بسم الله الرحمن الرحيموالصلاة والسلام على خير خاتم الأنبياء والمرسلين
السلام عليكم ورحمة الله وبركاته
أخواني أعضاء منتدانا الغالي
أعذروني جميعا على إختفائي وعدم تواجدي في المنتدى للفترة الماضية ولكني في موضوعي هذا راح أبين لكم الكثير والكثير
هذا مو مبرر لغيابي عن المنتديات لكن الواحد يحاول يعمل باللي يقدر عليه وربي يعييني على أن أوفي حقي في كل عمل أعملو وأحاول ما أقصر فيه
أول شي كلكم سمعتو عن الأضرار اللي حصلت في جده من أثر السيول والناس اللي تضررو فيها وعاشوو فيها فترة ومآساة لا يعلم بها إلا الله
ثاني شي ربنا أكرم بلدنا هذا وخاصة مدينة جده بشباب وبنات بجد أثبتوو روح الأخوه والمواساة لجميع أفراد أهالي جده ومن المواقف اللي تذكر ويفتخر بيها مساعدة أهالي المناطق المجاورة لنا وقيام جمعيات من خارج جده ومساعدتنا مثل جمعيات الشرقية والطائف وغيرهم ربي يوفقهم ويجزاهم خير
نزلت موضوع قبل فترة في كذا منتدى عن حملة إنقاذ جده وعملنا فيها وكنت الحمدلله ولله الفضل والمنه من العاملين في العمل التطوعي وعملت في شتى أعمالها من العمل داخل معرض الحارثي وإعداد المعونات للمحتاجين و عملت في الميداني وتوصيل الإحتياجات للمتضررين و إدخال لبينات المتضررين والمتطوعين ومن ثم إلى الآن في الكول سنتر .
في بداية الأمر كان موضوع العمل التطوعي ضد رغبة الكثير من الناس وحاول البعض تشويه صورة العمل التطوعي وإدخال الجانب الديني حيث الإختلاط والبحث عن مبررات لإيقاف أعضاء هذا الفريق من العمل الجماعي أو مساعدة الغير.
ولكن ولله الحمدلله كان أهل الخير والصلاح يشوفو وضع المتطوعين والمتطوعات مو وضع خلوه ولا ناس جو للتسلية بالعكس الحمدلله إنهى العمل بوصول 200 ألف كرتون معونات للمحتاجين وحتى الهيئة أنكرت تصديها ووقوفها في وجه العمل الخير والتطوعي ونصحت الشباب والبنات بالعمل فيها والعمل على مساعدة الخير
الأن في الوقت الحاضر وبعد الإنتهاء من العمل التطوعي الحمدلله إنتقلت لمرحة أخرى أو أسميها تجربة أخرى في حياتي
أعمل الآن مع لجنه خاصة تابعة للغرفة التجارية ومتعاونة مع الجمعيات الخيرية ووظيفتنا أصبحت تلقي مكالمات المحتاجين والمتضررين من السيول أو المتبرعين من أهل الخير
قبل ان يكون عمل هوا واجب علينا وعمل خيري نأمل وجه الله به إن شاء الله ولم أكتب الموضوع هذا لأشرح عملي إنما عندي هدف أتمنى أن أوصله بطريقة صحيحه ومفهومة
يا جماعة الخير يا أمة محمد صلى الله عليه وسلم يا من تفرحو وتضحكو
كل يوم نبكي وتدمع أعيننا وكل يوم نسمع قصص والله لوو إنكتبت في الجدران لبكت الجدران منها
أبغى أحكي لكم كم قصة من بعض اليأس والمعاناة التي يعانيها بعض من أخواننا في مدينة جدة ومنطقة بحرة وأتمنى أن أوصلها لكم لتعتبرو وتحسو بالنعمة اللي إنتو فيها
1-تم إنقاذ بنت في 18 من عمرها ومات 9 من أفراد أسرتها وما بقي غيرها أفراد الدفاع المدني أرسلوها لشقة مفروشة وأعطوها بعض المعونات وبعد يومين لقينها شنقت نفسها وميته.
2-إتصلت حرمة تشكي حالها وتطلب فقط بطانيات وبعض الأغذية وتقول الحمدلله حالنا مستور بس هذا اللي نحتاجه . ويوم يوصلو أخواننا من الجمعية الخيرية للبيت الرجال رجع يبكي على حالهم ويقول ياناس البيت فاضي والبطانيات أخذوها علشان يقدرو ينامو على الأرض ويتغطو بيها سبحان الله على عزة النفس .
3-شخص من عمري تقريبا توفى والده قبل شهر من السيل وتخيلو في السيل يتمسك بشجرة واللي ماسكين على كتفو أختو وأمو وأخواتو الإثنين يشوفهم والسيل يسحبهم تخيلوو كيف حالتو اللحين.
4-جانا إتصال من شخص يحتاج المعونه لما توصلنا له في منطقة بعييده في جده لقينا بيته عبارة عن مدخل واحد مؤدي إلا 4 غرف والفاصل بينها جدار خفيييف والساكنين فيها كل واحد بزوجته وأنباءه العدد الكل في الغرف كان 13 نفر سبحان الله وإحنا كل واحد يبغى غرفة خاصة بيه .
وغيرها الكثير من القصص والعائلات اللي لحد الآن بتعاني وربنا يقدرنا إننا نوصل لهم ونساعدهم.
صحيح قصص وآلام وبجد تلاقينا في حالة يرثى لها بسبب اللي بنشوفو ولا نسمعو لكن أحلى شي في الدنيا لما تسمع كلمتين من أي متصل يقولك الله يسعدك ولا الله يوفقك ولا الله يخلي لك شبابك والله الدعوات دي الناس تشتريها بذهب يوم من الأيام
بعد هذه القصص والمعاناه نجي للقصص اللي تقهر وتخلي الواحد بجد يتضايق أكثر
لما يتصل عليك واحد شغال في وظيفة حكومية وما شاء الله ربنا منعم عليه وراتبه 7 آلاف والدفاع المدني معطيه شقه مفروشه ومعطيه معونه ماليه تصرف له كل شهر يقوم هوا يرجع لبيته ويقولك أبغى مساعده ولما نشوف وضعه هذا ونقوله إحنا نحاول نساعد الأحوج منك يجي الرد إنتو حراميه ولا أنا أبي زي الشعب .
والله شي يقهر لما يجي الجشع في الناس والخوف من الله ينشال من قلوبهم
ولا واحد يشتكي أخوه يقول إنو أخوه أخذ معونته وهوا ما عندو معونه وما يقدر يسوي شي مع أخوه باللهي إيش تقولو على أخوه ؟؟
ولا واحد يتصل يقول أنا متضرر ويكون بيته مافيه شي بس علشان ياخذ معونات ولا يصرف له من المعيشة الخاصة من الدولة والكل ماسك كلمة زيي زي الخلق إشمعنا فلان والحكومة بتدفع وما باخذ من جيبك
باللهي دا المال ولا اللي بيسووه مو حرام ؟
أتمنى أن أوصل كلمتي لكل واحد أخذ مال ولا أخذ معونه بغير حق أو غير حاجة ترى ربي بيسألك عنها يوم القيامة أخوك أحوج بيها منك وإنتا في نعمة فأشكر الله ومن ترك شي لله عوضه الله بأحسن منه
والمعونات والأموال اللي بنوصلها والله إنها من أهل الخير وتبرعات من ناس يبغو فيها وجه الله وكثير منهم يأمنونا يبغو فلوسهم تصل لمستحقيقها مو لناس تبغى تاخذ زي ما ياخذ الشعب .
وياليت تساعدونا لإنو مو كل متضرر يوصل ولا يعرف إنو فيه معونات أو ناس تحاول تساعدهم .
أو تدلوهم على الطريقة الصحيحة وهيا التوجه للدفاع المدني وتسجيل بياناتهم وبعدها الإتصال على الرقم المجاني الخاص بمساعدة المتضررين من سيول جده .
عااارف إني طولت في الكتابة بس ياليت تدعولي وفي نفس الوقت تدعو لكل المتضررين وتحاولو تساعدوهم ولو بالنية
رد مع اقتباس
المشاركة الأصلية كتبت بواسطة الكونكورد
