( وتعددت الأسباب .. والبياخه واحده )
هالموضوع موب عن الأشياء البايخه
ذا عن الأشياء اللي تجيب الإحباط للواحد
فيه كذا موقف ذكرتها بالموضوع صارت لي .. أو تصير لي دايم
وفيه أشياء من مخي مطلعها <-- بلا من فضاوته خخخخخ
المهم أخليكم مع الإحباطات والأشياء اللي تجيب الإحباط
بسم الله
إنك تقول لواحد نكته تموت من الضحك وإذا خلصت يقولك : وبعدين ؟؟
إنك تصاقط بسيارتك وتعدي كل السيارات وإذا وقفت عند الإشارة يوقف جنبك اللي صقطت عليه بأول الشارع (( كنك يابو زيد ماغزيت ))
إنك تذاكر تذاكر تذاكر وتروح للجامعة ويقولك الدكتور الاختبار تأجل
إنك (( تلعوز )) عشان تشب النار لأهلك بالبر وهمن يجيك الشايب ويقولك وشوله مولعه أها بس طف الضوٌ
إنك تروح للناصرية تشيٌك على مخالفاتك .. وتلقى عندك مخالفة عدم تشغيل أنوار ضباب في مدينة الرياض
إنك جازم تبي تشتري شي من هارفي نيكلز .. وإذا جيت تدخل يقولك عوايل
إنك تسوق بورش ويقوم عليك راعي سيكل
إنك تصير بالشارع وقت الصلاة ومامعك إلا ريال واحد ومشتهي ببسي والبقالات مسكره وتدخل ريالك بآلة ببسي ويطلع لك ببسي باااااااااارد وتستانس .. وإذا فتحته تلقاه مثـلــٌج
إنك تشوف غرض بمحل وودك تشتريه بس إنه غالي وتقعد سنه تجمع له وخلال هالسنه تقول لواحد رح شف الغرض الفلاني جايز لي .. وهمن يروح ويلقاه آخر حبه ويشتريه والقهر أنه يقولك .. وتقعد أنت تقشر بصل
إنك تشوف شريط أغاني قدامك وين ماتروحتلقاه جوا المسجل ويغثك وتجدعه بالشنطه ويبنشر عليك كفر وتفتح الشنطه وتلقاه بوجهك وتجدعه بالمرتبة اللي قدام وناشب لك وين ماتروح تلقاه .. وهمن يجيك مره ودك تسمع أغنيه بهالشريط وماتلقى الشريط
إنك تناظر مباراة مع واحد مايدري وين الكوره معه .. منهو ذا ؟؟ كم عمره ؟؟ وش أسم خالته ؟؟
إنك تناظر مباراة ثانيه مع صديقنا اللي تو .. ويشوف لاعب اسمه ميلوزوفيتش ويقولك ذا برازيلي ولا أرجنتيني؟؟
إنك تناظر مباراة ثالثه مع نفس صديقنا .. ويقولك كم النتيجه وتقوله 1\1 ويقولك لمين
إنك تصير مطفر وبنزين السيارة بيخلص وتبي تسحب فلوس عشان تعبي بنزين وتوقف عند صراف وتطفي المسجل (( عشان تركز )) وتفك الحزام (( عشان تطلع البوك من مخباتك )) وتطفي السيارة (( عشان مايقضي البنزين )) وتطلع البطاقة وتدخلها بالآلة وهمن تناظر الشاشة ولا فيه عبارة كبر جبهتك (( نأسف لهذا العطل الطارىء ))
إنك تواعد واحد عشان تمرٌه .. وإذا وقفت عند باب بيتهم ودقيت عليه يقولك أنا منب في البيت .. تقوله هماك مواعدن ؟ يقولك : وإذا كنت مواعدك
إنك تدخل الملحق والأسلاك مفصولة وتقعد ساعة تحبرش بهن عشان يضبطن وإذا ضبطتهن وشبكت البلاي ستيشن (( بلايواي ستيتيون )) وجو العيال تلقى شريط الدوري الياباني خربان
إنك تلبس سبعين فنيله (( أعرف أقول بلوزه )) وثلاثين شرٌاب وسبع سراويل وتلبس كنادر (( أعرف أقول جزمه )) وتشيل الفروه معك .. وإذا طلعت لقيتها حر
سمـاوي
إنك تدخل الملحق وتفصخ ثوبك وتعلقه وتنسدح وتغطا (( وجه ميٌت من البرد
إنك تسوي نفس اللي تو .. وإذا جيت تدوٌر الريموتات تلقاهن بـآخر الملحق
إنك تناظر مباراة رابعة مع نفس صديقنا .. بين البرتغال واليونان .. يقولك بأي بطوله .. تقوله المباراة النهائية لبطولة أوروبا .. يقولك أفا يعني ميلان طلع بالحالة ذي يجوز لك تطرده برا الملحق وماعاد يعتـٌب بيتكم ألا برمضان
إنك تلعب بلوت مع واحد بارد
إنك تلعب بلوت ضد واحد المشروع عنده بريال
إنك تستقبل ناس من برا الرياض وتستلم فيهم دوران بكل مكان في الرياض وتعشيهم بأطلق مطعم (( هرفي )) خخخخخخخخ وإذا جيت تنزلهم للشقة تقولهم هاه عساكم أستانستوا .. يقولون لك : عادي
إنك تكلف على عمرك وتشتري هديه لواحد (( عطر مثلا )) وتهديه له .. يقولك تصدق إني شاري زيٌه الأسبوع اللي راح
إنك تصير دايخ وبعز الصيف وتنسدح على الفراش وتمسك ريموت المكيف وتلقى المكيٌف خربان
إنك تشتري شريط أغاني (( عود وأغاني هاديه )) عشانك تبي تمسك خط .. وإذا مسكت الخط وشغلته لقيته شريط طقاقات خخخخخخ
إنك تطلب بيق ماك ميل من ماكدونالدز وتنشب للفلبيني .. ويذ آوت بيكلز ويذ آوت أونيون .. وإذا تكيٌت بالملحق وقرطت أول قرطه .. ولاها بيكلزتن كبر خشم الفلبيني
إنك تنشب لـ نفس الفلبيني المذكور سابقا .. كثـــٌر الكتشب ومابي مايونيز .. وإذا فتحت الكيس لقيت مافيه ولا كتشبه <-- المفرد من كتشب خخخخ ولقيته مليان مايونيز
إنك تصير بعز النوم .. ويدخل عليك البابا يوحنا بولس الثاني خخخخخخخ
يدخل عليك الوالد .. ويقومك من النوم وإذا فتحت عيونك يقولك متى تبينا نقومك !!
إنك تشوف خبر عن تفجير بقناة الجزيرة .. بعدين يدخل عليك أخوك يقولك أول مره أشوف واحد يناظر نشرة أخبار قبل 6 شهور لا ومتحمس
إنك تقول للشايب بروح للمكان الفلاني أول وبعدين بروح للمحل الثاني يقولك لا رح للثاني قبل .. وإذا جلست تقنعه وحجرت له .. يقولك إيه أنت صح بس سوٌ اللي أقولك عليه
الزبده : شاركونا بـ أحباطاتكم
سامحونا أذا فيه أخطاء ولا شيمنقووول
