مساء الأنوار

تحياتي للجميع ..

تررد كثيرا قبل طرح هذا الموضوع ..

و لكن قال الله سبحانه و تعالى (( و جعلنا لكل شيء سببا ))

يعيش الإنسان غافلا في هذه الحياة إلى أن يأتي موقف أو لحظة

تجعله يستفيق مما هو فيه ..

و من أحبه الله أرسل إليه بعض الدلائل و العلامات لتكون سببا في

في رجوعه إلى الله سبحانه و تعالى بعد ابتعاده و لو لفترة بسيطة

هذه قصة حدثت لي من فترة قريبة جدا سأحكيها لكم:

في يوم من الايام و انا قاعده اتفرج على فيلم اجنبي انا و مجموعة من

بنات خالاتي .. الا و فجأة حسيت بألم غريب و اختناق كان اكبر من إني

اتحمله .. ما أعرف ليش جاني شعور إني قاعده أموت ,, فقمت بسرعه

ما بدي أموت و أنا قاعده أتفرج على فيلم .. قمت من الغرفه بسرعه

كبيرة من دون ما يلاحظ أحد أي شيء .. و أول ما طلعت من الغرفة

لقيت ماما قدامي قلتلها ماما سامحيني ترىو الله ما أقصد لا حظت

ستي ارتباك انفاسي و سرعة دقات قلبي .. فاخدتني لغرفتها ..

و جابتلي موية عشان أشرب بس ما كنت قادرة ابلع المويه .. و سارت

دموع تنزل من عيني من دون أي صوت و لا أني قادرة أتكلم بأي شيء

سألتني ستي ازا كنت صليت العشا .. فحركت راسي و قلتلها ايوة

صليت .. ستي مرة خوفتني و قالت لي اتشهدي قولي أشهد أن لا

اله الا الله .. بس ما كنت قادرة أو بالأصح كنت مرة خايفه لاقولها

و بعدين اموت على طول .. دموع تنزل اكتر و اكتر و من دون ما اقدر

اني انطق بحرف او اني اتحرك .. و كانت ستي الله يطول في عمرها

ضامتني لصدرها بكل قوتها .. و حاسة بدموعها .. و سارت تردد

(( يا ايتها النفس المطمئنة ارجعي الى ربك راضية مرضية ))

هزتني الاية .. يا ربي في اشياء كتير مرة ما سويتها .. كيف اقابلك

يا ربي بكل ذنوبي ... استسلمت للواقع و اني خلاص حموت ..

اتشهدت و هدات نفسي و سكت ..

و طبعا كانت حالة استنفار شديدة في البيت كلهم يقولوا

اسراء حتموت .. و رفيف ===>اختي

فرحت طبعا ح تاخد غرفتي

احمد قال الحمد لله دحين محد يغير القناة و احنا قاعدين نتفرج على

سبيس تون

المهم بالصدفه كان خالي دوبه جي من بره سمع بالخبر و جا بسرعه

يدور عليا و على فكرة خالي دا اقرب خيلاني ليا .. جا و شالني

و ركبني في السيارة ووداني على اقرب مستشفى ..

ما طلع فيا شيء الحمد لله قعدت هناك 6 ساعات و طلعت على طول

لكن في كم شيء

1_ شعور الواحد انو ح يموت شعور مخيف جدا و يحمل من الرهبة

الشيء الكثير ..

2_ شعور انك ح تقابل ربك ... أمر أكبر من أنه يتوصف..

3_ شعور أنك ح تفارق اهلك صعب جدا

و الاهم مندا كله و انا في داك الوقت كان كل همي انو بابا اداني غرض

اخبيله هو لو مت مين ح يقله فينه !!!!!!!!!!!!!!!!

حسيت وقتها انو قد ايش ستي تحبني ..

قد ايش خالي ما فكر غير انو كيف يوديني لاقرب مستشفى ..

الحمد لله يا ربي اني ما مت عشان كان في اشياء كتير لازم اسويها

اعتقد انو مرة حتفرق كتير لو مت داك الوقت او لو مت دحين

بس الحمد لله على كل حال و ارجع و اقول زي دايما اللهم احسن

خواتمنا و اجعلها على التوبة و الشهادة ,,,



تحياتي

اختكم

الأسطورة

(( و على فكرة يعني الواحد مو ضامن عمره ازا مت في اي وقت السنة

دي او بعد مية سنة ترى و الله مرة احبكم كلكم ))