[ALIGN=CENTER]


..


ترى نصيحة مني ..

هذا الذ حلى ممكن يتقدم مع القهوة .. او الباور هورس

وبعدين انا حاكتب بحسب ذاكرتي .. يعني ممكن اكون ناسية شي كذا ولا كذا

بس ترى عادي ... حارجع اكتبه لكم .. لا تخافوا


...

المقادير .. ياقلب العنا .. :


علبتين قشطة التاج ... ولاااااازم تكون قشطة التاج .. عشان انا باعطيكم

بالضبط اللي سويته ... يعني لا تعكّوا من عندكم .. بعدين تجوا تقولوا والله قمر قالت ..

حليب نيدو .. ولااازم نيدو ... الكمية حسب الرغبة .. وطبعا كل ما كثرتي .. كل مازادت كثافة

الخلطة زيادة بحكم انه ناشف ...

اهم شي في الخلطة كلها ...

انك تحطي بالضبط ... عشرين حبة تمر .. طبعاً من دون بذر ..

وتكون متساوية .. وياويل اللي تحط وحدة اكبر من الثانية ولاّ اصغر ..

لا والله امزح ... انا عن نفسي .. احيانا كمان ازود شوية ...

نص علبة حليب مكثّف .. طبعا مونص علبه من الحجم اللي ماتلحقي تسمّي عليه الا وتلاقيه

خلص ... لا في حجم اكبر اللي هو وسط ركّزوا على وسط ..

.. لانه في حجم عائلي .. لوحطيتي نصه .. انتي واللي حياكلوا من الحلى ..

ماراح تتحركوا بعدها الا بونش .. وحتى الباب حيزحلقوكم منه زحلقة بصابون ولاّ زيت ..

يعني حذاري من التهور .. عشان انا اللي حآكل الدعاوي

رشّة نسكافيه .. رشّة بسيييطة مرة .. يعني بس الخلطة تاخذ النكهة ..


.....

طريقة التحضير ..

يضرب ماسبق في الخلاط .. ضرباً مبرحاً ..


وبكذا نكون سوينا الخلطة ...

...

الدور والباقي .. على البسكوت اللي حتنحط فوقه الخلطة .. المضروبة


المقادير ...

اسطوانتين بسكوت ماري .. اللي ورقته حمرا ...

والزبدة .. ماني حافظة اسمها والله .. بس اللي ورقتها فضّي ..

احس الناس كلها تستخدم نفس الزبدة .. يعني اكيد الكل عارفها

المهم ...

تطحني البسكوت ...

وطبعا تسيحي الزبدة على النار ..

وتصبيها على البسكوت ...

كميّة الزبدة تكون اكثر من البسكوت بشوية ... عشان هي اللي حتمسّكه ببعضه ..

انا اول مرة سويت فيها هذا الحلى ... قالولي الكلام دا ..

رحت حطيت 43 حبة زبدة من اللي حجمها مرررررة صغير ..

عشان يمسك البسكوت

كل ما ازيد عشرة .. الاقي البسكوت لسه ناشف ..

ازيد كمان عشرة .. وهكزا وهكزا ...

وطبعا صار عندي .. كم هائل من الاوراق الزبدية .. <<< نسبة للزبدة .. :cool:

في النهاية جلسوا يعدّوا الورق

وطبعا يومها الحلى كان ... حلى زبدة اسمه .. مو حلى توفي ..

المهم ... نرجع لموضوعنا ...

اهم شي تكون الزبدة اكتر بشوييييييييية مرة من البسكوت ...

يعني لحد يسوي زيي ..

وبعدها المفروض انه ينحط في الفرن تقريبا 10 دقايق ..

بس انا عن نفسي اسويه من دون مااحطه في الفرن .. احسّه وهو سايح اطعم :cool:

وبعدها يوظع في الثلاجة ..

ويقدّم بارداً ...

وياحبزّا لو ترافقه قارورة باور هورس ... او كان .. مومشكلة ..

المهم باور هورس ... :cool:

...

وبالهناء والشفاء ...


[/ALIGN]