المساعد الشخصي الرقمي

مشاهدة النسخة كاملة : حنا يالسعوديين



صامت
25-03-2002, 05:19 PM
سلام

سأنقله لكم بالحرف كما وصلني ((قص ولزق)) خبركم مواضيعي القديمة


===========================



للدكتور. صعب بن محمد الزعيمر الشراري {عكاظ} 528

حنا السعوديين أكثر شعب في العالم يمتلك بترول . وحنا اللي تبرعنا لأغلب دول العالم . وحنا اللي إكتفينا من القمح وصدرناه للعالم . وحنا اللي أخذنا كأس أسيا ثلاث مرات . ووصلنا لكاس العالم ثلاث مرات . وحنا اللي هزمنا العراق في حرب الخليج . وحنا اللي فجرنا مركز التجارة والبنتاجون .

حنا السعوديين أول من طلع الفضاء من العرب . وحنا أكثر شعب في المنطقة وحنا أكثر شعب عنده ستالايت . وحنا اللي نمتلك قناة mbc وقناة art ... وحنا أكثر من يتصل على القنوات الفضائية ونلعب مع المذيعات الحلوات ونمزح معاهم .

حنا اللي أرسلنا أكثر المجاهدين لأفغانستان والبوسنة والشيشان . وحنا اللي ماأحد يغار على الدين مثلنا ، رغم إن أغلبنا مايصلي كل الفروض . وحنا اللي مافي شعب يضايق الكفار مثلنا . والتكفير عندنا مثل شرب الماء وألذ من العسل .

حنا السعوديين مافي أطيب وأكرم مننا . حنا اللي نرمي نصف أكلنا في الزبالة من زود الكرم . وحنا من تفوق على غيرنا في كبر الكروش والكسل .

حنا من أكثر شعوب العالم إستهلاكا للدخان والشيشة . وحنا اللي عندنا مدينة جدة رابع أكبر مدينة تلوث في العالم . وحنا اللي قضينا على الحياة البرية في السعودية من كثرالصيد والقنص. ثم رحنا على مصر والسودان نقضي على الباقي .

حنا أكثر من يطارد بنات العالم في الخارج . وحنا أكثر ناس في العالم ننفق على السياحة . وحنا اللي تبكي وتتحسف علينا بانكوك وبتايا من بعدها عنا .

حنا أكثر شعب في العالم عنده عمالة أجنبية . وأكثر الأشياء اللي نستخدمها من صنع غيرنا . ومانرضى نشتغل في المطاعم والمطابخ والمخابز والمغاسل . لأننا نشوفها أقل من مستوانا .

حنا اللي نحافظ على تقاليدنا حتى لو كانت غلط . وحنا اللي مانشوف أحسن من قبايلنا . ونشوف الأجانب أقل مننا . إلا من رحم ربي .

حنا اللي نشوف البنت مخلوق ناقص ومالها رأي . ماهي مسؤولة عن نفسها ، لكن مسؤولة عن أفعالها . ماتأكل في العزايم إلا من بقايا أكلنا . محجوزة عندنا في البيت مثل الغنم . ماتطلع إلا لزيارة الجارة أول للعمل . حتى زاد عليها الهم والغم . وحتى صارت في الوزن مثل الجمل . وبعد هذا نمنعها من ممارسة الرياضة لأن الرياضة بس للولد ..!!

حنا اللي الحرمة عندنا ماتكشف حجابها لنا وتكشفه للأجنبي . وحنا اللي نمنع الحرمة في المدينة من السواقه لأنها فتنة . حتى لو كانت قبيحة وغير مغرية . ونتركها تركب السيارة لوحدها مع السواق الأجنبي . رغم إن بنات البدو يسوقون السيارة في الصحراء من زمن . من دون خوف ولا وجل . ومن دون إعتراض الأهل .

حنا أول من إبتكر مطاردة البنات في الشوارع بالسيارات. وإذا شفنا بنت راكبة السيارة مع سواقها تجمعنا بسياراتنا حولها مثل الغنم . نبغا منها كلمة حتى لو تتفل في وجيهنا أو ترمينا بحجر.

حنا اللي عندنا أغلى المهور في العالم . ومانشوف ولا نعرف العروس إلا بعد الزفاف (شختك بختك) . وبسبب هذا ثلث الزيجات عندنا تنتهي بالطلاق ..!! .

رغم الحقيقة والألم ..

حنا السعوديين من أحسن المسلمين والعرب..!!

ورغم كل الحاسدين.. حنا السعوديين مافي مثلنا .. ولنا الفخر ..؟؟!!

ملاحظة : كل المعلومات الواردة في المقال صحيحه وعلى حسب الإحصائيات .
==========================

أيش رايكم !!!!!!!!!؟
صـــــــــــــــــامت

أرسطوالعرب
28-03-2002, 05:48 AM
سلام
الراي رايك...والشور شورك ..والعصمة في يدك :P

يا عمي مع إحترامي الشديد لحبيب قلبي الشراري...

إلا إن كلامه مبني على إفتراضات مع وخز في الجانب الأيسر للضمير نتج عنه تقبل إنشكاحي لنفسيتك المنهمكة في أكل السنكرز مما نتج عنه هذا الموضوع <===شوف أنا كاتب الكلام هذا لكن علي الطلاق ما أرجع أقراه مرة ثانية لو تطلع براسك نخلة ‍‍:D

بتقنعني إن الكابتن مر على سطول الزبالة - وإنتم بكرامة - وجلس يحسب كم كيلو طش البيت رقم واحد والبيت رقم إثنين

وبعد كذا دخل البيت وشاف كم كيلو أكلوا أهل البيت

ولا بتقنعني إنه نزل أسواق العالم وجلس يشوف كم واحد يرقم ‍!!!!

ولا بتقنعني إننا أول من طارد البنات بالسيارات ‍‍!!!!

شوف حبيب ألبي خلاصة الكلام

بلدنا فيها الخير وفيها الشر....والمتعوس يتلم على خايب الرجا

دائماً خلي نظرتك نظرة تفائلية يا صامت ....

لو بنجلس ونشتغل إحصاءات مستعد أكتب لك إحصائية تبكيك


إحصائية وأقشر عليها بصل ‍‍:D

وإسمها إنك بكيت ....وإنت فهيم يا جدو وبتفهمها

لسه الدنيا بخير يا حبيبي أغنية لمزعل كشطان أهديها لك مع عبيق الفجر الزعفراني <==== أول واحد تغزل بصباح الزعفران ...ياشيخ خل عني :p


---------

أنا بأنافس الجني........شوفني المرة ذي أنا اول من أعطاك وجه بموضوع لك ;)

---------


هـــــــــــــا تــــــضــــــــارب؟؟؟؟؟

aljenny
28-03-2002, 03:47 PM
وحنا إللي نعطي بطاقة الأحوال لكل من هب ودب

وحنا إللي يطلع عندنا من ظهر العالم فاسد


ولله الحمد والشكر على كل حال


ياصامت .. ياناقل .. وش دليلك .. أو دليله على صحة الملاحظه :

((ملاحظة : كل المعلومات الواردة في المقال صحيحه وعلى حسب الإحصائيات ))

أي معلومات وأي إحصائيات ؟؟!!

ما أشوف إلا دبش وعض وتبطر على النعمه

------------------------------

ثامر .. لاتستعجل .. قال صفّوا صفّين .. قالوا حنا أثنين !!

البندري...
28-03-2002, 05:52 PM
هلا والله بالصامت...

والله ماعاد عندي كلام اقوله بعد ....

اللي كتبه الاخ ثامر... والاخ الجني...

بس صدق حنا فينا الزين وفينا الشين...

وعلى فكرة بدأت عندنا صحوات دينية يعني زي من كثير بينحرفوا فيه الالالالاف استقاموا...

ولسا الدنيا بخير... دام فيها امثالك وامثال اعضاء الدرر اللي اكثر من روووووعة...

ويسلموووووووووو على هالموضوع...

اختك:
البندري...

صامت
28-03-2002, 10:25 PM
ارسطو .....وجع......قشر بصل لحالك .....


الجني...... البندري...اشكركم على المشاركة ...وانا مالي دخل زي ماجاني بالايميل ...كما اوضحت ولا ادري عن مدى صحة الكلام ...ولكن الحلو فيه التناقضات ............

اما من احصائياتي ....فهي كالتالي...


حنا البلد الوحيد في العالم اللي فيه مدارس مستأجره

وحنا البلد الوحيد في العالم ..اللي فيه مؤسسة التأمينات تأخذ ...اذا توظفت تأخذ منك ...واذا صرت عاطل ...ماكنهم يعرفونك ...

وحنا الشعب الوحيد في العالم اللي سفارتك ماتعرفك الا اذا ضيعت جوازك...

وحنا البلد الوحيد في العالم اللي جامعاتنا تفتح كليات خريجها مافيه أمل يجد عمل في بلده

وحنا البلد الوحيد في العالم اللي مانقدر نحاسب اي مسئول يخطيء حتى لوهو رئيس تعليم للبنات ....


وحنا البلد ..............لا هذي كبيرة شوي اروح في خرايطها .....


صــــــــــــــــــــامت

أرسطوالعرب
29-03-2002, 03:20 AM
سلام
إحترنا فيك يا صامت

بالأول تقول إحصائيات الشراري


والحين تقول إحصائياتك

إرسى على بر :p
---------

متخصص فقشات ...أقصد كفشات :D <====يالله إستلم يا الجني :p

---------

صامت
29-03-2002, 01:58 PM
ارسطوطو


الحمدلله حبيبي ....اللي يسمعك يقول ...كفشت ......

أنا قلت لك يامدعي الذكاء ...أن الموضوع منقول ..كما هو ....


بس في ردي الاخير ...اضفت احصائيات خاصة بي أنا .....وين التناقض ...ياأذكى واحد في المنتدى....بالله عليك فهمني ...لان ذكائي متوسط ولله الحمد



اخوك
صــــــــــــــامت