مساء النرجس والليلك للجيمع
.
..
.
..
مساء الخير والمحبة على عيون الجميع
الصراحة موضوع حازز فنفسي من اول ماجيت من الرياض الاسبوع اللي فات
ومأرقني ومفور دمي وحاولت انسى او اتناسى بس والله ما قدرت مرررررة
انا بحكيكم اللي صار وانتو وضميركم تحكموا بالعدل وتعرفوا انو الأصيـــل عانى معاناه
الله يعلم بيها واذا صارلي شي بتكفشوا اللي كان السبب
**********************
في أمان الله سافر كل من أخوكم في الله والظل وارسطو ودون جوان
الى الرياض لحضور زفاف اخونا الحبيب داونلود ( الله يوفقه)
وصلنا المطار وكان في استقبالنا العمدة الله يطول عمره ابو فهد وحبيب
الشعب بســـام
رحنا على الشقة المفروشة حقتنا نزلنا اغراضنا وصلّينا وخرجنا على القهوة
كان في انتظارنا هناك حبيبي ابو رهف ولاست هوب(تركي) وعزيز
وبعدين راح عزيز يجيب روميو من المطار وقعدنا .. والله وكانت الجلسة
حلوة ..... وفجأة ودون مقدمات وبكل هبل الدنيا وقرفها طب علينا
زي القضا المستعجل بدون احم ولا دستور بدون اي احترام للذات البشرية المحترمة
ولا الرجاجيل اللي قاعدين ... طب علينا العذاب ( نايف - وع )
وطبعا كل معاناة البشر ظهرت في تلك اللحظات الكهربائية
لما تنقلب القعدة من قعدة حلوة الى حرق اعصاب بدون اي تفاسير
( تخيلوا واحد راكب الطيار ومسافر على القاهرة .. وبعد الطيارة ما تطير بساعة
وهمّا فوق البحر يسأل خويّة: متى حتقلع الطيارة؟؟؟ الأخ كان يناظر انوار الاجنحة
ويفتكر انو لسّه على الأرض) هذا هو نايف
كتلة من الهبل المتقوقع صاحب اسرع جمل في الكون اتحداك تقابل نايف لاول
مرة وتفهم منه شي
المهم انتقلنا الى المطعم حتّى نتعشى لأني كنت مرة جيعان انا وبقية الشباب طبعا
لأنه من كثر جوعي اكلت ( كيتي كات) اتريق يالظل براحتك
المهم اتعشينا ورجعنا البيت
نمنا وصحينا ثاني يوم .. المفروض اليوم اللي حنحضر فيه فرح داونلود اللي اساسا
احنا قاطعين كل هذي الكيلومترات عشان نحضره ونوقف جنب صاحبنا
وياريت تركزوا على الموضوع دا.
طبعا انا يومها مانمت غير متأخر ولما صحيت بعد الازعاج اللي سوولي هوه على الغرفة
قمت للصالة ووجت نفس الشلة اللي كانت موجود البارح في القهوة
زائداً المصيبة المتنقلة اللي هيه نايف طبعاً
المهم .. كانت مشكلتي انا ودون جوان وارسطو انو نحلق وقلنا لشباب
فقالوا لسّه قدامنا وقت خلنا نروح نتغذى ونعين خير ونطلع القهوة وبعد المغرب
نروح نحلق قلنا اوكي .. طبعا كل اللي صار في النص هذا مو مشكلتنا
المشكلة بعد المعرب لما جينا نمشي عشان نرجع البيت ونستعد للفرح
خرجنا من القهوة الساعة 7 في الليل وطبعا عبال ما وصلنا البيت كان العشا اذن
فقال نايف انا اعرف حلاق كويس عبال ما نوصل يكون العشا خلّص ..
وبمنتهى الغباء من ثلاثتنا ( الاصيل - ارسطو - دون جوان ) وافقنا بهبل غير طبيعي
ورحنا على الحلاق المذكور آنفا .. المفروض انو عبال ما نحلق يروح نايف يغير ويجينا
طبعا نسينا انو نايف ساكن خارج حدود الكون ( جنوب الرياض) او صبيا بمعنى اصح
طبعا بشكل طبيعي حلقنا واتهببنا وقعدنا نستنى ساعتي كاملة
نستنى الأخ نايف يجي وبعد ما جانا ( لاحظوا حلق ولبس وجانا ) طرنا على الشقة
لأنو اتأخرنا فعلا رحنا اتحممت انا ودون جوان ولبسنا وخرجنا
كانت الساعة صارت 11 والمفروض اننا نكون في الفرح من 10
اخذنا الكائن اللي قولوا عنّه بشري رغم اني ماني مصدق
وطلعنا على الفرح
وقفنا السيارة ونزلنا نجري لأنو خايفين العريس يمشي وتضيع سفرتنا
على الفاضي .. دخلنا القاعة 3 شباب زي الورد وغبي بيمشي قدامنا
رحنا لصدر المجلس اللي في صالة الأفراح يتقدمنا الاهبل نايف لغاية ما فصله
عن العريس 4 امتار بالضبط ..
وبأعلى صوته ومنتهى الوقاحة قال : هذا مو داونلود:nfused:
تخيلوا اننا قعدنا ندور في الحمامات وفي المطعم وفكل مكان انو نلاقي واحد بس من شبابنا
انسوا الموضوع لأنو الكتشفنا انو الشي دا اللي اسمه نايف جابنا
صالة غلط
تعرفوا ايش معناة لما تكون فنص هدومك ومنته عارف تودي نفسك فين من
نظرات الناس .. تعرفوا معناة الموقف الأهبل .. هذا هو
خرجنا طبعا واحنا نلعن فنايف وفي اليوم اللي عرفناه فيه واتصلنا على ربعنا
لغاية ماعرفنا انو الصالة اسمها ( الماسية) مو ( الرومانسية) زي ما نايف
سمعها وفرق كبير بين الاثنين ( يعني كمان اصنج )
ورحنا طبعا على الصالة الجديدة ووجدنا شلّتنا برة يكيلون الينا انواع السباب
والحقد والتوعد والوعيد بعيونهم بدون اي كلمة
ودخلنا على الصالة لنجد العريس وحيدا مع ابوه و 5 فقط من اقاربه
وبمنتهى الحزن بدل مانقله مبروك هو قالنا عظم الله اجركم
ياجماعة اقسم بالله هذا اللي صار بدون اي مبالغة لدرجة انو اللي تكبدنا
عناء السفر عشانه ماقعدنا معاه ولا نص ساعة بسبب ......!!!
ايش اقول بس
طبعا ما انتهت القصة لهنا خرجنا والشباب سبقونا على القهوة
بدأت بلاهة واحد ثاني معانا اثر علي عقلة جلوسة مع نايف والصدمة اللي
اخذها من الموقف الغبي دا ..فقالنا الشباب فابو هيثم
فرحنا شادّين على ابو هيثم واحنا طول السيارة نسب ونلعن فنايف
وصلنا ابو هيثم ووقفنا السيارة ونزلنا ندور على الشباب
طبعا زحمة وابو هيثم كبيرة ... خرّج ارسطو جوّاله مشكوراً ليتصل على ابو فهد
عشان نعرف فين جالسين ... تخيلوا لما نكتشف انو ابو فهد واللي معاه
فقهوة ثانية تماما وفمنطقة ثانية تماما
الأخ دون جوان كان بيتكلم عن شباب خاصّين بيه هوه مو شبابنا احنا
وجاررنا كلنا معاه
اعزائي المشاهدين كانت هذه احدى حلقات طاش ماطاش 10 اللي حتتقدم فرمضان
عشتها بكل الم وحقد وكان لازم اقلكم عليها عشان تاخذوا حذركم من
النكبة اللي اسمها نايف
*********************
اتمنى ان يصل هذا الموضوع لناصر القصبي او السدحان وانا متأكد من انهم
لن يترددوا في انتاج الحلقة
وطاش طاش طاش ماطاش
خالص احتراماتي وتحياتي للجميع،،،،