عاجل وهام: هو ( .......... ) حرام؟؟؟
شىء محير بالنسبة لناس كتير أوى بيتمثل فى مراحل انتقالية عجيبة القاع وغريبة الأرضية والأسقف
على سبيل المثال..
انت لو بصيت لفئة من الناس ملتزمة بالفرائض من الالف للياء ( قدر طاقتها طبعا )
وفى النوافل مابيمنعهمش إلا الشديد القوى
تعرف؟
النوع ده من الناس بتلاقيه ممكن يقعد مكتئب يوم كامل ولما تسأله السبب ايه يقوللك أصلى ماصليتش الفجر انهارده
ويمكن يكون السبب كمان انه ماصلاش قيام الليل فيفضل مكتئب طول اليوم علشان ده
تعالى بقى
ونربط ده مع بعض بحاجة مهمة أوى أصّلها فينا رب العزة
ربنا حط ف كل إنسان فينا خاصية التعود والتأقلم مع أى شىء بيواظب عليه
فتلاقيها على المستوى الخلقى حتى لو مثلا انت كإنسان صحيح وعندك القدرة على الإبصار
لما تيجى تتخيل مثلا انك فى لحظة ممكن تفقد بصرك..تقول يا خبر!!
معقول انا اعيش من غير بصر
دانا لما النور بيقطع 5 دقايق ببقى زى المسطول وبمشى اتخبط هنا وهنا
فمابالك لو فقدت عينى
لا ياعم داصعب جدا اللهم احفظنا
لكن لو دارت الأيام ولاقدر الله ربنا ابتلاك بالعمى
ممكن اول يوم تانى يوم او اسبوع او شهر يلاقى العملية فعلا عذاب او فيها شىء من الوعورة فيبكى حاله
لكن مع مرور فترة قصيرة بتبدأ تدخل فى دايرة التأقلم وتتعود ويبقى بالنسبة لك البيت كله محفوظ مكان كل قطعة فيه
لما نحب نربط المثال ده ( ولله المثل الاعلى ) بحالة الشخص اللى متنكد عشان بس ساب قيام الليل ليلة واحدة تلاقيه لو ساب نفسه من غير مايؤدى قيام الليل كمان 5 ليالى تلاقيه شيئا فشيئا بقى عنده شىء بديهى جدا وعادى جدا انه مايصليهوش ، وكمان يمكن تتحول لغته لإنه يقوللك جرى ايه ؟!!
هو انا مزعل نفسى ليه
دى نافلة !
(طبعا هو كلامه منطقى جدا دلوقتى لكن إن دل يدل على حاجة مهمة جدا)
بعد فترة .. يبدأ ذوبان الطبقة التالية لقيام الليل ألا وهى
مابعد الصلوات الخمس من النوافل او ماقبلها
تتكرر المناجاة لنفسه لما يقول نفس العبارة فيقول : هو اللى هنقوله هنعيده ؟!! دى نواااااااااافل
طيب
مع الوقت بدأ يشغل نفسه وينغمس فى أى شىء أيا كان وبدل ماكان بيصلى فى المسجد يصلى فى البيت
البديهى طبعا إنه يروح يدور على اختلافات الفقهاء فى هل صلاتى فى المسجد فريضة ولا نافلة .. وإذا كانت فريضة تبقى فرض كفاية ولا فرض عين؟؟؟؟ بغض النظر عن نفسيته لما وصل لهذه الحالة ماهو اتعود خلاص
شوية وصلاة الفجر تشبك فى قيام الليل وينقطع عنها هى كمان ويقوللك بصراحة يعنى: أصل انا سهران طول الليل فى القراءة والتفكر وبعدين بروح عن نفسى بأى شىء سواء كان القعاد على النت أو غيره
وياعينى قبل الفجر بساعة يركبه العناء والتعب من المجهود اللى كان بيبذله طول الليل من قراءة وغيره فينام
مفكرش يقيس قدراته هل هو من النوع اللى بيقدر يسهر للفجر ولا لأ( ده لو كان ماقاسهوش فعلا )
قيس على كده بقى البنت اللى بدأتها بشوية مكياج مع الحجاب وبعدين الخروج مع أى مجموعة من الشباب على كوبرى قصر النيل وبعدين بعد التشويه وتقبيح صورة الحجاب قدام كل من هب ودب ييجى خلع الحجاب أو ..أو....إلخ
عشان كده مايبقاش عجيب ولا غريب انهم يتدرجوا عندنا فى وسائل الإعلام وغيره انه تبدأ تدريجيا الأمور لحد مانوصل فى القرن الحادى والعشرين للجدال فى هل الحجاب فرض ولا لأ؟!!!!!!
تفتكروا هنوصل للجدال فى هل الصلوات الخمس مفروضة ام لا؟؟؟؟
وهنا محور الكلام كله ومربط الفرس بالنسبة لنا
التعود والإيلاف للشىء
كل شىء فرضه ربنا عليك كمسلم بتحوطه مجموعة من العادات اللى ممكن انت تستهون بكونها نافلة إلا انها بتكون بمثابة السياج اللى بيحوط ويحمى الفرائض علشان لما ييجى الشياطين ( شياطين الإنس والجن طبعا ) ويضربوا ،، يضربوا السياج ده فيلاقوك متمسك بيه وبتستخدمه بحكمة فيصعب عليه اختراقه
السياج ده زى ماتفقنا اللى هو النوافل اللى طالما حافظت عليها صعب على هؤلاء الأعداء أن يصلوا إلى الفرائض
وإن غاب السياج سهل عليهم تدمير الفرائض ولو دمروا الفرائض وجعلوك مقصر فيها ،، اخترقوا القلب وبدؤا فى العبث فى العقيدة مهما أوتيت من علم
سيصبح علمك بمثابة الخط الأسود الذى خط به صاحبه فى صفحة سوداء فلم تعى منها أى شىء طالما لم تعمل بما علمت
أسأل الله لنا ولكم التوفيق والسداد وكل خير
