][ قلبـــك ابيــض يا عبد الكريم ....][!!!

[*amula_beauty*]

[align=center]

اليوم يوم الخميس << انا من الناس اللي تكتب يومياتها

قررنا انا والاهل نروح للحرم نصلي العشاء ^_^

رحنا وصلينا والحمدلله

وبعد ماخرجنا من الصلاه ....

اصريت انو نجلس بالساحه ...


صرت اقول لأخويا الله يخليك خلينا شويتين كمان ... نبغى نشووف العالم

ووافق على مضض

وقال يلا نشوف آخرتها معاكم

جلسنا ... وما احلاها من جلسه

متخيلين انوار الحرم .... وكان الجو يجنن ... نسمة هوا بااارده

والناس رايحين جايين




اللي يقرأ قرآن .. واللي يآكل ... واللي مبتلش بولدوو ... واللي يجري ورا بنتو

والاطفال يجروا هنا وهناك ... وتفحيييييييط يا معلم



وولد عمتي الصغير يخرب على الناس اللي يتصوروا ... كل ما وقفوا بيآخدوا لقطه ..

وهوا يجررررررررري من قدامهم مسوي نفسوو طياره


وهما يطالعووو عليه بحقد

وبينما انا غارقه في التأمل


واذا بي اسمع اصوات وناااس تجرررررري

اطالع ؟؟؟ واطالع ...؟؟؟ يا ساتر ايش فيه


والا اشوووفلك الحريم اللي كانو باسطين

كل وحده شايله قشها وشااارده



والعداد عندها واصل 120

واللي ترمي البضاعه في الزباله


واللي تآخد نصها وتخبيها

واللي واللي واللي

وفجأه عرفت السبب

هدا رجال ( شكلوا من البلديه ) ومعاه شرطيين

عملوا كبسه عليهم

واشووف الرجال جا وماسك بضاعة وحده حرمه

وهيا متشعبطه ببضاعتها

يقولها هاتي ...

تقووول لا يا ( ابد الكريم ) << عبدالكريم يعني

اتاريها الاخت حافظه اسموو من كثر الكبسات

راح (ابد الكريم ) يطالع بالشرطي والشرطي يطالع فينا انا واخواتي .. عشان مركزين معاهم

راح قال خلاص سيبها << شكلو نظرات الفجعه حقتنا شفعت للحرمه ^_^


صارت الحرمه تقووول ( قلبك ابيض يا ابد الكريم )

ورجعت وفرشت بسطتها

****************************


من وجهة نظري الخجوله ... اقول ياعالم ايش فيها لو خليتوهم يسترزقوا ؟؟

بالله ايش بيخسروا ..؟؟
والله من ضمنهم (سعوديات ) والله شفتهم بعيوني باسطين ...

محتاجين اللقمه

وعشان يستروا على نفسهم وعيالهم ... ويبعدوا نفسهم عن سؤال الناس

اشتغلوا دي الشغلات

البلديه ليه حاطه نقرها من نقرهم ؟؟؟؟
يعني ايش يبغوا ؟؟؟

يستأجروا محل قدام الحرم ؟؟؟
وي اذا كان اجار الشقق عند الحرم لليوم الواحد وصل 2000 وفوق

كيف بيستأجروا محل .؟؟؟؟


ابغاكم تبرروالي تصرفات البلديه ...

مو عاجبني الوضع نهائي


ووحده من اخواتي تقول ( مفروض انو (عبدالكريم دا) ما رجعلها البضاعه ..

دي امانه ولازم يأدي عملو على اكمل وجه )
وانا اقووول
( ارحموا من في الارض يرحمكم من في السماء)


ايش رأيكم يا اخواني ...

نمشي ورا ايه بدي الحاله
القلب والرحمه ولا العقل والمنطق ؟؟ ؟؟؟؟[/align]

[((كــــــــادي))]

امولة .. \\

هذولا عماله جالسة في البلد بدون اقامات شرعية

يعني ممكن يجي منهم اي شي

صحيح هي بتسترزق .. بس برضو هناك قانون

ولو كل واحد او وحدة دخل البلد بشكل غير شرعي .. والله تصير الدنيا خراب

ما تتذكري ايش عملو في الدانوب في جدة !

***

دمتِ بخير وليا رجعة

[DANiA]

أمولة.,,
ماينفع الدنيا حتخرب..

في اماكن للبيع والشرا واماكن للعبادة..
كل شي في مكانه
وفي تصاريح وقوانين الومفروض يلتزمو بيها,

شوفي,


هذا الشخص , في النمسا في مدينة فيينا بالتحديد < اتقابلت معاه
المهم دا شحات
لمن يوقف يحط قدامه علبة ولا طاقية الناس يحطو فيها فلوس..

والشرطة قدامنا تمر عليهم وتشوف التصاريح
لاحظي ... الوقوف ويعمل استراعض او بيع او ايش شي بتصريح

والدنيا ماشيه زي الحلاوة.. ومبسوطين..


هنا,
الدنيا مخبوصة..
لأنه مافي نظام

إلي ماعندها تصريح لا تبيع علني .. فكرتيني بالحجات حق الطراطيع الي ع البحر..

وبس

[lonely girl]

والله انا اشوف يا امولا لو كان البيع اشياء زي الملابس والالعاب
وكانوا الباعه سعوديين مافي مشكله
اما اذا كان البيع مواد غذائية فهذه الكارثة لانه راح
تجي من وراها امراض ومصايب
واذا كانوا من المتخلفين مشكلة اكبر لاننا نحارب التخلف
فكيف نشجعهم على البيع
بس تبي الصراحه انا احب اوقف عليهم واشتري منهم
اولا لانهم ارخص من السوق عشان مافي ايجار دكان
وثانيا احزن عليهم يعني ماجبرهم على كده
غير الشديد القوي والحاجة يا لطيف

[{البحر}]

تعريف البلدية: هي بلا وأذية
لاتجد احد الا ويدعي عليها
امتحان في كل شيء..
شوفي ياثـ..... عفواً ياأمولة
المشكلة الاساسية في السعوديات الباسطات هناك عاملين ستار غير شرعي للمتخلفات بدون قصد..

المفروض والطبيعي انه مافي سعودية محتاجة الى ذي الدرجة بما انه البلد في خير ونعمه واللي تبغى تتاجر مافي اي مشكلة بس يكون بتصريح رسمي وبرضه على شكل بسطات صغيرة ومو شرط انه يكون محل كبير وهذامعمول به في كل الاسواق والاماكن العامة ... ولو حصل هذا الامر فالبلدية بكل بساطه راح تسيطر على الوضع ويتم تعقب المتخلفات الي ممكن يسببوا مشاكل امنية على قولة ((كادي))
اما من ناحية المطاردات والمداهمات وتعقب المتخلفين ومايتبعها من تصرفات تدمع لها العين والقلب فهذي نتيجة لتطبيق النظام والسيطرة على الاوضاع واستتباب الامن فليس من المعقول ترك الحبل على الغارب

تحياتي

[SOUTHSTAR]

اهلين بالست أموله الغاليه ..

واهلن بمواضيعها اللي ماشاء الله تعكس طبعها الثرثار ..

شوفي يا ست أمل .. أنا راح أفتي لك بما انه ابوي ماسك منصب بالأمانه .. وأمانة المدينه بالتحديد ..

يا ست أمل ..

تخيلي انتي صاحبة محل تدفعي مبلغ وقدره ايجار وديكور وبضاعه والذي منه ..

ويجي شخص معاه نفس بضاعتك ومفترش قدامك .. يبيع نفس البضاعه بنص السعر ..

مين يحفظ حقوق المستاجرين والتجار ..

تخيلي هذا المنظر مرة أخرى ..

انتي طالعه من الحرم .. مصليه ركعتين ومتعبده ربك ..

واول ما تطلعي رجلط بره بوابة السلام مثلا ..

الا ما تقدري تمشي .. انواع الباعه المفترشين يبيعون بضايعهم .. يسببون ازمة وزحمة .. منظر غير سليم ..

تخيلي منظر آخر ..

طالعه من الحرم .. الا تجي وحده من الباعه الافارقه لاخوكي .. وتقوله ( هبيبي تبغى مسواك ) (هبيبي تبغى اساور) .. يعني بالمختصر .. مرتع للفساد الاخلاقي ..

هذا غير ان غالبيتهم مخالفين لانظمة الاقامه والعمل .. عصابات سرقة ونهب .. مشاكل مالها نهاية ..

ما احد قالهم لا تسترزقوا وتاكلوا عيشكم .. لكن بطرق سليمة ..

والادهى والأمر يا اموله .. ان المراقبين هو السبب الرئيس لانتشارهم .. لانهم مستفيدين من وراهم .. من رشاوي وعمولات والذي منه ..

والله تعبت معهم الامانات والبلديات ..

وانا مع قرار التخلص من هذه الظاهره ..

يعطيكي العافيه يا اموله .. وكثري لنا من هالثرثره .. خلي الواحد يفضفض ويتفلسف ..

[*amula_beauty*]

[align=center]

امولة .. \\

هذولا عماله جالسة في البلد بدون اقامات شرعية

يعني ممكن يجي منهم اي شي

صحيح هي بتسترزق .. بس برضو هناك قانون

ولو كل واحد او وحدة دخل البلد بشكل غير شرعي .. والله تصير الدنيا خراب

ما تتذكري ايش عملو في الدانوب في جدة !

***

دمتِ بخير وليا رجعة

اهين بمشرفتنا الغاليه :

[fot1]كــــادي[/fot1]


يا قلبي ادري انهم عماله وافده

بس مهما كان هما بشر

الحدود السياسيه الدخيله علينا خلتنا نقول كدا

بس احنا كلنا واحد مهما كان

وبعدين لو ابغى اكلمك من منطقك ...

اقولك ترا فيه منهم سعوديات وبنات ناس كمان

واعذريني ما اعرف ايش صار بالدانوب ؟؟؟؟

بس مهما كان فيه منهم اشرار

فيه ناس يخافوا الله ونيتهم كسب الرزق الحلال

بانتظار رجعتك

ربي يسعدك[/align]

[*amula_beauty*]

[align=center]

والشرطة قدامنا تمر عليهم وتشوف التصاريح
لاحظي ... الوقوف ويعمل استراعض او بيع او ايش شي بتصريح

والدنيا ماشيه زي الحلاوة.. ومبسوطين..


هنا,
الدنيا مخبوصة..
لأنه مافي نظام

إلي ماعندها تصريح لا تبيع علني .. فكرتيني بالحجات حق الطراطيع الي ع البحر..

وبس

طيب ياقمر ... اولآ هما ما بيبيعوا بالساحه ... برا الساااحه

( عشان ماتقولي اماكن عباده)

وثانيآ :
تتوقعي لو الحجه طلبت تصريح تبسط بيعطوها ؟؟؟؟


مرررررررره ما اعتقد
ولا تخليني افتحلك بوابة النقاااش عن البلديه وتعققيداتها

المحلات يبغالها رخص .. واذا ما اتفتحت تدفع مدري كم

وهم ع القلب ..ورووح وتعال ... وهم ع القلب .. والحريم دولا ما حيراجعوا الدوائر الحكوميه

لأن ماعندهم رجال ... ولو عندهم ماكان شفتيها باسطه وراميه الكرامه بالارض

وترا مو كلهم حجات فيه سعوديات

وماحتقدر تعملها كشك صغير

النظام يطبقوووه على ناس وناس لا

وعلى قول southstar

الرشااوي ماااشي سوقها

وكدا مايصير

يا يخلوا العالم تعيش

يابلاش

واتمنى ما احد يتدخل برزق التاني[/align]

[*amula_beauty*]

[align=center]

والله انا اشوف يا امولا لو كان البيع اشياء زي الملابس والالعاب
وكانوا الباعه سعوديين مافي مشكله
اما اذا كان البيع مواد غذائية فهذه الكارثة لانه راح
تجي من وراها امراض ومصايب
واذا كانوا من المتخلفين مشكلة اكبر لاننا نحارب التخلف
فكيف نشجعهم على البيع
بس تبي الصراحه انا احب اوقف عليهم واشتري منهم
اولا لانهم ارخص من السوق عشان مافي ايجار دكان
وثانيا احزن عليهم يعني ماجبرهم على كده
غير الشديد القوي والحاجة يا لطيف

اهلين بيكِ ياعزيزتي
طيب وانا كمان ما اشجع المواد الغذائيه انو احد يشتريها من الباعه المتجوليين

وبالنسبه ليا ماتفرق سعودي ولا مو سعووودي
كلنا وااحد

يعني مو نتجبر لأنو ربنا انعم علينا بنعمة الرخاء ونعمة السعوووده

يا بنتي احنا مجرد ناس ونسبنا الى عائله ملكت معظم شبه الجزيره العربيه
وجزاهم الله الف خير

يعني حظنا حلو كوننا سعوديين .. بس الدور والباقي ع المساكين اللي ما لهم حظ

ومو سعوديين
آآآآآآآآآآآآه يا قلبي

ويا كرهي للحدود السياااسيه

تخننننننننق


وتسلمي ع الطله الحلوه حبيبتي

واستمري على رأيك ... ترا انا والله دايمآ يحزنووني اضطر اشتري من عندهم جبرآ للخاطر بس

عشان ابسطهم بس لا اكثر ولا اقل

ولا استخدم الشي اللي آخدو منهم

برضو اخااف من الامراض
[/align]

[DANiA]

معليش,

النظام نظام..
ايش معنى كل الدول ماشية ع الأنظمة والشعب ماشي عليها ومايقدر يخلف منها شي!!!
ايش معنى هنا عندنا لمن يعملو نظام او قانون .. مع نفسهم!! مايلزمو الشعب القوانين والأنضباط!!!
بقولك:
ليش العرب لمن يخرجو برا بلددهم لدول اجنبيه يلتزمو بالقوانين حقتها؟! عارفين واراها حكومة قوية ممكن توديه في دهية بمجرد رمي المنديل في الشارع... هنا : رجال يفتح شباك السيارة ويرمي كل الزبالة .. في وسط الطريق.. او علبة ببسي.. ايش التحضر دا .... فين الأخلاق!!! فين التربية !! دا يدل على الشخصية والنظافة .. النظيف في بيته نظيف برا بيته ...

اعتقد نحن دولة غنية .. المفروض ماتكون منظرها الحضاري كدا !!

في اماكن للبيع يا ست امولة,.
مثلا الإشتراك في بازارات او في نفس بيتها تبيع..

ياكتر الحريم السعوديات الي تبيع من بيتها بطلبات وزي كدا,, زي الأكل

[*amula_beauty*]

[align=center]

تعريف البلدية: هي بلا وأذية
لاتجد احد الا ويدعي عليها
امتحان في كل شيء..
شوفي ياثـ..... عفواً ياأمولة
المشكلة الاساسية في السعوديات الباسطات هناك عاملين ستار غير شرعي للمتخلفات بدون قصد..

المفروض والطبيعي انه مافي سعودية محتاجة الى ذي الدرجة بما انه البلد في خير ونعمه واللي تبغى تتاجر مافي اي مشكلة بس يكون بتصريح رسمي وبرضه على شكل بسطات صغيرة ومو شرط انه يكون محل كبير وهذامعمول به في كل الاسواق والاماكن العامة ... ولو حصل هذا الامر فالبلدية بكل بساطه راح تسيطر على الوضع ويتم تعقب المتخلفات الي ممكن يسببوا مشاكل امنية على قولة ((كادي))
اما من ناحية المطاردات والمداهمات وتعقب المتخلفين ومايتبعها من تصرفات تدمع لها العين والقلب فهذي نتيجة لتطبيق النظام والسيطرة على الاوضاع واستتباب الامن فليس من المعقول ترك الحبل على الغارب

تحياتي

اهلآ وسهلآ بيك يا عزيزي طلال

هيا من ناحية بلا واذيه منجد بلا واذيه

ياريتهم يسوووا الاشياااء المهمه

وبعدين يركزووولي ع المساكين دووول

المشكلة الاساسية في السعوديات الباسطات هناك عاملين ستار غير شرعي للمتخلفات بدون قصد..

هنا معاك حق

بس برضووو المتخلفين مساكين ... الدنيا حدتهم يجووكم يا مريشين ...

وعلى فكره

انا ضد المخالفين ...

بس اللي شايفتووو ... حتى اللي عندهم اقامات

البلديه مناشبتهم

يعني انا معاك انو لازم تكون اقامتهم شرعيه

اقل شي
بس لا تمنعوهم من طلب الرزق

شوفو اخواننا ( المصريين) وهما قريبين مننا مرررررررره

كلنا عرب ... بس اقصد قريبين بالتفكير وباللهجه ونفهم بعض

نشوفهم بالافلام ... كيف يروحوا ليبيا ..
وكيف يدوروا فيز عشان يسافرووو لأمريكا ويشقوو طريقهم

يا ما اتعاطفنا معاهم

طيب شفت الفلم اللي يحزن حق ( هنيدي) اللي سافر النمسا اعتقد

وكيف هما هناك متشحططين

ترا انا احس اللي يصير بالمصريين يصير لي ( لأنهم مننا)
ومو بس المصريين ... كثير عرب

الله لايجيب اليوم اللي يحدكم يا اهل الخليج للتجوال والبيع[/align]

[*amula_beauty*]

[align=center]

طالعه من الحرم .. الا تجي وحده من الباعه الافارقه لاخوكي .. وتقوله ( هبيبي تبغى مسواك ) (هبيبي تبغى اساور) .. يعني بالمختصر .. مرتع للفساد الاخلاقي ..

هذا غير ان غالبيتهم مخالفين لانظمة الاقامه والعمل .. عصابات سرقة ونهب .. مشاكل مالها نهاية ..

ما احد قالهم لا تسترزقوا وتاكلوا عيشكم .. لكن بطرق سليمة ..

والادهى والأمر يا اموله .. ان المراقبين هو السبب الرئيس لانتشارهم .. لانهم مستفيدين من وراهم .. من رشاوي وعمولات والذي منه ..

والله تعبت معهم الامانات والبلديات ..

وانا مع قرار التخلص من هذه الظاهره ..

يعطيكي العافيه يا اموله .. وكثري لنا من هالثرثره .. خلي الواحد يفضفض ويتفلسف ..

اهلين بيك ياعزيزي :

[fot1]southstar[/fot1]
لولا القرابه اللي بيننا كان عرفت كيف ارد عليك

بس اسمع يا عزيزي

اولآ : انتوا ليه كدا دايمآ تطالعوا بالجانب المظلم ومن منظار اسود ... وبسوء نيه

ليه يعني لما قلت باعه متجوليين ... كلكم (معظمكم اقصد) اتخيل مناظر مقززه

وناس وسخين
وبنات يحاولوا يغووا الرجال

يا عالم ... انا اتكلم عن الفئه المستضعفه

النظيفه

اللي تبغى تتعفف عن المسأله

ودولا يبانوا ونعرفهم (سيماهم في وجوههم)

انا اتكلم ع المساكين المغلوبيين على امرهم

وما الوم نظرتكم القاصره

لأنكم شفتو من المتخلفين ( بالاقامه بما اني اكره لفظ (متخلفين) ) شفتو منهم اشياء تسم البدن

بس برضو زي مافيه الخبيث
فيه الطيب

يعني انتا ضد تصرف (عبدالكريم)

طيب اوكي

لكن لو عبدالكريم دا عمل كدا بالفئه الطيبه .. وشال بضاعتهم

كيف تتخيل بتكون حال الحرمه وحال اسرتها

والله على زمن الرسوول ما كان فيه زي كدا

انا ضد كل دي الاشياااء

وضد البلاهات هدي والحدوود السياسيه ... وضد القوانين الوضعيه
يعني لو اننا بزمن الرسووول

كان صار كدا؟؟؟؟

والله كان الأهالي قامو عليكم

ادري داك زمن ودا زمن

بس برضووو احنا ابتعدنا عن الدين

زمان كان الواحد يشتغل اي شغله عشان يسد رمقووو

حتى لو يحتطب

لكن دحين لو حاول يشتغل اي شغله زي كدا

الدنيا تتكالب عليه

الا يتهجول عشان يكسب اللقمه الحلال

يعني الحرام صار اسهل
بسبب تعقيداتكم
واعذاركم وحبكم للعولمه .. وللتقدم

ودا اللي موديكم لورا


اعذرني يا عزيزي

لكن انحرق دمي ... وما حسييت ايش قاعده اقووول
بس اكيييييييييييد قاصده كل كلمه قلتها

ربي يسعدك
[/align]

[SOUTHSTAR]

[align=center]



يعني الحرام صار اسهل
بسبب تعقيداتكم
واعذاركم وحبكم للعولمه .. وللتقدم

ودا اللي موديكم لورا


اعذرني يا عزيزي

لكن انحرق دمي ... وما حسييت ايش قاعده اقووول
بس اكيييييييييييد قاصده كل كلمه قلتها

ربي يسعدك
[/color][/align]

يا حليلك يا امل .. لو كل الناس بطيبتك كان الدنيا بخير ..

فيه امور يا امل لابد يكون فيه نظام يحكمها ويحكم من يتعامل معها ..

يعني دولة مثل السعودية .. يقصدها ملايين وملايين من البشر .. اكيد بتكون فرصه ذهبيه للفقراء علشان يجون ويدورون رزقهم فيها .. ولو بطرق غير نظاميه ..

يا امل .. المشكله اذا فتحنا الباب على مصراعيه راح تجي المشاكل اكثر من الفوائد .. وراح تستغل الطيبه ..

اعطيكي مثال .. لو ما كان فيه مثلا دائرة لمكافحة التسول .. كيف كان الوضع ؟؟

مو فيه ناس محتاجه من جد ؟؟ .. وتبي مجرد لقمة تسد فيها جوعها ؟؟

لكن وش اللي حصل ؟؟

فيه بعض الناس استغلت هالشي وصارت تمتهن التسول وتكسب من وراه الاف وملايين ..

والوسيله هي طيبة الشعب ..

نفس الشي مطبق على هذولي المفترشين ..

تلاقي نسبه منهم من جد محتاجين ويبون يشتغلون .. لكن نتيجة التساهل وعدم تطبيق وليس وجود النظام طلعت لنا ناس ماجا من وراهم الا المشاكل ..

شوفي الامور يا امل على نطاق اكبر من المحتاجين .. وراح تعرفي ضرر هالظاهره ..

دمتم بخير ،،

[*amula_beauty*]

[align=center]دانيا


ممكن سؤال ؟؟؟

انتي يا صديقتي الصدوووقه ... ليه دايمآ ضدي؟؟؟؟؟؟


النظام نظام..
ايش معنى كل الدول ماشية ع الأنظمة والشعب ماشي عليها ومايقدر يخلف منها شي!!!


طيب لا تدفي يا دنوووو


طيب اسمعي : مو انتي تقولي

في اماكن للبيع يا ست امولة,.
مثلا الإشتراك في بازارات او في نفس بيتها تبيع..

ياكتر الحريم السعوديات الي تبيع من بيتها بطلبات وزي كدا,, زي الأكل

ادري انو فيه اماكن للبيع

احسك شريره مدري ليه مع اني عارفتك طيووبه .. بس مو قادره ارد عليكي بقلبي بكووه

البازارات ما تتفتح دايمآ يا مخ ..

يعني تموت جوووع ؟؟؟؟؟؟؟؟؟؟؟

وفيه ناس مايقدرو يبيعوا ببيوتهم
يا انو البيت زحمه او بيتها ما يشجع تفتحو وتبيع فيه

والناس لها اعذارها وكل مين ظروفه غير التاني

لا تكوني ظالمه ولا متجبره

وخلي الناس تعيش

الين متى بنقول نظام .. ودوله ... وشكل حضاري
بلاش هم

ولا تفرق معايا

اهم شي عندي الحياه تمشي

والناس يلاقوا لقمة عيشهم

وياررررررررررررررريت مافي حدوود سياسيه

ولا حضاره ولا سخافه

بجد تعبوونا بالكلام الفاضي

نفسي البشريه ترجع بسيطه زي زمان[/align]

[لست بكاتبة]

[align=center]أمووووووووووووووووووووووله
بسرعة وقفي
في البداية موضعك تمام
بس الاجانب لالالالالالالالالا
بعدين لاتجيبي سيرت المصارية والسودان والسورية هم عندنا غير
لكن الإجانب اللي تدافعي عنهم لالالالالالالالالالالالالا
أمووووووووووووولة تقولي مساكين الله يرحم بحالك
طيب قبليني بكره بقباء الطالع
وأنا أعرفك مين هم المساكين[/align]