي :290:

حاول توضح وإذا فهمت ولقيت إني عندي الكفاءة جيت :)
أتذكر إني قرأت القصة هذي في ميل لكنها كانت ناقصة بعد ..

وووبس :305:


الشمـــــــــس

[aljenny]

شيهونه ..

الله لا يصبحك إلا بالرضا ......... والعافيه <- (مروق على الصبح .. ماهنا عناد)

أدري إن إشتراكك بلاش وهذا إللي غاثني كل ماشفتك أون لاين

لكن هين بيجيلك يوم وألقاك تدورين لو ربع ساعه تبللي فيها ميلك مدري ريقك

وتنصك الإشتراكات بوجهك وتهيمي في الشوارع والناس لاهيه في دنياها وماهم فاضين لك

وساعتها بس بتجيني هنا في موضوعي عشان تردين علي وأنا زي الأسد ولا حتى ألتفت

قال ربع ساعه قال !


طيب مافي مشكل سديق .. جاوبي وجيّري الجائزة بإسم نفر ثاني .. وكل ماشفتيهم يردون على موضوع خشي بعينهم وحسسيهم إنهم عايشين في كنفك وبفضلة خيرك (يلعن أم الذل)


-------------------------------------


يسعد صباحك يالشمس ..

يعني أنا إللي أحب نسما ؟

إلا والله لأنها قاعده بكبدي قلت خلني أصرفها وأرتاح من تدوير الموضوع كامل بالنت

بس عشان أبث روح المنافسه على ذبذبه قدرها خمسطعش فاصله خمسه ميجاهيرتز قررت مايلي :

بإمكان الفائز/هـ تحديد إسم الشركة المطلوب الإشتراك عليها

كذلك بإمكانه يتدلع على كيفه .. يعني يبيها شهر مفتوح .. أو ساعات معدوده بفتره مفتوحه .. وأكتر من كدا يبئى إفترى


والسؤال طال عمرك يقول : <-- (يعز فلان يقول وفلانه تقول)

من كاتب تلك القصه .. وماهي بقيتها ؟

يالله .. ولاتنسون خمس علامات على الترتيب وتنسيق الخط

وفقك الله .. ثابري

[هنو]

مساء الطيبة والخير والإحساس
مساء غير أحبابي مايليق =============< شاربة ديتول وداخلة :D


أنا كمان إشتراكي ببلاش لأنه على حساب أبوي:D


كيفك جنجون؟!!!
والله زمااااااااااااااااااااااااااان عن مواضيعك إلي تبط الكبد وتجيب الماحق:D
بس شفت العنوان إلي أكبر من الموضوع نفسه:( وقلت أدخل أتلقف وأشوف وش السالفة , منها نسلم ونزيد من عدد الرود كود ربي يفتحها علي وأصير "عضو متزن الخطوة":( والله تعبت الى اليوم وانا ماأعرف أمشي زي الناس كل ماطلعت الشارع أصير مضحكة للي يسوى والي مايسواش والسامعين يقولون آمين:D , لأنه مايصير كا مامشيت شمعت بأقرب جدار بوجهي كنه يقول تعالي:(

[Sami96SA]

مساء الخير

جنجون .. حبيبي

عسى ما شر؟ أخاف تكون مصخن وانت ما تدري!!

أنا قريت موضوعك أمس وسألت حالي وش صاير في الجني قاعد يوزع جوائز واشتراكات .. بس لأنك حددت المسابقه للي اشتراكاتهم بفلوس هونت وما تعبت حالي في البحث .. مع ان "استراحه" ماجابت نتيجه .. يعني حاولت .. وحاولت.

شكل الموضوع وكاتبه ضايعين.


وأخيرا وجدته.

الموضوع وكاتبه.

لكن ماراح أعلم لأني ما بستفيد شي خصوصا وانت تخوفنا من صاحبك "تأبط شرا" ياطا في بطونا.

ونا أعرفه ما يتواطن مستر تأبط :)


بس وش السالف؟ من جد


--------------------

سامي

[أحبه حيل]

مسا الخير ..

المصدر والموضوع واسم الكاتب موجود ,,,وحصلته لكن باقي القصه يفتح الله
أكيد بتسألون ليش ؟!

لأن تأبط شراً ما بعد طلع من الحمام للحين ::[ ناقع نفسه في خليط ديتول , وصنفرة جسم بالفواكه , وكوركس , ومعطر جو :sleep:

تخبرون توه جاي من القنص ,, وريحته طالعه

لكن لقيت البطل عنتره يصور له مسلسل جديد

ينفع ؟! أكيد ينفع

المهم شي يشبه للي طلبته ,,, يعني البطل في كل القصتين واحد .. أبو العناتر

هذي قصة عنتره مع الشاعر الفطحل ولد حارتهم ,,,وطبعاً باقي لها جزء ثاني وربما أجزاء !!!

_____ منقول مع سبق الاصرار والترصد _____

وانا جالس افكر ومتنح مع نفسي .... في ليله مافيها زو امر ( ضوء قمر )

اعود إليكم لأحكي لكم قصتي الحزينه مع الشعر
اييييييييه يالشعر كنت احبك من زمان لكن كرهني فيك الحراميه والناس اللي ماتستحيش

اقولكم من زمان كنت محبوب عندنا في القبيله ايام كان عندنا قبيله وكنت فارس العشيره بل فارس العشاير وكنت مشهور بالشده والحزم وسعة الصدر وكان يهابونني كبار الفرسان وجميع القبايل تهاب قبيلتنا علشاني معهم يعني لنا احسن المراعي والغدران وكان محل القبيله في مكان استراتيجي على أربعة شوارع مزفلته ..

المهم وكنت في نفس الوقت ومع المواصفات هذي كلها كنت شاعر فطحل وكنت راعي غزل وحركات نص كم وكنت راعي دوران في الشوارع أركب فرسي البلقاء واتوشح سيفي البتار وادور في شارع التخصصي اشخص عند اللي رايح وجاي واترزز ما شاء الله علي

المهم مره من المرات وكنت راكب فرسي واتمشى في المراعي كان الوقت في الصباح اصل انا كنت سهران عند واحد من الشباب وتعرفون لعب بلوت وشاهي رايح وشاهي جاي و بلاي ستيشن في خيمتهم الين الفجر طلعت صليت وركبت الحصان وحميته شوي ومشيت وكان الشارع فاضي مررررره المهم وارخي الخطام للحمار اقصد الحصان وينطلق تقول صاروخ اهب عليه ويوم بدى يسابق الريح بغيت افرش ايدي بس قلت اخاف نطير وتصير مشكله المهم واقعد اشعر انا ولقول ::

الخيل والبيداء والعزابيه تعرفني***** ومروع العرسان في كل شارع

عاد عرفت بعدين انه انسرق وحرف ولا حول ولا قوة الا بالله
المهم وصلت بيت الشعّر و اطلع المفتاح ابي افتح البيت الا هو مقفل وارج الباب الا واسمع صوت امي من ورى الباب تقول :: يا ولدي وانا امك قلت :: يا عوّنك قالت:: وانا امك ابوك قفل الباب يقول خلي ذا الولد السمرمدي يرقد عند اللي سهران عندهم وين بتروح وانا امك والله ما اقدر افتح لك الباب قلت :: يا يمه معليك ادبر نفسي قالت:: انتبه لنفسك وانا امك قلت ابشري والله واركب حصاني وادعس البنزين على الأخير ضايق صدري بس جلست افكر في امي الله يطول عمرها وحنيتها وتطلع مني ذيك الأبيات اقول فيها ::

الأم مدرسة اذا اعددتها ***** كجلمود صخر حطه السيل من علي

من علي صح لساني

طبعاً علي ذا يطلع أخوي الصغير حبيب بس دايم يعلم ابوي اني اغازل بنت جيراننا طيب انا وش دخلني هي اللي تغازلني وتقول عز الله انك نعجة سمينةْ بالحيل يا فارس الفرسان يالحبيب عاد انا عرفت انها تحبني اصلن انا زين مرررررررره اهبل ماشاء الله علي الله لايضرني قولوا ما شاء الله ياجماعه

المهم البيت اللي قلته في امي دريت انه سرقه عنتره الظاهر انه عنتره اصلن لو انه رجال كان سمى نفسه اسم زين قال ايش قال عنتره سرقه وعدله من ورى ظهري اللي ما يستحي على وجهه سرقه وقاعد يترزز به في حارتنا وانا اطالع فيه بنص عين هو صحيح انه قوي .. ويلعب كمال اجسام ... وجسمه كبير ...واسمر ....يروع ... ويخفف لحيته وكل مامر من عند بيت جيراننا اللي بنتهم تحبني وناوي اتزوجها يقعد يقول بيت الشعر اللي انا قايله بس معدل فيه شوي ::

يقول مكرأبن مفر ومقبل ابن مدبر معانا**** كجلمود صخر حطه ولد عمي علي من فوق الجبل

هي الصراحه كانت ما تعطيه وجه اول شي وانا انبسطت قلت الحمد لله انها لي ومره من المرات وانا قاعد انظف كفرات الحصان حقي الا ويجي عنتره بحصانه ويسحب جلنط في حارتنا ؟؟؟؟؟!! وتطلع بنت جيراننا تطل من ورى الباب وتنبسط ومن بعدها صارت ماتعطينا وجه المهم وفي يوم من الأيام و بعد صلاة المغرب قام ابو عنتره وكان عنده بقاله يبيع فيها وحاط فيها هندي طبعاً قبل السعوده ويوم جت السعوده حط عنتره فيها <<<<<< انتقام

المهم قام عقب الصلاه وقال يا جماعة الخير ترى عرس ولدي عنتره الخميس الجاي ليلة الأحد !! على بنت رأفت ابن لؤي يقصد جارنا والعزيمه للجميع ولا احد يغيب وترى العرس في قصر التهاني خلف جبل ابو ركبه ؟؟!! في الشارع الثاني !!!!!!!!!

يوم ضاق صدري وقلت ليلى وراحت بس ما تروح عبله وانا ولد ابوي والله وأنادي عيال الحاره واعلمهم بالخطه وقلت لهم لازم نسويها بأحكام علشان ما نبغى اي مجال للخطأ هذي فيها حياة او موت وزعت الأعمال على الشباب وقعدنا ننتظر الوقت المناسب علشان ننفذ الخطه .........

ترقبوا الخطه وما ذا حصل لعنتره


.................... وإلى الآن وأنا اترقب الخطة


يالله يا جني ,, إيدك على الاشتراك يا عمنا ,, خلينا نشوف رزقنا

ولما يوصلني اليوزر نيم والباسوورد ,, حيوصلك اللينك لحد عندك



كنت بواحد .... وأبلشتك باثنين

[aljenny]

لا لا تضايقون الترف لا تضايقونه
لا لا خلوه يجني من حياته ثمرها <-- ( فاهم غلط .. يحسبه لازم يرد بأبونوره)

يسعد أيامك هنوو ..

إرحمي نفسك ياشيخه .. إنتي بس بطلي الهباب المنظفات إللي تشربينها وأوعدك بتتزن خطوتك .. بالعكس أتوقع يكتبوا لك :

" عضو .. خطوته توزن بلد " <-- ( بلد فيها أحد .. لايروح بالك )


إييييه .. أنا بخير .. وربي تاب علي .. كنت "عضو .. يمشي على الوحده ونص " والحين شوفة عينك "متابع " يعني زي المرشد حق أقسام الشرطه .. شغلته يمسك جريده ويتابع الوضع .. وأي شي يشوفه شين يبلغ عنه .. وأبوفهد واعدني بنظارة شمسيه وبكت فاضي وبالطو .. يعني لزوم المتابعه

على فكره .. أنا كمان إشتراكي بلاش .. لأنو على البابا <-- ( وععععع ياشينها منك يالجني)


-----------------------------------------------------

هلا بسهم المنتديات الملتهب .. هلا بالسبحه المنفرطه .. هلا ..............
( خلاص أنت تعرف الباقي لأني متعيجز أكمل )


ياغالي الأثمان غلوك بالحيل <-- ( مازلت في جو أبونوره )

من قال لك إن المسابقه للي إشتراكاتهم بفلوس ؟؟!!

أنا أقول لايتريقون حقين البلاش لأني أنقهر منهم .. بس

وبعدين يخوي هات أبوبلاش وإلا أبوفلوس .. هات أي أحد .. بس عطوني باقي القصه

تكفى إلحقني بالباقي .. أخوك مزنوق في باقي القصه .. وده يكملها بأي طريقه

إلا تعال يبوي .. وش سالفتكم كل شوي " وش سالفتك يالجني ؟ "

أنا نفسي ضعت من كثر " السوالف "


تصدق سامي .. لو تعلمني وين القصه بالضبط على النت ..

أوعدك أخلي مستر تأبط يغير إسمه إلى "مستر تزبط " لعيونك بس


(روووووووعه مسجاتك .. لكن أخجلني وقت القراءة كان متأخر .. نعيدها بالأفراح)

------------------------------------------------------

لنا عوده لباقي الردود <-- ( الله أكبر .. إرحم نفسك ياشيخ )

[aljenny]

يسعد صباحك " أحبه حيل " ..

(((المصدر والموضوع واسم الكاتب موجود)))

حلو .. طيب وينه ؟؟

إلحقونا فيه .. سلموني الكاتب وباقي القصه مهو مشكله أنا أدبرها


صح قصة أبو العناتر حقتكم زينه مره وتهبل (ربي سامحني في يوم هالجمعه الفضيل) ..

لكن ذيك سبتني (يعني سلبتني .. وليست شتمتني) .. سبتني قلبي وعقلي :heart:

وما أنام الليل من كثر ما أفكر فيها ..

حسيت مستقبلي معها ..

بنيت بيتي بيدي ويدها ..

وما أقدر أتخلى عنها أبداً .. أبداً .. أبداً


المهم .. اليوزر والباسورد من عيوني الثنتين بتوصلك .. بس مسكني طرف لينك

وألف شكر لمشاركتك

[Sami96SA]

مساء الخير

هلا والله بالسبحه المنفرطه اكسترا

هذا رد التحيه بمثلها أو أحسن منها انشا الله :)


حبيت بس أقول لك اني ضيعت الموضوع وكاتبه ومافيني حيل أدور مره ثانيه .. محتاج لوقت كثير ونا ما عندي.

بس وش السالفه؟

-------------------

سامي

[aljenny]

يسعد أيامك سامي <- (الرجاء مراجعة ألقابك في موضوع آخر)


تبي تعرف السالفه ؟:-@

- السالفه إني ماعدت أدور الموضوع ولا الكاتب لأنها حامت كبدي (حامت = لاعت .. لمواطني دول مجلس التعاون)

- السالفه إني غيرت إسم شيهونه من "أخطبوط المنتديات" إلى "أم عشيش المنتديات"

- السالفه إني سويت قائمه بكل إللي جمدوني في بحثي وقررت أمر على مواضيعهم مرور الكرام إللي مامعهم وقت .. خشمي مرفوع إلى الأعلى كسحابة تطفح في السماء .. ولا حتى أعبرهم .. وأنا كلي أنفه ومنقهه

- السالفه إني قفلت هالموضوع لعدم التفرغ (تكفى ياللي مقطعتك الردود) .. وإذا تبي الصراحه أنا إستعملت كرت الإشتراك وماعندي نيه أروح أشتريلكم غيرهم


وهذي كل السالفه يابعد كل السوالف :cool:


( بالله ما إنقهرت على البند الثالث ^فوق^ ؟ .. ياوجدك مارديت )

[ملكة البحار]

السلام عليكم ....
اخي الكريم الجني (عشان الرقابه:D..


الحقيقه اني قرات الموضوع عشرومية مره ...

ومافهمت اش السالفه ؟؟ (كمان سالفه:))

بس الي متاكده انو كل هالشعراء موجدين في منتدانا...

والطقاقات كمان :051:موا نا ....

ما قلت ذهبت الطيور بارزقها ولا في امل نكمل... !!

بس اول اشرح الموضوع بشكل مبسط ...

تحياتي:123:

[aljenny]

وعليكم السلام ..

هلا بك (I) أختي الكريمه (I) ملكة البحار <- (أنتي أكرم من شهادتي لك في بداية رد)


أولاً وقبل البدء في الشرح .. فيه سطر لي فترة أبغى أكتبه لك ومالقيت المكان المناسب ..

((( ألف شكر لك يا أختي الفاضله على كذا رد في المنتدى السابق ذكرتي فيهم الجني بالخير .. سواء بكلمه أو إشاره أو سؤال عني في فترة غيابي الأخيره .. ولكن للأسف قراءتي للردود متأخر حال دون ردي عليك هناك)))

خلاص .. نبدأ بالشرح :

^فوق^ في أعلى الموضوع .. أنا نقلت قصه ناقصه جتني بالميل .. حلو ؟

أنا " الجني " طرحت القصه للجميع ليساعدوني في البحث عن بقيتها .. أو على الأقل عن كاتب القصه عشان أبحث عن بقيتها في موقعه أو في المنتدى إللي هو يكتب فيه .. وبس !

1+1= 2

قصه ناقصه + شخص يبحث عن بقيتها = شخص محتاج للمساعده

شخص محتاج للمساعده + شخص بيده المساعده = ترابط وتآخي وتكافل إجتماعي

ترابط وتآخي وتكافل إجتماعي × هالزمان = معليش يبوي نبغى مقابل

مقابل + مساعده = بقية القصه

بقية القصه + الجني = سعادة منقطعة النظير


أقدر أقول إنك عرفتي وش السالفه ؟

بإذن الله

تحياتي لك (I) أختي الكريمه (I)

[أحبه حيل]

السلام عليكم


يسعد صباح الجن كلهم ..


بنــادر .. هذا أنا عند وعدي !

من 10-2-1423 هـ إلى اليوم .. يعني بالضبط 5 شهور !!
وأنا أحاول أحصل ناتج المسأله هذي :

بقية القصه + الجني = سعادة منقطعة النظير

والحمد لله .. طلع معي الناتج صح :)

...

بعد المكالمة اللي صارت بين عنتره وأبو تمام ......
طلع تأبط شراً من الحمام (وأنتم بكرامه ) ودخل على أبو تمام بالملحق
قال أبو تمام : نعيماً يا زلمه
قال تأبط شراً : إلا على طاري نعيماً .. كني سمعت التلفون يرن !!
عسى والله منتب تغازل ؟!
قال أبو تمام : وإذا غازلت يعني .. وش فيها ؟!
والله يا أنت حسود .. نعنبو دارك معك الخنساء لها ثلاث سنين .. وأنا آكل تبن !
قال تأبط شراً : إتركها بس .. لي ثلاث سنين آكلتني وجاحدتني وقطع جوالي بسبتها
وكل يوم اقول لها ابشوفك وتعطيني أشكل .
وهالمكالمات اللي تحسدني عليها تحسبه حب وغرام ؟!
لا والله كلها تروح بأخوها صخر .. مات صخر وحيا صخر .. مبلشتني بصخر أخوها
وأنا أجاملها وأقول بقلبي (وشدعوى هنري ولد الاميره ديانا ؟! )
قال أبو تمام : إيه هين .. علينا ؟!
أقول بس خل عنك .. بلا خنساء بلا خرابيط
ترا العيال اتصلوا يبون الفزعه شكلهم يبي يرطبون على بطونهم .. وش رايك نروح ؟
قال تأبط شراً : ( وهو داخله الماء ) عسى ماهم واجد بس ؟
قال أبو تمام : والله ما خبرتك خواف إلى هالدرجه يالدجاجه
قال تأبط شراً : لا مهب المسأله خوف .. بس أخاف ينحتونني إذا دبغتهم كلهم .. وأنت تعرفني ما يقواني الا الله ثم العين
قال أبو تمام : كفو والله أجل أدق عليهم وأقول هذانا جينا ؟
قال تأبط شراً : إيه دق وتأكد من عددهم ( إلى الحين داخله الماء )
دق أبو تمام على عنتره وقال وين أنتم بس .. ترانا جازمين
قال عنتره : نص ساعه والوعد بالتخصصي نبي نروح لمطعم ماما نوره ناخذ أي شي لهالكابون أبو نواس مبلشنا يقول ما أعرف أضارب وأنا جوعان
وهم يتكلمون بالتلفون تأبط شراً كان ينغززز أبو تمام ويقوله لا تنسى تسالهم كم هم ؟
قال أبو تمام : إلا على طاري الجوع كم اللي تبون تهاوشونهم ؟
قال عنتره : أربعة دبش نبي نتوطاهم ونرجع
قال أبو تمام : أوكي نو بربلم نص ساعه وحنا عندكم
يوم صك السماعه أبو تمام قال تابط شرا : أجل خلني أروح للسياره أجيب دخاني والعجرا


بنفس الوقت كانوا الأربعة اللي بالـ ( ميتين ال )
اللي هم : المتنبي وامرؤ القيس وجرير والفرزدق يدورون بالتخصصي يحترون الوعد

- والله هالعبد هذا عليه جرمن مهب صاحي (يقصد عنتره ) الله يستر بس
التفت امرؤ القيس على اللي راكبين ورا (الفرزدق وجرير) قال : أنتم جازمين ؟ ما خفتوا ؟
قال جرير : لا ما خفنا بس أنت اللي شكلك خايف .. خابرك قلبك رهيف ولين
قال امرؤ القيس : لا يا بابا أنا قلبي ميت .. شكلك ما عرفتني مضبوط
والله ويشحطه ببيت :

وإن قسمت الفؤاد فنصفه .... قتيل ونصفه بالحديد مكبل

قال المتنبي : نعمممم ... الشر ما يجيك مرؤؤئي ( يدلع امرؤ القيس )
بهاللحظه كان الفرزدق بقمة الخوف ويسال جرير بأذنه ويقول له : ما تخبر واحد نشيط ؟
لأني الصراحه علي قل الصحه اليوم ولا أظني أهاوش معكم
قال جرير : وعووووووه اسمعوا يا عيال
قال المتنبي : خير وش السالفه ؟
قال جرير : خوينا خررررررر (خاف )
قال امرؤ القيس : افاااااااا .. والله ويلخخخ الفرزدق ببيت شعر :

كذلك طبعي لا أصاحب صاحبا .... من الناس إلا خانني وتغيرا

قال المتنبي : يالله الفرزدق رد عليه إن كانك رجل وإلا بلعت خشبه ؟(يشبهم)
قال الفرزدق : هين هو وشعره .. من خاف سلم .. لوهي بالقرق والله ما اسكت يومين .. بس البلا نبي ناكل بقوووس
إلا بس دورولكم واحد فزعه وهين
قال المتنبي : هذي كبينه أوقف عندها ؟
فيكم أحد يعرف له فزعه ؟
قال امرؤ القيس وهو منتفخ وضايق صدره :
إيه أوقف أعرف واحد مهب مثل هالثور اللي ورا
قال جرير : كفوووو سنايدي منهو ؟ أتحفنا ..
قال امرؤ القيس : رجالن شرواك .. الجاحظ سنايدي هو راعي هالمواقف ذي
قال الفرزدق : ونعم والله إنه رجالن سنافي
قال جرير : منهو هذا الجاحظ عشان تمدحه كل هالمدح ؟
قال الفرزدق : يا شيخ على شحم ... ويلزقه ببيت شعر :

وليس قولك من هذا بضائره .... العرب تعرف من أنكرت والعجم

قال امرؤ القيس للفرزدق :
ورا ما تسكت أنت ووجهك .. مهب أنت اللي تقيم الرجال
أبد .. بالكلام خذ وليده وبالفعل تقل دجاجه ! إنثبر وانطم والله إن سمعت صوتك لا أطخطخبك القزاز

يوم وقف المتنبي عند الكبينه شافوا جمس عبارتين واقف قدامهم
قال جرير : يا عيال .. الجمس هذا مهب غريب ؟
قال المتنبي : إيو الله هذا موتر ابن عباد ( النعامه )
شف رقم الموتر (ع ب ا د 444 ) <---- واسطه خخخخخخخخخخ
قال امرؤ القيس : امشوا خلونا نطب عليه ونستفزعبه
والله انه رايح عن بالي
نزلوا كلهم من الفرحه وادخلوا الكبينه
ولقوا ابن عباد يشتغل بالكبينه
قال المتنبي : أفاااا يا بو جبير .. ورانا ؟
عسى والله منت تشتغل هنا ؟
قال ابن عباد : لا إستح يا شيخ أنا اشتغل هنا ؟
الزير سالم هو اللي يشتغل هنا
سيرت عليه وقال إمسك مكاني شوي أبروح أجيب بكت ملبورو وأجي
والحمار له ساعه ماجاء
وهم يتكلمون دخل الزير سالم .. والله وياقفون كلهم زي الالف !
وكان الزير سالم يهذري وهو داخل ويقول :

كأني إذ نعا الناعي كليباً .... تطاير بين جنبيا الشرار

سلموا عليه وقالوا له عسى ما شر تقل ضايقن صدرك ؟
قال الزير : إيو الله قهرني هالبزر ولد عمي (يقصد جساس )لكن أنا وراه والزمن طويل
قال امرؤ القيس : الصراحه يالربع حنا جايين نبي فزعتكم
قال ابن عباد: سم وأبشر خير إن شاء الله ؟
قال امرؤ القيس : أبد .. هويش هويشه مهب هوشه .. وإننا مواعدينهم هنا يبي يجون بعد شوي .
قال الزير : اصبروا خمس دقايق تكفون .. يبي يجي همام يستلم بعدي بالكبينه وأبروح معكم .. والله إني مبطي عن الهوشات

دخل همام عليهم ومعه ثلاجة الشاهي وطن فصفص
والله ويتغامزون الربع ويطلعون .. ماودهم يدري همام
راح ابن عباد للجمس ( النعامه )
قال المتنبي : وين ؟
قال ابن عباد : أبجيب عصا العفريته
قال المتنبي : كفو والله


باللحظه هذي كان أبو تمام وتأبط شراً مع بعض بسيارة أبو تمام
أخذ الجوال أبو تمام ودق على عنتره
وقاله وين أنتم ؟
قال عنتره : حنا عند المطعم
قال أبو تمام : يالله دقيقه وحنا عندكم
شوي والله وياقفون عند المطعم وينزلون ويركبون المازدا
يوم إنهم مشوا راحوا للتخصصي
شافوا الـ( ميتين ال ) واقفه عند الكبينة
يوم ناظروا شافوهم واجد
قال تابط شرا : هجو هجو .. معهم ابن عباد والله إن نروح ملح
عنتره ما صدق خبر وينشب رجله بدعسة البنزين .. ويمر من عندهم تقل شراره من السرعه
المتنبي لمح المازدا وهي ماره من عندهم وزععععق لربعه : يالله يالله وراهم وراهم
طمر بالميتين ال وابن عباد بالجمس وخذ طردي وراهم ومن شارع لشارع ومن حاره لحاره وداروا الرياض بدقيقة

ومن حسن حظ عنتره طفت المازدا عند مركز الشرطة .. وينزلون الشله اللي بالمازدا ركض ويدخلون مكتب الضابط ويلقون عسكري كسره
قالوا له ما والله نطلع من هنا

ابن عباد جاي وراهم يمشي على كفرين هو والزير ودخلوا عليهم بمكتب الضابط وسكروا الباب من جوا
ودق ابن عباد على امرؤ القيس وقال له : وين انتم ؟ تمشون على بيض ؟
قال امرؤ القيس : لا بس كنت حسران وووقفنا عند دورة مياه
أنت وين أنت الحين ؟
قال ابن عباد : حنا بمركز الشرطة حاجرين السلق اللي أنتم خايفين منهم
قال امرؤ القيس : يالله جينا جينا
العسكري اللي كان معهم مسكت لان الزير سالم غايله بالربعه
وصلوا شلة الميتين ال ودخلوا عليهم بالغرفه
قال ابن عباد : يالله متنبي قلبي .. وش تبي نسوي بهم ؟ إنت تامر وحنا نطامر
قال المتنبي : أنا بس أبفشّل هالعنتره عند ربعه وباترك الباقي لكم
قال ابن عباد : يالله خذ راحتك
راح المتنبي لعنتره وعنتره طبعا بالع خشبه من الخوف ومسك عنتره وطخطخبه الجدران اللي بالغرفه
وفصخ ملابسه وصار وجهه يعطي ألوان غريبه من الفشيله مره أحمر ومره أزرق ومره برتقالي ومره كستنائي (يعني قوس قزح وعليكم الحساب )
وفي لحظة صمت زعق ابن عباد قائلا :

قربوا عصا العفريتت مني ..... قربوه فو الله اني دابغهمو

ومن القشر اللي بالزير سالم طلّع عصا العفريته من جيبه وعطاه ابن عباد
ابن عباد ضرب أبو نواس وضرب أبو تمام
وهو يضرب أبو تمام خمته جنيه وانهبل وبدا ياكل الخضر واليابس ويدبغ كل اللي بالغرفه ما خلا ابن أبوه صاحي
ولا سلم منه أحد حتى الطاوله حقت الضابط اخذت حقها


( أنا الصراحه يوم شفتها خربت قلت مالك ومال الغثا أكتب النهايه وفكنا ) <-- تعليق الكاتب

انتهى ..............



والحين يا سي جني .. خلنا نشوف نتائج هالسعادة المنقطعة النظير ! :rolleyes:

[aljenny]

يسعد أيامك أحبه حيل ..

تسلم يدينك ياعسى حيلك ماينقطع

أنا الآن في سعادة منقطعة النظير لا جا قبلها ولا ظنتي بيجي بعدها لأن هذي آخر حبه وكوّش عليها الجني
الآن أستطيع أن أنام فلا نامت أعين الجبناء (أهببببب يالقوي)

معليش عاد ترى الهدية بح من زمان الله يذكرك الشهاده .. بس فيه كرت جيل أبو ثمانين ساعه باقي فيه ربع ساعه وهالحين قاعد أكتب هالرد به .. يمشي ؟


بجد مشكوره ورود .. يقف قلمي حائراً أمام مجهوداتك .. يقف لاشغل ولامشغله بس واقف ولو تبي منه ذنب ما أعطاك .. يقولون سعودة سعودة وهذي أقلامنا ذبحتها البطالة .. مره قلمي قدم على وظيفة في منتدى عينوه سكيورتي على المواضيع لو دخل أحد وهاجم موضوع يتدخل قلمي ويوقفه عند حده !
إيييه بكره تصير *&^%$#@@! <- (قاعد أتهاوش أنا والمشرف .. أبي أكمل وهو يقول لا)

والسلام عليكم

[صامت]

سلام


الله يسعد ماء كل من طلت عيونه على موضوع اخي المطيور ...عفوا أقصد الجني الرائع

الله يسعد ماء ..تعني (الله يسعد مساء)


أنا متأكد أن وزير المياه الجديد لوكان موجود يوم تكتب الموضوع كان احتج عليه لكن حضك انه كان مشغول مع الانكليز وانت اخذت راحتك

لان المسكين كان عنده صفحه في جريدة اليمامة قبل 20 سنه يكب فيها لقاء مع المتنبي والمسكين مادرى انه بعد عشرين سنه بيطلع له واحد يجمع الشله كلهم ؟؟؟وبمختلف العصور لا ويفحطون في عليشه ...

أنصحك تنسحب من الموضوع وتعتذر للقصيبي والا مايصيرك سنع ولا راح تنعم بالماء البارد ...خصوصا انك في مدينة تشرب من بحر على بعد 500 كيلو متر لو تصدمها سيارة ...وصل سعر التنكر الف ريال

...واذا فيه جائزة أكيد لي ..بس بشرط ان جوائزك مصرح بها من الغرفه التجارية
لاني ماحب يكون يكون في الهستري حقي يمكن اصير وزير ....



اللهم أعن وزير المياه الجديد على العمل لتحقيق الامن المائي لنا وللاجيال القادمة

صـــــــــــــــــــامت

[aljenny]

ماء الخير والإحساس والطيبه .. ماء مايليق إلا بالصامت

بخخخخ

ياحبيلك يالصامت .. دايم رجعتك قوية

ما أقول إلا الله يقوم المطيور بالسلامه

( الرجاء مراجعة موضوع الملكة ونت متلطم يالصامت )


تصدق عاد وسعت صدري يوم جبت طاري القصيبي

تراني مادحه في الديوان وقايلهم إنه أحسن واحد يسكر بزابيز *

ياعساه على القوة في تسكير أي تسرب ورقي من أي بزبوز رفيع المستوى .. حتى ولو كان من نوع " غروهي "

مشكور على الطله البهيه جداً .. وتسجل في ملفك المطرز والمشكوك



* بزابيز = جمع بزبوز

والبزبور هو الحنفيه ( ترجمه لأهل الساحل الغربي )

والبزبوز هو الصنبور ( ترجمة لأهل درة الفكر الفلسفي )