السلام عليكم
الظاهر إنو الموضوع هذا يعتبر الجزء الثاني من سلسلة الفضايح اللي ابتدأتها بدجاجاتي الخمسة ... واللي صرت فيه شبيهة القرد على لسان أنكل
بس هذاك الموضوع كان بروح دعابة .. وأنا الحين .. ما فيني حيل أمزح .. بل جاية أحط حمولتي .. وأبغا أفضفض .. وبس
حتى راح أتكلم شوي عربي على شوي عامي .. واللي يجي معاي .. ولو شفتو سبة كذا ولا كذا مشوا حالكم .. ولا تستغربوا من الفضايح ..
أخوي الكبير عمره 34 سنة ... زوج وأب لثلاثة أبناء
من أكثر من رأيت فضلًا وعقلًا ..
رجل فكر .. وعلم .. ورجل أعمال ..
أقرب أخواني لي وأحبهم إلى قلبي .. يغرقني برعايته واهتمامه وحسن توجيهه .
وأنا أثق بهذا الأخ كثيرًا وأحبببببببه .
وكذا هو عند والدي ووالدتي .. الأكبر .. والأفضل .. والأحب .....وفي عائلتنا أجمع معلوم قدره وسلطانه .
المهم ..
أخونا في الله هذا جانا في رمضان .. وعرض علينا رغبته في .. زوجة ثانية |210|
أمي بربرت ..وسوت حكاية .. وقالت له روح مالي شغل .. والله ما أسعالك في زواجة ولا راح أستقبلها في بيتي .. وحااااااااااالة
أختي نفس المعارضة وبضراوة أشد ..
جاني يبغاني أخطبله .. وقعد ينص علي الشروط اللي يبغاها .. |210|
قلت له .. والله شوف يا سيدي .. تبغا تتزوج وتتهبب .. كيفك .. شي راجعلك .. وانت عارف رأيي بس إنت حر .. وإنت تتفاهم مع زوجتك ..
لكن أسعالك في زواجة هذي صعبة .. معليش ما أقدر ,أنا رافضة الموضوع أصلا ..وكمان موقفي صعب والله قدام زوجتك وأنا علاقتي بها طيبة وماودي أخسرها .. ولاحظ إنها بنت خالتي .. يعني مو بس زوجتك وخلاص وإنت تعرف خالة إيش ممكن تكون ردة فعلها ..
ورجاء خاص .. رجاء لو خطبت من جد لا تطلب مني أروح معاك فرح ولا ملكة . >>أعطيته حلقه بس هه على مييييييين .
قفلت في وجهه مننا .. أتفاهم مع زوجته .. وبعد الصياح والنياح رضيت على مضض .. (ملاحظة زوجته من النساء العاقلات جدًا .. لكن برضو السماء غييييييم|315| )
جانا قبل شهر وقال لي .. إنو زوجته .. خطبتله صحبتها !! << ما عملت كذا إلا من باب وقوع البلى ولا انتظاره .. خاصة إنو زوجها زنان بشكل الله وكيلكم
وجا يسألني رأيي عنها .. وقلت له ماتناسبك أبدًا .. عشان وعشان وقلت له أسبابي .
لكن سبحان الله .. لما ربي يريد شي محد يقدر يمنعه .. أخونا انشرح صدره لها .. وعجبته رغم المعارضة على الفكرة وعلى الإنسانة ..
بعد ما عزم أمره أنا امتنعت أقول رأي أو أتصرف أي تصرف .. سحبت يدي تماما من كل شي ..
لكن هذا الأخ مو راضي يسيبني في حالي .. شوي يبغا يتكلم .. وشوي يبغاني أوقف جنبه .. وشوي يبغاني أقابلها ( قلت له طيييييييييير )
لأول مرة أشوف أخوي متعب بهذا الشكل ومتأزم .
حقيقة أنا أخوي أهم شي عندي .. فكرته عجبتني ما عجبتني .. بس برضو أخوي ..
يوم الخميس كانت الملكة .. رفضنا كلنا نروح معاه .
جا يترجى .. ويعطينا علل وأسباب وانتقادات .. وهذا الأخ هرجه كثيييير يعني لو تخليه يتكلم لبكرا ما يسكت . بس من جد أول مرة يطلب مننا شيء بهذا الرجاء وهذا الألم . << ما نفع معه رجاي السابق زي ما توقعت
أمي شردت على مكة عشان يشيلها من باله . وطبعا خالاتي لا وكل العيلة لا
بقيت أختي الكبيرة وأنا والصغيرة .
أختي الكبيرة رفضت برضو .. وأنا رضيت على مضض ((هذا أخوي الكبير ياجماعة والله ما أقدر أزعله وأكسر خاطره )) وأختي الصغيرة مو على كيفها يعنيراح أجرها غصبن عليها , لكن مالنا داعي ونحن صغار ومن غير أختي الكبيرة .
أول مرة أشوف عريس زعلان ومتضايق ..وأول مرة أشوف عريس ما ينقال له مبروك !.. لآخر لحظة تجيله رسايل واتصالات الاعتراض والسخط من العائلة الكريمة .. !!
إي نعم أنا رافضة .. لكن ياجماعة هذا شي راجعله وراجع لزوجته .. هو متفاهم مع زوجته نحن إيش لقفنا ؟
عالم غاوية نكد بس .. مافي مراعاة لنفسيته .. ولا للظروف . أكره حاجة في حياتي اللقافة ..
عندنا عالم منظِّرة بس ..
اللي يقهر إنو عندنا واحد متزوج .. ومتصرمح .. ومو داري عن بيته وأفشل نموذج زوج شفته في حياتي .. وأهله قمة المعاناة .. ومحد فتح معاه فمه بكلمة .. كل اللي يقدرو يقوله (بكرة ربنا يهديه ) وبصوت واطي كمان .. عشان لا يجرحوا مشاعره !!!!
لكن هذا اللي جا يسوي الحلال(معليش حلال .. أبغض الحلال على النساء لكن حلال !!!) الكل وقف ضده .. والكل عمل هرجة .. وصار كل واحد فاهم ويعرف يتكلم ويرعف إيش اللي يصير وإيش اللي ما يصير !!
لا وكمان حتى أمي ما انفكت من الاتصالات
الأسبوع الماضي ( والظاهر الجاي ) كان بيتنا موقع قناة الجزيرة .. اللي يتصل ويقول (إيش آخر الأخبار وإيش صار معاكم .. ) واللي يقول لأمي ليش ما دخلتي الرضا والغضب !
واللي يلوم أمي كأنها هي اللي زوّجته .. واللي يسب أخوي (والله لو سب أحد أخوي قدامي لا أوريه شغله! )
مادري لمتى راح نقعد على دا الحال
ونظرًا لتفاقم الأوضاع .. وسوء الأعصاب عند الجميع .. أنا صرت البنت المسالمة .. ما أحاول أبدي إزعاجي ولا أي ردود فعلي .. منضبة في غرفتي طول الوقت وساكتة .. وأسمع الهواش من بعيد ..
يوم الملكة الكل يحط حرته فيني ..أتصل على أخوي يقفل في وجهي ..
أتصل على أختي تقفل في وجهي ..
أخوي أبو محمود يبربر لي .. مادري ليش ..
أمي برضو تقفل في وجهي ..
الكل متولع .. الحمد لله بس إنو أبوي نام وقتها ولا كان ما قصّر معاي..
والله أخذوني ملطشة ..
خربوا لي إجازتي
عندي شغل كثير هذا الويك إند .. والله ما سويت شي .. حسبي الله على إبليس برنامجي كله انخرب .. واجبات وتكاليف بالكوم عندي وما سويت شي ..
والله شغلة عالم تتزوج وعالم تبتلش ..
نفسي أسب وأشتم قلت مالي غير الدرر أحط فيها حرتي
وجع في الشيطان .. قرادة على الزواج وسيرة الزواج ..
أخوي دحين أوضاعه أحسن شوي .. يستعد للمعركة مع العائلة ..
وأنا والله خايفة على زوجته .. وخايفة منها ..
هو ماأعرف إيش مفهِّم العروسة عني .. أشوفها آخذة وجه علي وترسل لي رسايل .. وتتصل علي .. والله لو زوجته عرفت راح تكرهني كره العمى ..
كل يوم أصحى فيه أقول الله يجيب العواقب سليمة ..
أمي كل عين رايحة زي الليمون .. شوي تبكي على ولدها وعلىالمشاكل اللي فوق راسه .. شوي تبكي على زوجته .. شوي تبكي محتارة توقف مع مين ... شوي تبكي من كثر التعب .. وكثرة المعارضة .. ( أمي مرة حنونة وحكيمة .. مهما رفضت ما تحاول تستخدم الضغط مع أولادها.. وما تحاول تنكد على حاجة قيدها خلاص صايرة صايرة )
بس من جد من جد .. أعصابنا فاااااااالتة عالآخر ..
ودماغي متبرجل .. ماني قادرة أركز حسبي الله على اليهود .. اليوم غبت عن الجامعة ..
مادري متى نخلص من دا الموضوع .. والله طفشت منه
أحد بالله يشد من أزري .. ويوجهني بدل ماني متشتتة ..
كيف أتصرف مع أخوي
إيش أعمل مع زوجة أخوي
ومع الجديدة اللي آخذة وجه علي (على فكرة أنا الإنسانة كاسرة خاطري .. مو ذنبها إنها وافقت على واحد متزوج عشان تصير عروسة شؤم ! ما جاتنا عشان تصير ملطشة !)
وإيش الموقف اللي لازم أتخذه .. مع عيلتي .. وكيف أوقف جنب أمي التعبانة ..وبإيش أشور عليها
مع ملاحظة إنو المشاكل مازالت في ازدياد .. وإنو زوجته ما تدري لسه إنو هو خلاص أملك !
فضايح .. أدري
وأدري إني طفشتكم ..
بس معليش تحملوني
بحــارة