صباح مو بعيد عن البارحه ..
عشان كذا القومه للعمل صارت ثقيله .. اسحب نفسي على العمل .. اخلص لي شغلتين بالمكتب و اطلع اخلص اشغالي الخارجيه ابتداء بالمستشفى العسكري .. وانا احب اروح للمستشفى العسكري .. عشان حبيبي ناصر هناك.
هاتف ما يزيد النهار الا غم و نجاة الصغيره مضيعه الجو حقها وجايه تقول (انا بعشق البحر انا بعشق السما انا بعشق...) يااادي النهار المنيل بـ ...
يالله لك الحمد لقينا شي يفتح النفس شوي موقف قريب وبسرعه, اترجل من السياره متجه للمستشفى و فرصه اكحل عيوني بناصر ..
ناصر وما ادراكم ما ناصر .. هذا الله يطول عمركم على طاعته من يوم سوى الحادث وهو حاط دوبه و دوبي .. متفرغ للمعاند .. يمووووووت في النذاله لا شافني جابوه اول يوم ولا حصل لي اشوفه و سمعت انه مغمى عليه بس انه كان ماسك يد مدري مين وكان فيه طرف ابتسامه .. من ذاك اليوم لين صحى من الغيبوبه وانا كل ما حصل لي فرصه لو ثواني رحت مريته واحتلت على السكرتيه والامن و(الستاف) كله عشان ادخل العنايه المركزه اشوف هالابتسامه اللي سمعت عنها, ماشفت شي وكل مشاويري راحت على خالي بلاش لين بالاخير طفشو مني المستشفى وقررو يتخلصون مني وحطو ناصر بالعزل .. طبعا جلست كم يوم اجي ما اشوف الا رجوله و احس انه جالس يضحك بس لعانه عشاني ما اقدر اشوف وجهه طلع بعدها بفضل الله و استمريت قد ما اقدر ازوره .. واسمع اشاعات ولا اشوف شي .. بعد فتره من هالوضع بدأت الشكوك عندي انه جالس يعابطني و يستهبل علي ..
يقولون حرك يده اجي عنده ما يحرك شي .. يقولون ابتسم اجي عنده انواع التكشير .. يقولون يجاوب بعيونه ادخل عليه ما يناظر حتى فيني ..
عشان ما تصير الدعوه نصب .. هو بين فتره وفتره يعطيني نظره .. شوي حنيّه .. يذب واحد من عشره ابتسامه (0.1) يعني شي من هالقبيل ..
لكن الغالبيه مثل يوم ازوره ايام كاس اوربا .. وادخل واسلم واجلس واقوم و اغني و ارقص ابي احد يعطيني وجه .. و التلفزيون ماكل الجو علي .. جالس يتابع المباراه ويقزني بطرف عينه كأنه يقول (هذا بيركد والا قمت اتفاهم معاه)
مررررره وحده اللي سمعت شي وطلع صدق بعد عدة زيارات . . وفي اخر زياره قبل اسافر امريكا ضحك لي .. الواحد منكم اول وهله يقول المفروض اني افرح .. وين افرح وانا رايح لأمريكا .. وابتسم لي قبل اسافر بيوم او بنفس اليوم تقريبا !!
اكييييد الدعوه فيها شي .. اكييييد هالروحه ما بعدها رجعه .. الحاصل اني رجعت ولله الحمد .. وطلعت الضحكه لا تخفي خلفها اكثر مما امامها ..
نرجع لليوم .. كل مره ازوره في فترة الضحى . يا الاقيه نايم يا الاقيه نايم .. والمرات اللي ما الاقيه نايم يكون مكشر و انا جالس اقرق فوق راسه وكل شوي يتثاوب يحتريني اضف وجهي عشان ينام (يحتريني فيها مبالغه, من يوم اصد يمين والا يسار ما يصدق على الله ويحط راسه)..
طبعا السبب في التمارين الصباحيه والعلاج الطبيعي اللي يستمر لساعتين تهد حيل المتعافي ..
اليوم عاد غير .. اليوم بعد شهر من التردد عليه وانا اسمع انه يتكلم ولا سمعت شي منه .. اليوم تكلم معي ناصر (ابو عين هذا خاش عرض) قبل الظهر مريت عليه وجلست اسولف معاه في البدايه مارس معاي هوايته ولا كأن احد موجود .. بعدين صعبت عليه حالتي وعطاني وجه واتكلم معاه وه ويتفاعل ويرد بايمائات وبعض الكلمات .. واسأله من زاره فلان علان من شاف من المنتدى وقلت له اخبار بعض الشباب يوم وصلت لخبر زواج نايف تنح تتنيحه و وجهه كله علامات تعجب .. و جلست احلف له ساعه يالله باليالله صدق .. و رمى الشرشف وقام من السرير وراح للدريشه يبي ينتحر (مع انه المفروض ما يتحرك كثير الا بمساعدة احد).. - يابن الحلال تعوذ من ابليس .. هذي الدنيا .. لا حول ولاقوة الا بالله
- اقول لك فكني .. منتحر منتحر من غير شر .. كيف اعيش بدنيا بهالقسوه .. وش ذنب البنت المسكينه .. وش ذنب كلمة زواج عشان يصير فيها كذا
- يا ناصر قدر الله وما شاء فعل .. من يرد قضاء الله الولد ما كان يقصد..
- اقول لك فكني احسن لك ..
المهم يالله باليالله رجعناه للسرير .. اووووووووو انا طلعت من عنده مبسوط وحسيت الدنيا احلى ..
ناصر للي ما قابله .. في حضوره هيبه كثر ما في حضوره بهجه
ناصر للي ما قابله .. ساحر! تشعر بحضوره قبل ما يجي و بعد ما يمشي بفتره
ناصر للي ما قابله .. يترك فيك اثر عميق كل مره تقابله .. الاثر يخليك تمشي مبتسم
ناصر للي ما قابله .. يبتسم في الغالب نص ابتسامه بطرف شفته بس, هالابتسامه مليانه ثقه تخلي كل واحد يشوفه يحس انه هو اللي يحتاج زياره و مواساه..
تحياتي و حبي لناصر .. اللي رجع الالوان ليومي ..
الاثنين
6\9\2004
ننتظر طقطقت معانا في المنتدى قريبا ..