السلام والرحمه والاكرام ..
[ALIGN=CENTER]
****
(موضوع جاد جدا) عنوان قديم وله قصه
كنت في منتدى أول منتدى شاركت فيه وكانت الشله الموجوده تنحط على الجرح يبرى لكن مره كنا مبسوطين ..
المهم .. مسكت معاي وكم واحد من اللي بالمسنجر عندي نقلب المنتدى فوق تحت .. استهبال يعني .. مقالب وضحك وكفشات و ما تركنا عضو او عضوه من غير عياره او صفه ما لزقناها فيه وهواش (ودي) وجميع انواع الهبال اللي نقدر عليه .. كل الكلام هذا كان في منتدى الاصدقاء ..
بعد يومين ثلاثه, لقينا موضوع نازل من المشرفه او المراقبه .. دخلنا الموضوع لقيناها مررررره زعلانه ومتضايقه .. وتقول اغيب عنكم يومين الاقي المنتدى كذا
وحسب كلامها في البدايه انبسطت يوم لقت المنتدى بغيابها نشيط .. لكن الاحباط اصابها بعد ما شافت وش هالنشاطات .. كلللللللها مواضيع بايخه ولا يطلعها الا ناس بايخين وسخيفين (هذا معناة كلامها .. ) وطلبت مننا وبكل أدب مثل عوايدها إن المنتدى يكون فيه انصاف مواضيع كذا ومواضيع كذا .. وكانت تدق وتصر على سالفة مواضيع جاده ..
جلست يومين وطفشت .. ابغى أفش خلقي بس مستحي من هالمراقبه النشبه (والحق يقال كان لها حضور قوي ومحبب عند الكل).. قمت نزلت موضوع عنوانه (موضوع جاد جدا) وكان عباره عن استهبال مستخبي وسخريه مريره أحيانا وعموما فش خلق :rolleyes: وكان له عدد من الأجزاء .. وانقطعت عنه منذ مبطي(هالكلام مدري له سنتين او ثلاث) .
عاد هالمشرفه يعرفها بعضكم يمكن الشمس الشموسه اللي ما اشوف لها لا حس ولا خبر !!!!!
*****
السياسه و "التسبد"
أصبح كل ما يمت الى السياسه بصله "يدبل تسبدي" وبقوه .. الكل يتحدث ن السياسه والكل يلعن أمريكا .. لو استبدل الحديث بالفعل واللعن بالدعاء لربما كنّا أفضل حالا ..
( طرّاه أبو سلسله قبل شوي في الجلسه ..)
****
الأقتصاد و "الزبنه"
حدثت أحدهم ذات يوم عن مقاله يحتج صاحبها على كون "الرز" أكلتنا الشعبيه لأنه وببساطه يفترض حدوث حرب وإنقطاع خيرات الهند وما شابهها علينا .. فماذا سنأكل ؟!
فضحك "أحدهم" ثم ضحك بقوه أكبر قائلا (المشكله الأكبر ماذا لو تفرقت الأيدي العامله الأجنبيه كل الى بلدته .. وذهب "ابو يمن" ماذا سنلبس !!)
لم أفهمها "على الطاير"وبعد نصف ساعه ضحكت
حاجتين بسيطه تمر في البال .. احدها انه كل ولد نعمه بيزبن نفسه بأي طريقه كانت بحيث لاسمح الله وصارت حرب بيكون نسبيا مغطي احتياجاته .. ياترى العامه و ذوي الدخل المحدود من اللي حسب حسابهم .؟؟
الدوله تحتاج وبكل جهد واجتهاد لنوع من الاكتفاء الذاتي قبل لا يجي يوم لا مويه ولا طعام ولا شي .. وطبيعتنا الصحراويه و أعدادنا المتزايده تنبيء بمجاعات و وفيات تصل حد المجازر .. (أنا فقط أتحدث عن أبسط الأشياء .. الماء والطعام .. لن أتحدث عن الدواء وغيره :doo: )
(عاد اللي طرّاه ارتفاع اسعار الذهب الى السقف ;))
*****
آل سعود و "الموضه"
صاحب السمو الملكي الأمير فلان وصورته مع فلانه .. حرم صاحب السمو الملكي علان في الحفل الساهر .. فلان بن فلنتان والكاس .. الملك قبل عشرين الف سنه والملك قبل مدري ايش ..
الأسره السعوديه المالكه وما تفعله .. كيف تكون هذه الأسره هي خادمة الحرمين .. والخ الخ الخ الخ
بالإيميلات بالقروبات بالمواقع هجوم وتهجم وسب وطعن والهدف منه الى الان ما ادري ايش !!! طيب فايده وحده تطلع بها من كلامهم ,ما تلاقي ولا حتىأي إشاره لأي دليل على المصداقيه .. مجرد إداعائات وللأسف تنطلي على الكثير..
لكن الشرهه مو عليهم .. على العقليات اللي الى الىن تستخدم اسلوب (الوصول الى هذه الصفحه غير مسموح به) .. سواء لنظرية المؤامره العتيده دخل أم لا .. الأمر يحتاج الى حوار ويحتاج الى "علم" قبل أن تفلت الأمور من زمامها ..
ياخي افتحو المجال للصحافه وغيرها تتكلم.. من جدد غباااااااااااااء انك تترك الواحد يتكلم ويسب فيك ويطعن في كل شرف عندك قدام كل الخلايق .. وردك بوقس على وجهه !!
حتى لو مات من ضربتك .. هالشي ما راح يغير كلمه دخلت براس أي شخص .
كل علم ٍ شين عند آل سعود والا غيرهم بنعرفه بنعرفه خاصه بعد الانترنت والقنوات .. والخ الخ
حتى قناة النيو تي في كلللها بكبرها صارت من اللي (غير مسموح به) !!
أبسط شي و أذكى شي إنك تطلع فضايحك بنفسك وترد عليها بذكاء عشان اذا طلعت من غيرك ما يصير لها قيمه ولا تأثير كبير ... أو أي أسلوب جديد غير التقفيل اللي انتهى زمانه .
>> أعجبني مثل عوايده عبدالرحمن بن مساعد الأمير الشاعر يوم قال .. آل سعود عائله عاديه مثلهم مثل غيرهم فيهم الصالح وفيهم الطالح<<
(عاد اللي طرّاه آخر موضه !!)
****
"اللاااااااااااااه يخارجنا"
صارت هالكلمه المتداوله على ألسنة الكثير والعديد من طلاب الجامعه وربما طالباتها .. أشياء غريبه تحدث في جامعاتنا العزيزه (اموووووت وأعرف أساسها!!)
بأي حق يتم تقديم الأختبارات بهذا الشكل (ثلاث أسابيع كامله!!) دون سابق انذار أو حتى إعتذار !!!!
حقيقه الضغط النفسي الذي واكب هذا الضغط الدراسي يكاد لا يبقي ولا يذر
كان الله في عون الجميع ..
(عاد طرّاه إني ما قابلت القصبي في الثمامه)
*****
أسماء و "حضور"
إس إس الف وخمسميه: كثير أحيان أفكر ما أتعرف عليه أكثر مما أعرفه ..
بصراحه السبب إنه من القلائل اللي ارتحت لهم ولا أحب أو أخاف اذا عرفته أكثر أكتشف شي يغير شي :rolleyes:
ياحبي له وبس .. واااااد جنتتتل و أخلاق ما ادري من وين يجيبها ورصانه على سنع وثقل على خفة دم .. روح ياشيخ جعلها على ما تحب وتهوى .. قول آمين .
تدرون غيرت رايي .. وليتني اعرفه اكثر ;)
الظل: يااااااااااحبه للكلاااااافه .. من جد انسان يحرجك بكرمه وطولة باله .. وكلافته بهالابتسامه اللي ما يرضى يتركها مو لشي الا رحابة صدر وطيبة قلب .. عسى الله يفتحها بوجهه وين ما راح .. عاد وش اسوي أحب الناس اللي يتركون ويجتهدون عشان يتركون الذكرى الحلوه وشرف المعرفه في قلوب من يقابلونهم ;)
بسام: يوووووووووه يا ثقل دمه .. أول ما قابلته مع الدلخ نايف وابو رهف ونبيل .. الغبي نايف مثل عوايده عرفني ببسام وقال (أحمد) سلمت عليه عادي ولا ادري مين هو اللي لاحظته بس ثقالة الدم وانه يتهرب بأي طريقه ما يبي يسولف معي واستغربت !! ما اعرفه ولا يعرفني ليه كذا .. وكان يصرف نفسه من سالفه بسالفه مع أبو رهف (أول مره اشوفه بعد) لين بالأخير طفش أبو رهف وقال ياخي خلاص خلني اسولف شوي مع الرجال اول مره نقابله .. قام بسام تفشل وقام يناظر بالسقف ويعنني ...
بالاخير مشيت ما طلعت منه الا بكلمتين وفكره سلبيه نوعا ما ..
بعد فتره طووييييله ومواقف مختلفه لقيييييت اخيرا حاجه تقدر شوي تعجبك في شخصيته .. حسنته الوحيده .. تقدر تاخذ منه الحق والباطل بسهوله وسرعه .. صراحته تعجبني على الاقل اكتشفت اشياء كنت فاهمها غلط .. وياحليلك يابساموه
سامي: ما عمري شفته بس أنبسط لا شفت اسمه على موضوع .. واكتشافي مؤخرا لمهاراته او معرفته العلميه خلت للمواضيع طعم ثاااانييييي ..
نايف: يحتاج وبسرعه انه يفهم الآخره مثل ماهو فاهم بعض الأشياء بالدنيا :rolleyes: .. أكبر أسباب جاذبية الواد هذا انه يعرف "يستمع" ويعرف متى يحتاج اللي قدامه الى إذن وعلى طول يرهفها .. وياما ناس انغرو فيه بسبب هالميزه .. وبالاخير يطلع مقلب ههههههه
طبعا الواد نصاب درجه أولى حتى يخيل لي احيان انه يكذب الكذبه على نفسه ويصدقها .. وعشان الاشاعات خلوني اقول بكّاش .. لأن نصاب قويه شوي .. حساسية الواد ممتازه واحساسه متذبذب حسب النفسيه .. واللي سمع بالاقفال اللي يستخدمها التكرن في أمخاخهم .. ترى نايف عنده وحده لكن نادرا ما تطلع .. واذا طلعت ياويلك .. عموما ما بعد حددت موقفي من نايف .. هل أندم على معرفته او لا .. والسبب انه من فتره لأخرى أشتاق له .. يالله بلوى وانبلينا فيها ..
أبو فهد: بالنت يعجبني أكثر من الطبيعه .. يمكن عشانه يتكلم بالنت اكثر .. لكن اذا قابلته احس انه مباحث .. ماغير ساكت ويقلب عيونه و يوجهه الدشوش (أذانيه) وبس .. خاصه من تالي :o
أبو رهف: لااا لا لا مو معقول .. هذا سالفه ثانيه .. أحلى شي بالموضوع اني عرفته فتره قبل أدري انه مصري.. المفروض يعطونه جنسيه ياخي لهجته وشكله ما ينبي بأي مشاكل .. بس لولا افكاره وكثرة اعتراضه على ابو فهد في كل موضوع :p
لا واللي يقهرك ما يجيب الاعتراض صريح .. بس يجلس يتهزأ ويحاول يرفع الضغط .. معطيني الأنطباع بأن الأفكار اللي يتكلم بها أفكاره .. و أحب الناس اللي كذا حتى لو أفكارهم غلط (مو يعني افكاره غلط) وبرضو معطيني انطباع انه لو تأخر برا البيت راح يحصل علقه .. ننننييييههههاااااا
محمد المحيا: "ليه ذا الجفوا" .. ماني قايل غير انك من اكثر الاشخاص اللي افتقدتهم في المواضيع والردود .. وأتسائل عن سبب هالغيبه والجفا ؟!!!!!
(طرّاه الشوق يوم انقطعنا عن من بيدنا وصله لولا الظروف اللي خليناها شماعه .. )
*****
كذبة "الحقيقه" !
هل حقاً لن نستطيع أن نعيش دون الحقيقه !!!
أكره ه ه ه ه ه وبعنف الهاله الإعلاميه المصاحبه للحقيقه في كل محفل و كل قناه او جريده.. كأنها طعامنا وشرابنا ودونها لن نعيش ولن نتنفس ولن ولن ولن .. الخ !!
هناك في رأيي حد أدنى من الحقيقه ( من ربك ما دينك ومن نبيك) يجب أن يمتلكها الكل .. وبعدها ربما حقائقنا التي نحددها نحن و مدى حاجتنا لها ..
لكن بكل تأكيد ليست حقيقتهم التي يثيرون حولها الكثير والكثير ..
(طرّاه .. مدري وش طرّاه.. !)
*****
جرب .. "طاوعني"
إن لم تكن قد غفوت والساعه تجاوزت الثانيه عشر .. او ان كنت نمت وصحوت ناظراً إلى الساعه التي تجازت الثالثه فجرا .. تحامل على نفسك قليلاً و توّضأ ولن أقول صل ركعتين بل ركعه واحده.. ثم أطلب ماشئت .. فقد نزل الله الى السماء الدنيا يعرض عليك أنت أن يجيب سؤالك إن سألت .. !!!!
(طرّاه شريط سمعته .. اسمه "الى الله المشتكى" مدري لمين بس لا يفوتكم)
*****
تنهيده ختام
ذروة تعاستنا .. هي ذروة سعاده عشناها
لكننا لم نمتلكها ..
سعاده تسربت لنا في غفلة من الزمن ..
سعاده سنذكرها والله .. دااائما دائما .. فتبكينا !
_________________ إنتصار منصور العقيل_________
****************************** *****************
تعبت من الكتابه وطولت .. أعتذر اذا كان فيه شي مو واضح .. لكن منذ مبطي عن النت وبصراحه فتحت وجلست اكتب اكتب اكتب اكتب .. ليم طاح اللي براسي الحين .. والسلام ختام
[/ALIGN]
