على ترابك( نزف قلم:محمد سنجر)
على ترابك
شربت الميه من نيلك
وعشت العمر اغنيلك
و لو هانسى
مواويلك
و لو ساعة
و لون نيلك
و لون خيرك
بيرجع قلبي من تاني
يغنيكي
بلون تاني
و الاقي نفسي متمرمغ
على ترابك
*****
على ترابك
أموت فيكي
فدا ترابك
و مات والدي
ف أكتوبر
فدا ترابك
رفع رايتك
رفع راسي
أيوه فاكرها
مش ناسي
ومات جدي
و هو بإيده بيحفر
يشق يا مصر
في قناتك
يشيل تبرك
على راسه
و لا رجعشي
و كان نفسه
يشوفني مرة و أنا بأمشي
على ترابك
*****
على ترابك
رسمتك قلب بيرفرف
و رحت و جيت
عشان أعرف
لو انتي غالية جوايا
هاروح و ارجع
و مش ها قدر
أسيبك لحظة و اتوجع
لإنك إنتي يا عمري
اللي بقيالي
ف قلب القلب من جوه
و راس مالي
و نفسي و عمري و عيالي
فدا ترابك
*****
السلام عليكم و رحمة الله و بركاته
في ترحالنا تمر الصور، تتسارع كأننا نعيش في الماضي ، و الحاضر ساعات نعيشها ، و بعد مرورها ،،، الوطن حليب شربناه من أمهاتنا ، الوطن أم ، بارك الله بكم يا ابن مصر الكنانة .
أخوكم عمر
