مساء النرجس والليلك للجميع
.
.
.
تنبيه وتنوية:
هذا الموضوع سبب رئيسي لأمراض الضحك والقهقة والحش والشماته
وننصحكم بقرائته فوراً
هذا الموضوع يعتبر الجزء الثاني من موضوع أنا والنيبالي وهواك فمن لم
يتشرف بقراءة ذلك الموضوع فهو الآن يدخل التاريخ من اوسع ابوابه لأنه
سيقرأ هذا الموضوع ثم سيذهب لرابط الموضوع الآخر في آخر هذا الموضوع
****************************
أنا فعلا مش عارف أيش حكاية ليلة الخميس معاية، ومثلي مثل أي
شاب سعودي مكافح أمس الأربعاء كان آخر يوم دوام .. يعني جا وقت
نزول السوق والمشتريات عشان نعيّد مثل بقية البشر;)
طبعاً مثل العادة مرّيت على بخيت ::* .. وقلتلّه إني أبغى أنزل وسط البلد
وإذا كان حابب ينزل معاية .. أقلّكم شوفو الحوار اللي دار بيننا:
هائل: أقلك أبغى أنزل البلد تنزل معاية ؟؟!!
بخيت: لسّه كنت حكلمك ... كنت أبغى أطلع مكّة
هائل: مكّة!!!! أيش عندك فمكة ؟؟ لا تقولّي أسلمت وتبغى تجيب عمرة
بخيت: لا .. أصلوا أنا طلّعت شريحة بدل فاقد لجوالي .. وأبغى اشتري جوّال
هائل: لا يا شيخ؟؟!!! .... وايش علاقة تشتري جوّال بطلعة مكّة ؟
بخيت: أصلوا في وحده حيشتريلي جوّال
هائل: وحده .... يشتريلي؟؟ ما تركلب يا بخيت
بخيت: لا يا شيخ قصدي واحد حيشتريلي جوّال
هائل: بخيت شكلك لسّه صايم
بخيت: يا خي خلاص مو لازم تفهم المهم جايني وجوّال وأبغى أنزل مكة
إيش الغباء دا؟؟
هائل: غباء؟؟؟؟؟؟؟؟؟ طيب يا بخيت أنا اللي غبي .. المهم تعال ننزل البلد وبكرة نطلع مكّة
بخيت: أوكي .. بس خلّيني أتصل على الولد فمكة اشوفه جاب الجوال ولا لأ
طبعاً رحنا اتصلنا على (الواد) لقينا جواله مقفل .. ونزلنا وسط البلد بحفظ الله ورعايته ..
طبعاً الجو في البلد غير عن جد تحس إنك فرمضان .. أمم وخلايق وجنسيات مختلفة
وبليلة وكبدة وبسطات .. الكل يبيع والكل يشتري .. عن جد ونااااسة
المهم في آخر مشوارنا طقت فبال بخيت إننا نشتري جوّال .. ولمّا سألت عن (الولد)
اللي يبغى يشتريله جوّال قالّي ماهو قادر يستنّا عشانه متعطّل على الجوال..
المهم خرجنا من سوق المحمل اللي كنّا موقفين سيارتنا في المواقف تبعه
ورحنا على مركز صحاري للالكترونيات على اساس نشوف جوّال هناك
بخيت وهو ينزل من السيرة دايماً أقله (يقفل الباب وراه)
نزلنا المركز دوّرنا ما حصلنا شي مستعمل كويس
رجعنا ورحنا مركز الأمير .. وقعدنا تقريباً ساعة واحنا نلف على جوّال مستعمل
آخر شي قالّي خلاص اشتري (الكاتيل) الجديد ، جوال ممتاز ورخيص
دخلنا على المحل واختار الجوال لا وكمان اخذ سماعة ومدري ايه،
الحسبة كلها طلعت 450 ريال، جينا وقت الحساب قالّي أدفع
نعم يا خوية إنت مزلزلني ليك ساعتين على الجوال وتقولي أنا أدفع كمان
طبعاً الفاس وقعت في الراس ومافي تراجع دفعت الفلوس وخرجنا من المحل وانا حاقد عليه
ودار بيننا الحوار التالي:
هائل: نروح نتسحر ؟
بخيت: لسّه بدري .. الساعة دوبها صارت 3 وربع
هائل: ثلاثة وربع بدري؟؟؟ أجل انت متى تتسحر
بخيت: نحن نتسحر على اربعة ونص خمسة إلا ربع
هائل: :-S ، بالله كيف تقدروا تناموا وبطنكم مليانة إذا الفجر يأذن خمسة وثلث
بخيت: أيّة مليانة يا عمّي ، أنا أتسحر وأقوم اتفرّج فلم واشرب 4 سجاير وبينهم كاستني موية وبعدين يأذن الفجر
(Z) :016:
هائل: لا يا شيخ كل دا فنص ساعة
بخيت: لا يعني احنا مو نتسحر اربعة ونص يعني أربعة وربع أو اربعة
هائل: طيب يا نصّاب، تتسحّر الحين ولا لأ؟؟؟
بخيت: ياللا نتسحّر .. بس انته تعرف ان الجوال دا ممتاز ......
طبعاً وبدأ محدث النعمة استلمني على الجوال دا وقعد يشرحلي كل قطعة فيه .. عن جد غثّني
المهم وقّفنا عند المطعم .. وانا نازل من السيارة
بخيت: بالله قفّل الباب يا هائل
:020: :042:
طبعاً الأخ جوّاله في السيارة وما يبغاه ينسرق
طبعاً من وقت ما طلبنا الطلبات واحنا قاعدين في المطعم وبخيت
ما وقّف كلام عن الجوال وأنا فعلاً صدّعت حاولت أغيّر الموضوع:
هائل: بخيت فين محمد الظل مختفي الأيام دي ماني شايفة في المنتدى
بخيت: أكيد مشغول مع رمضان .. بس خلاص دحين عندي جوّال اتصلبه
هائل: لا حول ولا قوة إلا بالله
بخيت: (كأنّه استوعب) صحييييييح أنا نسيت .. جوّالي استقبال:079:
هائل: حسبي الله عليك ونعم الوكيل يا شيخ، كل الإمتحان دا وجوّالك استقبال؟؟؟؟
بخيت: مو مشكلة .. أقلك أعطيني مفتاح السيارة
هائل: ليه خير؟؟؟
بخيت: أبغى أروح أجيب الجوال، وجاهه يعني
هائل: وجاهه ؟؟؟؟؟؟؟؟؟
بخيت: أيه ... ياخي الآن عرفت إن اللي معاهم جوّالات عايشين حياة حلوة
هائل: يااااااااااارب ... صبر جميل والله المستعان
بخيت: إنته عارف .. أنا اليوم حنام بالتوب اللي علي
هائل: ليش يا ابن الناس ؟؟؟؟
بخيت: عشان أحط الجوال في الجيب اللي فوق
:099: :115:
تعرفوا حاجة .... ترى أقسم بالله أنا تعبت
في غباء زي كده؟؟؟
أنا بصراحة ما شفت
الله يخليكم أبغى رأيكم .... دا يستاهل يكون مدير فنّي للدرر؟؟؟؟؟
والله سمعتنا حتعلى بيك يابو البخت
هدية:
هذه المحادثة دارت بيني وبين بخيت قبل نزول الموضوع مباشرة:
لا تقم بكتابة كلمة المرور الخاصة بك أو رقم بطاقة الائتمان في أي رسالة محادثة فورية مطلقاً.
بخيت:
هلا
بخيت:
لحظه معايا جوال
الأصيــــــــــــــــل :
يادي الجوّال اللي ما حنخلص منّه
بخيت:
كتبت شيء ؟
الأصيــــــــــــــــل :
شي زي أيش؟
بخيت:
الله يكفيني شرك
الأصيــــــــــــــــل :
كيف الجوّال معاك؟
بخيت:
عادي اصلا انا متعود على الجوالات
الأصيــــــــــــــــل :
ههههههاااااااااي
الأصيــــــــــــــــل :
حقك
الأصيــــــــــــــــل :
كيف ليلتك البارح .. نمت كويس؟
الأصيــــــــــــــــل :
ولا مانمت اساسا من الفرح
بخيت:
ياخي كل شوي يرن ما قدرت انام
الأصيــــــــــــــــل :
هههههههههههههههه
الأصيــــــــــــــــل :
اشبك ساكت
بخيت:
معايا ناس علىالماسنجر
بخيت:
والجوال يرن
الأصيــــــــــــــــل :
ياااااااااااه مرة مشغول حضرتك
الأصيــــــــــــــــل :
شفت إني رجّال وما نزّلت الموضوع
الأصيــــــــــــــــل :
عشان تعرف قد ايش احبّك
بخيت:
والله انك ذيب
بخيت:
<------ يقول والله انك حيوان من البارح خايف
الأصيــــــــــــــــل :
خايف ليه حبيبي
بخيت:
عشان الموضوع
الأصيــــــــــــــــل :
بس ريحني وقولّي نمت بالثوب؟
بخيت:
انا حاسس ريحة خيانه
الأصيــــــــــــــــل :
ليه؟؟؟؟؟؟؟؟؟؟؟
بخيت:
طيب قفل البوكس هذا وافتحه من جديد
الأصيــــــــــــــــل :
طيب وبعدين
بخيت:
قفلته ؟
الأصيــــــــــــــــل :
ايه
بخيت:
عشان اضمن انك ما تسوي له برنت اسكرين
بخيت:
نمت بدون الثوب لاني حصلت طريقه اسهل
بخيت:
حطيت الجوال في الارض وحطيت سماعة الاذن في اذني ونمت
الأصيــــــــــــــــل :
ههههههههههههههههههههههههههه
الأصيــــــــــــــــل :
لاحول ولا قوة إلا بالله
الأصيــــــــــــــــل :
انا اخاف ماتكمل الاسبوع إلا تكون اتجننت
بخيت:
لا اصلا جوالي ما يخلي صاحبه يتجنن
بخيت:
اش عرفك انت ما تعرف شيء
الأصيــــــــــــــــل :
هههههههههههههههههههههههه
الأصيــــــــــــــــل :
طيب
***************************
[ALIGN=CENTER]لمشاهدة الجزء الأول الرجاء الذهاب لهذا الرابط
أنا والنيبالي وهواك[/ALIGN]
خالص تحياتي،،،