أنا..وقلمي3

[الجبل]

أنا:قلمي ..فلمي
قلمي: هلااا هلا والله وغلا ..وين الناس؟!! لك شهر ونصف كاتم أنفاسي بغطوتي (غطائي) وراميني في ظلمة الدرج بين الأوراق وناسيني.
أنا:والله تعرف مشاغل الدنيا ..الله لايشغلنا إلا بطاعته
قلمي: ايه حافظ أعذاركم ..المهم وش تبي بي ؟
أنا: أبد .سلامتك بس ودي تكتب لي موضوع أنزله في متندى النقد الأدبي.
قلمي : وين..؟وين..؟ النقد الأدبي ..عند الأدباء والكتاب والشعراء
أنا: إيه عد الأدباء
قلمي : عوذااا(أعوذ بالله) لالالالالالالا أنا ما أكتب لك عند الأدباء
أنا:لييييييه ؟؟؟ وش فيهم الأدباء؟
قلمي : الأدباء مغرورين ومتغطرسين ونافخين خشومهم..ياشينهم والواحد منهم مايشوف من الأرض شي.
أنا: ول ول ول أنت شايل عليهم ياقلمي ..لالا ..أنت آخذ فكرة خطأ عنهم
قلمي: بلا فكرة خطأ بلا بطيخ...إلا متكبرين ومتغطرسين ولو تبغى أجيب لك دليل جبت لك ألف دليل.
أنا: أشوف هات دليلك
قلمي : أكبر دليل ها الأيام المنتديات الأدبية تلاقي الواحد منهم حين يكتب موضوع يسهب ويكتب لك ثلاث صفحات وكلام كثير ولكن مايتنازل ويكتب رد للمواضيع الثانية ..لا وإن بغى منك شي كتب لك رد بدون تحية ولاسلام ولاتحية ختام..يعني كأنه يكتب بفلوس والعياذ بالله
أنا: اسمح لي ياقلمي إنك مخطي ..نعم مخطي ..خذ عندك مثلا أنا أكتب في ردودي تحية وسلام
قلمي :ههههههههههههههههههاهاهاهاهااه وووووووووووو (متسلقي من شدة الضحك)وأنت من ضحك عليك وقال انك من الأدبااءهههههههه منهو اللي ضحك عليك بالله ههههههاي
أنا: (منحرج) تبي الصدق : أمي الله يرضى عليها ويرزقني رضاها ، هي اللي دايم تقول لي اني أديب ..حتى أذكر أول قصيدة كتبتها أيام المراهقة كانت قصيدة غزلية حزينة بدون قافية ولاوزن ولامعنى بعد بس كانت حزينة ، يوم قريتها لمي قامت أمي تبكي ..وتبكي وأنا أقرأ قصيدتي الحزينة وأمي تبكي وأنا أقرأ وأمي تزيد في بكاها ..توقفت وسألت أمي: يمه ليه تبكين؟!! قالت : ياوليدي خايفة عليك من الحسد ومن العين . قلت لها: وأنا اللي أحسبك تبكين من قصيدتي ..طيب يايمه وش رايك بقصيدتي قالت : والله مدري عنها ياوليدي ماسمعتها من فرحتي بك . ومن يومها ياقلمي وأنا مقحم نفسي مع الأدباء ...بس تراك ظالم الأدباء والكتاب والشعراء
قلمي: أقول لك وش رايك تسأل أعضاء المنتدى وش رايهم بالأدباء وبخاصة الذين يكتبون في المنتديات إلا يشعرون بأنهم متكبرين ومتغطرسين ولايتفاعلون مع كتابة الآخرين وبخاصة المبتدئين . أنت أسألهم
أنا:بس أخاف يزعلون مني ويقاطعوني والسبه أنت وجهك
قلمي: لالالا تخاف هذا رأي ماهو رأيك .أنت حاط رأسك معهم.
أنا:طيب وين تبيني أنزل الموضوع : في درة الشعر والخواطر أو في النقد ألأدبي أو في الفلسفي
قلمي (مقاطعني في الكلام): لالالالا لاهذا ولاهذا نزله في درة الأستراحة وشف رأي الأعضاء الكرام في الموضوع هم معي وإلا معك؟
=
وكتبه/ الجبل
--
أنا ..وقلمي 1
أنا..وقلمي2

[الـدانــة]

[ALIGN=CENTER]
مشاء الله عليك ياجبل':

موضوع يموت من الضحك أنت متأكد أنك كنت تكلم قلمك؟؟!!

أخاف كنت تكلم الفرزدق

أمك ذي تراها محبه لك

\\ياوليدي خايفة عليك من الحسد ومن العين . قلت لها: وأنا اللي أحسبك تبكين من قصيدتي \\

أما بالنسبه لرئيي في الأدبيه

الأدبيه أجمل الساحات وكتابها ذو أحاسيس مرهفه,وهم في عالم ثاني غير العالم الي نعيشه..

بس بعضهم يعيشوا معك يكتبوا عن أي مشكله أليمه تحدث لنا وهؤلاء هم الذي أحرص أني أقرأ شعرهم..

والبعض الآخر يعيطك كل مافي جوارحه ويبدع لك في شعره سواء كنت معايش للقصته أم لا

وأيضاً هذا له التقدير والإحترام.

أما الأخر قصيده ورى الثانيه ولا لها وجه ولا قفى وبعضهم أن رديت عليه يالله بالحيل يرد عليك

وأنتبه ترى تقول له ليه حاط ذيه وشايل ذيه..|315|

تلقى نفسك طاااااااااخ مخبوط

وألف شكر على الموضوع [/ALIGN]

[BackShadow]

هلا نويصر
اشتقنالك حبيبي واشتقنا لقلمك الرائع
بجد بديت ادمن على قراءة مغامرات قلمك ذا

يا خوفي يكون قيصر هو اللي لعب براسك وخلاك تنزل الموضوع هذا ;)


بالنسبة لي اتفق مع قلمك ولكن من غير تعميم
بالفعل هناك الكثير والكثير من الكتاب والادباء والمستأدبين ( من يدعي الادب )
يكتب موضوع يأخذ منه ساعات وساعات لكتابته
وعندما تشاركه في هذا الموضوع يرد عليك بنصف سطر باللون الاسود مثلاً
ولا يحسسك باي اهتمام او تقدير لوجودك في موضوعه

ايضاً هناك منهم من يتعدم احراجك في موضوعه
وهناك من يكره المبتدئين في الادب والمحبين له

ولكن ايضاً لا نهمل الجانب الجيد
فهناك من كرس نفسه لمساعده المبتدئين وتنميتهم وتوجيههم
وهذا الغرض الاساسي من كثير من المنتديات
ولكن اعترف بان هذه الفئة قليلة جداً جداً

دائماً ما اردد بان نجاح الاديب او الكاتب يكون بتبني قلم وتنميته وتقديمه الى الساحات والمجتمع الادبي وسيكون له الفضل بعد الله في هذا الامر . ':


اشكرك واشكر قلمك الرااائع


مع تحياتي

[الجبل]

الدانة الفاضلة
مساء الخير
أصالة عن نفسي ونيابة عن قلمي أشكر لك هذا الرد الجمييل
وعلى فكرة ترى قلمي يدعي أن جده كان قلم للجاحظ على شان كذا نافخ ريشته.
أما حب أمي لي فهو أسمى وأكبر من تعبيرات قلمي أسأل الله أن يرزقني برها .
قلمي يصيح ويقول ياجبل ترى دانة موفقتني الرأي بس قالت رأيها بلباقة وسياسة .
ويبقى متعاطون الككتابة الأدبية مدمنوا عطرسة وتكبر .
أنا: أقول قلمي انطم ..ولاتورطنا أكثر .
قلمي: ليش أورطك هو أبداء وجهة النظر الشخصية لقلم محايد تعتبر ورطة.
أنا: لاوالله بس أنا وش ورطني فيك ...وبقوة ألجمت فم قلمي بغطوته وكتمت أنفاسه .
=
ألف شكر لك دانة على ردك الطيب.
الجبل وقلمه.

[الوجيه]

[ALIGN=CENTER]

كلنا نتحاور مع القلم كل يوم

لكن هل انت تتضارب معه':[/ALIGN]

[ابوفهد]

أخي الغالي أبو محمد
السلام عليكم ورحمة الله وبركاته ...

حوار رائع لكم مع قلمكم الرايق جدااااً

الحمد لله أولاً على عودة قلمكم لامتاعنا بإبداعاتكم والتي فقدناها طويلاً أتمنى أن لا تبخل علينا انت وقلمكم من مثل هذه الحوارات .

معه حق قلمك لم يكن منصفاً في تخصيص درة النقد الأدبي حيث عليه أن يشمل بعض الدرر الأخرى إضافة إلى بعض الأعضاء ومع ذلك هناك أدباء متفاعلين مع من رد عليهم بشكل رائع بس تعال هنا .

قلمك الله يسلمه ينتقد الأدباء بأنهم إذا كتبوا لك رد بدون تحية ولا سلام ولا تحية ختام .

يعني ما شاء الله عليه هالقلم كتب لنا في بداية حواره هذا تحية الإسلام؟ وهل ختم حواره أيضاً بها؟

الله يحفظ لكم الوالده ويطيل بعمرها على الطاعة معها حق تخاف عليك من الحسد على تلك القصيدة وهذا الحوار أيضاً ماشاء الله عليك .

على كل حال قلمك معه حق في مشورته بأن تضع حواراتك هنا في الاستراحة .

لك خالص تحياتي ولا تحرمنا من مثل هذه الحوارات الرائعة

والسلام عليكم ورحمة الله وبركاته.

[الجبل]

بسم الله
السلام عليكم أيها الأحبة ورحمة الله وبركاته
مساكم الله بالخير
فتحت درج مكتبي وإذا بقلمي مكشخ وحاط رجل على رجل .
أنا: خير ياقلمي وراك مكشخ وشكلك مستانس .
قلمي: سلامتك يا الحبيب ...بس ترى يحق لك تفتخر بأن لك قلمي مثلي .
أنا: لا ياشيخ ...طيب ليش
قلمي:ماقريت اللي كاتبه عمو
أنا: من عمو ؟
قلمي: السيد الفاضل/ الظل..ماقريت رده الجميل اللي بيض الوجه ، يقول اني قلم رائع وأنه صار مدمن على ابداعاتي.
أنا: وأنت صدقت ان هذا المدح لك؟
قلمي: أجل لمين ؟
أنا: هذا لي .
قلمي:قم بس قم
أنا(وبغضب شديد) : أقول احترم نفسك وثمن كلامك لاو الله آخذك من تلابيبك وأرميك في الزبالة
قلميوهو يبكي) : دي آخرت عشرة عشرين سنة تقول لي ارميك في الزبالة
أنا: أية عشرين سنة ..هو حنا في مسلسل مصري مالك عندي إلا سنة وغاثني
قلمي: علشان كذا راميني في الدرج ماتاخذني معك ...حتى يوم رحت لقيصر ما أخذتني معك .
أنا: أقول انكتم واكتب لي رد شكر للأخ الفاضل / الظل ، والأخ الحبيب/ الوجيه ،والأخ العزيز/ أبو فهد
وأقول لهم أني راجع لهم .
وتحياتي للجميع