السلام عليكم
هااااااااااااع للجميع ..
تحيه طيبه وبعد ..
يوم الخميس .. 9/9/2004
صحيت من النوم الساعه 11 الصباح.
دخلت على المنتدى .. الساعه 8 مساءا ..
دخلت على لوحة التحكم ..
شفت المواضيع اللي فيها ..
وبعدين اخترت المواضيع الجديده..
وانا قاعد افتح في المواضيع اللي تشدني..
لقيت موضوع من أبو فهد بخصوص وفاة أخو نايف الله يرحمه ..
طبعا انا صعقني الخبر..
كلمت هايل وبلغته .. صعق هو ايضا ..
اتصلت بثامر وزادي واونكل ..
ثامر طبعا جواله مقفل كالعاده..
بعدين اتصلت على الحجز حق الخطوط ..
ويقلي الرد الالي "لو انك رجال القى موظف فاضي دحين " ..
والله طلعت المطار وحجزت على رحلة الساعه 4 صباح الجمعه ..
وقطعت البوردنج وكل شي..
يادوب رجعت البيت وكملت ابويه وامي عشان ابلغهم اني مسافر..
ونسقت مع ادرارا على اساس ينتظرني بالمطار..
المهم جهزت اغراضي والساعه 3 وانا في المطار..
وبسم الله سافرت للرياض ..
طبعا من حظي المنيل قعد جنبي واحد ..
شنبه واصل لسرّته ..
ونص كلامه مني فاهمه والله..
وانا ما اقول الا (ايوه ..صح .. اكيد .. الله يعين ..)
ماعندي غيرها ..
شكله لو قلي انته ابله بقوله ايوه .. صح .. اكيد .. الله يعين
شويتين .. ووصلنا..
الرجال قاعد يقلي كلام مني فاهم منه غير انه يحمد الله عالسلامه وانه يبغاني اتغدى عنده .. !!!!!
وانا مافي الا انواع الاعتذارات ..
المهم نزلت المطار ..
ادق على ادرارا جواله مقفل ..
افااااااا
طيب انا ما اعرف ولا شي في الرياض..
حتى اسم المكان اللي المفروض انزل فيه ما اعرفه..
يعني بالعربي.. زي الحجاج السيريلنكيه لمن يجو مكه ..
مافي 5 دقايق و اتصل ادرارا ..
وانا طبعا حسيت انه كنت غرقان وطلعت ..
يقلي والله جوالي هدا الـ .. والـ .. صار يقفل لوحده ..
(طول عمري اقول انه النوكيا زباله ) ..
عموما..
وصل المطار وطلعنا على القرموشي عشان نفطر..
رحنا فطرنا
طبعا ايش على فول..
يمين بالله لو في جده كان رميت الصحن في وجهه..
بس الحمدلله على النعمه ..
بعد الفطور طبعا جا وقت الشيشه ..
رحنا على بيت ادرارا اللي اصر انه اشيش عنده مو في القهوه
طبعا الله يعطيها العافيه ام عبد الملك ما قصرت ..
جاتوه .. شاهي .. عصير.. الخ
وادرارا كان مضياف الله يوسع عليه ..
بعد ماخلصنا يقلي الاخ الحلو ادرارا اني انام عنده ..
هيا كولو..
كملت ..
والله ثم والله ما قعدت ..
وبعد مفاقعات .. خرجنا على شقق مفروشه ..
وطبعا اتفرجو عالشقق الي وقفنا عندها ..
يا جماعه والله تسد النفس..
ومن شقه لشقه لين وصلنا على وحده نضييييييييييييييييييييفه ..
الحمدلله نزلت فيها وجلس ادرارا عندي ..
طبعا ايش الكارثه الكبرى ..
الان انا جيت بزيي الرسمي.. (جنز وتيشيرت)
وجبت معايه السروال الطويل والكفيه والعقال والغتره والدنيا كلها..
وايش نسيت ..
الثوب بكبره
يا ام البلشه ..
طبعا تطوع ادرارا الله يسلمه بثوبه ليه ..
طبعا طولي زي ادرارا (178 سم) تقريبا ..
قلنا كويس..
لبست الثوب طلع قصير
اكتشفت انه اكتفافي اعلى منه
لا وكمان طلع الكم شامر شويه عن الطبيعي ..
بس بشكل مو ملحوظ مره ..
النهايه
جف البحر شكله زي المدرسين المصريين لمن يلبسو ثوب
اتكل ابو عبدالملك الله يسلمه على بيته ..(الساعه 10.45 )
وجيت قلت ابغى اريح شويه لين الساعه 12 الظهر عشان بنصلي على اخو نايف في المسجد اللي جنب مقبرة النسيم ..
بس فجأه دق شي في دماغي..
واتذكرت انه انا في الرياض..
والرياض وقتها قبلنا في الصلاه ..
سألت موظف الاستقبال قلي الساعه 12 الا ربع تبدأ الخطبه
يا حلااااااااااوه
يعني لو نمت بروح فيها ..
يالله ياعمي كمل ..
طبعا لبست وخلصت وطلعت على المسجد ..
وكان في اسقبالي هناك ابو فهد ..
دخلنا صلينا ..
وبعد الصلاه صلينا على اخو نايف الله يرحمه وطلعنا على المقبره ..
شفنا كم جنازه بس ماكانت حقتنا ..
الين ما جات جنازة اخو نايف..
طبعا الله يكتبلنا الاجر..
بس فعلا نايف كان متأثر جدا جدا جدا..
وطبعا يا جماعه الخير الله يرحمنا برحمته ..
انا اول مره اشهد دفنه ..
الله يرحمنا برحمته ..
(ارجو التوقف هنا والدعاء بالرحمه لأخ نايف)
نستكمل..
ذهبت مع ابو فهد الى منزله ..
واتقهوينا ..
ثم قابلني اب فهد بعياله الله يحفظهم..
صراحه قمه في التمدن والاخلاق والكرم .. حفظهم الله..
ثم الحمد لله سنحت الفرصه وحضر علينا شخص احببته جدا..
هو الغالي (أبو الخنساء)
بالفعل سعدت بالتحدث اليه وجلسته ..
كان شخصا سموحا طيبا ترتاح عند محادثته ..
ولا يوجد عنده الحدود عند البعض بأني انا ملتزم وأنتم اناس عاديين ..
بالعكس..
كان جدا جدا حبوبا وصاحب حوار ونقاش ممتع ..
بارك الله فيه وجمعنا به في الفرودس..
انصرف ابو الخنساء حفظه الله حيث انه ابنته في المستشفى ..
(وقفه اخرى وأرجو الدعاء لابنة أبو الخنساء بالشفاء ان شاء الله )
نستكمل
ثم حضر الغذاء .. وبسم الله ..
بعد الغذاء كان المفترض انه وصول الأصيل للرياض..
وقيدي انا موصفله من بدري المكان اللي نزلت فيه ..
الجدير بالذكر هنا ان ابو فهد حفظه الله وجّب وعمل الواجب وزياده ..
وكان مضيافا رائعا حفظه الله.
المهم.
رحنا أنا وأبو فهد ناخدالاصيل من الشقه عشان نطلع للغالي ناصر..
وعشان انفك من ( وهج ) اللي كل شويه تتصل وتقلي هايل وصل ولا لأ .. وانتبه عليه ومدري ايه ..
وصلنا للأصيل والحمدلله كلم مرته وهج عشان افك من الصداع ..
اخذناه واتكلنا على الله ثم اتحركنا على المستشفى..
طبعا قابلنا اخونا ناصر..
والله ياجماعه الخير ماشاء الله ما شاء الله اصبح افضل بكثير من السابق..
ويسلم على اهل الدرر كلها ..
بقوله " الدرر كذا" ويرفع ابهامه..
الله يحفظه ان شاء الله ويتم شفاءه ..
(وقفه اخرى هنا للدعاء لأخينا ناصر بعجلة الشفاء التام)
نستكمل..
انضم الينا في المستشفى اخونا تركي (لاست هوب)
اتجهنا بعد هذا الى منزل نايف..
طبع اخذنا حوالي الساعه حتى نصل مع قرف الرياض..
يعني كبيره لدرجة القرف..
وصلنا وجلسنا مع نايف..
طبعا حكونا حكاية اخوه وكيف مات .. واسمه فهد
وسأقصها عليكم من لسان أحد اصدقائه اللي كان معه الى لحظة الوفاة: -
" كنا مع فهد نسير بالسياره ليلا فوق احد الجسور التي تصل مابين جبلين وتحتها وادي ، ثم وجدنا أمامنا حادث مروري خطير، فتوقفنا لعلنا نستيطع المساعده بأي شيء ، المهم نزل فهد ووجد احد المتعرضين للحادث يحتضر، فقال له قل (لا اله الا الله) .. وكررها عليه .. واخر ما سمعنا فهد يقوله لهذا الشخص قل لا اله الا الله ثم هوى من فتحه في الجسر لا تظهر مع الظلام الحالك الى اخر الوادي (ارتفاع 40 م تقريبا)"
يقول عم نايف : والله والله والله لم أر فهد احلى من المنظر الذي رأيته عليه بعد الغسل . كان جميلا جدا ..
يقول جف البحر: والله كانت الجنازه خفيفة جدا جدا..
الحمدلله ..
انتهينا .. بعدين خرجنا وخلصنا كم مشوار وبعدين رحنا للشقه ..
جانا ادرارا وجلس معانا انا وابو فهد وهايل..
وبعد شوي خلاص جاه وقت العوده للمطار ..
حيث ان اقلاع الرحله لجده الساعه 12 ليلا..
والحمدلله جلسنا في المطار مع ادرارا حتى دخلنا على الطائره ..
واالله لا يوريكم على الكبتن .. كان من جد ابله..
والله ما قد دخت زي كذا في عمري قد مادخت من الرحله دي..
الحمدلله وصلنا لجده ورجعت البيت عبل ما رفعت ودخلت انام (3 صباحا) وطبعا انا من يوم خرجت من البيت الى ان رجعنا كنت صاحي 40 ساعه
والحمدلله نمت الى الساعه 1 الظهر اليوم واهوه بكتبلكم الموضوع ..
طبعا رحله متعبه بس الحمدلله استفدت كتير منها
اسف على الاطاله واتمنى انكم استمتعتم ..
مع حووووووووووووبي،،